Naŋki Cuudan 27

1Ɔci ne ɛkkɛn jiek ḍaakkiti agi ɔɔn ootcɔn ban Ḍɔɔm te murka tolanyɛ, ɛkkɛn Buuluc ‘woñgi ḍuaŋa, ɔci maka pookɛn maka bala jiju ciginji daŋkun, ɛkkɛn ‘woñgi ḍuaŋa daŋkun aŋka gwaldɛ ɛkɛ yomu te wona ɛkkɛn ootti ban Ḍɔɔm. Ḍuaŋa neeni ɛkɛ yenti Julyac. Ackan ɛkɛ ma boṭi agi ackan ḍuaŋa tolan ban Ḍɔɔm. 2Ɔci ɔɔn taamnɔn te murka tolan gɛɛlti te ban Adramittyam. Murka neeni buagɔn woon ati ooddi boddi te waan taaŋɛ ooddi ban Ecya aŋan. Ɔci ɔɔn attɔn. Ɔci men gɛɛl balgɔn iki ɔɔn murka tolanji. Ɛkɛ yenti Ɛrictaarkoc. Ɛkɛ bɛɛn te ban Tacalunika ban Macɛdɔɔnyaji. 3Ɔci ne liidɔ ɔɔn dɛnnɔn ban Ciḍɔɔn, ɔci murka tolan yɔɔtcin iñɔ bana neeniti. Ɔci Julyac yomɛ pwatcin Buulucti, ɔci ɛkɛ gɔkcin Buulucti agi dala ɛkta ooddɔ jyɛyi iki mung ɛkki aŋka ɛkta magdi ɛkki. 4Ɔci ɔɔn jɔŋnɔn te bana neeniti, ɔci acaan jwami tol tol ɔci ɔɔn gallinjiyɛ, ɔɔn murka ṭwoŋŋɔn pɔya parɛ ati booti Kaŋ Cayprac taaŋɛti nona jwami baawiy. 5Ɔci murka tolan yɔɔtcin iñɔ bɛɛ, ɛkɛ ati ati ati ne ñamu, ɔci bala booti ban Ciliicya taaŋɛti, ɔci ban Pampiilya taaŋɛti moki. Yeti murka orcinti bonka neeniti bɛɛ, bala Galŋa Tolan yiɛŋɛji, ɔci ati ne ban Mayra ban Licyaji ɔɔn. 6Ɔci bana neenitiyɛ, ḍuaŋa murka tolan maka ban Alɛkcaandriya yuarŋɛ. Murka tolan neeniyɛ, buagɔn woon ooddi ban Ḍɔɔm. Ɔci te jyek ḍuaŋayɛ, ɔɔn taamnɔn murka tolan neeniti. 7Ɔci ɔɔn attɔn. Ɔci murka tolan ati ne pɛñan bɛɛ, ati ne maalan ṭɔɔlɛ, acaan jwami tol tol ɔci woon pwatcin bɛɛ. Ɔci ɔɔn attɔn goṭṭɔn ban Nidoc. Acaan jwami tol tol ɔci ɔɔn gallinji a ɔɔnyɛ, murka yaakinti woon a tyɛlga bɛɛ, ɛkɛ ooddi gɔ jyetci bora ɔɔn. Ɔci ɔɔn attɔn te pɔya parɛ, ɔci ɔɔn dɛnnɔn Kaŋ Kriit. Kaŋ Kriit neeniyɛ, a nona tolan. Ɔci ɔɔn attɔn boottɔn kaŋa neeni taaŋɛti nona jwami baawiy, ɔci ɔɔn goṭṭɔn noon gɛɛl bala yenti Calmɔɔnɛ. 8Ɔci ɔɔn attɔn attɔn attɔn boottɔn Kaŋ Kriit taaŋɛti moki, ɔci ɔɔn dɛnnɔn baan gɛɛl bala bartan ma a Nona Yɔɔdki Murkan Nona Pwadan. Bana neeni cualcinti ban Laciiya. 9Ɔci murka tolan yɔɔni bana bartan ma a Nona Yɔɔdki Murkan Nona Pwadan nink kɔɔna kɔɔnno. Ɔci ne ninka Gworki Ma Koñ bɛɛki bora dokiyɛ, ɔci noon ŋeejji ma aŋi ñaal jiñɛ doki, ɔci murkan yaakinti woon ne pwadan bɛɛ acaan te ñaaljiyɛ, jwami tol tolo. Ɔci Buuluc gɔkcin mati agi, 10“Hay, ɛkkɛ ‘uayo! Dala ɛkkɛ woŋgɔ tiittɛ! Gɔṭṭɛ, yuarca ‘ya woon tɛy tɛy yomɔ galŋji, kan ikin oottin ɔɔnyɛ, murka lɛɛkti dita, ɔci waka bala jiju murkaji neeni ḍakti. Ɔci ikin ma gɛɛg daŋkun ḍakti moki.” 11Yeti Julyac ḍuaŋa ackan bala gɔṭi jiek i mena nɛɛyi murka i murka weegɛn, ɔci Julyac tieŋŋin jyeka guagdɛ Buuluc neeni bɛɛ, yeti ɛkɛ tieŋŋin gena jyek murka weegɛn i mena nɛɛyi murkay. 12Ɔci acaan nona yɔɔdi murka tolan neeni pwad pwad te coodi ñaal jiñɛ bɛɛyɛ, maka coŋin gɔki agi dala murka ooddɔ ɔɔn, ma pottɔ woon ɔɔn, ɛkkɛn buagɔn dala murka ooddi ne bana yenti Pinikc aŋka ɛkkɛn yuoddi iñɔ bana wannati. Ɔci ban Pinikc neeniyɛ, ɛkɛ a nona yɔdki murkan Kaŋ Kriit taaŋɛti te kaŋ taaŋŋa yordi pɔya nona luutti iñɔ oŋy. 13Ɔci ne jwami yoŋni ne ḍiɛran ṭɔɔlɛ te pɔya cuayatiyɛ, maka neeni ɛkkɛn gɔki agi, “Ahaa, acca woon pwanna pwanno. Ikin dɛntin ne pɛñan.” Ɔci gena cyɛgan luuttan ma iñɔ aŋka yɔɔddi murkayɛ, bala iñɔ pietin, ɔci ɛkɛ nɔɔbbɛ ma ñaalɔ te pietin, ɔci ḍuacci murka tolan konɛti. Ɔci murka oŋ luoṭi oŋo. Ɔci murka bala booti te Kaŋ Kriit taaŋɛti ne cwakanti. 14Yeti ne ɛkkɛn atki ñamu ne ḍyɛṭ ṭɔɔlɛyɛ, jwamma tolan yoŋŋin te pɔya ‘wollanti te kaŋ wyeñɛtiy. 15Ɔci murka tolan eññɛ jwami ne pɛñan. Murka tolan yaakinti jwami bɛɛdɛ jitin moki bɛɛ. Ɛkɛ buannɛ jwammo. Ɔci ɔɔn murka tolan dalnɔn ati parɛ amaam doki ɔɔn. 16Murka tolan neeniyɛ, menin ḍiɛran bala eedɛ ɛkɛ jiñɛti oŋkanda. Ɔci oŋŋa ɛkkɛn jɔŋki te Kaŋ Kriityɛ, murka ḍiɛran neeni bala pieg wyetkɛnti. Ɔci ne jwamma tolan bɛɛni ne pɛñanyɛ, ma yaakinti murka ḍiɛran neeni oltan jiju murka tolan konɛti bɛɛ. Ɔci ne ɔɔn dɛnnɔn kaŋa ḍiɛran yenti Kɔdayɛ, ɔɔn murka ḍiɛran olnɔn jiju doki, yeti murka neeni naŋki ɛkɛ tɛy tɛyo, ɔɔn yaakɔnti ɛkɛ oldɔn jiju a cwakan bɛɛ. 17Ɔci ne ɔɔn murka ḍiɛran neeni olnɔn jiju murka tolan konɛti dokiyɛ, ɔɔn murka tolan neeni ḍɛɛŋŋɔn te wyengo. Ɔci bworŋ murka tolan bworŋa ati ɛkɛ neeniyɛ, oljɛ ma ñaalɔ aŋka jwami murka eedɛ te pɔya parɛ acaan ma buayi murka dita eedɛ jwami nona ŋɔmiti. Çɔmma neeniyɛ, yaayɛ a niɛno. 18Ɔci ne liidɔ jwamma tolan bɛɛn men. Ɔci pɔɔgi pieg bala ooddi ne ñaalɔ, ɔci murka tolan yaakinti woon moki bɛɛ. Ɔci acaan a ɔŋŋiyɛ, waka bala murka tolan konɛti neeni gɛɛg yiɛpcɛ ma ɔntɔ aŋka murka tolan pwardɛ. 19Ɔci ne liidɔ moki maka kanŋan murka tolanyɛ, wyeng murka neeni yiɛpcɛ ɛkkɛn ɔntɔ. 20Ɔci oŋki gɛɛgtiyɛ, ɔɔn oŋ waŋɛ yuarŋɔn bɛɛ, ɔci moki te ween jiñɛyɛ, ɔɔn kɛltan yuarŋɔn bɛɛ. Jwami bala ne tolan. Te ñamu ɔɔn poŋɔn ka ɔɔn dɛndɔn. Ɔci acca paŋŋa neeni bala moki bɛɛ. Ɔɔn buayɔn ka ɔɔn ḍaktɔn, kaapun. 21Ɔci ne ma balki atki oŋkɛn kɔɔnki kɔɔni te koñ a ɔɔnyɛ, Buuluc jɔŋŋin ñaalɔ te nona ɛkkɛn ñomgɛnti ɔci gɔkcin ɛkkɛnti agi, “Dala te ɛkkɛ tieŋnɛ jyek ‘ya. Ɔci te ikin yennin te Kaŋ Kriit aŋan. Ɔci kan a ɔɔnyɛ, te taab neeni bɛɛn ikinti bɛɛ, ɔci te waka bala murkati neeniyɛ, te ḍakcin bɛɛ. 22Yeti acca moki ‘ya gɔkka ɛkkɛti, dala ɛkkɛ yomgɔ tɛya, acaan ikin men gɛɛl ḍakti bɛɛ. Gena murka tolan parɛ aŋka ḍakti. 23Acaan Wey ɔɔn Jwaŋa Tolan mena maldi ‘yayɛ, ɛkɛ malɛɛka gɛɛl cuonnɛ ‘yati weenji, ɔci ɛkɛ yɔɔtcin ‘ya taaŋuti, 24ɔci gɔki ‘yati agi, ‘Buuluc, naa i buay bɛɛ. I ḍakca bɛɛ. Ne baaṭi i yɔɔtca ḍuaŋa tolan ban Ḍɔɔm ñamɛti. Gɔṭṭi, acaan i magdi Juaŋ a ɔɔnyɛ, ɔci maka balgi iki i murka tolanji neeniyɛ, ɛkkɛn da magdɛ Juaŋ daŋkun ba i ɔɔn.’ 25Hay ɛkkɛ, dala ɛkkɛ yomgɔ tɛya! Acaan ŋeej ‘ya ikin maktin Jwaŋa Tolan ba naŋki ɛkɛ naŋka ‘ya myennati neeni. 26Yeti ne baaṭi ikin mɔrtin kaŋ wyeñɛ gɛɛlti ɔci murka lɛɛkti jitin.” 27Ɔci murka tolan bala ati amaam parɛ budan ɔɔn. Nink ɔɔn ninka balgɔn Galŋ Edriyajiyɛ, aŋi inyaakkɛn wyetkɛn ne ŋaanɔ. Ɔci te ninka neeniyɛ, te ween jiñɛ ba ne ween jiñɛ tuodan ɔɔn, maka kanŋan murka tolanti poŋi gɔki agi ṭɛɛr moki loonɔ bɛɛ. 28Ɔci ɛkkɛn wyenti ḍɛkkɛ guonan ɔci luutci iñɔ galŋji luopi galŋo, ɔci galŋ tuod twod men bala ba yardan a ma baan ne yyɛɛwɔ (40) ɔɔn. Ɔci murka tolan ati ñamu moki ne ḍiɛran ṭɔɔlɛ, ɔci gen luutci ma iñɔ moki, ɔci galŋ ṭaali baali ba yardan a men baan ne cyɛɛlɔ ɔci mena parɛ byeŋkɛ (30) ɔɔn. 29Ɔci ɛkkɛn buayi agi murka tolan dita ooddɔ pomk jitin, ɔci a ɔŋŋiyɛ, ɛkkɛn waka yɔɔddi murka tolan luutci iñɔ ne ŋaanɔ murka ŋwayɛti. Ɔci ɛkkɛn bala gɔki agi, “Dala noon bɔwa, hay!” 30Maka kanŋan murka tolanti neeniyɛ, ɛkkɛn noŋi yooŋdi ɔntɔ te murka ḍiɛran neeni lieda ɔɔn. Ɔci ɛkkɛn murka ḍiɛran neeni luutci iñɔ pietin doki. Ɛkkɛn noŋi ma ñingɛn, ɛkkɛn bala gɔki agi ɛkkɛn buagɔnti waka yɔɔddi murka neeni, oldɛnti luuttɛnti iñɔ pietin murka tolan ñamɛti. 31Ɔci Buuluc gɔkcin ḍuaŋati ɔci ackanti agi, “Hay, kan maka kanŋan murka tolan neeni ciya murka tolanji bɛɛyɛ, ɛkkɛ ḍaktɛ waakida acca.” 32Ɔci ackan ati, ɔci wyenga luotki ma murka ḍiɛran iñɔ neeniyɛ, ɛɛrɛ jitin, ɔci murka ḍiɛran neeni ati pieg wyetkɛnti parɛ budan ɔɔn. 33Ɔci te ween jiñɛ neeni ne noon noŋi bɔɔdi ɔɔnyɛ, Buuluc bala gɔki mati te jyek oomdin. Ɛkɛ gɔki agi, “Acca ninka ɛkkɛ ciyɛ budan te oomdin aŋi inyaakkɛn wyetkɛn ne ŋaanɔ doki. Te jyek murka tolan neeniyɛ, ɛkkɛ ommɛ gen gɛɛl bɛɛ. 34Dala ɛkkɛ omdɛ oomdin aŋka ɛkkɛ waakɔ tɛya, ɛkkɛ men gɛɛl ḍakti bɛɛ. Ɛkkɛ dɛndɛ baanji ne pwadan.” 35Ɔci ne ɛkɛ gɔŋni a ɔɔnyɛ, ɛkɛ byedg luullɛ bieŋɛti, ɔci ɛkɛ gɔkcin agi pwatcin Juaŋti te byedga neeni. Ɛkɛ gɔkcin a ɔɔn ma ñomgɛnti waakɛnda. Ɔci byedga neeni wɛɛnnɛ jitin, ɔci ɛkɛ omjin. 36Ɔci ɛkkɛn waakɛnda yomgɛn pwadgin, ɔci ɛkkɛn omjin oomdin daŋkun. 37Ɔɔn maka bala murka tolanjiyɛ, ɔɔn agɔn a miyyan ne yyɛɛwɔ ɔci ma baan ne ḍoogɔ mena parɛ byeŋkɛ, ɔci ne dɔɔyɔ wilin ne cyɛɛlɔ (276). 38Ɔci ne ɛkkɛn omki ne korkɛn yoŋkiyɛ, ɛkkɛn poka bala murka tolan konɛti neeniyɛ, yiɛpcɛ bora Galŋa Tolanji aŋka murka tolan pwardɛ. 39Ne noon bɔɔniyɛ, ṭɛra iwan yuarcɛ maka neeni, yeti ṭɛra neeni ñiyi ɛkkɛn bɛɛ. Ɔci nona ḍooñan yuarcɛ ɛkkɛn. Nona neeniyɛ, pwad pwad a ŋɔmi budan. Ɔci maka neeniyɛ, poŋi gɔki agi dala murka tolan ooddɔ dɛndɔ nona ḍooñan neeniti aŋka yɔɔddɔ waan tuktanti nona ŋɔmiti neeni. 40Ɔci waka cyɛgan yɔɔddi murkayɛ, wyeng ɛkkɛn ɛɛrɛ ma jitin, ɔci waka neeni dalji ɛkkɛn te pietin ɔɔn, ɔci waka nɛɛki ɛkkɛn murka neeniyɛ, cɔɔtcɛ noonɛnti, ɔci bworŋ murka wiɛnji ñaalɔ murka ñamɛti, ɔci murka tolan oŋ luoṭi noŋi dɛndi bora nona iwan. 41Yeti murka tolan dɛñjin bora bɛɛ. Kaŋ wyeñɛ gɛɛl bala ḍiɛṭ ḍyɛr muulɛwi piego, ɔci yuarcɛ ɛkkɛn bɛɛ. Ɔci ŋɔmma kaŋ wyeñɛti neeniyɛ, murka tolan muŋŋɛ. Ɔci murka tuka ñamu dɔŋnɛ niɛnti yaakinti woon moki bɛɛ. Ɔci ŋwayɛ bala yɔɔd ñaalɔ, ɔci pɔɔgi bala jiebi ɛkɛ, ɔci ɛkɛ noŋi lɛɛkti jitin. 42Ɔci ackanyɛ, ɛkkɛn gɔki agi, “Dala maka a kɛɛnk neeniyɛ, noktin.” Ɛkkɛn gɔki a ɔɔn acaan ɛkkɛn buayi te maka a kɛɛnk neeni. Ɛkkɛn gɔki agi ne maka neeni mualdi borayɛ, agi ɛkki dita kordɔ ɔntɔ. 43Yeti ɛkkɛn ma nogɛ bɛɛ. Ɛkkɛn dɛɛnɛ ḍuaŋa. Ḍuaŋa ma dɛɛnɛ a ɔɔn acaan ɛkɛ buagɔn naa Buuluc noktan ma bɛɛ. Ɔci ḍuaŋa gɔkcin mati agi maka yaakinti mɔɔlyɛ, dala ɛkkɛn kuaddi pietin ñamu mualdi ooddi nona iwan, 44ɔci maka pookɛn, maka kookinti muali neeniyɛ, dala ɛkkɛn ooddi te jang murka janga lɛɛktin neeni. Ɔci a ɔŋŋiyɛ, ma ati bora nona iwanti waakɛnda. Menga ḍakcin bɛɛ.

will be added

X\