Naŋki Cuudan 8

1Ɔci Caawul yookɔn te jyek lyen Ictipanuc bɛɛ. Bala ba ɛkɛ poŋi gɔki agi dala ɛkta nogdi mako. Ɔci te oŋŋa wannayɛ, taab bɛɛn ne tolan ma kaniicati ban Urcaliim. Ɔci Ma Kiṭɔ waakɛnda cyɛnŋin jitin. Maka pookɛn ati bonk Yahuudiyaji, ɔci ma gɛɛg ati bonk Camɛɛryaji. Gena Cuudan Yaccu Cuudan A Inyaakkɛn Wyetkɛn Ne Yyɛɛwɔ neeni aŋka cien te ban Urcaliim konɛtiy. 2Ɔci maka ‘uay gɛɛg maka yomgɛn bala Juaŋti bɛɛn ɔci Ictipanuc warɛ eyɛ ɔci jokci ɛkkɛn iñɔ, ɔci ɛkkɛn bala wiak ne tolan te ɛkɛ. 3Yeti Caawul bala noŋi ne yaayan Ma Kiṭɔti oŋkanda ɔɔn. Ɔci ɛkɛ bala ooddi oorg waakɛnda muowi maka ‘uay ɔci maka moong te oorg jitin, ɔci eedɛ ḍuattɛ ciginji. 4Ɔci maka cyɛnŋin jitin ati noon warda neeniyɛ, ɛkkɛn bala mieti ma waakɛnda te jyeka wonkɛn jyeka pwadin. 5Ɔci Pilibuc ati ban Camɛɛryaji, ɔci bala loṭi ma Camɛɛrya te jyek Yaccu Kiṭɔ. 6Ɔci pooldin ḍwaŋin neeniyɛ, ne ɛkkɛn balki yɔtki tyeŋki jyeka laldɛ Pilibuc neeniyɛ, ɛkkɛn woŋgɛn tiiccɛ waakɛnda te jyek ɛkɛ ne ɛkkɛn gɔrki naŋka naŋŋɛ ɛkɛ naŋka tɛyan naŋka ñyecki may. 7Maka coŋin gɛɛg muogɛ jɔkin yeyin, ɔci ne Pilibuc gɔŋni jɔkinti agi dala ɛkki koodɔ bora te matiyɛ, ɔci ɛkkɛn bala yaadan a yook ɔci kooyin bora te ma waakɛnti. Ɔci maka pwotk ɔci maka ŋɔr ɛkkɛn waakɛn yɔɔtci iñɔ daŋkun. 8Ɔci ma yomgɛn ñɔɔna ñɔɔn bana tolan neeniti. 9Yeti bana neenitiyɛ, mena ṭyeni gɛɛl bala yenti Cimaan. Ɛkɛ bala noŋi naŋka tɛyan te jɔkin yeyin ñamu. Ɔci ma Camɛɛrya waakɛndayɛ, ɛkkɛn yomgɛn buañi te naŋki ɛkɛ. Ɔci ɛkɛ gɔki agi ɛkɛ agji mena tolɔ. 10Ɔci ma waakɛnda i maka ḍyɛrin ɔci maka ḍwaŋinyɛ, ɛkkɛn tieŋŋin jyek ɛkɛ, ɔci bootcin ɛkɛti. Ɔci ɛkkɛn bala gɔwwɔ te mena neeni agi, “War tɛɛn ɛktayɛ, agi war tɛɛn Jwaŋa Tolan, agi war tɛɛn neeniyɛ, yenti ‘Tol Tolo’.” 11Ɔci ɛkkɛn bala tyeŋi jyek ɛkɛ oŋkanda, acaan ɛkɛ bala noŋi naŋka tɛyan neeni te baaṭi doki. 12Yeti ne ma jyetki jyeka guagdɛ Pilibuc a jyek cyɛgji Jwaŋa Tolan neeni ɔci ne ɛkkɛn tieŋki jyek yenti Yaccu Kiṭɔtiyɛ, ɛkkɛn buulɛ ma. Gena maka ‘uay i maka moongo. 13Ɔci Cimaan daŋkun jyetti. Ɔci ne ɛkɛ buulkiti mayɛ, ɛkɛ bala ati iki Pilibuc oŋkanda. Ɔci ne ɛkɛ baali gɔṭi naŋka naŋdi Pilibuc a naŋka tɛyan naŋka ñyecki ma oŋkandayɛ, gɔ ɛkɛ moki podi ɔɔn. 14Ɔci ne Cuudan Yaccu maka bala ban Urcaliim neeni tieŋki maka ban Camɛɛrya jyetki jyek Jwaŋa Tolantiyɛ, ɛkkɛn Butruc ɔci Yɔhanna cuuñɛ ɛkkɛnti. 15Ɔci ne ɛkkɛn bɛɛkiyɛ, ɛkkɛn cɔkcin Jwaŋa Tolanti te ma Camɛɛrya aŋka Boŋ Jwaŋa Tolan cootti ɛkkɛn yomgɛnti. 16Acaan Boŋ Jwaŋa Tolan bɛɛn mengati men bɛɛ. Ma buuli ma te yenti Yaccu parɛ men. 17Ɔci Yɔhanna ɛkkɛn i Butruc byeŋkɛn tañji ɛkkɛnti, ɔci Boŋ Jwaŋa Tolan bɛɛn ɛkkɛnti doki. 18Ɔci ne Cimaan gɔrni a ɔɔnyɛ, ɛkɛ gɔkcin Butructi i Yɔhanna agi, 19“Antɛ bilka neeni aŋka dala naŋka tɛyan bɛya ‘yati aŋka ne ‘ya byeŋku tanda mengatiyɛ, dala Boŋ Jwaŋa Tolan bɛya ɛkɛti daŋkun.” 20Ɔci Butruc gɔkcin ɛkɛti agi, “Dala i ooddi ḍakti iki bilk i a cyɛɛlɔ, acaan i poŋ gɔk agi naŋki Jwaŋa Tolan ma wɛɛṭi te bilko. 21Jyek naŋka tɛyan bɛya te Juaŋti neeni a jyek i bɛɛ, acaan i yomu bala ɔntɔ te Jwaŋa Tolanti. 22Dala i wiakca yomuti te naŋki i naŋka yaayan neeni. Ɔci dala i cɔkca Jwaŋa Tolanti ɔci i gɔrca ne Juaŋ boki paŋŋa neeni eedɛ ɛkɛ ɔntɔ te i yomuti boki no. 23Acaan ŋeej ‘ya i baal yomu yaayɛ ne tolan, ɔci i waru pɔŋni te nɔji i neeni bɛɛ. I baal te nɔji bieŋɛti men.” 24Ɔci Cimaan ṭwokcin agi, “Dala ɛkkɛ cɔktɛ Juaŋti te ‘ya aŋka naa naŋka guaŋŋɛ ɛkkɛ neeni gɛɛl bɛya ‘yati bɛɛ.” 25Ɔci ne Butruc ɔci Yɔhanna ma myetkɛti te naŋki Yaccu Kiṭɔ naŋka yuarɛ ɛkkɛn ɔci ne ɛkkɛn ma lalkɛti te jyeka cuonnɛ Ciɛggɔn matiyɛ, ɛkkɛn dɔɔki ban Urcaliimji dɔki. Ɔci ne ɛkkɛn balki yomu dɔɔti ban Urcaliimjiyɛ, ɛkkɛn ati ɔŋi bonka bala yomu ban Camɛɛrya konɛti, ɔci ɛkkɛn maka neeni myetkɛ daŋkun te jyeka wonkɛn jyeka pwadin neeni. 26Ɔci ne naŋka neeni baanɛyɛ, malɛɛka gɛɛl gɔkcin Pilibucti agi, “I jɔŋŋa te bana neeniti wɛnni, i ootta pɔya cuayati pɔya eetan ma te ban Urcaliim eetan ban Gacati. Gena pɔya eetan ma wɔɔŋjiy.” 27Ɔci ɛkɛ jɔŋŋin ɔci atti. Ɔci mena ‘uan gɛɛl bala ati pɔɔjɔ. Ɛkɛ a men ma Cudaan mena kanŋan i ḍuaŋa tolan mena gɔṭi bilko. Ḍuaŋa tolan neeniyɛ, ɛkɛ a ḍuaŋa tolan a ɛɛŋo, ɛkɛ bartan ma agi Kandaci. Ɔci ‘wana neeni ati ban Urcaliim aŋan aŋka morti Juaŋti. 28Ɔci ne ɛkɛ yorni te ban Urcaliim ooddi dɔɔdi ban ɛkkɛnyɛ, ɛkɛ bala taab te baabin ɛkɛ baabin wuatan muntany. Ɔci ne ɛkɛ baali eedɛ baabinyɛ, ɛkɛ bala poki worga Juaŋ te ñaalɔ ɔɔn. Worga neeniyɛ, gena jyek Icaaya mena a bɔwa Jwaŋa Tolan. 29Ɔci Boŋ Jwaŋa Tolan gɔkcin Pilibucti agi, “Ɔgdi ootta orcati baabinti aŋan.” 30Ɔci Pilibuc kuan yiŋi ɛkɛti, ɔci bala tyeŋi jyeka pagdɛ ɛkɛ. Ɔci Pilibuc gɔkcin ɛkɛti agi, “Jyeka paga i wanna jitkɛn yuarca?” 31Ɔci ‘wana neeni gɔkcin agi, “Hay, jitkɛn yuarca ‘ya a ɔki? A menɛ ‘ya lalla aŋka ɛkkɛn jitkɛn yuarta ‘yay?” Ɔci ɛkɛ gɔkcin Pilibucti agi, “Kooya, taaptin iki ‘ya.” 32Jyeka pagdɛ ɛkɛ neeniyɛ, gɔki agi, “Mena neeni ɛkɛ bala ba kalŋ ne eetiti ma ŋartiti may, walla ɛkɛ bala ba kalŋ ṭɔɔlɛ ne eetiti ñyɛtitiyɔ ma ɔci gɔkti genga bɛɛy. 33Ma gɔrcin jyek ɛkɛ ne pwadan bɛɛ. Ma noŋi ne yaayan ɛkɛti bala ba ɛkɛ a genga bɛɛ. Maka bala cieki iki ɛkɛ neeniyɛ, naŋki ɛkkɛn bala a ɔki a ɔɔn? Acaan ɛkkɛn ɛkɛ ŋudɛji te coodi iñɔ ṭɛɛrji wɛnni.” 34Ɔci mena tolan neeni gɔkcin Pilibucti agi, “‘Ya myetta, hay, bɔwa neeni gɔki te war ɛkɛ parɛ? Walla ɛkɛ gɔki te war mena parɛ gɛɛl?” 35Ɔci Pilibuc ɛkɛ myennɛ te jyeka wonkɛn jyeka pwadin, jyek Yaccu Kiṭɔ. Ɔci ɛkɛ ne men juannɛ lwoŋŋiyɛ, ɛkɛ men lwoŋŋɛ te jyeka guaŋŋɛ Icaaya te Yaccu Kiṭɔ. 36Ɔci ne ɛkkɛn balki atki pɔɔjɔyɛ, ɛkkɛn dɛñjin nona balki pieg gɛɛlti, ɔci mena tolan neeni tooccin Pilibucti agi, “Gɔṭṭi, piega yɔdi wan. Oŋ i ‘ya bulda bɛɛ?” [ 37Ɔci Pilibuc gɔkcin ɛkɛti agi, “Kan i jyetti te yom i ne pwadanyɛ, i buldin.” Ɔci mena tolan neeni gɔkcin ɛkɛti agi, “‘Ya jyeti doki. ‘Ya gɔk Yaccu Kiṭɔ ɛkɛ a Kaci Jwaŋa Tolan.”] 38Ɔci ɛkɛ gɔki agi da baabin yɔɔddɔ. Ɔci baabin yɔɔnni. Ɔci Pilibuc ɔci mena neeniyɛ, ɛkkɛn kooyin iñɔ, ɔci ɛkkɛn ati pietin, ɔci ɛkɛ buullɛ Pilibuc. 39Ɔci ne ɛkkɛn kooki bora te pietin bɛɛki borayɛ, ɔci Boŋ Jwaŋa Tolan Pilibuc eññɛ nona parɛti. Ɔci menga Pilibuc yuarŋɛ moki bɛɛ. Ɔci ɛkɛ ati baanji te yoma ñɔyan. 40Ɔci Pilibuc eññɛ Boŋ Juaŋ ɔci ɛkɛ warɛ mɔŋnɛ ban Ajɔɔtoc. Ɔci ɛkɛ ati te Ajɔɔtoc bala ooddi ban Cɛcariiyati. Ɔci bonka ḍyɛrin bala yomɔ. Ɔci ɛkɛ bala mieti ma te jyek Yaccu Kiṭɔ bonka ḍyɛrinti neeni ne ɛkɛ dɛnni ban Cɛcariiyati ɔɔn.

will be added

X\