Naŋki Cuudan 25

1Ɔci Pɛctacyɛ, ne ninka ɛkɛ aŋŋɛ ḍuaŋa ṭɔɔlɛ akki ḍoogɔ ban Cɛcariiyayɛ, ɛkɛ jɔŋŋin te bana neeniti ɔci ati ban Urcaliim. 2Ɔci gaciicin ḍwaŋin ma Icrayiil ɔci maka ḍwaŋinyɛ, jyeka tɔɔmki ɛkkɛn Buuluc neeniyɛ, eyɛ ɛkkɛn Pɛctacti. Ɛkkɛn ‘yeṭi tooccin Pɛctacti te Buuluc agi, 3“Dala Buuluc oodda ban Urcaliim.” Ɛkkɛn tooccin ɛkɛti a ɔɔn acaan ɛkkɛn jiek ñaagɛyɔ ɛkkɛn buagɔn Buuluc noktan yomɔ. 4Ɔci Pɛctac kɛkcin ɛkkɛnti agi, “A’a, Buuluc bala jiju ciginji ban Cɛcariiya, ɔci ne cwakanti ‘ya ootta ban Cɛcariiya aŋan daŋkun. 5Dala ma ɛkkɛ maka ñingɛn tɛyan ɛkkɛn gɛɛg ooddin iki ‘ya. Ɔci kan gena naŋŋɛ Buuluc yaayan gɛɛl bala dala ɛkkɛn gɔkti.” 6Pɛctac ɛkɛ yeddin te ban Urcaliim bala ba nink ne dɔɔyɔ wyetkɛn ne ḍoogɔ walla ba nink a inyaakkɛn moki ɔɔn hayya ɛkɛ oŋ atti ban Cɛcariiya oŋo. Ɔci ne liidɔ ɛkɛ cooccin kaakci godanti ɔci ɛkɛ ma myennɛ agi dala Buuluc oodi ma nona ɛkɛti. 7Ɔci ne Buuluc bɛɛniyɛ, ma Icrayiil maka bɛɛn te ban Urcaliimyɛ, ɛkkɛn Buuluc bwodiwi, ɔci ɛkkɛn bala tɔɔmi ɛkɛ ne pɛñan, yeti te jyek ɛkkɛn neeniyɛ, ɛkkɛn menga gena naŋŋɛ Buuluc yaayan gɛɛl oonɛ bora ḍuaŋati bɛɛ. 8Ɔci Buuluc gɔkcin jyek ɛkɛ daŋkun agi, “‘Ya ganuun ma Icrayiil gɛɛg bɛɛnji bɛɛ, ɔci ‘ya noŋi gena yaayan gɛɛl on Juaŋ ona tolanti neeni bɛɛ. Ɔci ‘ya jyek ḍuaŋa ma Ḍɔɔm ḍuaŋa tolan neeni gɛɛg bɛɛnji oŋgati bɛɛ.” 9Yeti acaan Pɛctac buagɔn ma Icrayiil yomgɛn pwaddiyɛ, ɛkɛ gɔkcin tooccin Buulucti agi, “I buagi ikin oottin iki ‘ya ban Urcaliim aŋka ikin gɔrtin jyeka tɔɔmki ma i neenɛ?” 10Ɔci Buuluc kɛkcin gɔki agi, “A’a, nona yɔɔda ‘ya neeniyɛ, gena non ḍuaŋa tolan ma Ḍɔɔm nona noŋki ma godany. ‘Ya noŋi gena yaayan gɛɛl ma Icrayiilti oŋgati bɛɛ. Jyeka neeniyɛ, ŋeej i doki. 11Kan ‘ya jyek ganuun akuuma lɛɛŋi jitin, ɔci kan naŋki ‘ya yaayɛ ne tolan aŋka akuuma buagɔn noki ‘yayɛ, ‘ya gɔkca genga bɛɛ. Yeti kan jyeka tɔɔmki ma ‘ya neeni a jyeka budanyɛ, men gɛɛl yaakinti ‘ya ‘wonda maka neeni bɛɛ. ‘Ya buaga ḍuaŋa tolan ma Ḍɔɔm gɔrti jyek ‘ya.” 12Pɛctac ɔci ma ɛkɛ warɛyɛ, ɛkkɛn bala gɔṭi jiek ñamu pookɛn, ɔci ne ɛkkɛn jyeka neeni ḍaakkitiyɛ, Pɛctac gɔkcin Buulucti agi, “I gɔk i ootta ḍuaŋa tolanti ban Ḍɔɔm aŋka ɛkɛ gɔrti jyek iyɛ, pwatcin. ‘Ya buaga dala i ootta aŋan.” 13Ɔci ne nink gɛɛg bɛɛki borayɛ, mena ḍuaŋa tolan gɛɛl bɛɛn ban Cɛcariiyati. Ɛkɛ yenti Agriipa. Ɛkɛ bɛɛn iki ɛŋa yenti Bɛrniicɛ, ɛkkɛn bɛɛn ñiepi Pɛctac. 14Ɔci ne ɛkkɛn ɛɛni coodi nink bɛɛki borayɛ, Pɛctac ḍuaŋa tolan neeni myennɛ te jyek Buuluc. Ɛkɛ gɔki agi, “Mena ‘uan gɛɛl bala wɛnni. Ɛkɛ dalnɛ Pilikc ciginji. 15Ɔci ne ‘ya baala ban Urcaliimyɛ, gaciicin ḍwaŋin ma Icrayiil bɛɛni, ɔci cyekin moki bɛɛn ‘yati, ɔci ɛkkɛn bala tɔɔmi Buuluc. Ɛkkɛn buagɔn agi dala ‘ya jiek oljɔ Buuluc wyendanti. 16Ɔci ‘ya ṭwokcan ɛkkɛnti ka naŋki ɔɔn ma Ḍɔɔm bala a ɔɔn bɛɛ. Ɔɔn noŋdɔn godan ñamu. Mena tɔmtan ma neeni gɔkti jyek ɛkɛ, ɔci ma gɔrti jyeka tɔɔmki ma ɛkɛ neeni bala a ɔki. Ɔci kan jiek yeyɔyɛ, ma oŋ noŋdi ywobji ɛkɛti oŋo. 17Ɔci maka neeni bɛɛnɔn dɔɔŋnɔn iki ‘ya wɛnni, ɔci ne liidɔ ‘ya cooccan kaakca noŋki ma godan, ‘ya kwaccan bɛɛ. Ɔci ‘ya gɔkcan mati ka dala Buuluc kootan ɛkkɛn orɔ nona ‘yati. 18’Ya baal poŋ ka Buuluc a nɔɔdɔn kaapun. ‘Ya gɔk ka naŋki ɛkɛ yaayɛ kaapun. Yeti ne maka tɔɔmi ɛkɛ bɛɛkiyɛ, ɛkkɛn bala tɔɔmi ɛkɛ te jyeka yeyin gɛɛg bɛɛ. 19Ɛkkɛn bala tɔɔmi ɛkɛ te jyek mali ma Icrayiil pookɛn budan. Ɛkkɛn bala tɔɔmi ɛkɛ te jyek men gɛɛl yenti Yaccu. Ɛkɛ tuuni, yeti Buuluc bala gɔki te jyek ɛkɛ agi ɛkta baalɔ tɛɛtɔ. 20Acaan ‘ya yaakati jyeka neeni gwaldi jitin ne pwadan bɛɛyɛ, ɔci ‘ya tooccan Buulucti, ka dala ɛkɛ ooddi ban Urcaliim aŋka ma gɔrti jyek godan aŋan. 21Ɔci Buuluc kɛkkin te woon ɛkɛ gɔki agi dala ɛkɛ kɛɛdɛti ñin ma ɔɔn ne ḍuaŋa tolan ma Ḍɔɔm aŋka gɔrta jyek ɛkɛ ɔɔn. Ɔci acaan a ɔŋŋiyɛ, ‘ya gɔkcan mati ka dala ɛkɛ gwaltan ma ne pwadan ne oŋŋa ‘ya ɛkɛ cunda ḍuaŋa tolan ma Ḍɔɔmti bɛɛdi ɔɔn.” 22Ɔci Agriipa gɔkcin Pɛctacti agi, “‘Ya buaga tieŋŋa jyek ɛkɛ paru.” Ɔci Pɛctac ṭwokcin ɛkɛti agi, “Ne liidɔ i tieŋja jyek ɛkɛ.” 23Ɔci ne liidɔ Agriipa bɛɛn i Bɛrniicɛ. Ɛkkɛn bɛɛn i maka pookɛn maka a ḍuaŋan ḍwaŋin, ɛkkɛn bɛɛn ɛŋi bworŋin akuuma waakɛnti i maka ñingɛn tɛyan bana neeniti. Ɔci waak waakɛnda pwanna pwanno. Ɔci ɛkkɛn kaaccin orɔ ona ḍworki ma wyetkɛn, ɔci ɛkkɛn cooccin iñɔ, ɔci Pɛctac gɔkcin mati agi, “Dala Buuluc oodi ma orɔ!” Ɔci ne Buuluc koonɛ orɔyɛ, 24ɔci Pɛctac gɔkcin agi, “I ḍuaŋa Agriipa, ɔci maka bala wɛnni waakɛnda, acca dala ɛkkɛ gɔrtɛ gena ‘wana tɔmtan ma Icrayiil waakɛnda neeni. Ne ‘ya baala ban Urcaliimyɛ, ɛkkɛn bɛɛn ‘yati tɔɔmi ɛkɛ. Ɔci wɛnni moki ɛkkɛn bɛɛn ‘yati moki, ɔci bala tɔɔmi ɛkɛ moki. Ɛkkɛn gɔki ‘yati a ñaccu agi naa ‘ya ‘wana neeni daljɔ ciyɔ tɛɛtɔ moki bɛɛ. Agi dala ‘ya ɛkta nogjɔ. 25Yeti ne ‘ya gɔrna jyek ɛkɛyɛ, ‘ya gena yaayan gɛɛl yuarŋ ɛkɛti aŋka ‘ya ɛkɛ nogda bɛɛ. Ɔci acaan ɛkɛ gɔki agi dala ḍuaŋa tolan ma Ḍɔɔm aŋka gɔrtɔ jyek ɛkɛyɛ, ‘ya gɔkcan ka ‘ya ɛkɛ cundi ḍuaŋa tolanti ban Ḍɔɔm. 26Yeti acaan ‘ya jiek jitkɛn yuarcan men bɛɛyɛ, ɔci ‘ya yaakati kiejja genga men ḍuaŋa tolanti bɛɛ. Ɔci a ɔŋŋiyɛ, ‘ya ɛkɛ owwan i ñamuti Agriipa ḍuaŋa tolan, ɔci maka pookɛn neeni ñomgɛnti. Ɔci ne i gɔrti jyek ɛkɛyɛ, ‘ya oŋ kiejja jiek oŋo. 27Kan men gɛɛl bala ciginji, ɔci ‘ya ɛkɛ cundi ḍuaŋa tolan ma Ḍɔɔmti budan, ɔci ḍuaŋa tolan neeni myetka te jyek naŋki ɛkɛ bɛɛyɛ, a ɔɔn yɔmjin bɛɛ, yaayɛ.”

will be added

X\