Naŋki Cuudan 4

1Ɔci ne Butruc ɔci Yɔhanna balki gɔkki mati a ɔɔnyɛ, gaciicin ma Icrayiil bɛɛn i ḍuaŋa bɔlin on Juaŋ ona tolan, ɔci ma Cadyuciin da bɛɛn iki ɛkkɛn. 2Acaan ɛkkɛn yomgɛn yeyɔ te jyeka lorki Cuudan ne yyɛɛwɔ neeniy. Acaan ɛkkɛn gɔkcin mati agi Yaccu jɔŋŋin ñaalɔ te koolji tɛɛti moki. Jyeka neeni mieti agi maka tuun yaakinti jɔŋdi ñaalɔ tɛɛti moki. 3Ɔci Cuudan neeni muogɛ ma ɔci ḍuaccɛ ma ciginji, ɔci niini ne liidɔ acaan oŋ utcin doki. 4Yeti maka tieŋŋin jyek ɛkkɛn neeniyɛ, jyeti a ḍiɛkan bɛɛ, a ɔŋŋi Ma Kiṭɔ bala ciɛñ a ciɛñi ne coŋki bala ba alpn ne dɔɔyɔ (5,000) ɔɔn. 5Ɔci ne liidɔ maka cyekin ɔci maka ḍwaŋin ma Icrayiil ɔci maka loṭi ganuun Juaŋ ɛkkɛn wyetkɛn ḍɔɔlɛ ban Urcaliim. 6Ɔci Anac gaciic tolan ma Icrayiil, ɔci Kayapac, ɔci Yɔhanna, ɔci Alɛkcaandar, ɔci ma gaciic tolan bala i ɛkkɛn daŋkun. 7Ɔci Cuudan Yaccu owwɛ ma ɔci yɔɔtci ɛkkɛn ma ñomgɛnti, ɔci maka gɔṭi jiek tooccin ɛkkɛnti agi, “Ɛkkɛ yaakɛti naŋka neeni a ɔki? Naŋka neeni naŋŋɛ ɛkkɛ te yenti menɛ yeti?” 8Ɔci Butruc acaan ɛkɛ yomɛ kuumi te Boŋ Jwaŋa Tolanyɛ, ɛkɛ gɔkcin mati agi, “Maka ḍwaŋin ɔci maka cyekin, tieŋdɛ! 9Kan ɛkkɛ toocɛ ɔɔnti te naŋka mena a puon warɛ pwanni neeniyɛ, dala ŋeeddɛ ɛkkɛ naŋka neeni bɛɛn te aŋɛ. 10Dala ŋeeddɛ ɛkkɛ, ɔci dala ŋeettan ma Icrayiil waakɛnda ‘wana neeni warɛ pwani te yenti Yaccu Kiṭɔ men ma Najarɛt. Yaccu neeniyɛ, ɛkɛ a mena ŋaamnɛ ɛkkɛ ñaalɔy, yeti ɛkɛ luolnɛ Jwaŋa Tolan ñaalɔ te koolji tɛɛti moki. Ɔci te naŋki ɛkɛ neeniyɛ, aŋka ‘wana neeni bala yɔɔd ɛkkɛ ñomgɛti warɛ pwanni. 11A ɔɔnyɛ, bala ba jyeka guaŋŋɛ Daawud te baaṭi agi, ‘Guonan guaktan maka cɔti oorg agi ɛkta yaayɔ neeniyɛ, ɛkɛ aŋi guonan pwadan on warɛti doki? Ɔci ɛkkɛ woodgɔ agɛ maka yookɔn te ɛkɛy.’ 12Ɔci yɔɔd bɛya te mena parɛ gɛɛlti bɛɛ, yeti ɛkɛ ikin ‘wonnin yɔɔd te Yaccu parɛ. Acaan Jwaŋa Tolan ikin ‘wonnin yenta parɛ gɛɛl bala baan wɛɛn warda aŋka ikin yɔɔtin ɛkɛ bɛɛ.” 13Ɔci ne ma gɔrki Butruc ɔci Yɔhanna yomgɛn tɛɛki a tɛɛnyɛ, ma korkɛn buañi noono, acaan ŋeecɔn ɛkkɛn Butruc ɔci Yɔhanna neeni, ɛkkɛn lalɛ ma te worgan waakɛnda bɛɛ. Ne ma tieŋki jyek ɛkkɛnyɛ, ŋeecɔn ɛkkɛn ɛkkɛn ñingɛn tɛɛcin, acaan ɛkkɛn bala i Yaccu oŋkanda. 14Ɔci ne ɛkkɛn gɔrki ‘wana warɛ pwani neeni ne baali yɔɔtki iki Butruc ɔci Yɔhannayɛ, ɛkkɛn yaakinti gɔki gena yaayan gɛɛl ɛkkɛnti moki bɛɛ. 15Ɔci ne Butruc ɔci Yɔhanna cuoñkiti ma bora te nona ɛkkɛn noŋki jiekyɛ, ɔci ma bala gɔwwi yɔtin pookɛn agi, 16“Ikin ‘uaya neeni naŋtin a ɔki yeti? Acaan naŋka tɛyan naŋka ñyecki ma naŋɛ ɛkkɛn yuarɛ maka ban Urcaliim waakɛnda. Ɔci ikin yaakinti tiekin te naŋka neeni bɛɛ. 17Dala ikin gɔktin ‘yertin ɛkkɛnti ne pwadan aŋka ɛkkɛn gɔkti maggati te jyek Yaccu neeni moki bɛɛ. Ɔci kan a ɔŋŋiyɛ, jyeka neeni ooddi baan warda moki bɛɛ.” 18Ɔci ɛkkɛn Butruc ɔci Yɔhanna borki orɔ, ɔci ɛkkɛn gɔkcin ɛkkɛnti agi, “Naa ɛkkɛ gɔktɛ mati te yenti Yaccu moki bɛɛ.” 19Yeti Butruc ɔci Yɔhanna, ɛkkɛn ṭwokcin gɔkcin ɛkkɛnti agi, “Gɔṭṭɛ, a gena pwatcin Jwaŋa Tolantiy, ɔɔn noŋdɔn ba jyek ɛkkɛ, walla ɔɔn noŋdɔn ba jyek Jwaŋa Tolan? 20Ɔɔn yaakɔnti ciedɔn lieda te naŋka yuarŋɔn ɔɔn neeni bɛɛ, ɔci te jyeka tieŋnɔn ɔɔn neeni bɛɛ.” 21Ɔci ne ɛkkɛn Butruc ɔci Yɔhanna iirkiti mokiyɛ, ɛkkɛn gɔkcin ɛkkɛnti agi, “Ɔgdɛ ooddɛ.” Ɛkkɛn gɔki a ɔɔn acaan pɔya noŋki ɛkkɛn ywobji mati bala bɛɛ. Ɛkkɛn buayi maka pookɛn acaan ma waakɛnda bala jieyi Juaŋ te naŋka naŋɛ Butruc yaakkɛn i Yɔhanna neeni. 22’Wana warɛ pwani te naŋka tɛyan naŋka ñyecki ma neeniyɛ, yuong ɛkɛ bala ñamu te yuonga a ma baan ne yyɛɛwɔ (40). 23Ɔci Butruc ɔci Yɔhanna ne ɛkkɛn pɔkkiti mayɛ, ɛkkɛn dɔɔki nona mung ɛkkɛnti, ɔci ɛkkɛn ma myetkɛ te jyeka guagɛ gaciicin ḍwaŋin ma Icrayiil ɛkkɛnti, ɔci te jyeka guagɛ cyekin ɛkkɛnti. 24Ɔci ne mung ɛkkɛn tieŋki jyek ɛkkɛnyɛ, ɛkkɛn cɔkcin Jwaŋa Tolanti te tuka ne cyɛɛlɔ waakɛnda agi, “Ciɛggɔn, i balki war tɛɛn waakɛnda, i a mena cɔti pɔllo, ɔci ṭɛɛro, ɔci galŋin, ɔci waka bala ɛkkɛn jitkɛnti neeni waakɛnday. 25Ɔci i a mena gɔki te Boŋ i te tuk yɔr ɔɔn Daawud kɛɛngɔn i, ne ɛkɛ gɔŋni mati agi, ‘Keedin Pookɛnyɛ, jyek ɛkkɛn a jyek ywobji ogo? Oŋ ma bala gɔwwɔ yɔtin te jyeka tobin jyeka budan neeni ogo? 26Ḍuaŋan ḍwaŋin baan wardayɛ, ɛkkɛn noŋi jyek tommo. Ɔci maka a wyetkyɛ, jyek ɛkkɛn ñaagɛyɔ te tomi agi noowinti iki Juaŋ ɔci Mena Muonɛ Juaŋ Bora daŋkun.’ 27Ɔci acca awarɛ Hiruuduc Antipac ɔci Bilaatuc Buntiyɛ, jiek ñaagɛyɔ bana neeniti wɛnni i Keedin Pookɛn ɔci i kɛɛn Icrayiil daŋkun agi noowinti i Yaccu kɛɛngɔn i mena yomɛ bɔwan Mena Muonɛ Juaŋ Boray. 28Ɛkkɛn wyetkɛn ḍɔɔlɛ aŋka noŋdi ba naŋka ḍaaŋŋi i te war tɛɛn i ɔci ba yom i agi bɛɛdɔy. 29Ɔci acca Ciɛggɔn, dala i tieŋja jyeka ‘yerki ma ɔɔn neeni, ɔci dala ɔɔn kɛɛnk i magdɔn acca aŋka ɔɔn mietɔn ma te jyek i te yoma tɛyan oŋkanda ɔɔn. 30Ɔci dala i maka waakɛn yeyin ywaŋa, ɔci dala ma i noŋdi naŋka tɛyan naŋka ñyecki ma iy. Dala ɛkkɛn noŋdi naŋka neeni te yenti Yaccu mena a kɛɛngɔn i kɛɛgɔn yomɛ bɔwany.” 31Ɔci ne cɔŋŋa neeni baaniyɛ, ona cɔkki ɛkkɛn neeniyɛ, warɛ ḍiedan. Ɔci Boŋ Jwaŋa Tolan bɛɛn ɛkkɛnti waakɛnda. Ɔci ɛkkɛn yomgɛn kuumi te Boŋ Jwaŋa Tolan, ɔci ɛkkɛn bala mieti ma te jyek Jwaŋa Tolan te yoma tɛyan. 32Ɔci maka jyeti Yaccuti neeniyɛ, ɛkkɛn waakɛnda yomg ɛkkɛn a yoma ne cyɛɛlɔ, ɔci paŋŋa paŋtan ɛkkɛnyɛ, a paŋŋa ne cyɛɛlɔ. Ɔci kan waak bala ɛkkɛntiyɛ, ɛkkɛn menga gɔki agi gena wak ɛkɛ parɛ bɛɛ. Waak waakɛnda a wak ɛkkɛn waakɛnda. 33Ɔci Cuudan Yaccu ɛkkɛn ma myetkɛ te jyek jɔllin Yaccu jɔlni ñaalɔy. Ɛkkɛn ma myetkɛ a ɔɔn te yoma tɛyan, ɔci Jwaŋa Tolan yomɛ pwanna pwani ɛkkɛnti waakɛnda. 34Ɔci ɛkkɛn men gɛɛl bɔw bɔw bɛɛ, acaan ɛkkɛn magga balki oorg ɔci yelko. Ɔci a oŋki ɛkkɛn yiel gɛɛl wiɛltanyɔ, ɔci oŋŋa parɛ moki ɛkkɛn on gɛɛl wiɛltanyɔ, 35ɔci ɛkkɛn bilka neeni eetan nona Cuudan Yaccuti, ɔci Cuudan Yaccu neeniyɛ, kan ma gɛɛg bɔw bɔw te bilkyɛ, ɔci ɛkkɛn ma kɛntan. 36Ɔci maka wak ɛkkɛn wiɛljiyɔ neeni gɛɛl bala yenti Yuocip. Ɛkɛ a kɛɛn Laawi. Ɛkɛ bɛɛn te Kaŋ Cayprac. Ɛkɛ okki Cuudan Yaccu yenta parɛ agi Barnabac. (Ɔci Barnabac te tuk Mabaan agi, “Mena Šeyi May.”) 37Ɔci Barnabac neeni, ɛkɛ yel ɛkɛ wiɛllɛ, ɔci bilk eññɛ ‘wonnɛ Cuudan Yaccu.

will be added

X\