Naŋki Cuudan 7

1Ɔci gaciic tolan ma Icrayiil tooccin Ictipanucti agi, “Jyeka guaktan ma iti neeni a jyeka awarɛ?” 2Ɔci Ictipanuc gɔkcin agi, “Modg ɔɔn ɔci weyi ɔɔn, tieŋdɛ. Jwaŋa Tolan warɛ lɛɛlnɛ bora yɔr ikin Abrahimti ne ɛkɛ baali ciyi te bana kaŋ wyeñɛti meny. Te wɔɔka wannayɛ, ɛkɛ meni bɛɛn ban Arɔnti bɛɛ. 3Ɔci Jwaŋa Tolan gɔkcin ɛkɛti agi, ‘Abrahim, jɔŋŋa ñaalɔ te bana neeniti, ma ɛkkɛ dalja, ootta nona i myettin ‘yay.’ 4“Ɔci ɛkɛ ma ɛkkɛn ma Kaldiiya dalnɛ, ɔci ɛkɛ bala ciyi ban Arɔn ne ḍyɛṭ ṭɔɔlɛ. Ɔci ne weegɛn tuuniyɛ, ɛkɛ oonɛ Juaŋ bora wɛnni bana ciyi ɛkkɛ neeni. 5Juaŋ Abrahim ‘wonnɛ noon gɛɛl ne ḍyɛṭ ṭɔɔlɛ aŋka aga non ɛkɛ men bɛɛ. Yeti Abrahim myennɛ Juaŋ agi, ‘Bana neeniyɛ, aga ban i ɔci ban kɛɛgin i oŋkanda ɔɔn.’ Yeti ne Juaŋ gɔŋni Abrahimti agi ṭɛra neeni agdɔ ṭɛr ɛkta i kɛɛgin ɛkta neeniyɛ, Abrahim balkin kaci gɛɛl men bɛɛ. 6Jyeka guaŋŋɛ Jwaŋa Tolan neeni gɔki Abrahimti agi, ‘Kɛɛgin i aga maka wɛlg bana parɛti, ɔci ɛkkɛn naŋtan ma a maka kɛɛnko, ɔci taab bɛya ɛkkɛnti yuong miyyan ne ŋaanɔ (400).’ 7Ɔci agi, ‘Maka noŋdi taab ɛkkɛntiyɛ, ‘ya ywobji olja ɛkkɛnti daŋkun, ɔci a ɔŋŋiyɛ, kɛɛgin i pɔɔktan mako, ɔci ɛkkɛn koodi bora bɛya morti ‘yati nona neeniti wɛnni.’ 8Ɔci Juaŋ Abrahim myennɛ te jyek ŋwoti mako. Jwaŋa Tolan buagɔn Abrahim ɔci kɛɛgin ɛkɛ ŋwottan ma waakɛnda bala ba naŋka ñyecki ma Jwaŋa Tolan te jyeka naŋɛ ɛkɛ i ɛkkɛn. Ɔci Icaak jiennɛ Abrahim. Ɔci ne nink Icaak ninka ɛkɛ jietkiti ma akki ne dɔɔyɔ wyetkɛn ne ḍoogɔyɛ, ɛkɛ ŋunnɛ weegɛn. Ɔci Yaakub jiennɛ Icaak, ɔci Yaakub ŋunnɛ weegɛn, ɔci yɔrg ikin ŋeecɔn ma a inyaakkɛn wyetkɛn ne yyɛɛwɔ, ɛkkɛn jiennɛ Yaakub, ɔci ɛkkɛn ŋuodɛ mako. 9“Ɔci yɔrg ikin kɛɛgin Yaakub korkɛn modɔ mod ɛkkɛn Yuocipti, ɔci ɛkɛ wiɛljiyɔ ɛkkɛn, ɔci eyɛ ma ban Macor aŋi mena kɛɛngɔn. Yeti Jwaŋa Tolan bala iki ɛkɛ. 10Ɔci Yuocip maŋŋɛ ɛkɛ te taab ɛkɛ waakɛnda. Ɔci Jwaŋa Tolan Pɛɛrɔ naŋŋɛ yomɛ pwanna pwani ɛkɛti, ɔci Yuocip ‘wonnɛ Juaŋ ñing tɛɛn Pɛɛrɔ ñamɛti. Pɛɛrɔ neeniyɛ, ɛkɛ a ḍuaŋa tolan ma Macor. Ɔci ɛkɛ Yuocip naŋŋɛ aŋi ḍuaŋa ṭɔɔlɛ ban Macor, ɔci Yuocip naŋŋɛ aŋi ḍuaŋa on ɛkɛ daŋkun. 11Ɔci koñ bɛɛn ban Macor jiñɛ warda, ɔci ban Kɛnan daŋkun. Ɔci taab bɛɛn yɔrg ikinti ne tolan acaan ɛkkɛn yɔṭi waka amtan gɛɛg bɛɛ. 12Yeti Yaakub tieŋŋin agi pok balgɔ ban Macor, ɔci ɛkɛ kɛɛgin ɛkɛ yɔrg ikin cuuññɛ ban Macor pokti. Oŋŋa neeniyɛ, gena oŋŋa atki ɛkkɛn te ñamu neeni, yeti ɛkkɛn Yuocip ñiyɛ ne agɛ ɛkɛ bɛɛ. 13Ɔci te oŋŋa akki yyɛɛwɔyɛ, Yuocip warɛ lɛɛlnɛ bora modgɛnti. Ɔci oŋŋa ɛkɛ warɛ lɛɛlnɛ bora modgɛntiyɛ, Pɛɛrɔ kɛɛn Yuocip ŋeennɛ. 14Ɔci Yuocip ma cuuññɛ wey ɛkkɛn Yaakubti, ɔci ɛkɛ bornɛ iki ma ɛkkɛn. Ma ɛkkɛnyɛ, a ma baan ne ḍoogɔ mena parɛ byeŋkɛ ɔci ne dɔɔyɔ (75). 15Ɔci Yaakub ati ban Macor, ɔci ɛkɛ iki kɛɛgin ɛkɛ yɔrg ikin ɛkkɛn tuun aŋan. 16Yeti ɛkkɛn waakɛn eyɛ ma ṭɛr bana ɛkkɛn ḍuaññɛ Juaŋ te jwali ɔci jokci ma iñɔ ban Cɛkam. Ɛkkɛn waakɛn jokcɛ ma kola wiɛllɛ Abrahim te bilko. Kola neeni wiɛllɛ ɛkɛ te kɛɛgin Emar ‘uay ban Cɛkamti. 17“Ne yuonga coŋin atkɛ doki, ɔci ne jyeka gɔŋni Juaŋ Abrahimti agi ɛkɛ ma koojji bora te ban Macor ɔci ‘woñji baan noŋki dɛnti borayɛ, ma ikin bala ciɛñ a ciɛñi gɔ moki coŋkin ɔɔn. 18Ɔci ma ooki ḍuaŋa tolan ḍuaŋa woonɛ ban Macor, ɔci ɛkɛ cooccin kaakci cyɛgjiti. Ɔci ḍuaŋa tolan neeniyɛ, Yuocip ŋeejɛ ɛkɛ moki bɛɛ. Ɛkɛ Yuocip kwoyɛ. 19Ḍuaŋa neeni bala ñieyi te yɔrg ikin. Ɔci ɛkɛ gɔkcin yɔrg ikinti agi dala ɛkki kɛɛgin ɛkki kɛɛgin ḍyɛrin yiɛpti ɔntɔ baan ŋoodanti aŋka dala ɛkki tuudɔ waakcinda. 20Ɔci te oŋŋa wannayɛ, Muuca jiedɛ mako. Ɔci ɛkɛ pwanna pwani Jwaŋa Tolan woŋgɛti. Ɔci ɛkɛ cien on weegɛn ba ponk ne ḍoogɔ. 21Ɔci oŋŋa ɛkɛ ookiti ma bora te on weegɛn aŋka yiɛptan ɔntɔ baan ŋoyɛti aŋka tuwayɛ, ɛkɛ eññɛ kaci Pɛɛrɔ, kacca ṭɔɔl on ɛkkɛn. Ɔci ṭɔla neeni bala gɔṭi Muuca ba kaci ɛkɛ ɔɔn. 22Ɔci a ɔŋŋiyɛ, Muuca lalɛ ma ban Macor te jyek worgan ma Macor, ɔci te jyek naŋki ma Macor waakɛnda. Ɔci Muuca yaakinti jiek ne pwadan, ɔci balkɔn war tɛɛn moki. 23“Ɔci ne Muuca yuong ɛkɛ akki ma baan ne yyɛɛwɔyɛ, (40), ɛkɛ bala poŋi gɔki agi ɛkɛ ootci ḍieŋji ma ɛkkɛn ma Icrayiilti. 24Ɔci Muuca ne atti ḍieŋni ma ɛkkɛntiyɛ, men ma Macor gɛɛl mɔŋnɛ noŋi ne yaayan men ma Icrayiil gɛɛlti, ɔci Muuca ‘wan ma Icrayiil neeni yuonnɛ, ɔci men ma Macor neeniyɛ, noŋŋɛ Muuca. 25Acaan Muuca poŋi gɔki agi dala ɛkɛ ŋeeddɛti ma ɛkɛ ‘wonnɛti Juaŋ jiek aŋka ɛkɛ ma pɔkcɛ te taab ɛkkɛn. Yeti ma bala poŋi a ɔɔn bɛɛ. 26Ɔci ne liidɔ ma Icrayiil gɛɛg mɔŋnɛ ɛkɛ noowɔ ne yyɛɛwɔ moki. Ɔci Muuca gɔkcin ɛkkɛnti aŋka ɛkɛ ɛkkɛn yɔŋdɛ jieko. Ɔci ɛkɛ gɔkcin mati agi, ‘Hay! ‘Uayo, ɛkkɛ agɛ modin hay! Ɛkkɛ noowɛ yaakkɔ a ɔɔn ogo?’ 27“Ɔci mena noŋi ne yaayan moodɛnti neeniyɛ, ɛkɛ Muuca taannɛ ɔntɔ. Ɔci ɛkɛ gɔkcin Muucati agi, ‘Ɔgdi ootta ɔntɔ aŋan, i aŋŋi ḍuaŋa ɔɔn te jyek menɛ? Ɔci i aŋŋi mena yɔŋi jiek te jyek menɛ? 28I buagi noki ‘ya ba mena noŋŋi i tɛɛnɔyɛ?’ 29“Ɔci ne Muuca tieŋni jyeka neeniyɛ, ɛkɛ yiŋi ɔntɔ, ati bala ciyi ban Midyan, ɔci ne ɛkɛ baali ciyi ban Midyanyɛ, ɛŋ ɛkɛ jieni kɛɛgin a ‘uay ne yyɛɛwɔ. 30“Ne yuonga a ma baan ne yyɛɛwɔ bɛɛki borayɛ, Malɛɛka warɛ lɛɛlnɛ bora Muucati wɔɔŋji nona omi maañ jaano. Ɔci malɛɛka warɛ lɛɛlnɛ bora yeccu maañ jitin. Wɔŋa neeni bala poma yenti Cina tɛyɛti. 31Ɔci ne Muuca gɔrni ɛkɛyɛ, ɛkɛ poni te naŋka neeni. Ɔci ne ɛkɛ orniti aŋka ɛkɛ gɔrti ne pwadanyɛ, ɛkɛ tieŋŋin pwan Jwaŋa Tolan ne Juaŋ gɔŋni ɛkɛti agi, 32‘‘Ya a Jwaŋ yɔrg ɛkkɛ Jwaŋ Abrahim, ɔci Jwaŋ Icaak, ɔci Jwaŋ Yaakub.’ Ɔci Muuca warɛ ḍiedan acaan ɛkɛ buayi, ɔci ɛkɛ gɔrcin jaanti moki bɛɛ. 33Ɔci Jwaŋa Tolan gɔkcin ɛkɛti agi, ‘Wɛɛyi i gwodda bora, acaan nona yɔɔdi i neeniyɛ, a non ‘ya nona pwadan ne tolan. 34’Ya gɔrcan taab ma ‘ya ban Macor, ɔci ‘ya tieŋŋan joŋdin ɛkkɛn, ɔci ‘ya bɛɛn iñɔ wɛnni aŋka ɛkkɛn pɔkka. Bɛɛd i cundin ‘ya ban Macor.’ 35“Ɔci Ictipanuc gɔkcin ‘wota agi, ma yookɔn te Muuca ne ɛkkɛn gɔkki agi ɛkta aŋŋɔ ḍuaŋa ɛkkɛn te jyek menɛ, ɔci moki ne ɛkkɛn gɔkki agi ɛkta yɔŋɔ jiek te jyek menɛ. Ɔci yeti mena yookiti ma neeniyɛ, ɛkɛ cuonnɛ Juaŋ ɔci ɛkɛ aŋi ḍuaŋa ɛkkɛn, ɔci ma pɔŋnɛ ɛkɛ. Ɔci te naŋka ɛkɛ ma pɔŋnɛ neeniyɛ, Muuca maŋŋɛ malɛɛka ɛkɛ lɛɛrnɛ warɛ jaantiy. 36Ɔci Muuca neeniyɛ, ɛkɛ ma oonɛ bora te ban Macor te naŋki ɛkɛ naŋka tɛyan naŋka ñyecki ma ɛkɛ. Muuca noŋjin naŋka neeni ban Macor, ɔci noŋjin naŋka neeni Galŋa Tidan ḍwaŋɛti moki, ɔci noŋjin naŋka neeni moki ne ɛkkɛn balki wɔɔŋji te yuonga ma baan ne yyɛɛwɔ (40) neeni. 37Ɔci Muuca neeniyɛ, ɛkɛ ma Icrayiil myennɛ agi, ‘Jwaŋa Tolan ɛkkɛ ‘wondɛ mena bɔwa gɛɛl te ma ɛkkɛti ba ‘ya ɔɔn.’ 38Muuca neeniyɛ, gena ɛkɛ bala wɔɔŋji iki ma Icrayiil oŋŋa ɛkkɛn wyetkɛn ḍɔɔlkɛti nona ne cyɛɛlɔy, ɔci gena ɛkɛ noŋi jiek iki malɛɛka Pom Cina wyeñɛtiy. Gena Muuca ‘wonnɛ Juaŋ jyeka tɛɛtki ma neeni oonɛ ɛkɛ ikintiy. 39“Ɔci yɔrg ikinyɛ, buagɔn tieŋdi jyek ɛkɛ bɛɛ. Ɔci ɛkkɛn yookɔn te jyek ɛkɛ. Ɔci ɛkkɛnyɛ, bala poŋi gɔki agi ɛkkɛn dɔɔdinti ban Macor. 40Ɔci ɛkkɛn gɔkcin Haruunti agi, ‘Dala i ɔɔn noŋdɔn waka maldɔn ɔɔn gɛɛg ba jɔkin aŋka ɛkkɛn wɛɛddi ñamu ɔɔn ñomgɔti ɔɔn wɛɛtɔn dwaktɔn ban Macor. Acaan Muuca mena ikin oonin bora te ban Macor neeniyɛ, ɛkɛ bala wɛnɛ acca yeti?’ 41Ɔci te oŋka wannayɛ, ɛkkɛn noŋjin naañ ṭɔɔlɛ doki aŋka aga jwaŋ ɛkkɛn. Ɔci ɛkkɛn gen ‘yɛri ɛkɛti doki. Ɔci ɛkkɛn yomgɛn ñɔɔna ñɔɔn te gena naŋɛ ɛkkɛn neeni. 42Acaan a ɔŋŋiyɛ, Jwaŋa Tolan warɛ yalnɛ ɔntɔ te ɛkkɛnti. Ɛkkɛn dalnɛ pookɛn moṭi waka bala pɔliji, waka ba kɛltany. Ɔci a ɔɔnyɛ, jyeka kiigin worga bɔwan Jwaŋa Tolanti dɛññin bora agi, ‘Ma Icrayiil, yuonga ɛkkɛ balgɛ wɔɔŋji yuonga ma baan ne yyɛɛwɔyɛ, (40) mala ‘yɛrdɛ ɛkkɛ ‘yati neeniyɛ, ɛkkɛ ɛṭɛ ‘yati awarɛ boki? 43A’a, ɛkkɛ noŋŋɛ ona a bworŋ moṭɛ ɛkkɛ jwaŋa yenti Mɔlɛk, ɔci gena a muacin jwaŋa a kɛɛli yenti Ripan. Waka a muacin neeni pɔɔññɛ ɛkkɛ aŋka ɛkkɛ mortɛ ɛkkɛnti. Acaan a ɔŋŋiyɛ, ‘ya ɛkkɛ eedin ɔntɔ te wɛnni eedin ban Baabil ŋoyɛti.’ 44“Te baaṭi ne yɔrg ikin balki wɔɔŋjiyɛ, ɛkkɛn balki on Juaŋ ona bworŋo. Ɛkɛ cɔdɛ ma ba jyeka Muuca myennɛ Jwaŋa Tolany. 45Oŋŋa yɔrg ikin bɛɛki wɛnni iki ḍuaŋa ɛkkɛn Jɔcwa ɔci baan mukkɛtiyɛ, ona bworŋ neeni owwɛ ɛkkɛn wɛnni. Ɔci oŋŋa wannayɛ, Jwaŋa Tolan Keedin Pookɛn maka ciyi bana neenitiyɛ, ŋualnɛ ɛkɛ ɔntɔ. Ɔci ona neeniyɛ, bala yuonginda ne Daawud bɛɛni ɔɔn. 46“Jwaŋa Tolan yomɛ ñɔɔna ñɔɔn te Daawud. Ɔci Daawud tooccin Juaŋti acaan ɛkɛ buagɔn cɔtti ona pwadan te gwoyi aŋka ciyi Jwaŋ Yaakub. 47Yeti gena Daawud cɔti on Juaŋ ona tolan neeni bɛɛ. Gena Cɔlaman kaci Daawud aŋka cɔti ona ciyi Juaŋ neeniy. 48“Yeti Jwaŋa Tolan ñaalɔyɛ, ɛkɛ ciyi oorga cɔttan ma a cɔni neeni bɛɛ, bala ba jyeka kiinɛ bɔwa Jwaŋa Tolan gɛɛl ne Jwaŋa Tolan gɔki agi, 49‘Pɔlla ñaalɔ a kaakci ‘ya, ɔci ṭɛra iñɔ a nona ḍɔcca ‘ya cieg ‘ya. Ɛkkɛ yaaktɛti noŋdɛ ona ciya ‘ya boki? Ɔci ɛkkɛ yaaktɛti noŋdɛ nona wooda ‘ya boki? 50Waak waakɛnda cɔni ‘ya te byeŋ ‘ya bɛɛ?’” 51Ɔci Ictipanuc gɔkcin ‘wota agi, “Ɛkkɛ wyetkɔ tɛy tɛyo, hay! Ɛkkɛ yomgɔ yeyɔ Jwaŋa Tolanti parɛ bɛɛ. Ɛkkɛ yookɛ te jyek Boŋ Juaŋ oŋkanda bala ba yɔrg ɛkkɛ daŋkun. 52Yɔrg ɛkkɛ bɔwan Jwaŋa Tolan gɛɛl daljɛ te naŋki ywobji boki? Bɔwan gɔki te baaṭi agi Mena Pwadan baalɔ bɛɛdɔyɛ, nogɛ yɔrg ɛkkɛ. Ɔci acca Mena Pwadan neeniyɛ, ɛkɛ tomnɛ ɛkkɛ ɔci noŋŋɛ ɛkkɛ doki. 53Ɛkkɛ ‘woñkɛ malɛɛkan ganuun, yeti ɛkkɛ jyek ganuun tiiññiyɔ bɛɛ.” 54Ɔci ne Maka Gɔṭi Jiek balki tyeŋki jyek Ictipanucyɛ, ɛkkɛn looñi ne tolan, ɔci ɛkkɛn lɛkɛn tiicciti te yom yoño. 55Yeti Ictipanuc neeniyɛ, ɛkɛ yomɛ kuumi te Boŋ Jwaŋa Tolan, ɔci ɛkɛ gɔrcin ñaalɔ, ɔci pwani Jwaŋa Tolan yuarnɛ ɛkɛ, ɔci Yaccu yuarnɛ ɛkɛ bala yɔɔd Jwaŋa Tolan taaŋɛti taaŋŋa byerɔn. 56Ɔci Ictipanuc gɔkcin ɛkkɛnti agi, “Gɔṭṭɛ, ‘ya gɔrcan pɔli warɛ pɔŋnɛ, ɔci ‘ya Kaci Ma Baan yuarcan bala yɔɔd Jwaŋa Tolan taaŋɛti taaŋŋa byerɔn!” 57Ɔci ne ɛkɛ baali gɔki a ɔɔnyɛ, ɔci Maka Gɔṭi Jiek yaajjin ne tolan, ɔci ɛkkɛn jyetkɛn midɛ, ɔci ɛkkɛn yiŋi waakɛnda nona ɛkɛti, 58ɔci ɛkɛ mugɛyɔ ɔci eyɛ wuayɛ ɔntɔ baan ŋoyɛti, ɔci ɛkɛ yepci te gwoyi aŋka noktan. Ɔci maka yebi Ictipanuc neeniyɛ, bworŋin ɛkkɛn ‘woñgi ‘uan ṭɔɔlɛ ḍiɛran gɛɛl aŋka tiektɛ. ‘Wana neeni yenti Caawul. 59Ɔci ɛkkɛn bala yebi Ictipanuc ne ɛkɛ bala cɔki Juaŋti ɔɔn. Ɛkɛ cɔkcin agi, “Ciɛggɔn ‘ya Yaccu, anti ṭiebji ‘ya!” 60Ɔci ɛkɛ ḍwoñjin iñɔ, ɔci yaajjin te pwana tolan agi, “Ciɛggɔn, naa i nɔjja neeni olja ɛkkɛnti bɛɛ!” Ɔci ne ɛkɛ gɔŋni a ɔɔnyɛ, ɛkɛ tuun doki.

will be added

X\