Kuluci 4

1Kanŋa weyyɛn, dala ɛkkɛ noŋdɛ ne pwadan kɛɛnk ɛkkɛti. Naa ɛkkɛ ɛkkɛn amdɛji bɛɛ. Acaan ɛkkɛ daŋkun balkɛ Weya gɔṭi ɛkkɛ ñaalɔ daŋkun. 2Dala ɛkkɛ cɔktɛ Jwaŋa Tolanti oŋkanda ɔɔn. Ɔci ne ɛkkɛ cɔktɛyɛ, dala ɛkkɛ woŋgɔ tiittɛ te cɔŋi ɛkkɛ oŋkanda. Ɔci dala ɛkkɛ gɔktɛ a pwatcin ɛkɛti. 3Ɔci ne ɛkkɛ cɔktɛyɛ, dala ɛkkɛ cɔktɛ te ɔɔn daŋkun. Dala ɔɔn noŋdɔn Juaŋ pɔy aŋka ɔɔn mietɔn ma te jyeka pwadin. Gena jyek Kiṭɔ mena cuonnɛ Jwaŋa Tolan yuoci ma, jyeka bɛɛn bora acca neeni. A ɔŋŋiyɛ, dala ɛkkɛ cɔktɛ te ‘ya Buuluc acaan ‘ya baal ciginji te jyeka neeni. 4Dala ɛkkɛ cɔktɛ Jwaŋa Tolanti aŋka ‘ya jiek owwa bora ne pwadan mati ba bolja Jwaŋa Tolan buagɛy. 5Dala ɛkkɛ woŋgɔ tiittɛ te naŋki ɛkkɛ ɔci te jyek ɛkkɛ, ne ɛkkɛ balgɛ gɔwwɛ iki maka pookɛn maka ciyi budan te jyek Jwaŋa Tolany. Dala wɔɔkan ṭɔlgɛn yuardɛ ɛkkɛyɛ, oldɛ loṭi ɛkkɛ ma waakɛnda. 6Dala ɛkkɛ gɔktɛ maka neeniti te lɛmma pwadan oŋkanda. Naa ɛkkɛ gɔkɛ amaam budan bɛɛ. Dala ɛkkɛ poŋdɛ jiek ñamu oŋ ɛkkɛ oŋ ṭwoktɛ mati te jyeka tootti ɛkkɛn ɛkkɛti te Kiṭɔ neeni. 7Ɛkkɛ nɔɔttɛ Ticcikoc te jyek ‘ya waakɛnda. Ticcikoc neeniyɛ, ɛkɛ a mod ikin moda ana ‘yay. Ɛkɛ a mena tieci kanŋan waakɛn. Ɛkɛ bala kanŋin iki ‘ya a cyɛɛlɔ te kanŋa Jwaŋa Tolan. 8’Ya ɛkɛ cuoñña ɛkkɛti acaan ‘ya buaga dala ɛkkɛ myettɛ ɛkɛ te jyek ɔɔn aŋka dala ɛkkɛ yomgɔ tɛya te jyek ɛkɛ ɛkkɛti. 9Ɛkkɛn bɛya iki Ɔnɛɛcimac. Ɔnɛɛcimacyɛ, bala tieci kanŋan ɛkɛ waakɛn ‘yati daŋkun. Ɛkɛ a mod ikin acca, ‘ya an ɛkɛ. Ɛkɛ a maka ban ɛkkɛ. Maka neeni yaakkɛnyɛ, ɛkkɛn ɛkkɛ myettɛ te jyek ɔɔn waakɛnda. 10Mod ikin Erictaarkoc mena balgin iki ‘ya ciginji wɛnniyɛ, ɛkɛ ñiepi ɛkkɛ. Ɔci Mark ñaakan Barnabac ñiepi ɛkkɛ daŋkun. Ne ɛkɛ bɛɛdi ban ɛkkɛyɛ, dala ɛkkɛ ɛkɛ ñiibdɛ ne pwadan ba bolja ‘ya ɛkkɛ myennin te jyek ɛkɛ dokiy. 11Jicac mena bartan ma agi Jactac neeniyɛ, ɛkɛ ñiepi ɛkkɛ daŋkun. Maka ḍokkɛn neeniyɛ, ɛkkɛn a Ma Kiṭɔ maka a Ma Yahuud. Ɔci ɛkkɛn bala kanŋin iki ‘ya te jyek Jwaŋa Tolan. Ɛkkɛn ‘ya makka ne pwadan, ma ɔɔn Ma Yahuud maka pookɛn gɛɛg bala moki wɛnni bɛɛ. 12Ɛpaprac men ɛkkɛyɛ, ɛkɛ ñiepi ɛkkɛ ne tolan. Ɛkɛ a mena noŋi kanŋa Yaccu Kiṭɔ. Ɛkɛ bala cɔki Juaŋti te ɛkkɛ oŋkanda ne tolan agi dala ɛkkɛ yɔɔdjɛ ne tɛyan, ɔci agi dala ɛkkɛ jyek Juaŋ ŋeejjɛ ne pwadan, ɔci agi dala yomg ɛkkɛ bwagda naŋki yom Juaŋo. 13Naŋki ɛkɛ ŋeej ‘ya ne ɛkɛ baali kanŋi kanŋa Juaŋ ne tolan ɛkkɛti, ɔci ne ɛkɛ baali kanŋi maka pookɛnti daŋkuny. Gena Ma Kiṭɔ maka ban Lɛyoduciiya ɔci ban Yarɔɔpolic. 14Luuk mena a kiimi mena anin ikin, ɛkkɛn yaakkɛn i Dimacyɛ, ɛkkɛn ñiepi ɛkkɛ. 15Dala ɛkkɛ maka ban Lɛyoduciiya ñiibdɛ te ‘ya. Ɔci Nimpac ñiibdɛ te ‘ya daŋkun iki maka ḍwoṭi wyetkɛn on ɛkɛ te jyek Juaŋy. 16Ne ɛkkɛ ḍoodɛ te paŋi worga ‘yayɛ, dala ɛkɛ paktan ma kaniicati ban Lɛyoduciiya. Ɔci worga bɛɛn te ban Lɛyoduciiyayɛ, dala ɛkkɛ poktɛ ɛkɛ daŋkun. 17Ɔci gɔṭṭɛ, dala ɛkkɛ gɔktɛ Arkippocti agi dala ɛkɛ waŋɛ tiittɛ te kanŋa ɛkɛ kanŋa ɛkɛ ‘wonnɛ Kiṭɔy. 18Gena ‘ya Buuluc kiewan jwali ṭɔɔlɛ neeni ɛkkɛti te byeŋ ‘ya paru neeni, aŋka ‘ya ñiep ɛkkɛ. Naa ɛkkɛ ñingɔ yeya te ‘ya ciginji wɛnni bɛɛ, dala ɛkkɛ cɔktɛ te ‘ya! Dala Jwaŋa Tolan ɛkɛ yomɛ pwada a pwani ɛkkɛti.

will be added

X\