Naŋki Cuudan 3

1Ɔci oŋ gɛɛlti ne oŋ waŋɛ warɛ yiɛnnɛyɛ, Butruc ɔci Yɔhanna ɛkkɛn bala ati ooddi on Juaŋ ona tolan aŋka cɔkti Juaŋti. 2Ɔci ma gɛɛg bala ḍuoṭi mena puono. Ɔci ‘wana a puon neeniyɛ, ɛkɛ a puon wona jiennɛ mɛɛgɛn. Ɔci ɛkɛ eetan ma ḍurtan oŋkanda ḍuattan ma Kaañ Tuka Pwadanti aŋka ɛkɛ ñwoyi waak ne ma bɛɛti on Juaŋ ona tolany. 3Ne ɛkɛ gɔrni Butruc yaakkɛn i Yɔhanna noŋki kaatti on Juaŋ ona tolanyɛ, ɛkɛ tooccin ɛkkɛnti te waako. 4Ɔci Butruc bala gɔṭi ɛkɛ te waŋɛ, ɔci Yɔhanna daŋkun bala gɔṭi ɛkɛ te waŋɛ, ɔci Butruc gɔkcin mena puonti agi, “Gɔṭṭa ɔɔnti wɛnni.” 5Ɔci mena ñwoyi waak neeni gɔrcin ɛkkɛnti, ɔci ɛkɛ bala poŋi gɔki agi ɛkɛ ‘wondɛti ma waagga kaapun. 6Yeti Butruc gɔkcin ɛkɛti agi, “‘Ya balka ḍeyyan gɛɛg aŋka ‘wondin i bɛɛ. Yeti gena bala ‘yatiyɛ, i ‘wondin. ‘Ya gɔkka iti te yenti Yaccu men ma Najarɛt, jɔlla ñaalɔ pocca woono!” 7Ɔci Butruc mena puon neeniyɛ, muŋŋɛ te bieŋɛ, ɔci ɛkɛ luolnɛ ñaalɔ. Ɔci ɛkɛ ciegɛ ɔci ṭuamkɛ tɛɛn doki. 8Ɔci ɛkɛ kuawin ñaalɔ ne pɛñan, ɔci ɛkɛ yaakinti woon parɛ. Ɔci ɛkɛ ati kaaccin orɔ on Juaŋ ona tolan iki ɛkkɛn. Ɔci ɛkɛ bala ati a woon ne ḍyɛṭ ṭɔɔlɛ gɔ moki ɛkɛ kuawi ñaalɔ ɔɔn. Ɔci ɛkɛ gɔki agi Jwaŋa Tolan pwanni agi pwani katan. 9Ɔci ne ma waakɛnda gɔrki ɛkɛ ati a woon parɛyɛ, ɔci ne ɛkkɛn tieŋki ɛkɛ gɔki agi Juaŋ pwadɔyɛ, 10ɛkkɛn poni ne tolan, ɔci ɛkkɛn korkɛn buañi ne pɛñan te naŋka neeni, acaan ‘wana neeni ñiyɛ ɛkkɛn gena mena bala ciyi kaañ tukɛti ñwoyi waaky. Kaañ tuka kaatti ma on Juaŋ ona tolan neeniyɛ, ma boṭi agi Kaañ Tuka Pwadan. 11Ɔci ne mena ñwoyi waak neeni baali atki i Butruc ɔci Yɔhanna menyɛ, ɔci ma waakɛnda yiŋi ḍworcinti ɛkkɛnti bora daaŋji daŋa cɔnnɛ Cɔlaman on Juaŋ ona tolan warɛti acaan ɛkkɛn korkɛn buañi noono. 12Ɔci ne Butruc gɔrni a ɔɔnyɛ, ɛkɛ gɔkcin ɛkkɛnti agi, “‘Uay ma Icrayiil, ɛkkɛ korkɔ buayi noon te naŋka neeni a ɔɔn ogo? Ɛkkɛ gɔṭɛ ɔɔn ḍyɛrdintɔ a ɔɔn bala ba ɛkkɛ poŋɛ gɔkɛ agi ɔɔn ‘wana neeni ywaŋŋɔnyɔ ɔɔn pookɔ te naŋki ɔɔn naŋka tɛyan aŋka ɛkɛ yaakiti woon wanna ogo? 13Jwaŋa Tolan noŋjin, ɔci yenti kɛɛngɔn ɛkɛ Yaccu toli doki. Jwaŋa neeniyɛ, gena Jwaŋ yɔrg ikin Abrahim ɔci Icaak ɔci Yaakub. Yeti Yaccu neeniyɛ, ɛkɛ ‘wonnɛ ɛkkɛ ma byeŋkɛnti, ɔci ne ɛkkɛ attɛ Bilaatuc ñamɛti, ɔci ne ɛkɛ buagi Yaccu pɔktɛyɛ, ɛkkɛ yookɛ te pɔkkin ɛkɛ. 14Awarɛ, ɛkkɛ yookɛ te mena pwadan ɔci ɛkkɛ gɔŋnɛ Bilaatucti agi mena noki ma gɛɛl aŋka pɔkka. 15Ɔci te jyek ɛkkɛyɛ, mena tɛɛtki ma aŋka nogɛ ma doki. Yeti ɛkɛ luolnɛ Juaŋ ñaalɔ te koolji, ɔci ɛkɛ yuarŋɔn ɔɔn tɛɛti moki, ɔci acca ɔɔn mietɔn ma te jyek jɔŋŋin ɛkɛ jɔŋni ñaalɔ neeni. 16’Wana gwaldɛ ɛkkɛ ɔci ŋeejɛ ɛkkɛ neeniyɛ, ɛkɛ warɛ pwani te yenti Yaccu mena noŋŋɛ ɛkkɛ neeni ne ɛkɛ jyetti yenti ɛkɛtiy. Ɛkɛ warɛ pwani warda. 17“Modg ɔɔn, yeti ŋeej ‘ya ne ɛkkɛ balgɛ noŋɛ naŋka naŋŋɛ ɛkkɛ Yaccuti neeniyɛ, naŋka neeni ŋeejɛ ɛkkɛ ne pwadan bɛɛ, ba ma ɛkkɛ maka ḍwaŋin daŋkun, naŋka neeni kwoyɔn ɛkkɛn moki. 18Yeti a ɔŋŋiyɛ, jyeka guaŋŋɛ Jwaŋa Tolan te tugi maka a bɔwan Juaŋ te baaṭi dɛññin bora, ne ɛkkɛn gɔkki te tuk Jwaŋa Tolan agi Kiṭɔ wardan eeddɔ. 19Acaan a ɔŋŋiyɛ, dala ɛkkɛ yomgɔ wiakti te nɔji ɛkkɛ, ɔci waakɔ yaldɛ aŋka nɔji ɛkkɛ eedɛ Juaŋ ɔntɔ te ɛkkɛti. 20Ɔci Juaŋ noŋdi kanŋa tolan ɛkkɛti. Ɛkɛ oŋ Yaccu mena muonɛ ɛkɛ bora neeni cuondɛ dɔɔdɛ wɛnni moki ba jyeka naŋŋɛ ɛkɛ te ñamu dokiy. 21Yeti acca ɛkɛ ciyi ñaalɔ kɛɛy oŋŋa Juaŋ waak ywaŋdɛ waakɛnda aktɛ waka wonkɛny. Ɛkɛ waak ywaŋdɛ ba jyeka guaŋŋɛ Jwaŋa Tolan te baaṭi ne ɛkɛ gɔki jyeka neeni te tugi maka a bɔwan ɛkɛ bɔwan pwadiny. 22Muuca gɔkcin agi, ‘Juaŋ ɛkkɛ ‘wondɛ bɔwa gɛɛl te ma ɛkkɛti bala ba ne ɛkɛ ‘ya naŋŋata a bɔwa wanna ɔɔn. Dala ɛkkɛ tieŋdɛ jyeka guagdɛ ɛkɛ waakɛnda. 23Ɔci kan men gɛɛl tieŋdi jyek bɔwa neeni bɛɛyɛ, ɛkɛ kyɛptan ma ɔntɔ te Ma Kiṭɔti ɔci ɛkɛ ḍakti.’ 24“Camwil ɔci maka bɔwan maka boottin Camwil ŋoyɛti waakɛnda, ne ɛkkɛn gɔkki jyeka neeniyɛ, ɛkkɛn gɔki te oŋka acca neeni. 25Ɔci waka guagɛ bɔwan Jwaŋa Tolan te baaṭiyɛ, guagɛ ɛkkɛn te ɛkkɛ daŋkun, ɔci jyeka naŋɛ Jwaŋa Tolan i yɔrg ɛkkɛyɛ, dɛññin bora ɛkkɛti doki. Gena jyeka guaŋŋɛ Juaŋ Abrahimti ne Juaŋ gɔki agi, ‘Naŋka pwadan bɛya kɛɛn wardati te mena bɛya te war itiy.’ 26A ɔŋŋi Jwaŋa Tolan ne ɛkkɛ ‘wondɛ kɛɛngɔn ɛkɛyɛ, ɛkɛ cuonnɛ ɛkɛ ɛkkɛti te ñamu doki aŋka ɛkɛ yom ñɔɔn cuondɛ ɛkkɛti, ɔci ɛkkɛ yaldɛyɔ ɛkɛ te naŋki ɛkkɛ naŋka yeyin.”

will be added

X\