Naŋki Cuudan 24

1Ɔci ne ninka ne dɔɔyɔ bɛɛki borayɛ, Ananaayac gaciic tolan ma Icrayiil bɛɛn i cyekin gɛɛg ɔci mena parɛ moki, ɛkɛ yenti Tɛrtooloc. Tɛrtooloc neeniyɛ, ɛkɛ a mena urkinti jiek ma ñomgɛnti ne pwadan ɔci ɛkɛ eyɛ ma acaan ma buagɔn dala ɛkɛ ḍuaŋa ṭɔɔlɛ myettɛ te jyek Buuluc non godanti. 2Ɔci ma wyetkɛn ḍɔɔlɛ buagɔn gɔrti jyek Buuluc. Ɔci ne Buuluc borkiti mayɛ, Tɛrtooloc jɔɔtcin ñamu ɔci gɔkcin agi, “I Pilikc, i a mena pwadan, coodi pwani bala ban ɔɔn acaan te i. Ɔci te jyek i mokiyɛ, naŋka pwadin bɛɛn ban ɔɔn acaan i ñingu tɛy tɛyo. 3Ɔci ma ɔɔn baan warda yomgɛn pwad pwad iti oŋkanda. 4“Ɔɔn buagɔn i taabba te jyek ɔɔn bɛɛ. A ɔŋŋi ‘ya buaga gɔkka iti jwali ne ḍuulan budan acaan i yomu pwad pwado. 5Ɔɔn gɔrnɔn ‘wana neeni ɛkɛ bala yooci naŋki ma Icrayiilti baan warda, ɔci ɛkkɛn bala tyewɔ te jiek te naŋki ɛkɛ neeni. Ɛkɛ a ḍuaŋa maka bartan ma agi Ma Najarɛt, jyek mali ɛkkɛn da pookɛn. 6Ɔci oŋ gɛɛltiyɛ, ɛkɛ noŋi on Juaŋ ona tolan yaadɛ, yeti ɛkɛ muŋŋɔn ɔɔn. [Ɔci ɔɔn buagɔn ɛkɛ noŋdɔn godan bala ba jyek ganuun ɔɔn. 7Oŋ yeti ḍuaŋa tolan yenti Licyac bɛɛn ɔci ɛkɛ eññɛ ne pɛñan te ɔɔnti. 8Ɔci Licyac gɔkcin agi maka tɛki Buuluc warɛ neeniyɛ, dala ɛkkɛn bɛya i ñamuti wɛnni.] Ɔci acca kan i gɔrca jyek ɛkɛyɛ, jyek ɛkɛ ŋeejja i, ɔci tɔmta tɔɔmmɔn ɔɔn ɛkɛyɛ, ŋeejja i moki.” 9Ɔci ma Icrayiil gɔkcin agi, “Ɛɛ, jiek bala a ɔɔn.” 10Ɔci ḍuaŋa ṭɔɔlɛ Buuluc gɔmnɛ bieŋɛ agi dala ɛkta gɔktɔ daŋkun, ɔci Buuluc gɔkcin agi, “Çeej ‘ya i a ḍuaŋa godan kɛɛn ɔɔn ma Icrayiil neeni te baaṭi doki. Yuong i a ḍiɛkan bɛɛ. Ɔci acaan a ɔŋŋiyɛ, ‘ya da gɔkka jyek ‘ya iti te yoma ñɔyan. 11Kan i jiek gwala jitin ne pwadanyɛ, ŋeejja i ‘ya ati ban Urcaliim te baaṭi bɛɛ. Nink ‘ya ninka atta ban Urcaliimyɛ, a inyaakkɛn wyetkɛn ne yyɛɛwɔ budan. ‘Ya ati morcan Jwaŋa Tolanti aŋan. 12’Ya yuarka ma oŋ gɛɛlti tyewwin i menga on Juaŋ ona tolanti neeni bɛɛ. Ɔci ne ‘ya baala oorga morki ma Juaŋtiyɛ, ‘ya noŋ jyeka yeyin gɛɛg mati bɛɛ, ɔci ma lyɛli te jyek ‘ya gɛɛg bɛɛ. Ɔci baan konɛti moki jyeka yeyin gɛɛg bɛɛn te ‘ya bɛɛ. 13Maka gɔki agi ‘ya yaajjɔ neeniyɛ, ɛkkɛn men gɛɛl gen kona tɔɔmki ɛkkɛn ‘ya acca neeni oodɛ bora iti bɛɛ. 14’Ya gɔkka ɛkkɛti awarɛ, ‘ya mor Jwaŋ yɔrg ikinti neeni te Pɔy Yaccu neeni, ɔci ma Icrayiil ɛkkɛn gɔki agi pɔya moṭa ‘ya neeni yaayɔ agi damgɔn. Yeti ‘ya tiek jyek Muuca gɛɛg bɛɛ, ɔci ‘ya tiek jyeka kiiwɛ maka bɔwan Jwaŋa Tolan gɛɛg bɛɛ. 15Maka tɔɔmi ‘ya neeniyɛ, ɛkkɛn gɔki agi Juaŋ maka pwadgɔ luolda ñaalɔ, ɔci maka yiegɔ moki luolda ñaalɔ. Ɔci ‘ya jyeti gɔk a ɔɔn daŋkun. 16’Ya baal poŋ ka dala ‘ya noŋja ne pwadan Juaŋti ɔci mati oŋkanda, acaan ‘ya buaga naa yom ‘ya wiakti te naŋka yeyin neeni gɛɛg bɛɛ. 17“Yuong gɛɛgti ‘ya baaw ban Urcaliim, ɔci acca ‘ya bɛɛn ɔci ‘ya eccan bilk gɛɛg, ɔci bilka neeniyɛ, ‘woñgan ‘ya kɛɛn ɔɔn neeni budan. Ɔci waka ‘yɛrtan ma Juaŋti moki owwan ‘ya daŋkun. 18Ɔci ‘ya baal noŋ naŋka neeni on Juaŋ ona tolan, ɔci ‘ya noŋjan ba naŋki ma Icrayiil te jyek ywaŋi ma waakɛn Juaŋ ñamɛti, ɔci ne ‘ya naŋka neeni cwammayɛ, ‘ya yuarka maka tɔɔmi ‘ya neeni. ‘Ya balgin i ma gɛɛg bɛɛ. ‘Ya baal paru. Ɔci jyeka yeyin baawo. 19Maka ‘ya yuarka on Juaŋ ona tolanyɛ, gena ma Icrayiil maka bɛɛn te ban Ecya. Kan ɛkkɛn balki jiekyɛ, dala ɛkkɛn bɛya nona iti neeni, aŋka ɛkkɛn gɔkti jyeka tɔɔmki ɛkkɛn ‘ya neeni. 20Ɔci maka bala wɛnni acca kan gena yaayan gɛɛl yuarɛ ɛkkɛn ‘yati te oŋŋa Maka Gɔṭi Jiek gɔrki jyek ‘ya neeniyɛ, dala ɛkkɛn gɔkti. 21Gena jwalla yaanna ‘ya ɛkkɛnti kaapun, ne ‘ya gɔŋna agi, ‘Acca ‘ya yɔɔd ɛkkɛ ñomgɔti wɛnni te oŋŋa neeni aŋka ɛkkɛ goddɛ ‘ya te jyenna ‘ya jyetta ka maka tuun jɔŋdi ñaalɔ te kolkti tɛɛti mokiy.’ ” 22Pilikcyɛ, jyek Pɔy Yaccu ŋeejɛ ɛkɛ ne pwadan, ɔci ne ɛkɛ tieŋni jyek maka bɛɛn ɛkɛti neeniyɛ, ɛkɛ gɔkcin ɛkkɛnti agi, “Jiek bawwin acca. Ne Licyac mena ḍuaŋa ackan neeni bɛɛdiyɛ, ‘ya jyek ɛkkɛ gwaldi jitin ne pwadan waakɛnda.” 23Ɔci Pilikc gɔkcin ḍuaŋati agi, “Dala i gɔrca Buuluc, ɔci kan mung Buulucn buagɔn bɛya ɛkɛtiyɛ, dala ɛkkɛn bɛya ɔɔn aŋka ɛkɛ maktan te waka bala ɛkɛ buagiy.” 24Ɔci ne nink gɛɛg bɛɛki borayɛ, Pilikc bɛɛn i ɛŋ ɛkɛ Drucilla. Drucilla neeni a men ma Icrayiil. Ɔci Pilikc Buuluc bornɛ, ɔci ne Buuluc bɛɛni nona ɛkkɛntiyɛ, ɛkkɛn bala tyeŋi jyek ɛkɛ. Buuluc bala gɔki ɛkkɛnti te jyek jyeni ɛkɛ Yaccu Kiṭɔti. 25Ɔci ne Buuluc baali gɔki ɛkkɛnti te jyek naŋka pwadin, ɔci te tiita ma tiecki waakɛn, ɔci te jyek oŋŋa bɛya a oŋ godan Juaŋyɛ, Pilikc buayi ɔci gɔkcin ɛkɛti agi, “I ɔgdi ootta acca. Ne wɔɔka ikin gɔrtin jiek iki i baldiyɛ, i oŋ bortin ‘ya oŋo.” 26Pilikc bala poŋi agi Buuluc ɛkɛ ‘wondɛti bilk kaapun, ɔci acaan a ɔŋŋiyɛ, ɛkɛ Buuluc bornɛ oŋki ne coŋɔn aŋka ɛkkɛn gɔwwɔ yaakkɛn. 27Ɔci ne yuonga ne yyɛɛwɔ bɛɛki borayɛ, mena parɛ aŋi ḍuaŋa ṭɔɔlɛ non Pilikc. Ɛkɛ yenti Pɔrcyac Pɛctac. Ne kanŋa Pilikc baaniyɛ, ɛkɛ Buuluc dalnɛ te ciginji ɔɔn. Ɛkɛ Buuluc dalnɛ te ciginji a ɔɔn, acaan ɛkɛ buagɔn dala ma Icrayiil yomgɛn pwaddi.

will be added

X\