Naŋki Cuudan 9

1Caawul ɛkɛ bala ‘yeṭi nooŋi Ma Kiṭɔ men. Ɔci ɛkɛ ati tooccin gaciic tolan ma Icrayiilti, 2acaan ɛkɛ buagɔn worgan eedɛ maka ḍwaŋinti oorga morki ma Juaŋti ban Ḍimaacka, acaan ɛkɛ buagɔn ooddi lieṭi maka a Ma Pɔy maka ‘uay ɔci maka moong mwogdɛ ɔci ḍɛgdɛ, ɔci eedɛ dwagdɛ ban Urcaliim byeŋkɛn a ḍɛɛggin ɔɔn. 3Ɔci ɛkɛ atti. Ɔci ne ɛkɛ noŋi dɛndi ban Ḍimaackayɛ, noon dɛkkin ɛkɛti te ñaalɔ bɔɔna bɔɔno. 4Ɔci ɛkɛ ḍɛmmin iñɔ ṭɛɛrji, ɔci ɛkɛ tieŋŋin pwan gɔkkin ɛkɛti agi, “Caawul, Caawul, i noŋ ne yaayan ‘yati a ɔɔn ogo yeti?” 5Ɔci Caawul gɔkcin agi, “Ciɛggɔn, i a menɛ?” Ɔci pwan gɔkcin ɛkɛti agi, “Gena ‘ya Yaccu mena naŋa i oŋkanda ne yaayan neeni. 6Acca dala i jɔŋŋa ñaalɔ ootta bana tolanti aŋan, ɔci aŋanyɛ, i myetti men gɛɛl te naŋka naŋa i.” 7Ɔci maka atki i ɛkɛyɛ, ɛkkɛn bala yɔdi a yɔɔdi lieda ɔɔn, yaakinti gɔkti genga bɛɛ, acaan ɛkkɛn buayi. Ɛkkɛn tieŋŋin pwano, yeti ɛkkɛn men gɛɛl yuarcɛ bɛɛ. 8Ɔci ne Caawul jɔŋni ñaalɔ te ṭɛɛrjiyɛ, ɛkɛ woŋgɛ a pɔggin, yeti ɛkɛ yaakinti gwali noon bɛɛ. Ɔci ɛkɛ eyɛ lwadɛ ma te bieŋɛ, eyɛ lwadɛ ma ne ban Ḍimaackati ɔɔn. 9Ɔci ɛkɛ bala ciyi a ulli ba nink ne ḍoogɔ ɔɔn. Ɔci te ninka ne ḍoogɔ neeniyɛ, ɛkɛ omi genga bɛɛ, ɔci ɛkɛ moti waagga bɛɛ. 10Ɔci men Kiṭɔ gɛɛl bala ban Ḍimaackati yenti Ananaayac. Ɔci Ciɛggɔn gɔkcin ɛkɛti te liɛlti agi, “Ananaayac!” Ɔci Ananaayac jyettin ɛkɛti agi, “Aah, Ciɛggɔn, ‘ya baal wɛnni.” 11Ɔci Ciɛggɔn gɔkcin ɛkɛti agi, “Jɔŋŋa ootta pɔya bartan ma a ‘Pɔya A Tyɛlga’, ootta on Yahuuja ɔci toocca mati aŋan te mena ‘uan mena yenti Caawul. Ɛkɛ a men ma Tarcoc, ɛkɛ bala aŋan cɔki ‘yati ne pɛñan. 12Ɔci men gɛɛl yenti Ananaayac yuarnɛ ɛkɛ te liɛlgin bɛɛn ɛkɛti, ɔci byeŋkɛ tannɛ ɛkɛti aŋka ɛkɛ woŋgɛ pɔktɛ.” 13Ɔci Ananaayac kɛkcin Ciɛggɔnti agi, “Hay, Ciɛggɔn, ‘ya tieŋŋan jyeka guaktan ma oŋkanda te ‘wana neeni. ‘Ya tieŋŋan naŋka naŋdɛ ɛkɛ ma iti yaayan neeni ban Urcaliim. 14Ɔci acca ɛkɛ bala wɛnni, ɔci jyek maka ḍwaŋin bala ɛkɛti doki aŋka ɛkɛ muowi maka moṭi iti waakɛnda ɔci ḍyɛgdɛ.” 15Yeti Ciɛggɔn gɔkcin ɛkɛti agi, “A’a, dala i ɔgdi ootta ɛkɛti, acaan ɛkɛ kɛññan ‘ya bora aŋka noŋdi kanŋa ‘ya. Ɛkɛ kɛññan ‘ya bora aŋka ɛkɛ Keedin Pookɛn nɔɔttɛ te yenti ‘ya, ɔci maka ḍuaŋan ḍwaŋin moki nɔɔttɛ, ɔci ma Icrayiil moki nɔɔttɛ. 16Ɔci ‘ya ɛkɛ myetka te taab bɛya ɛkɛti ne tolan te yenti ‘yay.” 17Ɔci Ananaayac ati ɔci kaaccin ona gɔŋni Ciɛggɔn ɛkɛti, ɔci ɛkɛ byeŋkɛ tannɛ Caawulti, ɔci ɛkɛ gɔkcin ɛkɛti agi, “Mod ɔɔn Caawul, Ciɛggɔn ikin Yaccu mena warɛ lɛɛlnɛ bora iti pɔɔjɔ ne i baali bɛɛdi wɛnniyɛ, ɛkɛ ‘ya cuonna iti aŋka i yaaktiti gwali noon moki, ɔci i daŋkun yomu kuma te Boŋ Jwaŋa Tolan.” 18Ɔci ne Ananaayac gɔŋni a ɔɔnyɛ, ɔci ne pɛñan waak gɛɛg ḍɛɛmdin iñɔ te Caawul woŋgɛti bala ba bɛyi ɔɔn. Ɔci ɛkɛ yaakinti gwali doki. Ɔci ɛkɛ jɔŋŋin ñaalɔ ɔci buuli ma. 19Ɔci ne pɛñan ɛkɛ omjin waako, ɔci ɛkɛ warɛ tɛɛn moki. Ɔci ɛkɛ cooccin i Ma Kiṭɔ ban Ḍimaacka ne ḍiɛran ṭɔɔlɛ. 20Ɔci ne ɛkɛ balki cieki i ma aŋanyɛ, ɛkɛ kwaccin bɛɛ. Ɛkɛ kaaccin oorga morki ma Juaŋ, ɔci ma myennɛ te jyek Yaccu agi, “Yaccu neeniyɛ, ɛkɛ a Kaci Jwaŋa Tolan awarɛ.” 21Ɔci maka tieŋŋin jyeka guagdɛ ɛkɛ neeniyɛ, ɛkkɛn yomgɛn buaññi. Ɛkkɛn gɔki agi, “Mena neeni a mena bala noŋi ne yaayan mati oŋkanda ban Urcaliim ne ma balki cɔkki te yenti Yaccu Kiṭɔ bɛɛ? Mena neeni a mena bɛɛn ban ikinti wɛnni acaan ɛkɛ buagɔn ḍɛɛwi Ma Kiṭɔ ɔci ma eedɛ ɛkɛ maka ḍwaŋinti ban Urcaliimji bɛɛ?” 22Ɔci Caawul warɛ byerŋa byerŋ te kanŋa Yaccu. Ɔci ma Icrayiil maka ciyi ban Ḍimaackatiyɛ, ne ɛkkɛn balki tieki i Caawulyɛ, ɛkkɛn buannɛ Caawul te jiek ne pɛñan acaan Caawul ɛkkɛn lwoŋŋɛ te jyek Yaccu waakɛnda. Ɛkɛ ma nɔɔnnɛ agi Yaccu neeniyɛ, ɛkɛ a Kiṭɔ awarɛ, Mena Muonɛ Juaŋ Boray. 23Ɔci ne nink gɛɛg bɛɛki borayɛ, ma Icrayiil noŋi jiek acaan ɛkkɛn buagɔn noki Caawul. 24Yeti Caawul tieŋŋin jyeka naŋtan ɛkkɛn neeni. Ɔci maka noŋi jiek acaan buagɔn noki Caawul neeniyɛ, ɛkkɛn bala ciyi boopi Caawul kañ baan kaña tolan tuggɛti te oŋ jiñɛ ɔci te ween jiñɛ agi kan Caawul koodɔ borayɛ, ɛkta nogdinti ɛkkɛn doki. 25Yeti oŋ gɛɛlti te ween jiñɛ parɛ maka laldɛ Caawulyɛ, ɔji wɛngɛ wyengo, ɔci Caawul ḍuurci iñɔ te kaañ wyeñɛ, ɔci ɛkɛ ati unni nogɛ ma moki bɛɛ. 26Ɔci ne Caawul dɛnni ban Urcaliimjiyɛ, ɛkɛ buagɔn ñoodi i Ma Kiṭɔ yeti ɛkkɛn waakɛnda buayi ɛkɛ. Ɔci ɛkkɛn tieki, ɛkkɛn gɔki agi ɛkɛ a men Kiṭɔ bɛɛ. 27Yeti Barnabac ɛkɛ eññɛ nona Cuudan Yaccuti. Ɔci Barnabac ɛkkɛn myennɛ te jyek Caawul te naŋka Ciɛggɔn warɛ lɛɛlnɛ bora ɛkɛti te wɔɔka ɛkɛ baali pɔɔjɔ ooddi ban Ḍimaacka, ɔci Barnabac moki ɛkkɛn myennɛ te lalla Caawul baali loṭi ma ban Ḍimaacka te yenti Yaccuy. Ɛkɛ bala gɔki mati te yoma tɛyan. 28Ɔci ne ma tieŋki jyek Barnabacyɛ, Caawul oŋ aŋi men ɛkkɛn oŋo. Ne ɛkɛ baali ban Urcaliimjiyɛ, ɛkɛ bala ati booti baan konɛti loṭi ma oŋkanda te yenti Yaccu, ɔci ɛkɛ buayi men gɛɛl bɛɛ. 29Ɔci ɛkɛ bala gɔwwɔ tyewɔ iki ma Icrayiil maka gɔki te tuk Giriik. Yeti ɛkkɛn bala gɔki te jyek nooŋi ɛkɛ oŋkanda. 30Ɔci ne modgɛn tieŋki jyek nooŋi ɛkɛyɛ, ɛkkɛn Caawul eyɛ ban Cɛcariiya, ɔci ne ɛkkɛn dɛñki ban Cɛcariiyatiyɛ, ɛkkɛn Caawul cuuñɛ ñamu ne ban Tarcoc ɔɔn. 31Ban Yahuudiya ɔci ban Jaliil ɔci ban Camɛɛrya cooccin ne pwadan, jyek taab bawwin ma kaniicati. Ɛkkɛn buayi gena Jwaŋa Tolan parɛ. Ɛkkɛn maŋŋɛ Boŋ Jwaŋa Tolan yomgɛnti, ɔci a ɔŋŋiyɛ, ɛkkɛn ciɛñ a ciɛñi gɔ moki coŋkin ɔɔn. 32Ɔci Butruc ɛkɛ bala ati ḍɔki a ḍwaŋi te ñaalɔ nona bonk jitin cootti iñɔ bɛɛ. Ɔci oŋ gɛɛltiyɛ, ɛkɛ ati Ma Kiṭɔti maka ciyi ban Lida. 33Ɔci ne ɛkɛ baali ban Lidayɛ, mena ‘uan gɛɛl yuarŋɛ ɛkɛ yenti Aneeyac. Ɔci Aneeyac neeniyɛ, ɛkɛ a puono. Ɛkɛ bala niin aŋganti ba yuonga ne dɔɔyɔ wyetkɛn ne ḍoogɔ (8). 34Ɔci Butruc gɔkcin ɛkɛti agi, “Aneeyac, Yaccu Kiṭɔ i ywaŋdi. Jɔŋŋa ñaalɔ. Waka niini i ywaŋa.” Ɔci ne pɛñan ɛkɛ jɔŋŋin ñaalɔ doki, kwaccin bɛɛ. 35Ɔci maka ciyi ban Lida ɔci maka ciyi ban Caaran, ɛkkɛn gɔrcin mena warɛ pwani neeniti, ɔci ɛkkɛn waakɛn yali Ciɛggɔnti. 36Ɔci ban Yaapa men Yaccu mena ɛɛŋ gɛɛl bala yenti Tabiita. (Tabiita te tuk Mabaanyɛ, agi “Mwoyo.” Te tuk Giriik agi “Ḍɔrkac.”) Tabiita ɛkɛ yomɛ pwanna pwani mati. Ɛkɛ moki ma te waak oŋkanda. 37Ɔci oŋ gɛɛltiyɛ, ɛkɛ warɛ yaayɛ ɔci ɛkɛ tuuni. Ɔci ɛkɛ luagiyɔ mako. On jiñɛ gɛɛl bala ñaalɔ, ɔci ɛkɛ eyɛ ma, ɔci niinji ma aŋan. 38Acaan ban Yaapa cual cwal te ban Lidayɛ, Ma Kiṭɔ tieŋŋin agi Butruc baalɔ aŋan ban Lida. Ɔci ɛkkɛn ma gɛɛg cuuñɛ ne yyɛɛwɔ nona Butructi, ɔci ɛkkɛn gɔkcin ɛkɛti agi, “Dala ikin oottin ban Yaapa ne pɛñan.” 39Ɔci Butruc jɔŋŋin ɔci bɛɛn i ɛkkɛn. Ɛkɛ kwaccin bɛɛ. Ɔci ne ɛkkɛn bɛɛki dɔɔkki ban ɛkkɛnyɛ, ɛkkɛn Butruc eyɛ kaacci ona ñaalɔ Tabiitati. Ɔci moonga ciek neeniyɛ, ɛkkɛn bala yɔdi Butruc bwodiwi. Ɛkkɛn bala wiak ɔci ɛkkɛn Butruc lɛɛrki bworŋin ṭuorŋɛ Tabiita ṭwornɛ ɛkkɛn ne ɛkɛ baali tɛɛti meny. Gena jibban i bworŋin becin. 40Ɔci Butruc gɔkcin mati orɔ agi, “Dala ɛkkɛ kaattɛ bora.” Ɔci ne ɛkkɛn kaacki borayɛ, Butruc ḍwonjin iñɔ ɔci cɔkcin Juaŋti. Ɔci ne ɛkɛ cɔŋni Juaŋti ne ḍookkiyɛ, ɛkɛ warɛ yallɛ Tabiitati ɔci gɔkcin ɛkɛti agi, “Tabiita, jɔlla ñaalɔ.” Ɔci Tabiita ñingɛ pɔŋnɛ, ɔci ne ɛkɛ Butruc yuarnɛyɛ, ɛkɛ jɔllin ñaalɔ ɔci cooccin te ŋwayɛ. 41Ɔci Butruc Tabiita muŋŋɛ te bieŋɛ ɔci luolnɛ ñaalɔ. Ɔci ɛkɛ ma Yaccu bornɛ, ɔci moonga ciek bornɛ daŋkun, ɔci ɛkɛ Tabiita ‘wonnɛ ma tɛɛti doki. 42Ɔci jyek jɔllin ɛŋa neeni ñaalɔ te lienti ati ban Yaapa konɛti warda, ɔci ma jyeti Ciɛggɔnti ne coŋɔn. 43Ɔci Butruc cooccin ban Yaapa ne ḍyɛṭ ṭɔɔlɛ. Ɛkɛ bala ciyi on Cimaan. Cimaan neeniyɛ, kanŋa ɛkɛ a kanŋa wwakti geek ɔci kanŋa buurŋ geek moki.

will be added

X\