Naŋki Cuudan 6

1Ɔci te oŋka wannayɛ, ne Ma Kiṭɔ balki ciɛñki a ciɛñi gɔ moki coŋkinyɛ, jiek bɛɛn Ma Kiṭɔ ma Icrayiilti. Ma Icrayiil maka gɔki te tuk Giriik, ɛkkɛn bala wɛyyɔ te jyek waak i ma Icrayiil maka gɔki te tuk Ma Ibru, acaan ne ɛkkɛn ‘woñki ma te waak oŋkandayɛ, moonga ciek ɛkkɛn yɔmji te waak bɛɛ. 2Ɔci Maka Inyaakkɛn Wyetkɛn Ne Yyɛɛwɔ borcin Ma Kiṭɔti waakɛnda, ɔci ɛkkɛn bɛɛni. Ɔci Maka Inyaakkɛn Wyetkɛn Ne Yyɛɛwɔ gɔkcin ɛkkɛnti agi, “Ɔɔn yaakɔnti lali jyek Juaŋ daldɔn te jyek oomdin bɛɛ. 3Modg ɔɔn, a ɔɔnyɛ, dala ɛkkɛ muodɛ maka ‘uay gɛɛg ne dɔɔyɔ wyetkɛn ne yyɛɛwɔ te ɛkkɛti wɛnan aŋka ɛkkɛn gɔrti kanŋa neeni. Dala maka neeni ɛkkɛn ŋeecɔn ma waakɛnda a ɛkkɛn a maka pwadin, ɔci dala ɛkkɛn a maka yomgɛn kuumi te Boŋ Jwaŋa Tolan, ɔci dala ɛkkɛn a maka ñingɛn tɛyan aŋka ɔɔn ɛkkɛn ‘wondɔn kanŋa neeni. 4Yeti ɔɔnyɛ, ɔɔn woodɔn te cɔŋi ɔci te lali jyek Juaŋ bɛɛ.” 5Ɔci ne ma tieŋki jyeka neeniyɛ, ɛkkɛn waakɛnda gɔki agi, “Ɛɛ, a ɔɔn pwatcin, hay.” Ɔci ɛkkɛn maka ‘uay kɛññɛ bora ne dɔɔyɔ wyetkɛn ne yyɛɛwɔ. Ɔci mena ‘uan gɛɛl ne cyɛɛlɔyɛ, ɛkɛ yenti Ictipanuc. Ɛkɛ jyeti Juaŋti ne pwadan, ɔci ɛkɛ yomɛ kuumi te Boŋ Jwaŋa Tolan. Ɔci maka pookɛn neeniyɛ, gena Pilibuc, ɔci Prɔkɔɔrac, ɔci Nikeenɔr, ɔci Timan, ɔci Parmenac, ɔci Nikɔleeyac. Ɔci Nikɔleeyac neeni ban ɛkkɛn yenti Antyak. Nikɔleeyac naŋki Keedin Pookɛn dalnɛ, ɔci ɛkɛ bala noŋi ba ma Icrayiil. 6Ɔci maka ne dɔɔyɔ wyetkɛn ne yyɛɛwɔ neeniyɛ, owwɛ ma Cuudan Yaccuti, ɔci Cuudan Yaccu neeniyɛ, ne ɛkkɛn cɔkkiyɛ, ɛkkɛn byeŋkɛn tañji ɛkkɛn wyetkɛnti aŋka Juaŋ ɛkkɛn magdɛ te kanŋa ɛkkɛn ‘woñkiti ma neeni. 7Ɔci jyek Jwaŋa Tolan ati ciɛñi baan konɛ warda, ɔci ma Icrayiil Ma Kiṭɔ bala ciɛñ a ciɛñi ne pɛñan gɔ moki coŋkin ban Urcaliim ɔɔn. Ɔci maka gaciicin ma Icrayiilyɛ, gɛɛg jyeti Kiṭɔti ne coŋɔn. 8Ɔci Ictipanuc yomɛ bɔɔna bɔɔno, ɔci yomɛ tɛɛna tɛɛno. Ɛkɛ bala noŋi naŋka tɛyan ɔci naŋka ñyecki ma Juaŋ ma ñomgɛnti. 9Yeti ma gɛɛg bɛɛn te ona morki ma Juaŋ (ona yenti On Maka Kɛɛnk Acca Moki Bɛɛy). Ɔci ma Cayriin, ɔci ma Alɛkcaandriya, ɔci maka ‘uay gɛɛg te ban Ciliicya ɔci ban Ecyayɛ, maka neeni bala tyewɔ. Ɔci maka neeni buannɛ Ictipanuc. 10Ɛkkɛn yaakinti gɔwwɔ i ɛkɛ moki bɛɛ, acaan Ictipanuc bala gɔki te ñing tɛɛn te Boŋ Jwaŋa Tolan ɛkɛ yomɛti. 11Ɔci ɛkkɛn ati maka pookɛn myetkɛ lieda ɔɔn, ɔci ɛkkɛn ma ‘woñgi bilko, ɔci gɔkcin ɛkkɛnti agi, “Dala ɛkkɛ ma myettɛ agi Ictipanuc bala ḍori Muuca ɔci Jwaŋa Tolan.” 12Ɛkkɛn gɔki a ɔɔn acaan ɛkkɛn buagɔn ma loondi Ictipanucti. Ɔci ma waakɛnda i cyekin i maka loṭi ganuun Juaŋyɛ, ne ɛkkɛn tieŋki jyeka neeniyɛ, ɛkkɛn looñi, ɔci ɛkkɛn ati ɔci Ictipanuc mugɛ, ɔci owwɛ ma nona Maka Gɔṭi Jiek ñomgɛnti. 13Ɔci ɛkkɛn maka pookɛn gɛɛg ḍuaccɛ iñɔ daŋkun aŋka ɛkkɛn Ictipanuc jomtanyɔ. Ɔci ne ma balki gɔrki jiek menyɛ, ɛkkɛn Ictipanuc jomgiyɔ. Ɛkkɛn gɔki agi, “Ictipanuc gɔki ne yaayan oŋkanda te on Juaŋ ona tolan, ɔci te ganuun Muuca. 14Ɔɔn tieŋnɔn ɛkɛ gɔki agi Yaccu men Najarɛt neeni on Juaŋ ona tolan lɛɛkta iñɔ, ɔci jyek naŋki yɔɔr jyeka ikin ‘wonninti Muuca bɛɛn ikinti agdɛyɔ.” 15Ɔci ne ma balki cieki gɔrki jiekyɛ, maka ciyi nona Maka Gɔṭi Jiek gɔrcin Ictipanuc ñingɛti waakɛnda, ɔci ɛkɛ ñingɛ waakɛn aagɛ bala ba bolji malɛɛka ɔɔn.

will be added

X\