Naŋki Cuudan 26

1Ɔci Agriipa gɔkcin Buulucti agi, “Kan i buagi gɔkca jyek iyɛ, dala i gɔkca.” Ɔci Buuluc bieŋɛ laŋnɛ ñaalɔ ɔci gɔkcin agi, 2“I Agriipa ḍuaŋa tolan, ‘ya yomu ñɔy ñɔy acaan ‘ya buaga gɔkka jyek ‘ya jyeka tɔɔmki ma Icrayiil ‘ya neeni iti, 3acaan i jyek naŋki yɔrg ikin ma Icrayiil waakɛnda ŋeej, ɔci jyeka gɔwwin tyewwin ikin ma Icrayiil moki ŋeej i. Naa i taabba te jyek ‘ya bɛɛ, dala i tieŋŋa ne pwadan. 4“‘Ya ŋeecka ma Icrayiil acca bɛɛ. ‘Ya ŋeecka ɛkkɛn te baaṭi doki ne ‘ya wona ḍiɛra men. Ne ‘ya baala ciyin iki kɛɛn ɔɔn, ɔci moki ne ‘ya baala ban Urcaliim naŋki ‘ya ŋeecɔn ma Icrayiil waakɛnda. 5Çeecɔn ɛkkɛn te ñamu doki ‘ya a men ma Pɛriciin, ɔci ‘ya baal ciy te jyek ma Pɛriciin. Ɔci ŋeecɔn ɛkkɛn moki Ma Pɛriciin neeniyɛ, ɛkkɛn a ma ikin ma Icrayiil maka tieci jyek ganuun mali ikin ma Icrayiil warɛ ne tɛyany. Yeti ma Icrayiil maka tɛki ‘ya waru neeni jyeka ‘ya aga men ma Pɛriciin neeniyɛ, owwɛ ɛkkɛn bora bɛɛ. 6Ma bala noŋi godan ‘yati, acaan ‘ya jyeti jyeka guaŋŋɛ Juaŋ yɔrg ikinti te baaṭiy. 7Jyeka neeniyɛ, gena jyek jɔŋŋin ma jɔŋti ñaalɔ te kolk jitin tɛɛtki mokiy, jyeka kɛɛtan kɛɛn Ma Icrayiil kɛɛna a inyaakkɛn wyetkɛn ne yyɛɛwɔ neeniy. Ɔci ɛkkɛn bala moṭi Juaŋti oŋkanda acaan ɛkkɛn buagɔn jyeka neeni dala dɛndi bora. Ḍuaŋa tolan gena jyeka tɔɔmki ma Icrayiil ‘ya neeni. 8Te gena yeti ɛkkɛ gɔkɛ agi Juaŋ yaakinti ma luoldɛ ñaalɔ te koolji tɛɛti moki bɛɛy? 9“Ɔci te ñamu daŋkun ‘ya baal poŋ ka dala ‘ya noŋja kanŋa ne tolan, aŋka jyek Yaccu Kiṭɔ men ma Najarɛt neeniyɛ, baadi. 10Gena jyeka bala naŋdi ‘ya ban Urcaliim neeni. Gaciicin ḍwaŋin ma Icrayiilyɛ, ɛkkɛn ‘ya ‘woñka worga, ɔci te jyek ɛkkɛnyɛ, ‘ya ati Ma Kiṭɔ owwan ɔci oljan jiju ciginji a ḍiɛkan bɛɛ. Ne ma balki nokki maka neeniyɛ, jyek ‘ya daŋkun bala ba jyek maka noki ma neeni ɔɔn. 11Ɔci oŋkanda ‘ya baal noŋ ne yaayan Ma Kiṭɔti oorga morki ma Icrayiil Juaŋti. Ɔci ‘ya baal ‘yer ɛkkɛn ka dala ɛkkɛn jyenna jyetki ɛkkɛn Yaccuti wanna daltan. Ɔci acaan ‘ya yomu yaayɛ Ma Kiṭɔti ne pɛñanyɛ, ‘ya ati lier ɛkkɛn ne bonka loonanti ɔɔn. 12“Ne ‘ya baala noŋa naŋka neeni menyɛ, oŋ gɛɛlti ‘ya baal ootta ban Ḍimaackati, ɔci worga gaciicin ḍwaŋin ma Icrayiilyɛ, bala ‘yati doki, ɔci ‘ya ‘woñka ɛkkɛn kanŋa neeni. 13I ḍuaŋa tolan, ne ‘ya baala yom menyɛ, oŋ waŋɛ bala yɔɔd yeccu, ɔci gen gɛɛl dɛkkin ‘yati iki maka atin iki ‘yay. Ɛkɛ dɛkkin ne pɛñan te ñaalɔ. Oŋ waŋɛ buannɛ ɛkɛ te dyɛŋŋo. 14Ɔci ɔɔn ḍɛɛmnɔn iñɔ ṭɛɛrji waakida. Ɔci ‘ya tieŋŋan pwan gɔkkin ‘yati te tuk ikin ma Icrayiil agi, ‘Caawul, Caawul, i noŋ ne yaayan ‘yati a ñaccu ɔɔn ogo? I yaci waru paru te naŋka naŋa i yaayan ‘yati oŋkanda neeni. I baal ba yana yaci warɛ parɛ yana yɔɔwi kɔmñi weegɛn ne weegɛn baali jiebbi cieti ɛkɛy.’ 15“Ɔci ‘ya gɔkcan ɛkɛti agi, ‘Ciɛggɔn, i a menɛ?’ “Ɔci Ciɛggɔn gɔkkin ‘yati agi, ‘Gena ‘ya Yaccu, mena naŋa i ne yaayan oŋkanday. 16Jɔlla ñaalɔ yɔɔtca te ciegu acaan ‘ya waru lɛɛllan bora iti buaga i naŋdin a mena noŋi kanŋa ‘ya. ‘Ya buaga i ma myetka te waka yuarŋi i acca, ɔci moki te waka i nɔɔttin te ɛkkɛn ne baaṭiy. 17Ɔci i yɔɔdin ‘ya oŋkanda te ma Icrayiil, ɔci i moki yɔɔdin ‘ya te Keedin Pookɛn maka i cundin ‘ya ɛkkɛnti daŋkun neeni. 18’Ya i cundin aŋka i ɛkkɛn ñingɛn pɔkka ɔci ɛkkɛn waakɛn yaltan te nona mielti ɔci ooddi te nona bɔwan, ɔci ɛkkɛn mwondi te jyek Jwaŋa Yaayan ɔci dɔɔkti Jwaŋa Tolanti. Ɔci a ɔŋŋiyɛ, ɛkkɛn bɔɔktɛ Juaŋ te nɔji ɛkkɛn, ɔci ɛkkɛn ñoodi a cyɛɛlɔ i maka jyeti ‘yati maka kɛññan ‘ya boray.’ 19“Acaan a ɔŋŋiyɛ, Agriipa ḍuaŋa tolan, ‘ya yaakati jyeka bɛɛn ‘yati te ñaalɔ neeniyɛ, bɛɛdji bɛɛ. 20Ɔci te ñamu ‘ya baal lor maka ban Ḍimaacka ɔci ban Urcaliim. Ɔci ne baaṭi ‘ya ati lor maka ban Yahuudiya warda, ɔci ne baaṭi moki ‘ya ati lor Keedin Pookɛn daŋkun. ‘Ya ɛkkɛn myetkan ka dala ɛkkɛn waakɛn yaltan, dala ɛkkɛn yordi Jwaŋa Tolanti, ɔci dala ɛkkɛn ciya ba maka waakɛn yali te nɔji ɛkkɛn awarɛ. 21Acaan ‘ya baal lor ma a ɔɔnyɛ, ‘ya mukka ma Icrayiil on Juaŋ ona tolan neeni. Ɔci ɛkkɛn buagɔn noki ‘ya. 22Yeti ‘ya magda Juaŋ oŋkanda, ɔci acca neeniti moki ɔɔn. Ɔci acaan a ɔŋŋiyɛ, ‘ya yɔɔd wɛnni miet maka ḍwaŋin ɔci maka ḍyɛrin te jyeka awarɛ neeni. Jyek Muuca ɔci jyek maka bɔwanyɛ, ‘ya ɛkkɛn aaŋiyɔ bɛɛ. 23Ɛkkɛn bala gɔki te jyek naŋka bɛya ne ŋoyɔ agi ne Kiṭɔ bɛɛddayɛ, ɛkta wardan eeddɔ ɔci ɛkta jɔldɔ ñaalɔ moki te koolji tɛɛti moki. Ɛkta agdɔ mena jɔɔttɔ te jɔŋŋin ñaalɔ te koolji tɛɛti moki. Ɔci agi a ɔŋŋiyɛ, ɛkta agdɔ mena dɛki ma Icrayiil, ɔci Keedin Pookcɛn daŋkun.” 24Ɔci ne Buuluc baali gɔki jyek ɛkɛyɛ, Pɛctac yaadjin gɔkcin ɛkɛti agi, “Hay, Buuluc, i noŋ agdi amgɔn te jyeka i lalkiti ma ne coŋɔn neeni!” 25Ɔci Buuluc ṭwokcin gɔkcin ɛkɛti agi, “I Pɛctac Mena Tolan, ‘ya noŋ agdi aamma bɛɛ. Jyeka guagdi ‘ya neeniyɛ, gena jyeka awarɛ, a jyek amji bɛɛ. 26Jyeka neeni ŋeej i Agriipa ḍuaŋa tolan, ɔci ‘ya yaakati gɔkca iti ne pwadan te jyeka neeni. Naŋka neeniyɛ, gɛɛl kwoy i bɛɛ. Naŋka bɛɛn Yaccuti waakɛnda neeniyɛ, ɛkkɛn cogiyɔ ma bɛɛ, ɛkkɛn naŋɛ ma a lyɛlta waakɛnda. 27I Agriipa ḍuaŋa tolan, i jyetti jyek maka bɔwanɛ? Çeej ‘ya doki i jyetti jyek ɛkkɛn.” 28Ɔci Agriipa ṭwokcin Buulucti agi, “I poŋ gɔk ‘ya naŋda i agdi men Ma Kiṭɔ doki ne pɛñan ɔɔn?” 29Ɔci Buuluc ṭwokcin gɔkcin ɛkɛti agi, “Dala te i ɔci maka tyeŋi jyek ‘ya neeniyɛ, dala te ɛkkɛ waakida agdɛ Ma Kiṭɔ ba ‘ya ɔɔn, kan acca lakun doki, walla ne baaṭi, yeti ‘ya buaga ɛkkɛ agdɛ maka ḍɛktɛ ma te jiŋgin ba ‘ya ɔŋŋi bɛɛ.” 30Ɔci Agriipa ḍuaŋa tolan jɔŋŋin ñaalɔ, ɔci ḍuaŋa ṭɔɔlɛ moki jɔŋŋin ñaalɔ, ɔci Bɛrniicɛ moki jɔŋŋin ñaalɔ, ɔci maka bala ciyi i ɛkkɛn moki jɔllin ñaalɔ. 31Ɔci ne ɛkkɛn kaacki bora te ona neenitiyɛ, ɛkkɛn bala gɔwwɔ yɔtin pookɛn te jyek Buuluc agi, “‘Wana neeni noŋi gena yaayan gɛɛl aŋka ɛkɛ noktin ikin bɛɛ, ɔci moki ɛkɛ noŋi gena yaayan gɛɛl aŋka ikin ɛkɛ oltin jiju ciginji bɛɛ.” 32Ɔci Agriipa gɔkcin Pɛctacti agi, “Te ɛkɛ toonni iti agi ɛkɛ ootci ḍuaŋa tolan ma Ḍɔɔmti bɛɛyɛ, te ɛkɛ pɔkka i doki.”

will be added

X\