Kuluci 2

1Dala ŋeeddɛ ɛkkɛ ‘ya baal kanŋ te ɛkkɛ ne tolan, ɔci te Ma Kiṭɔ maka ban Lɛyoduciiya daŋkun. Ɔci ‘ya baal kanŋ moki te Ma Kiṭɔ maka yuarŋ ‘ya te woŋgu ‘ya men bɛɛy. 2’Ya buaga dala ɛkkɛ ciedɛ te yoma ñɔyan oŋkanda, ɔci dala ɛkkɛ oondi yɔtin pookɔ. Ɔci dala ɛkkɛ jyek Juaŋ ŋeeddɛ ne pwadan, ɔci jyeka naŋŋɛ Jwaŋa Tolan te baaṭi jitkɛn a coggin neeni ŋeeddɛ ne pwadan, jyeka neeniyɛ, gena Kiṭɔ waanɛ. 3Jyek ñing tɛɛn bɛɛn te ɛkɛti, ɔci ɛkɛ a mena jiek ŋeejɛ waakɛnda. 4’Ya ɛkkɛ myennin a ɔɔn aŋka naa ma gɛɛg ɛkkɛ maaltɛ ɛkkɛn ɔntɔ te lɛmma milan bɛɛ. 5Ne ‘ya baawa ɛkkɛti te war ‘ya waanɛ jiñɛyɛ, ‘ya baal ba ne ikin balkin iki ‘ya a cyɛɛlɔ te booŋ no. Ɔci ‘ya yomu ñɔɔna ñɔɔn te yɔɔdda ɛkkɛ yɔɔnnɛ ne tɛyan te jyenna ɛkkɛ jyettɛ Kiṭɔti neeni. 6Ɛkkɛ jyettɛ Yaccu muŋŋɛ yomgɔti doki aŋi Ciɛggɔn ɛkkɛ, a ɔɔnyɛ, dala ɛkkɛ ciedɛ ne pwadan ɛkɛti oŋkanda ɔɔn. 7Dala ɛkkɛ yɔɔddɛ ne tɛyan te jyek Yaccu Kiṭɔ ba jana bɛɛkkɛ ati iñɔ ne pwadan. Ɔci dala ɛkkɛ ‘uottɛ ñamu te jyek ɛkɛ. Dala jyeni ɛkkɛ tɛya gɔ moki tɛyi ɔɔn te jyek ɛkɛ, ba naŋka ɛkkɛ lallɛ Ɛpaprac te ñamu wanna ɔɔn. Ɔci dala ɛkkɛ gɔkɛ a pwatcin Juaŋti oŋkanda te jyeka neeni. 8Dala ɛkkɛ woŋgɔ tiittɛ, naa ɛkkɛ jyɛttɛ ɔntɔ maka loṭi ma te Jwaŋa Tolan amaam te jyeka pookɛn neeni bɛɛ. Jyeka lorki ɛkkɛn ma neeni a jyek naŋki ma baan ṭɛɛr wyeñɛti wɛnni budan. Dala ɛkkɛ woŋgɔ tiittɛ acaan jyeka neeni bɛɛn te Kiṭɔti bɛɛ, ɛkkɛn pɛɛdan i jyek Kiṭɔ. 9Juaŋ warɛ lɛɛlnɛ bora warda ikinti te lali Kiṭɔ oŋŋa ɛkɛ aŋŋi men baan, ɔci baali ciyin iki ikin ba men baany. 10Ɔci acaan ɛkkɛ agɛ Ma Kiṭɔ dokiyɛ, ɛkkɛ balkɛ coodda pwadin waakɛnda. Gɔṭṭɛ, Kiṭɔyɛ, ɛkɛ a Ciɛggɔn jɔkin waakɛnda, ɔci moki ɛkɛ a Ciɛggɔn ḍuaŋan waakɛnda. 11Ɛkkɛ maka bala Yaccutiyɛ, ɛkkɛ balkɛ jyek ŋwoti daŋkun. Yeti jyek ŋwotta neeniyɛ, gena naŋka naŋtan ma te byeŋkɛn bɛɛ. Gena naŋka naŋdɛ Kiṭɔ ma yomgɛnti, ɔci naŋka neeni aŋka yɔmjin acaan yomg ɛkkɛ yomga te baaṭi neeniyɛ, eññɛ ɛkɛ ɔntɔ doki. 12Ɔci ba jyek bulti ɛkkɛyɛ, bala ba jyek lyen ɛkkɛ daŋkun. Lyen Yaccu aŋi ba lyen ɛkkɛ, ɔci jɔŋŋin ɛkɛ jɔŋni ñaalɔyɛ, aŋi ba jɔŋŋin ɛkkɛ daŋkun. Naŋka neeni bala ɛkkɛti acaan ɛkkɛ jyettɛ Jwaŋa Tolanti. Te jyenna ɛkkɛ jyettɛ Juaŋti neeniyɛ, ŋeejɛ ɛkkɛ war tɛɛn ɛkɛ tolla tollo. Yaccu luolnɛ ɛkɛ ñaalɔ te war tɛɛn ɛkɛ. 13Te ñamu ɛkkɛ balgɛ ba maka tuutan te nɔji ɛkkɛ. Ɔci yomga yeyin eññɛ Kiṭɔ men bɛɛ. Yeti acca ɛkkɛ unnɛ iki Kiṭɔ a cyɛɛlɔ te naŋki Jwaŋa Tolan ɛkkɛti. Ikin bɔɔŋnin ɛkɛ te nɔji ikin waakɛnda. 14Ikin noŋŋin nɔji waakida, ɔci jiek dɔɔkkin ikin wyetkɔti te nɔjja neeni, ɔci yeti jyeka neeni nuunnɛ ɔntɔ Juaŋ te ikinti te oŋŋa Yaccu tuuni ñaalɔ kakantiy. 15Ɔci te oŋŋa wannati ɔɔn daŋkunyɛ, Jwaŋa Tolan Jwaŋa Yaayan buannɛ i ma ɛkɛ. Gɔṭṭɛ, Jwaŋa Tolan oŋ warɛ jaaññɛ bala lɔti ɛkkɛn te wyeng ba kɛɛnka kwayɛ ma te nona loonan. Ɛkɛ bala lɔti ɛkkɛn malɛɛkan ñomgɛnti. 16A ɔŋŋiyɛ, ‘ya gɔkka ɛkkɛti, ne ɛkkɛ tiecɛ waka neeni waakɛn bɛɛyɛ, naa menga wooki ɛkkɛ te naŋki ɛkkɛ wanna bɛɛ. Waka neeni gena waka tiitanyɔ Ma Yahuudy, ɔci waka neeniyɛ, gena ami oomdin gɛɛg ɔci waka maattan ma gɛɛg, ɔci iidn Ma Yahuud, ɔci iid paan waŋɛ oŋkanda, ɔci Oŋ Cabit. Naa menga wooki ɛkkɛ te waka neeni bɛɛ. 17Naŋki tiit ninka neeniyɛ, bala ba ṭiebji naŋka bɛyay. Ɔci naŋka bɛya neeniyɛ, gena Kiṭɔ. Jyek ɛkɛ aŋka awarɛ, dala tiitinyɔ. 18Naa ɛkkɛ jyɛttɛ ma ɔntɔ te malla awarɛti neeni bɛɛ, acaan ma gɛɛg poŋi gɔki agi waka yuarɛ ɛkkɛn te loggin neeniyɛ, a jyeka awarɛ. A ɔŋŋiyɛ, maka neeni buagɔn ɛkkɛ waakɔ dɔɔdɛ iñɔ, ɔci ɛkkɛ mortɛ malɛɛkanti. Ɔci ɛkkɛn bala poŋi amaam budan, ɔci ɛkkɛn yomgɛn ḍwaŋgin. 19Ɔci ɛkkɛn kɛpcin ɔntɔ yookɔn te jyek Kiṭɔ wyeñ kaniica. Ma kaniica aga maka ne cyɛɛlɔ te wyeñ ɛkkɛn neeni. Ɔci ɛkkɛn ‘uotti ñamu, ɔci kaniica naŋdɛ Jwaŋa Tolan tɛya te Kiṭɔ. 20Ɔci gɔṭṭɛ, naa ɛkkɛ ciyɛ ba ne ɛkkɛ agɛ kɛɛgin iñɔ baanji ṭɛɛrji wɛnni moki bɛɛ. Ɔci naa ɛkkɛ tyeŋɛ jyeka naŋtan ma iñɔ ṭɛɛrji baanji moki bɛɛ. Acaan te oŋŋa ɛkkɛ tuunɛ iki Kiṭɔyɛ, paŋŋa bala iñɔ ṭɛɛrji, ɛkɛ a paŋi ɛkkɛ moki bɛɛ. Maka iñɔ wɛnni ɛkkɛn gɔki agi, 21“Naa i gena neeni luolla ñaalɔ bɛɛ.” Ɔci moki agi, “Naa i topci gena neeniti bɛɛ.” Ɔci moki agi, “Naa i dɛcca gena neeni bɛɛ.” Naa ɛkkɛ tieŋdɛ jyek ɛkkɛn neeni bɛɛ. 22Naa ɛkkɛ tieŋdɛ jyeka dɛɛki Ma Yahuud te naŋki waka coŋin wanna bɛɛ. Acaan waka neeni ɛkkɛn a waka baadi lakun budan ne ikin noŋin ɛkkɛny. Ɔci naa ɛkkɛ tieŋdɛ jiek ṭɔlgɛn naŋɛ ɛkkɛn te waka neen neeni bɛɛ, acaan ɛkkɛn ‘wonnɛ Juaŋ jyeka neeni bɛɛ. Yeti jyeka neeni naŋɛ ɛkkɛn pookɛn a jyek ma baan budan. 23Ɔci naa ɛkkɛ tieŋdɛ jyek ɛkkɛn wanna bɛɛ, acaan jyeka wanna ma naŋtan noŋdi nɔji ba naŋka yomg ɛkkɛn yomga yeyin wanna buagɛ men ɔɔn, ɔci moki ba bolja ɛkkɛn balki poŋki agi ma ñingɛn tɛyɔ te naŋki jyeka neeni ɔɔn. Ɛkkɛn poŋi ‘wota gɔkɛ agi kan ɛkkɛn waakɛn dɔɔdinti iñɔ Jwaŋa Tolan ñamdanti, ɔci moki agi kan ɛkkɛn waakɛn jyebdinti jitin te nɔji ɛkkɛn, ɔci agi kan ɛkkɛn mortɛnti Juaŋti ba naŋki ma ɛkkɛnyɛ, agi a ɔɔn ɛkkɛn ñingɛn tɛyɔ katan.

will be added

X\