Kuluci 3

1Gɔṭṭɛ, dala yomg ɛkkɛ buagdɛ jyek waka bala ñaalɔ nona ciyi Kiṭɔy. Acaan ɛkkɛ jɔŋnɛ ñaalɔ iki Yaccu Kiṭɔ a cyɛɛlɔ. Ɛkɛ bala ciyi Jwaŋa Tolan taaŋɛti taaŋŋa byerɔn acaan ɛkɛ naŋŋɛ Juaŋ a Ciɛggɔn Tolan. 2Ɔci oŋkanda ɔɔnyɛ, dala ɛkkɛ poŋdɛ jyek waka bala ñaalɔ neeni. Naa ɛkkɛ poŋdɛ jyek naŋka naŋtan ma yeyin iñɔ wɛnni ṭɛɛrji bɛɛ. 3Acaan ɛkkɛ tuunɛ doki, ɔci tɛɛtin ɛkkɛ tɛɛtin Kiṭɔ neeniyɛ, bala Juaŋti. 4Kiṭɔ mena tɛɛtin ikin neeniyɛ, ne oŋŋa ɛkɛ bɛɛdi warɛ lɛɛldɛ borayɛ, ɔci ɛkkɛ daŋkun baldɛ ba ɛkɛ te pwani ɛkɛ ñaalɔ pɔliji. 5Yomg ɛkkɛ yomga te baaṭi neeniyɛ, dala nogdɛ tuwa baadi. Naŋki yoma te baaṭi neeniyɛ, gena tomi, ɔci wɛlji, ɔci yoma ulan, ɔci tomi maka ‘uayiti, ɔci bwakti naŋka yeyin neeni, ɔci war ḍiŋŋo, ɔci yom ḍɔŋ te waako. Mena buagɔn wak mena parɛ naŋki ɛkɛ bala ba mali jɔkin yeyin, waka pɔɔtan ma a pɔɔto. 6Naŋka yeyin neeniyɛ, etti ywobji Jwaŋa Tolan maka noŋi naŋka neeniti. 7Ne ɛkkɛ aŋŋɛ Ma Kiṭɔ men bɛɛyɛ, ɛkkɛ balgɛ ciyɛ ba coodda yaayan neeni ɔɔn. 8Yeti accayɛ, dala ɛkkɛ mwondɛ te loñko, ɔci kon cyɛñño, ɔci yom yoño, ɔci waaŋi maka pookɛn. Naa jyeka yeyin bala ɛkkɛ tuggɔti bɛɛ. 9Naa ɛkkɛ joommɛ yɔtin pookɔ bɛɛ. Naa ɛkkɛ noŋɛ waka neeni moki bɛɛ, acaan ɛkkɛ yoma te baaṭi neeni olnɛ ɔntɔ iki naŋki ɛkɛ ɔɔn. 10Ɔci acaan ɛkkɛ ‘wonnɛ Jwaŋa Tolan yoma woonɛ, ɔci yoma woonɛ neeni ciɛñ a ciɛñi gɔ moki ciɛñji ñamu ɔɔn ne ɛkɛ Juaŋ ŋeeddɛ ne pwadan ɔɔn. Yoma neeni warɛ agdɛ aga ba mena oki ɛkiy. 11Kan yoma woonɛ neeni bala ɛkkɛtiyɛ, ɛkkɛ menga yaakinti gɔkti moki agi Keedin Pookɛn aŋka pwadgɔ, walla Ma Yahuud pwadgɔ bɛɛ. Ɔci walla menga gɔkti agi maka balki jyek ŋwoti ɔci bɔɔrk aŋka pwadgɔ bɛɛ. Ɔci walla menga gɔkti agi maka ani ṭwaŋ oŋ aŋi Ma Kiṭɔ neeni, ɔci walla agi maka kɛɛnk aŋka pwadgɔ bɛɛ. Acaan Kiṭɔ bala ikinti waakida. Ɔci Ma Kiṭɔ ɛkkɛn bala bolja ne cyɛɛlɔ waakɛnda. Yeti Kiṭɔ aŋka bala ñamu ne tolan te waak waakɛnda. 12Ɛkkɛ muonɛ Juaŋ bora aŋŋɛ ma ɛkɛ maka anɛ ɛkiy. Ɔci acaan a ɔŋŋiyɛ, dala ɛkkɛ yomgɔ bala mati. Ɔci dala ɛkkɛ noŋdɛ ne pwadan mati. Ɔci naa ɛkkɛ noŋɛ waakɔ bɛɛ. Dala ɛkkɛ tuggɔ luucin. Dala ɛkkɛ loomgɔ tɛɛcin. Dala ɛkkɛ bɔyyɛ yɔtin pookɔ. Kan men gɛɛl ɛkkɛti balki jwali gɛɛl te naŋki mena parɛyɛ, dala ɛkɛ mena parɛ neeni bɔɔktɛ. Bala ba ne ɛkkɛ bɔɔŋnɛ Ciɛggɔn ɛkkɛyɛ, dala ɛkkɛ maka pookɛn neeni bɔɔktɛ daŋkun. 14Jwali gɛɛl bala ñamu agi dala ɛkkɛ oonji yɔtin pookɔ. Ɔci te jyek oonnin ɛkkɛ oonni yɔtin neeniyɛ, ɛkkɛ yaakɛti coodɛ a cyɛɛlɔ ne pwadan oŋkanda ɔɔn. 15Dala coodi pwani bɛya te Kiṭɔti neeni aga ba ciɛggɔn ɛkkɛ yomgɔti. Ɛkkɛ muonɛ Juaŋ bora aŋka ɛkkɛ agdɛ maka ne cyɛɛlɔ, ɔci Jwaŋa Tolan buagɔn dala ɛkkɛ ciedɛ te coodi pwani waakida. Ɔci dala ɛkkɛ gɔkɛ Juaŋti a pwatcin oŋkanda. 16Dala jyek Kiṭɔ bala ɛkkɛ yomgɔti ne pwadan oŋkanda ɔɔn. Dala ɛkkɛ loordɛ yɔtin pookɔ te jyek ɛkɛ. Ɔci moki dala ɛkkɛ ṭeewɛ yɔtin pookɔ te ñing tɛɛno. Dala ɛkkɛ ‘ualdɛ Jwaŋa Tolanti, ɔci dala ɛkkɛ jieddɛ ɛkɛ te jyek ɔɔlgo, ɔci dala ɛkkɛ ‘ualdɛ ɔɔlga loṭi Boŋ Jwaŋa Tolan may. Ɔci gɔktɛ a pwatcin Juaŋti te yoma awarɛ. 17Kan ɛkkɛ noŋdɛ gengayɛ, dala ɛkkɛ noŋdɛ te yenti Ciɛggɔn ikin Yaccu. Ɔci moki kan ɛkkɛ gɔktɛ gengayɛ, dala ɛkkɛ gɔktɛ te yenti Ciɛggɔn ikin Yaccu. Ɔci dala ɛkkɛ gɔkɛ a pwatcin te yenti Yaccu Wey ikin Jwaŋa Tolanti. 18Moongo, dala ɛkkɛ tieŋdɛ jyek ‘uay ɛkkɛ. A ɔɔn pwatcin Ciɛggɔnti. 19’Uayo, dala ɛkkɛ andɛ moong ɛkkɛ. Naa ɛkkɛ gɔkɛ ɛkkɛn ɔɔrndɛ a ɔɔrŋin bɛɛ. 20Kɛɛgin, dala ɛkkɛ noŋdɛ ba jyek mɛyyɔ ɔci ba jyek weyyɔ. A ɔɔn pwatcin Ciɛggɔnti. 21Kɛɛgin weyyɛn ɔci mɛyyɛn, naa ɛkkɛ gɔkɛ ‘yeṭɛ kɛɛginti a ñaccu ɔɔn nɔñji bɛɛ. Kɛɛgin yomgɛn tuwa dita. 22Hay, maka kɛɛnko! Dala ɛkkɛ noŋdɛ ba jyek kanŋa weyyɛn iñɔ wɛnni ṭɛɛrji oŋkanda. Naa ɛkkɛ noŋɛ kanŋa ne pwadan te kanŋa weyyɛn ñingɛnti budan aŋka ɛkkɛn gɔkti agi ɛkkɛ pwadjɛ bɛɛ. Dala ɛkkɛ kandɛ te yoma awarɛ, ɔci buattɛ Jwaŋa Tolan. 23Ne ɛkkɛ balgɛ noŋɛ kanŋa neeniyɛ, dala ɛkkɛ noŋɛ te yoma awarɛ, ɔci poŋdɛ kanŋa neeni a kanŋa Kiṭɔ. Gena kanŋa ma baan budan bɛɛ. 24Dala ŋeeddɛ ɛkkɛ gena Ciɛggɔn ikin ɛkkɛ ‘wondɛ gena ma ḍuaññɛ ɛkɛ neeni ne baaṭi te kanŋa ɛkkɛ neeni, acaan kanŋa weegɛn waanɛyɛ, gena Ciɛggɔn ikin Yaccu Kiṭɔ. 25Kan men gɛɛl noŋi ne yaayan, kan ɛkɛ a mena ḍiɛran walla kan ɛkɛ a mena daanyɛ, Jwaŋa Tolan jiek oldɛ ɛkɛ wyeñɛti ɔɔn.

will be added

X\