Naŋki Cuudan 5

1Ɔci mena ‘uan gɛɛl bala yenti Ananaayac, ɛŋ ɛkɛ yenti Capiira, ɔci ɛkkɛn yel ɛkkɛn wiɛljiyɔ. 2Ɔci ɛkkɛn bilka neeni wɛɛdi jitin, ɔci ɛkkin pookɛn daliyɔ te on ɛkkɛn, ɔci ɛkkin pookɛn neeni eññɛ mena ‘uan nona Cuudan Yaccuti. Ɔci ɛkkɛn ne bilk wɛɛtkiti jitinyɛ, ŋeejɛ ɛɛŋ daŋkun. 3Ɔci Butruc gɔkcin agi, “Ananaayac, te gena yeti i yomu kuummi te jyek Jwaŋa Yaayan aŋka i dyeti Boŋ Juaŋ ñingɛ a ɔɔn neeni? Bilka wiɛlli i te non ɛkkɛ neeniyɛ, ɛkkɛn ooni i waakɛnda wɛnni bɛɛ. Gɛɛg dolniyɔ i te baanji daŋkun. 4Gɔṭṭi poca, ne ɛkkɛ noon men wiɛllɛ bɛɛyɛ, ɛkɛ a non ɛkkɛ bɛɛ? Ɔci ne ɛkɛ wiɛllɛ ɛkkɛ doki, jyek bilk a jyek ɛkkɛ bɛɛ? Ɔci acca i yomu bala a ɔki aŋka i noŋi a ɔɔn wan? Iyɛ, gena men baana naŋŋi ñin i neeni bɛɛ. Gena Jwaŋa Tolan naŋŋi ñin i wan!” 5Ɔci Ananaayac ne ɛkɛ tieŋni jyeka neeniyɛ, ɛkɛ ḍɛmmin iñɔ ɔci tuun doki. Ɔci Ma Kiṭɔ ne tieŋki jyeka neeniyɛ, ɛkkɛn buayi waakɛnda. 6Ɔci ‘uaya ḍyɛrin gɛɛg jɔllin ñaalɔ ɔci ati ɛkɛ paariyɔ te bworŋin ɔci ḍuurɛ bora ɔci jokci iñɔ. 7Ɔci ne oŋ woŋgɛ ne ḍoogɔ baakiyɛ, ɛŋ ɛkɛ bɛɛn daŋkun. Yeti ɛkɛ jyek ‘uarɛ ŋeejɛ men bɛɛ. 8Ɔci Butruc gɔkcin ɛkɛti agi, “Hay i! ‘Ya myetta, ɛkkɛ noon wiɛllɛ bilk bala ba bolja neeni ɔɔn pari bɛɛ?” Ɔci ɛɛŋ jyettin agi, “Ɛɛ, bilk wiɛllɔn ɔɔn bala ba bolja wanna ɔɔn.” 9Ɔci Butruc gɔkcin ɛkɛti agi, “Hay i! Ɛkkɛ jiek ñaaŋŋɛyɔ yaakkɔ a ɔɔn nɔñji bala ba ɛkkɛ ponnɛ Boŋ Jwaŋa Tolan a poccin a ɔɔn ogo? Tieŋŋa, maka ‘war i eyɛ bora ɔci jokci iñɔ waayiyɛ, ɛkkɛn bala bɛya, ɔci i daŋkun eeti ɛkkɛn bora jokti iñɔ.” 10Ɔci ne ɛkɛ gɔŋni a ɔɔnyɛ, ne pɛñan doki Capiira ḍɛmmin iñɔ Butruc ñamɛti ɔci tuuni. Ɔci ne maka ‘uaya ḍyɛrin ne kooki orɔyɛ, ɛkɛ mɔkci tuun doki. Ɔci ɛkɛ eyɛ ɛkkɛn bora, ɔci jokci ‘war ɛkɛ taaŋɛti. 11Ɔci te naŋka neeniyɛ, Ma Kiṭɔ buañi waakɛnda, ɔci maka bora ne ɛkkɛn tieŋkiyɛ, ɛkkɛn buañi daŋkun. 12Ɔci oŋkanda ɔɔnyɛ, Cuudan Yaccu bala noŋi naŋka tɛyan naŋka ñyecki ma Juaŋ ma ñomgɛnti. Ɔci Ma Kiṭɔ waakɛnda bala ḍwoṭi wyetkɛn oŋkanda on Juaŋ ona tolan daaŋji daŋa cɔnnɛ Cɔlamany. 13Ɔci maka borayɛ, ɛkkɛn magga ñoodi i Ma Kiṭɔ amaam budan bɛɛ, acaan ɛkkɛn buayi. Yeti ɛkkɛn bala poŋi gɔki agi maka neeni ɛkki pwadgɔ. 14Yeti maka coŋin gɛɛg jyeti Yaccuti, ɔci polla tolan ati Ma Kiṭɔti aŋi maka ne cyɛɛlɔ, maka ‘uayi ɔci maka moongo. 15Ɔci oŋkanda maka waakɛn yiegdi ɛkkɛn ootan ma bora te oorgti, ɔci eetan ḍurtan ma pɔɔk toŋkɛnti te aŋgann ɔci te aarann moki, aŋka ne Butruc gordi pɔɔjɔyɛ, ɛkkɛn buagɔn ṭiebji ɛkɛ ɔga maka waakɛn yeyinti neeni aŋka ɛkkɛn waakɛn pwaddi. 16Ɔci maka bala ban Urcaliim toŋkɛtiyɛ, ɛkkɛn bɛɛn ḍwoṭṭinti ban Urcaliimji. Ɛkkɛn bɛɛn eccin maka waakɛn yeyin ɔci maka muogɛ jɔkin yeyin, ɔci ɛkkɛn waakɛn pwadgin waakɛnda. 17Yeti gaciic tolan ma Icrayiil i maka bala ɛkɛtiyɛ, ɛkkɛn korkɛn modɔ Cuudan Yaccuti, 18ɛkkɛn ati ɛkkɛn muogɛ ɔci ɛkkɛn eyɛ ciginji. Maka bala i gaciic tolan neeniyɛ, gena ma Cadyuciin. 19Yeti ne weenji malɛɛka gɛɛl cuonnɛ Jwaŋa Tolan, ɔci cigin tukɛ pɔŋnɛ, ɔci ma koonɛ malɛɛka bora, ɔci ɛkɛ gɔkcin mati agi, 20“Ɔgdɛ ooddɛ yɔɔttɛ on Juaŋ ona tolanji ma myettɛ te jyek Juaŋ jyeka tɛɛtki ma neeni waakɛnda.” 21Ɔci ne ɛkkɛn tieŋki jyeka neeniyɛ, ɛkkɛn ati on Juaŋ ona tolanti te tinnɔ, ɔci ɛkkɛn bala loṭi ma moki. Ɔci gaciic tolan ma Icrayiil iki maka balki iki ɛkɛyɛ, ɛkkɛn wyetkɛn ḍɔɔlɛ nona ne cyɛɛlɔ, ɔci ɛkkɛn borcin maka gɔṭi jiekti. Ɔci ɛkkɛn borcin cyekin ma Icrayiilti waakɛnda daŋkun. Ɔci ɛkkɛn ma gɛɛg cuuñɛ ciginji aŋka ma ootan bora te ciginji aŋka ɛkkɛn eetan nona ma wyetkɛn ḍɔɔlkitiy. 22Yeti ne bɔlin atki ɛkkɛntiyɛ, ɛkkɛn mɔkci jiju bɛɛ, ɔci ɛkkɛn dɔɔkkin dɔki nona maka ɛkkɛn cuuñkiy. Ɔci ɛkkɛn ma myetkɛ agi, 23“Ɔɔn cigin mɔŋnɔn tuggɛ a uulgin. Ɔci maka gɔṭi ciginyɛ, ɛkkɛn bala yɔdi kɛɛy gɔṭi cigin. Ɔci ne ɛkkɛn cigin tuggɛn pɔkkitiyɛ, ɔɔn gɔrnɔn jiju, ɔci menga bala bɛɛ.” 24Ɔci ne ḍuaŋa bɔlin on Juaŋ ona tolan ɔci gaciicin ḍwaŋin ma Icrayiil tieŋki jyeka neeniyɛ, ɛkkɛn tieki, ɔci ɛkkɛn bala gɔki agi, “Aa, cca cca cca, naŋka neeni baadi men boki?” 25Ɔci men gɛɛl bɛɛn ɔci ɛkkɛn myennɛ agi, “‘Uaya olnɛ ɛkkɛ ciginjiyɛ, ɛkkɛn bala yɔdi on Juaŋ ona tolanji loṭi mako.” 26Ɔci ḍuaŋa bɔlin ɛkɛ ati i bɔlin aŋka ɛkkɛn ma dɔɔtan moki. Ɔci ne ɛkkɛn ma ookitiyɛ, owwɛ te ywobji moki bɛɛ, acaan ɛkkɛn buayi dita ɛkkɛn yeptan ma te gwoyi noktan. 27Ɔci ne ɛkkɛn ookiti mayɛ, ɛkkɛn yɔɔtci ma maka gɔṭi jiek ñomgɛnti. Ɔci gaciic tolan ma Icrayiil tooccin ɛkkɛnti agi, 28“Kana ɛkkɛ myetkɛ ɔɔn doki ka naa ɛkkɛ loṭɛ ma te jyek mena neeni moki bɛɛ? Ɔci acca jyeka loṭɛ ɛkkɛ ma neeniyɛ, ati ban Urcaliim konɛti warda. Ɔci ɛkkɛ buagɛ dala jyek lyen Yaccu aga jyek ɔɔn aŋka jiek bɛya ɔɔn wyetkɔtɛ?” 29Ɔci Butruc ɔci maka pookɛn a Cuudan Yaccu neeniyɛ, ɛkkɛn gɔkcin ṭwokcin mati agi, “Hay ɛkkɛ, ɔɔn buagɔn noŋdɔn ba jyek ma baan budan bɛɛ. Ɔɔn buagɔn noŋdɔn ba jyek Jwaŋa Tolan. 30Gɔṭṭɛ, Yaccu neeniyɛ, ɛkɛ ŋaamnɛ ɛkkɛ ñaalɔ ɔci noŋŋɛ ɛkkɛ. Ɔci Jwaŋa Tolan Jwaŋ yɔrg ikinyɛ, Yaccu jɔɔlnɛ ñaalɔ te koolji tɛɛti moki. 31Ɔci ɛkɛ naŋŋɛ Jwaŋa Tolan aŋi mena tolan, ɔci coonnɛ Juaŋ taaŋɛti taaŋŋa byerɔn. Ɛkɛ naŋŋɛ Juaŋ a Mena Wɛɛyi ikin, ɔci ɛkɛ moki a Mena Yuoci ikin. Ɔci a ɔŋŋiyɛ, ɛkɛ yaakinti noŋdi aŋka ma Icrayiil yomgɛn wiakti te nɔji ɛkkɛn, ɔci ɛkɛ yaakinti ma Icrayiil bɔɔktɛ te nɔji ɛkkɛn aŋka jyek nɔji ɛkkɛn baadi. 32Maka noŋdi ba jyek Jwaŋa Tolanyɛ, Juaŋ ɛkkɛn ‘wondɛ Boŋ ɛkɛ. Ɔci Boŋ ɛkɛ neeniyɛ, ɛkkɛn nɔɔttɛ te naŋki Yaccu. Ɔci ɔɔn daŋkun ɔɔn balgɔn mietɔn ma te naŋki Yaccu daŋkun.” 33Ɔci ne Maka Gɔṭi Jiek tieŋki jyeka neeniyɛ, ɛkkɛn looñi Cuudan Yaccuti ne tolan, ɔci ɛkkɛn buagɔn ɛkkɛn noktan. 34Yeti men ma Pɛriciin gɛɛl bala i Maka Gɔṭi Jiek neeni ɛkɛ yenti Gameelyal. Ɛkɛ a mena loṭi ma te jyek ganuun. Ɔci ma waakɛnda gɔki agi ‘wana neeni pwadɔ katan. Ɔci Gameelyal gɔkcin agi, “Dala maka neeni kaatti bora lakun ne ḍiɛran ṭɔɔlɛ.” 35Ɔci ne ɛkkɛn kaacki borayɛ, Gameelyal gɔkcin mati agi, “Hay! Ɛkkɛ ma Icrayiil, woŋgɔ tiittɛ te naŋka naŋdɛ ɛkkɛ ‘uaya neeniti neeni. 36Te baaṭi ‘uan gɛɛl bala yenti Tudac. Ɛkɛ gɔki agi ɛkɛ agji mena tolɔ, ɔci ma gɛɛg bootcin ɛkɛti a ḍiɛkan bɛɛ, bala ba miyyan ne ŋaanɔ (400). Yeti ne baaṭi Tudac nogɛ mako, ɔci maka bootcin ɛkɛti neeniyɛ, ɛkkɛn cyɛnŋin jitin, ɔci jyek Tudac ḍakcin budan. 37Ɔci ne baaṭi moki ne ma Ḍɔɔm balki kieki ma yengɛnyɛ, mena parɛ gɛɛl bala yenti Yahuuja. Ɛkɛ bɛɛn te ban Jaliil, ɔci ma gɛɛg tieŋŋin jyek ɛkɛ ɔci bootcin ɛkɛti. Ɔci ne baaṭi ɛkɛ ḍakcin daŋkun, ɔci maka bootcin ɛkɛti neeni cyɛnŋin jitin moki. 38Ɔci acca ‘ya ɛkkɛ myettin, naa ɛkkɛ noŋdɛ genga ‘uaya neeniti bɛɛ. Ɛkkɛn daldɛ. Kan jyek ɛkkɛn neeni bɛɛn te yomg ma baanti budanyɛ, jyek ɛkkɛn ḍakti budan. 39Yeti kan jyeka neeni bɛɛn te Jwaŋa Tolantiyɛ, ɛkkɛ yaaktɛti 'uaya neeni yɔddɛ ñin bɛɛ, dala ɛkkɛ woŋgɔ tiittɛ! Ɛkkɛ aŋka waakɔ woottɛ noowɛ i Jwaŋa Tolan.” 40Ɔci ma tieŋŋin jyek Gameelyal ɔci ɛkkɛn Cuudan Yaccu borkɛ, ɔci ɛkkɛn ḍwayɛ, ɔci ɛkkɛn gɔkcin ɛkkɛnti agi, “Naa ɛkkɛ loṭɛ ma te jyek Yaccu moki bɛɛ!” Ɔci ne ɛkkɛn jiek ḍaakkitiyɛ, ɛkkɛn ma pɔkkɛ. 41Ɔci ne ɛkkɛn kooki bora te non Maka Gɔṭi Jiekyɛ, ɛkkɛn yomgɛn ñɔɔna ñɔɔn acaan taab bɛɛn ɛkkɛnti te jyek Yaccu. 42Ɔci ɛkkɛn jyek Yaccu daljɛ bɛɛ. Ɛkkɛn bala loṭi ma oŋkanda ɔɔn. Ɛkkɛn bala loṭi ma on Juaŋ ona tolan ɔci oorga pookɛnti daŋkun te jyek Yaccu Kiṭɔ.

will be added

X\