Ɛpacac 1

1Gena ‘ya Buuluc mena bornɛ Jwaŋa Tolan te yom ɛkɛ ɔci naŋŋɛ a cuuda Ciɛggɔn Yaccuy. ‘Ya kiew worga Ma Kiṭɔti maka ciyi ban Ɛpacacy. Gena maka jyek Yaccu tiiyɛyɔ ne pwadany. 2Dala Wey ikin Jwaŋa Tolan ɔci Ciɛggɔn ikin Yaccu Kiṭɔ, ɛkkɛn yomgɛn pwada a pwani ɛkkɛti, ɔci ɛkkɛ ‘wontɛ coodi pwanno. 3Dala ikin jieyin Jwaŋa Tolan Wey Ciɛggɔn ikin Yaccu Kiṭɔ acaan Kiṭɔ cuonnɛ ɛkɛ ikinti aŋka ɛkɛ noŋdi naŋka pwadin ikin yomgɔti, ɔci naŋka pwadin ñaalɔ ban Jwaŋa Tolanyɛ, oonɛ ɛkɛ ikinti waakɛnda. 4Te baaṭi ne noon warda aŋŋɛ Jwaŋa Tolan men bɛɛyɛ, Juaŋ ikin muonin bora doki. Ɛkɛ ikin muonin bora a ɔɔn te ‘woñgin ɛkɛ ikin ‘wonninti Yaccu Kiṭɔ te baaṭi doki agi ikin akcin maka ciyi budan te naŋka yaayan, ɔci agi ikin pwatcin ɛkɛ ñamɛtiy. 5Acaan ɛkɛ ani ikinyɛ, jiek naŋŋɛ ɛkɛ ñamu doki agi dala ikin akcin kɛɛgin ɛkɛ woodgɛn te naŋki Yaccu Kiṭɔ. Ɛkɛ jiek naŋŋɛ a ɔɔn te yom ɛkɛ parɛ, acaan ɛkɛ yomɛ bala ikinti. Jiek paŋŋɛ ɛkɛ te ñamu agi ikin akcin kɛɛgin ɛkɛ, ɔci acca ɛkɛ noŋjin a ɔɔn doki. 6Ɔci acaan a ɔŋŋiyɛ, ikin cuonnin ɛkɛ Kaci ɛkɛ Kacca ani ɛkɛy. Dala ikin jieyin Jwaŋa Tolan acaan ɛkɛ yomɛ pwanna a pwani ikinti te Yaccu Kiṭɔ. 7Ikin wannin ɛkɛ te yimg Yaccu Kiṭɔ, ɔci a ɔŋŋiyɛ, ikin bɔɔŋnin ɛkɛ acca doki te nɔji ikin. Yom pwani Juaŋ neeni tol tolo hay! 8Jwaŋa Tolan yomɛ pwanna a pwani ikinti awarɛ te naŋki ɛkɛ neeni. 9Ɔci acca ikin nɔɔnnin Juaŋ te ñing tɛɛn waakɛnda te jyeka naŋŋɛ ɛkɛ te Kiṭɔ te yom ɛkɛ te naŋka bɛya ne ŋoyɔ jyeka jitkɛn kuoliwi ma te baaṭiy. Yeti ɛkɛ jiek oonɛ bora ikinti acca doki. 10Jyeka naŋŋɛ Juaŋ yomɛti neeni gɔki agi ne oŋ gɛɛlti ba oŋŋa guagdɛ ɛkɛyɛ, ɛkɛ jiek ywaŋdɛ waakɛnda. Gena jyek waka bala iñɔ ṭɛɛrji, ɔci jyek waka bala ñaalɔ pɔliji. Ɔci ne ɛkɛ waak ywaŋdɛyɔ a ɔɔnyɛ, ɔci Kiṭɔ aga Ciɛggɔn waak waakɛnda. 11Ɔci moki kan Juaŋ gɔki agi ɛkɛ noŋji gengayɛ, ɛkɛ jyeka neeni daldɛ budan bɛɛ. Ɛkɛ noŋdi ba jyeka guagdi ɛkɛy. Gɔṭṭɛ, ɛkɛ ikin kɛnnin bora ba jyeka naŋŋɛ ɛkɛ te baaṭi aŋka ikin aktin ma ɛkɛ woodgɛn te ñoowin ikin, ñoonin iki Kiṭɔ ba naŋka ɛkɛ buagɛ naŋka ḍaaŋŋɛ ɛkɛ te ñamu dokiy. 12Ikin maka jyeti Kiṭɔti ñamu neeniyɛ, dala ikin jieyin Juaŋ te pwani ɛkɛ. 13Ɛkkɛ maka ciyi ban Ɛpacacyɛ, ɛkkɛ tieŋnɛ jyeka awarɛ neeni daŋkun. Jyeka wonkɛn jyeka pwadin neeniyɛ, gɔki agi Yaccu yaakinti yuoci ɛkkɛ. Ɛkkɛ jyettɛ Kiṭɔti, ɔci ɛkkɛ ‘wonnɛ Jwaŋa Tolan Boŋ ɛkɛ Boŋa guaŋŋɛ ɛkɛ agi ‘woñji may. Ɔci te Boŋ ɛkɛ neeniyɛ, ɛkkɛ lɛɛlnɛ Juaŋ bora a ɛkkɛ aŋŋɛ ma Jwaŋa Tolan doki. 14Te Boŋ Jwaŋa Tolan ikinti neeniyɛ, ŋeecin ikin ne oŋ gɛɛlti ikin ‘wontin Juaŋ waka pwadin ba jyeka guaŋŋɛ Juaŋ ikinti neeni, ɔci te Boŋ Jwaŋa Tolanyɛ, ŋeettin ikin a Juaŋ ikin wannin ɔci naŋŋin a ma ɛkɛ. Ɔci a ɔŋŋiyɛ, dala ikin jiettin ɛkɛ te pwani ɛkɛ neeni. 15’Ya tieŋŋan jyek ɛkkɛ doki agi ɛkkɛ jyetcɛ Yaccu Kiṭɔti, ɔci ɛkkɛ anjɛ Ma Kiṭɔ waakcinda. 16Ɔci a ɔŋŋiyɛ, ‘ya gɔk a pwatcin Juaŋti oŋkanda te ɛkkɛ. ‘Ya cɔk Juaŋti te ɛkkɛ oŋkanda. 17’Ya cɔk Jwaŋ Ciɛggɔn ikin Yaccu Kiṭɔti. Ɛkɛ a Wey ikin weya pwadan. Dala ɛkkɛ ‘wondɛ ɛkɛ Boŋ ɛkɛ Boŋa ɛkkɛ ‘wondɛ ñing tɛɛn ɔci ɛkkɛ laldɛ te Juaŋ aŋka ɛkkɛ Juaŋ ŋeeddɛ ne pwadan. 18Ɛkkɛ muonɛ Juaŋ bora, ɔci ɛkkɛ jyettɛ balgɛ kɛɛyɛ naŋki ɛkɛ naŋka bɛya ne baaṭiy. Ɔci ‘ya baal cɔk Juaŋti aŋka ɛkkɛ ‘wondɛ ɛkɛ ñing tɛɛno, aŋka jyeka neeni ŋeeddɛ ɛkkɛ ne pwadan yomgɔti. Ɔci ‘ya cɔk Juaŋti moki aŋka jyeka naŋŋɛ Juaŋ neeni ŋeeddɛ ɛkkɛ ne pwadan ne Juaŋ gɔki agi ɛkɛ Ma Kiṭɔ ‘woñji waak ba naŋki ma baan ne kɛɛgin ɛkkɛn ‘wontiti ɛkkɛn moldiny. Jwaŋa Tolanyɛ, ɛkɛ Ma Kiṭɔ ‘wondɛ waak ne pwadan. 19’Ya cɔk Juaŋti te ɛkkɛ aŋka dala ŋeeddɛ ɛkkɛ war tɛɛn Jwaŋa Tolan war tɛɛn ‘wonninti ikin neeniyɛ, ɛkɛ tol tolo. Ikin maka jyeti ɛkɛti neeniyɛ, ikin ‘wonnin ɛkɛ war tɛɛn ɛkɛ. 20War tɛɛn neeniyɛ, gena war tɛɛn Juaŋ Kiṭɔ luolnɛ ñaalɔ te koolji tɛɛti mokiy. Ɔci te oŋŋa wanna Kiṭɔ coonnɛ Juaŋ taaŋɛti taaŋŋa byerɔn ñaalɔ pɔliji. 21Ɔci waak waakɛnda waka bala acca ɔci waka bɛya ne baaṭiyɛ, ɛkkɛn bala Kiṭɔ bieŋɛti. Gena malɛɛkan, ɔci jɔkin ṭɔlgɛn, ɔci cyekin bala iñɔ ṭɛɛrji waakɛndayɛ, bala ɛkɛ bieŋɛti. 22Te naŋki Juaŋyɛ, waak waakɛnda bala byeŋ Kiṭɔti. Jiek waakɛnda a jyek Kiṭɔ. Ɔci Kiṭɔ naŋŋɛ Juaŋ aŋi Ciɛggɔn ma kaniica waakɛnda. 23Ɛkɛ a wyeñ ma kaniica, ɔci ma kaniica a war ɛkɛ. Ɔci a ɔŋŋiyɛ, genga bɔɔnjin Kiṭɔti moki bɛɛ. Ɔci waka aŋŋɛ Juaŋ ɔci noon wardayɛ, kuumi te ɛkɛ.

will be added

X\