Naŋki Cuudan 28

1Ɔci ne ɔɔn tonnɔn bora te galŋjiyɛ, ɔɔn myetkɔn ma agi kaŋ wyeñɛ neeniyɛ, gena kaŋ wyeñɛ bartan ma a Malta. 2Maka ciyi nona neenitiyɛ, ɛkkɛn yomgɛn pɔkki ɔɔnti, ɔci ɛkkɛn ɔɔn makkɔn. Ɛkkɛn maañ oljiti, ɔci ɛkkɛn gɔki ɔɔnti agi ma bɛɛdɔ oottɔ maccu. Ɛkkɛn ɔɔn orkinti maañ a ɔɔn acaan ñaal bala liɛbi ɔci jwami luy luyo. 3Ɔci Buuluc bala lyemi jang daŋkun. Ɔci ɛkɛ jang oonɛ, ɔci ne ɛkɛ jang olnɛ maccuyɛ, kaaŋ bala jangti, ɔci ne jang waakɛn myɛlki te maañyɛ, ɔci kaŋa neeni kooyin bora te jangti ɔci Buuluc kaññɛ bieŋɛti, ɔci kaaŋ bala cual te ɛkɛ bieŋɛti. 4Ɔci maka ciyi nona neeniti, ne gɔrki kaŋa neeni baali cuali te men bieŋɛti a ɔɔnyɛ, ɛkkɛn bala gɔwwɔ yɔtin pookɛn agi, “Hay, ‘wana neeni ɛkɛ nokkin menga. Ne ɛkkɛn bɛɛki te galŋjiyɛ, ɛkɛ ḍakcin galŋji bɛɛ, yeti acca ɛkɛ tuwa, kaapun.” 5Yeti Buuluc kaaŋ byɛrnɛ maccu, ɔci kaaŋ ɛkɛ yannɛ bɛɛ. 6Ɔci maka ciyi nona neenitiyɛ, ɛkkɛn bala gɔṭi Buuluc, ɔci ɛkkɛn bala poŋi gɔki agi ɛkta wardan wiɛndɔ wardanda ɔci ḍɛmdɔ tuudɔ ne pɛñan kaapun. Ɔci ne ɛkkɛn ɛɛni gwali Buuluc a ɔɔnyɛ, ɔci ne gena yaayan gɛɛl bɛɛni ɛkɛti bɛɛyɛ, ɛkkɛn jiek aagɛyɔ agi ɛkta agi juaŋo! 7Ɔci ḍuaŋa tolan ḍuaŋa maka ciyi kaŋ wyeñɛti neeniyɛ, ɛkɛ yenti Poblyac. Ɔci kaŋ wyeñɛ neeniyɛ, noon gɛɛl a non Poblyac. Non ɛkɛ neeniyɛ, cualcinti nona ɔɔn tonnɔn bora te galŋji. Ɔci ɛkɛ gɔkkin ɔɔnti agi ɔɔn bɛɛdjɔn ban ɛkɛ. Ɔci ɔɔn attɔn ban ɛkɛ. Ɔci ɔɔn niinnɔn ban ɛkkɛn nink ne ḍoogɔ, ɔci ɛkɛ yomɛ pwana pwani ɔɔnti. 8Ɔci wey Poblyacn bala niin iñɔ warɛ yaayɛ. Ɛkɛ warɛ myɛl myɛlo, ɔci ɛkɛ ‘yɛɛd a yimg moki. Ɔci Buuluc ati ḍieŋjin ɛkɛti, ɔci ne ɛkɛ cɔŋni Jwaŋa Tolantiyɛ, ɔci ɛkɛ byeŋkɛ tannɛ men warɛti, ɔci mena neeniyɛ, ywaŋŋɛ ɛkɛ doki. 9Ɔci acaan mena neeni ywaŋŋɛ Buuluc a ɔɔnyɛ, maka pookɛn bɛɛn ɛkɛti daŋkun. Ɛkkɛn a maka waakɛn yeyin. Gena maka ciyi kaŋ wyeñɛti. Ɔci Buuluc bala yɔŋi ɛkkɛn waakɛnda daŋkun. 10Ɔci maka neeniyɛ, ɛkkɛn yomgɛn pwanna pwani ɔɔnti, ɔci ɛkkɛn ɔɔn ‘woñkɔn waka coŋin neeni budan. Ɔci ne ɔɔn jɔŋnɔn te aŋanyɛ, ɛkkɛn ɔɔn ‘woñkɔn waka coŋin moki aŋka mokɔn ɔɔn waakɔ yomɔ pɔɔjɔ. 11Ɔɔn balgɔn ciyɔn kaŋa neeni wyeñɛti ponk ne ḍoogɔ, ɔci ne ponka neeni bɛɛki borayɛ, ɔɔn taamnɔn murkati moki. Murka tolan neeniyɛ, ɛkɛ a murka maka ban Alɛkcaandriya. Ɔci yenti ɛkɛ a Jɔkin A Yuonko. Ɔci murka tolan neeniyɛ, ɛkɛ bala yɔɔd kaŋ wyeñɛti te wɛɛñi wyeñɛ 12Ɔci baabin tool konɛ baabin tolan ati ne ban Cirakyuc, ɔci ɛkɛ yɔɔni wɛnan noŋi nink ne ḍoogɔ. 13Ɔci ne ninka neeni bɛɛki borayɛ, ɔɔn jɔŋnɔn te bana neeniti ɔci attɔn ne ban Ḍejyom. Ɔci ṭienin ñaalɔ ne liidɔ jwami yoŋŋin te pɔya cuayati. Ɔci te ninna akki ne yyɛɛwɔ ɔɔn dɛnnɔn ban Putiiyoli. 14Ɔci aŋanyɛ, ɔɔn yɔṭṭɔn modg ɔɔn Ma Kiṭɔ gɛɛg. Ɔci ɛkkɛn bala dɛyi ɔɔn. Ɛkkɛn gɔki agi dala ɔɔn cooccɔn aŋan lakun nink ne dɔɔyɔ wyetkɛn ne yyɛɛwɔ. Ɔci ɔɔn coonnɔn ne ḍiɛran ṭɔɔlɛ ba jyek ɛkkɛn hayya ɔɔn oŋ jɔŋnɔn attɔn ban Ḍɔɔm oŋo. 15Ɔci ne ɔɔn balgɔn te yom menyɛ, modg ɔɔn ban Ḍɔɔm tieŋŋin agi ɔɔn baljɔn bɛɛdjɔn, ɔci ɛkkɛn jɔŋŋin te ban Ḍɔɔm, ɔci ɛkkɛn ma gɛɛg bɛɛn kookkin ban Apyac. Ɔci maka pookɛn gɛɛg bɛɛn kooŋnin iki ɔɔn bana balki oorg wɛlg oorga ne ḍoogɔy. Ɔci ne Buuluc maka neeni yuarti ne bɛɛtiyɛ, ɛkɛ gɔkcin Juaŋti agi pwatcin Jwaŋa Tolan. Ɔci ɛkɛ yomɛ pwanni. 16Ne ɔɔn dɛnnɔn ban Ḍɔɔmyɛ, ḍuaŋa Buuluc olnɛ ciginji bɛɛ, yeti ɛkɛ gɔki agi dala Buuluc coottɔ pardan baan kondanti on gɛɛlti, ɔci ackan gɛɛl ne cyɛɛlɔ olji ma gɔṭi ɛkɛ. 17Ɔci ne ninka ne ḍoogɔ neeni baakiyɛ, Buuluc borcin ḍuaŋan ma Icrayiil ban Ḍɔɔm agi dala ɛkki bɛɛdɔ ḍieŋdɔ ɛkɛti. Ɔci ne ɛkkɛn bɛɛki nona ɛkɛtiyɛ, ɛkɛ gɔkcin ɛkkɛnti agi, “Modg ɔɔn, ‘ya noŋi gena yaayan gɛɛl kɛɛn ikinti bɛɛ. Ɔci jyek yɔrg ikinyɛ, ‘ya jwali gɛɛl bɛɛnji bɛɛ. Yeti ne ‘ya baala ban Urcaliimji menyɛ, ‘ya ‘woñka ma ma Ḍɔɔm byeŋkɛnti, ɔci ‘ya olka ma ciginji. 18Ma Ḍɔɔm neeniyɛ, ne ɛkkɛn gɔrki jyek ‘yayɛ, ɛkkɛn buagɔn ‘ya pɔkta, acaan ɛkkɛn yɔṭi ‘ya noŋi gena yaayan gɛɛl aŋka akuuma buagɛ nokki ‘ya bɛɛ. 19Yeti ma Icrayiil yookɔn te pɔkkin ‘ya. Ɔci acaan a ɔŋŋiyɛ, ‘ya gɔkcan ḍuaŋa ṭɔɔlɛti ka dala jyek ‘ya eetan gwaldɛ ḍuaŋa tolan ban Ḍɔɔm neeni. Ne ‘ya gɔŋna a ɔɔnyɛ, ‘ya buaga gɔkca jyeka yeyin ma ikinti bɛɛ. 20Ɔci acca ɛkkɛ bornin ‘ya acaan ‘ya buaga ɛkkɛ yuardin, ɔci ikin gɔktin iki ‘ya. ‘Ya buaga ikin gɔktin iki ‘ya a ɔɔn, acaan jyeka ‘ya ḍɛɛkkati ma te jiŋgin neeniyɛ, gena jyeka kɛɛtan kɛɛn ikin ma Icrayiil neeni daŋkun.” 21Ɔci ɛkkɛn ṭwokcin Buulucti agi, “Worga gɛɛl bɛɛn ɔɔnti te ban Yahuudiya te jyek i bɛɛ. Ɔci modg ikin ma Icrayiilyɛ, ɛkkɛn men gɛɛl bɛɛn gɔki ɔɔnti te i agi i yaajji bɛɛ. 22Yeti dala i ɔɔn myettɔn te paŋŋa paŋa i neeni, acaan ŋeejɔn ɔɔn ma tɔɔmi te malla neeni baan warda.” 23Ɔci ɛkkɛn jiek naŋɛ, gena jyek oŋŋa ɛkkɛn bɛɛti gɔrti jiek iki Buulucy. Ɔci ne oŋŋa neeni bɛɛniyɛ, ma bɛɛn nona ona ciyi Buuluc. Ɛkkɛn bɛɛn a ḍiɛkan bɛɛ, kɔɔna kɔɔnno. Ɔci Buuluc bala lwoki ma te jyeka neeni te liidɔ ne oŋ unni ɔɔn. Jyeka lwogdɛ Buuluc neeniyɛ, gena jyek cyɛgji Jwaŋa Tolan. Ɔci Buuluc bala lwoki ɛkkɛn te ganuun Muuca, ɔci te worgan maka bɔwan Jwaŋa Tolan. Ɛkɛ bala ‘yeṭi ɛkkɛnti ne pɛñan aŋka ɛkkɛn jyeddi Yaccuti. 24Ma gɛɛg jyeti jyeka guagdɛ ɛkɛ neeniti, ɔci maka pookɛn gɛɛg jyeti bɛɛ. 25Ɔci ma Icrayiil ɛkkɛn jiek kɛɛbɛ jitin, maga da te jiekɛn, ɔci ɛkkɛn noŋi jyɛndi jitin ooddi baanji. Ɔci Buuluc gɔkcin jwali ṭɔɔlɛ gɛɛl ɛkkɛnti moki agi, “Oŋŋa Boŋ Jwaŋa Tolan gɔŋni yɔrg ɛkkɛti te lɛmi Icaayayɛ, ɛkɛ gɔkkin jyeka neeni awarɛ. Ɛkɛ gɔki Icaayati agi, 26‘Dala i ootta maka neeniti, ɔci gɔkca ɛkkɛnti agi, ɛkkɛ tieŋdɛ jiek a tieŋŋin oŋkanda ɔɔn, yeti ɛkkɛ yaakɛti jiek jitkɛn yuartɛ ne pwadan moki bɛɛ. Ɔci moki, ɛkkɛ gɔrtɛ a gwali oŋkanda ɔɔn, yeti ɛkkɛ yaakɛti waak yuartɛ ne pwadan moki bɛɛ. 27Dala ɛkkɛ gɔktɛ mati a ɔɔn, acaan maka neeniyɛ, ɛkkɛn yomgɛn poli doki. Ɔci ɛkkɛn jyetkɛn poli doki te tyeŋi jyek ‘ya. Ɔci ɛkkɛn woŋgɛn mitcɛti doki. Ɔci a ɔŋŋiyɛ, ɛkkɛn gɔrti te woŋgɛn moki bɛɛ. Ɔci ɛkkɛn jyetkɛn pɔktan moki bɛɛ, ɔci ɛkkɛn yaakinti jiek yuartanji yomgɛnti moki bɛɛ, ɔci ɛkkɛn waakɛn yaltan bɛya ‘yati moki bɛɛ, ɔci ɛkkɛn ywaŋdi ‘ya moki bɛɛ.’ 28“Ɔci acaan jwali Juaŋ neeni a jwalla awarɛyɛ, dala ŋeeddɛ ɛkkɛ jyeka yuoci Juaŋ ma neeniyɛ, ati Keedin Pookɛnti daŋkun cuuññɛ Juaŋ ɛkkɛnti. Ɔci ɛkkɛn yookɔn bɛɛ. Ɛkkɛn aŋka tieŋdi.” [ 29Ɔci ne ɛkɛ baali gɔki jyeka neeniyɛ, ma Icrayiil kaaccin bora, ɔci ɛkkɛn bala gɔwwɔ tyewɔ yɔtin pookɛn ne pɛñan.] 30Ɔci Buuluc bala ciyi on gɛɛlti, ɔci ɛkɛ bala ḍɔci bilk oŋkanda te ona neeni. Ɔci yuong ɛkɛ yuonga ɛkɛ cieni ona neenitiyɛ, a yyɛɛwɔ. Ɔci ne ma bɛɛki ḍieŋki ɛkɛti oŋkandayɛ, ɛkɛ yomɛ pwanna pwani ɛkkɛnti. 31Ɔci ɛkɛ bala mieti ɛkkɛn te cyɛgji Jwaŋa Tolan. Ɔci ɛkɛ bala loṭi ma te jyek Ciɛggɔn ikin Yaccu Kiṭɔ. Ɔci ɛkɛ bala loṭi ma lyɛli a lyɛllo. Men gɛɛl bala dɛyi ɛkɛ te lali bɛɛ.

will be added

X\