Kuluci 1

1Gena ‘ya Buuluc, cuuda Yaccu Kiṭɔ te yom Jwaŋa Tolan, ɔci mod ikin Timutawuc, kienɔn worga ɛkkɛti neeni. 2Ɛkkɛ agɛ modg ɔɔn Ma Kiṭɔ maka ban Kuluci, maka pwadin maka jyettɛ Kiṭɔtiy. Dala Jwaŋa Tolan Wey ikin yomɛ pwada a pwani ɛkkɛti, ɔci dala ɛkɛ ɛkkɛ ‘wondɛ coodda pwadan. 3Oŋkandayɛ, ɔɔn gɔkin a pwatcin ne ɔɔn cɔkɔn Jwaŋa Tolan Wey Ciɛggɔn ikin Yaccu Kiṭɔti te ɛkkɛy. 4Acaan ɔɔn tieŋnɔn jiek te jyenna ɛkkɛ jyettɛ Yaccu Kiṭɔti, ɔci te jyek anna ɛkkɛ anɛ Ma Kiṭɔ waakɛnday. 5Jyek jyeni ɔci jyek ani neeniyɛ, bala ɛkkɛti acaan ɛkkɛ jyettɛ balgɛ kɛɛyɛ te coodda ne baaṭi coodda ciedɛ ɛkkɛ ñaalɔy. Paŋŋa neeni bɛɛn ɛkkɛti te oŋŋa ɛkkɛ tieŋnɛ jyeka wonkɛn jyeka pwadin jyeka awarɛy. 6Jyeka wonkɛn jyeka pwadin neeni bɛɛn mati ṭɛɛr konɛ warda, ɔci bala eci naŋka pwadin ma yomgɛnti Ɔci jyeka neeni bala ciɛñ a ciɛñi gɔ moki ciɛñcin ñamu ɔɔn. Te oŋŋa ɛkkɛ tieŋnɛ, ɔci ne acca ɔɔnyɛ, jyeka neeni bala etti naŋka pwadin oŋkanda ɛkkɛti. Acaan ɛkkɛ mwokɛ yom pwani Jwaŋa Tolan ɛkkɛti. 7Ɛkkɛ tieŋnɛ jyeka neeni te Epapracti. Ɛkɛ a kɛɛngɔn Kiṭɔ ba ikin ɔɔn. Ikin anin ɛkɛ. Ɛkɛ bala noŋi ba jyek Kiṭɔ ɔci loṭi ɛkkɛ ne pwadan aŋka ɛkɛ moki ‘ya. 8Ɔci ɔɔn nɔɔnnɔn ɛkɛ te naŋki Boŋ Jwaŋa Tolan ɛkkɛ yomgɔti agi ɛkkɛ anjɛ ma ne tolan. 9Ɔci acaan a ɔŋŋiyɛ, ɔɔn balgɔn cɔkɔn Jwaŋa Tolanti te ɛkkɛ oŋkanda te oŋŋa ɔɔn tieŋnɔn jyek ɛkkɛ neeni, ɔci ne acca ɔɔn. Ɔɔn balgɔn cɔkɔn Juaŋti ka dala ɛkkɛ ‘wondɛ ɛkɛ ñing tɛɛn ɛkɛ aŋka ɛkkɛ jyeka loṭi Boŋ Jwaŋa Tolan ŋeeddɛ, ɔci aŋka dala ɛkkɛ yom Juaŋ ŋeeddɛ ne pwadan. 10Ɔɔn balgɔn cɔkɔn Juaŋti a ɔɔn aŋka dala ɛkkɛ ciedɛ ba coodi ɛkɛ. Ɔci a ɔɔnyɛ, coodi ɛkkɛ pwada Juaŋti. Ɔɔn cɔkɔn Juaŋti ka dala kanŋa kandɛ ɛkkɛ waakɛnda neeniyɛ, etti naŋka pwadan. Ɔci ɔɔn cɔkɔn Juaŋti moki ka dala Juaŋ ŋeeddɛ ɛkkɛ ne pwadan gɔ moki ŋeejjɛ ɔɔn te naŋki ɛkɛ, ɔci te yom pwani ɛkɛ. 11Dala ɛkkɛ ‘wondɛ Juaŋ war tɛɛn ɛkɛ war tɛɛn tolan neeni aŋka dala ɛkkɛ yomgɔ tiektɛ ne pwadan aŋka ne jwali gɛɛl bɛɛdi ɛkkɛtiyɛ, ɔci ɛkkɛ yaakɛti yɔɔdɛ ne tɛyan te yom pwani Jwaŋa Tolan, ɔci ma jieddi Juaŋ te naŋki ɛkkɛ neeni. 12Ɔci te naŋki ɛkɛ neeniyɛ, dala ɛkkɛ gɔktɛ a pwatcin Wey ikinti oŋkanda, acaan ɛkkɛ muonɛ ɛkɛ bora naŋŋɛ ɛkɛ a maka ciyi te nona bɔwan. 13Te ñamu ikin agin ma ciɛggɔn nona mielo, yeti ikin wɛɛnin Jwaŋa Tolan bora, ɔci eññin ḍuannin non Kaci ɛkɛ, Kacca ondɛ ɛkɛ aŋka tieŋtin gena jyek ɛkɛ parɛ. 14Ikin wannin Kaci ɛkɛ, ɔci ikin bɔɔŋnin ɛkɛ te nɔji ikin. 15Jwaŋa Tolanyɛ, ɛkɛ yuarɛ ma te woŋgɛn bɛɛ. Yeti Kiṭɔyɛ, ɛkɛ a Jwaŋa Tolan waanɛ, ɔci ɛkɛ warɛ aaŋŋɛ aŋi men baan aŋka ɛkɛ yuarkiti ma ne pwadan neeni. Kiṭɔ ɛkɛ a Ciɛggɔn waka cɔnnɛ Juaŋ neeni waakɛnda. 16Waak cɔnnɛ Juaŋ te Kiṭɔ waakɛnda waka ṭɛɛrji yuartin ikin te woŋgɔ, ɔci waka ñaalɔ pɔliji waka yuartin ikin te woŋgɔ bɛɛ, ɔci jɔkin waakɛnda ɛkkin ḍwaŋin i ɛkkin ḍyɛrin. Ɛkkɛn bɛɛn te Kiṭɔ aŋka ɛkɛ jiɛtan ma te waak waakɛnda. 17Ne waak waakɛnda baaki menyɛ, ɛkɛ doki bala. Waak waakɛnda bala te nonk ɛkkɛnti te war tɛɛn ɛkɛ. 18Kiṭɔyɛ, ɛkɛ a ḍuaŋa acaan ɛkɛ a wyeñ ma kaniican. Ma kaniican ɛkkɛn ciyi tɛɛti te Yaccu Kiṭɔ, ɔci ɛkkɛn a war ɛkɛ. Gena ɛkɛ a mena bɔɔni lien te ñamu aŋka jyek ɛkɛ balki ñamu te jyek waka pookɛn waakɛnda neeni. 19Te yom Jwaŋa Tolanyɛ, Kiṭɔ bolji Jwaŋa Tolan lɛɛlnɛ bora warda. 20Ɔci moki te yom Jwaŋa Tolan te naŋki Kiṭɔ te oŋŋa yimg ɛkɛ kɛɛki iñɔyɛ, Juaŋ ŋeewin i ma baan doki, ɔci ŋeewin i waka bala iñɔ ṭɛɛrji wɛnni, ɔci ŋeewin i waka bala ñaalɔ pɔliji moki. 21Ɔci ɛkkɛ, te ñamuyɛ, ɛkkɛ balgɛ ɔntɔ te Jwaŋa Tolanti, ɔci paŋi ɛkkɛ da bala ɔntɔ pookɔ moki. Ɛkkɛ yookɛ te Jwaŋa Tolan, ɔci naŋki ɛkkɛ moki yeyɔ. 22Yeti acca ɛkkɛ ŋeenɛ i Jwaŋa Tolan doki te lyena tuuni Kiṭɔ kakanti neeni. Yaccu tuun te ɛkkɛ aŋka ɛkkɛ agdɛ maka pwadin ne tolan Jwaŋa Tolan ñamɛti. 23Ɔci acaan a ɔŋŋiyɛ, ɛkɛ buagɔn dala ɛkkɛ yɔɔddɛ ne tɛyan oŋkanda te jyenna ɛkkɛ jyettɛ Jwaŋa Tolanti neeni. Ɔci ɛkɛ buagɔn naa yɔɔta ɛkkɛ yɔɔññɛ Juaŋ neeni daldɛ bɛɛ. Ɛkkɛ tieŋnɛ jyeka wonkɛn jyeka pwadin neeni doki. Ɔci jyeka wonkɛn jyeka pwadin neeni ati ṭɛɛr konɛ warda. Ɔci ‘ya Buuluc neeniyɛ, ‘ya a mena noŋi kanŋa jyeka neeni. 24Ne ‘ya balkati taab te ɛkkɛ ɔɔnyɛ, ‘ya yomu ñɔy ñɔy men ɔɔn acaan taab ‘ya neeni etti pwani ɛkkɛti. Taab ‘ya neeniyɛ, bala ba taab Yaccu. Taab bala ɛkɛti te ma kaniica ɛkɛ. Ɔci ‘ya daŋkun taabba aŋka ma kaniica magdi ne coŋɔn. 25Juaŋ ‘ya naŋŋa a mena noŋi kanŋa ma kaniicati, ɔci ‘ya naŋŋa Juaŋ a cuuda noŋ kanŋa ɛkkɛti. Ɛkɛ buagɔn dala ‘ya ɛkkɛ myettin te jyek ɛkɛ waakɛnda. 26’Ya cuonna ɛkɛ aŋka ‘ya ɛkkɛ myettin te jyeka naŋŋɛ Juaŋ te baaṭi jitkɛn a coggin matiy. Jyeka neeni lɛɛlnɛ ɛkɛ bora acca. Ɛkɛ buagɔn ‘ya ɛkkɛ myettin te ɛkkɛn ne pwadan. Ɛkɛ Keedin Pookɛn yɔɔññɛ te baaṭi te yuonga ati coŋin waayi bɛɛ. Yeti acca ɛkɛ buagɔn dala ma ɛkɛ waakɛnda jwalla neeni ŋeettan. 27Ɛkkɛ Keedin Pookɛnyɛ, jyeka coggin neeni oonɛ Juaŋ bora ɛkkɛti aŋka ŋeeddɛ ɛkkɛ jyeka neeni pwadɔ ne tolan. Jyeka bɛɛn bora neeniyɛ, gena Kiṭɔ mena bala ɛkkɛ yomgɛti neeni. A ɔŋŋi ɛkkɛ yaakɛti ciyɛ kɛɛyɛ oŋkanda ɔɔn, aŋka ɛkkɛ kaattɛ ban Jwaŋa Tolan. 28Ɔɔn moki balgɔn mietɔn ma oŋkanda te jyek ɛkɛ. Ɔɔn balgɔn ṭeyɔn ma waakɛnda, ɔci ɔɔn balgɔn loṭɔn ma waakɛnda te jiek acaan ɔɔn buagɔn dala ɛkkɛn oodɔn Jwaŋa Tolan ñamɛti pwadgin a pwadgin. 29’Ya kanŋ ne pɛñan waru byerŋa byerŋ te kanŋa te war tɛɛn ɛkɛ ‘ya yomuti.

will be added

X\