Naŋki Cuudan 23

1Ɔci Buuluc bala gɔṭi ḍɛɛṭi Maka Gɔṭi Jiek neeniti, ɔci gɔkcin ɛkkɛnti agi, “Modg ɔɔn! Gen gɛɛl bala ‘ya yomuti bɛɛ. ‘Ya yomu niin pwanna pwanno. ‘Ya noŋ ba jyeka ṭagdɛ Juaŋ oŋkanda, ɔci acca moki ɔɔn.” 2Ɔci ne gaciic tolan ma Icrayiil mena yenti Ananaayac neeni tieŋni jyeka guagdɛ Buuluc neeniyɛ, ɛkɛ gɔkcin maka yɔdi iki Buuluc wannati agi, “Dala ɛkkɛ mena wanna moddɛ tukɛti.” 3Ɔci Buuluc gɔkcin ɛkɛti agi, “Hɔɔy, i mena noŋi ma ñingɛn neeni i jyɛbdi Jwaŋa Tolan! I waanu ciy noŋ godan ‘ya ba ganuun, ɔci i buagi dɔki i ganuun bɛɛyaji ‘ya motta makɔ?” 4Ɔci maka yɔdi iki Buulucyɛ, gɔkcin ɛkɛti agi, “I wook mena naŋŋɛ Juaŋ a gaciic tolan ma Icrayiilyɛ?” 5Ɔci Buuluc ṭwokcin mati agi, “Modg ɔɔn, ŋeej ‘ya ka ɛkɛ a gaciic tolan ma Icrayiil bɛɛ. Jyeka kiigin gɔki agi, ‘Naa menga gɔkti ne yaayan ḍuaŋa ɛktati bɛɛ.’” 6Yeti ne Buuluc gɔrni maka yɔdi wɛnan gɛɛg akki ma Cadyuciin ɔci ma gɛɛg akki ma Pɛriciinyɛ, ɛkɛ yaajjin te nona Maka Gɔṭi Jiekti neeni agi, “Modg ɔɔn. ‘Ya a men ma Pɛriciin, ɔci ‘ya a kaci ma Pɛriciin. Ɔci acca ma noŋi godan ‘ya, acaan ‘ya gɔk ka ne ma tuutiyɛ, ma jɔŋdi ñaalɔ tɛɛti moki.” 7Ɔci ne ɛkɛ gɔŋni a ɔɔnyɛ, ma Pɛriciin ɔci ma Cadyuciin bala tyewɔ ne pɛñan, ɔci maka coŋin neeniyɛ, kɛɛptin jitin te jieko. 8Ɛkkɛn kɛɛptin jitin te jiek a ɔɔn acaan ma Cadyuciin oŋkanda gɔki agi ne ma tuudiyɛ, ma jɔŋdɔ ñaalɔ moki bɛɛ. Ɔci ɛkkɛn gɔki moki agi malɛɛkan balgɔ bɛɛ, ɔci agi boŋki ma baan moki baagɔ. Ma Pɛriciin aŋka gɔki agi ne ma tuudiyɛ, ma jɔŋdɔ ñaalɔ tɛɛti moki, ɔci agi malɛɛkan balgɔ moki, ɔci boŋki ma baan balgɔ moki. 9Ɔci yook pɛɛdin ne tolan, ɔci maka loṭi worga Juaŋ ma Pɛriciin gɛɛg jɔŋŋin ñaalɔ, ɔci gɔkcin ne pɛñan agi, “Ikin yɔɔrtin gena yaayan gɛɛl ‘wana neeniti bɛɛ. Bala a booŋ walla malɛɛka gɛɛl gɔkcin ɛkɛti dita!” 10Ɔci ne ma jiek pɛñki a pɛñiyɛ, ḍuaŋa tolan buayi agi dita Buuluc tintan ma ñaalɔ ɔci noktan te ṭɔrin. Ɔci ɛkɛ ackan myennɛ agi dala ɛkki ooddɔ iñɔ nona mati aŋka ɛkki Buuluc pɔktɛ te ma byeŋkɛnti ɔci eedi ma orɔ on ackanti. 11Ɔci te ween jiñɛ neeniyɛ, Ciɛggɔn yɔɔtcin Buuluc taaŋɛti, ɔci gɔkcin ɛkɛti agi, “Dala i yomu tɛya! Acaan i ma myenni te jyek ‘ya wɛnni ban Urcaliimyɛ, ɔci ne baaṭi i ma myetka te jyek ‘ya a ɔɔn ban Ḍɔɔm daŋkun.” 12Ɔci ne liidɔ ne noon bɔɔniyɛ, ma Icrayiil gɛɛg jiek ñaagɛyɔ te lɛmma ne cyɛɛlɔ. Ɛkkɛn gɔkcin a warɛ te yenti Jwaŋa Tolan agi ɛkkɛn omdinti waagga bɛɛ, ɔci mottinti waagga bɛɛ, agi ɛkkɛn Buuluc parun nogdinti ñamu. 13Ɔci maka jiek ñaagɛyɔ neeniyɛ, ɛkkɛn a ma baan ne yyɛɛwɔ (40), ɔci maka pookɛn gɛɛg bala moki. 14Ɔci ɛkkɛn ati nona gaciicin ḍwaŋin ma Icrayiilti ɔci cyekinti, ɔci ɛkkɛn gɔkcin ɛkkɛnti agi, “Ɔɔn gɔŋnɔn a warɛ te yenti Jwaŋa Tolan ka ɔɔn omdɔn waagga bɛɛ, yeti ɔɔn Buuluc nogdɔn ñamu parun. 15A ɔŋŋiyɛ, dala ɛkkɛ iki Maka Gɔṭi Jiekyɛ, ooddɛ gɔktɛ ḍuaŋa tolan ḍuaŋa ma Ḍɔɔmti dala Buuluc koodɛ iñɔ nona Maka Gɔṭi Jiekti neeni, ɔci dala ɛkkɛ noŋdɛ ba ɛkkɛ buagɛ gɔrtɛ jyek Buuluc moki ne pwadan ɔɔn. Yeti ne ɛkɛ koodi iñɔ ne ɛkɛ dɛndi nona ɛkkɛti men bɛɛyɛ, ɔɔn mɔktɔn kɛɛyɔn ɛkɛ, ɔci ɛkɛ nogdɔn ɔɔn doki.” 16Yeti ñaakan Buuluc tieŋŋin jyeka naŋɛ ma te jyek nooŋi Buuluc neeni. Ɔci ɛkɛ bɛɛn ɔci ati kaaccin orɔ on ackan, ɔci ɛkɛ Buuluc myennɛ te jyeka tieŋnɛ ɛkɛ neeni. 17Ɔci Buuluc ḍuaŋa gɛɛl bornɛ ɔci ɛkɛ bɛɛn ɔci Buuluc gɔkcin ɛkɛti agi, “Kaalgɔn ṭɔɔlɛ neeni eya nona ḍuaŋa tolanti acaan ɛkɛ balki jiek gɛɛg buagɔn gɔkti ɛkɛti.” 18Ḍuaŋa kaalgɔn ṭɔɔlɛ eññɛ ḍuaŋa tolanti, ɔci ḍuaŋa gɔkcin ḍuaŋa tolanti agi, “Buuluc mena muŋŋin ikin neeniyɛ, ɛkɛ boṭṭin ‘yati ɔci ɛkɛ gɔki ‘yati agi ‘ya kaalgɔn neeni oojjɔ nona iti agi ɛkta balki jiek gɛɛg ɛkta buagda gɔktɔ iti.” 19Ɔci ḍuaŋa tolan kaalgɔn ṭɔɔlɛ muŋŋɛ te bieŋɛ, ɔci ɛkkɛn ati nona parɛti yaakkɛn, ɔci ɛkɛ tooccin kaalgɔnti agi, “Jwalla i buagiti ‘ya myetta neeni bala a ɔki?” 20Ɔci ɛkɛ ṭwokcin ɛkɛti agi, “Ma Icrayiil jiek ñaagɛyɔ. Ɛkkɛn gɔki agi ɛkkɛn toottinti iti agi i Buuluc oojji iñɔ ne liidɔ nona Maka Gɔṭi Jiekti. Ɛkkɛn gɔki agi ɛkkɛn noŋdinti ba ɛkkɛn gɔrtinti jyek ɛkta ne pwadan ɔɔn. 21Yeti naa i jyedda jyek ɛkkɛn bɛɛ, acaan ma Icrayiil neeniyɛ, gɛɛg bala kɛɛy Buuluc. Ɛkkɛn a ma baan ne yyɛɛwɔ (40), ɔci maka pookɛn gɛɛg bala moki. Ɛkkɛn gɔkcin a warɛ te yenti Jwaŋa Tolan agi ɛkkɛn omdinti waagga bɛɛ, ɔci mottinti waagga bɛɛ, agi ɛkkɛn Buuluc parun nogdinti ñamu, ɔci acca ɛkkɛn jiek ḍaagɛ doki, yeti ɛkkɛn bala kɛɛy gena jyek i.” 22Ɔci ḍuaŋa tolan gɔkcin kaalgɔn ṭɔɔlɛti agi, “I ɔgdi ootta, naa i men gɛɛl myetka a ‘ya nɔɔnna i te jyeka neeni bɛɛ.” 23Ɔci ḍuaŋa tolan borcin ḍuaŋan gɛɛgti ne yyɛɛwɔ, ɔci gɔkcin ɛkkɛnti agi, “Dala ɛkkɛ ackan limdiyɔ a miyyan ne yyɛɛwɔ (200), ɔci ackan taab te muntanyɛ, ɛkkɛn limdiyɔ a ma baan ne ḍoogɔ mena parɛ byeŋkɛ (70), ɔci ackan eci ṭwaŋgi limdiyɔ a miyyan ne yyɛɛwɔ (200). Dala ɛkkɛn wak ɛkkɛn ywaŋtanyɔ aŋka ɛkkɛn jɔŋdi ne weenji ooddi ban Cɛcariiya.” 24Ɔci ḍuaŋa tolan gɔkcin mati agi, “Dala muntan gɛɛg eedi ma acaan taabda Buuluc.” Ɔci ɛkɛ gɔkcin moki agi, “Dala ɛkkɛ noŋdɛ ba jyek ‘ya neeni aŋka Buuluc dɛndi ne pwadan Pilikcti.” (Ɔci Pilikc neeniyɛ, ɛkɛ a ḍuaŋa ṭɔɔlɛ bana ecki ma Buuluc waayi.) 25Ɔci ḍuaŋa tolan ɛkɛ kieŋnɛ worga agi, 26I Pilikc, ḍuaŋa ṭɔɔlɛ pwadan, ‘ya ñiep i. Gena ‘ya Klɔdyac Licyac. 27Gɔṭṭi, ‘wana neeni mugɛ ma Icrayiil, ɔci ɛkkɛn noŋi ɛkɛ noktan, ɔci ‘ya attin iki ackan ‘ya ɔci ɛkɛ wɛɛn ‘ya te ɛkkɛn byeŋkɛnti, acaan ‘ya tieŋŋan ɛkɛ a men ma Ḍɔɔm. 28Ɔci acaan ‘ya buaga tieŋja jyeka wookki ma ɛkɛ neeni ne pwadanyɛ, ‘ya ɛkɛ eñi nona ma ɛkkɛnti Maka Gɔṭi Jieko. 29Ɔci ‘ya gɔrcan jyeka tɔɔmki ma ɛkɛ neeni. Ɔci jyeka tɔɔmki ma ɛkɛ neeniyɛ, gena ganuun ma Icrayiil pookɛn. Jyeka ɛkɛ noktiti ma neeniyɛ, baawo, ɔci jyeka ɛkɛ ḍuattiti ma ciginjiyɛ, baaw moki. 30’Ya myenna men gɛɛl agi ma Icrayiil jiek ñaaŋiyɔ agi ɛkta nogdinti. Ɔci a ɔŋŋiyɛ, ‘ya ɛkɛ cuoññan iti. Ɔci maka tɔɔmi ɛkɛ neeniyɛ, ɛkkɛn myetkan ‘ya ka dala ɛkkɛn ooddi jyeka tɔɔmki ɛkkɛn ɛkɛ neeniyɛ, ootan ɛkkɛn iti aŋan. 31Ɔci ackan Buuluc eyɛ ba jyeka gɔŋni ḍuaŋa tolan ɛkkɛnti, ɔci Buuluc eyɛ te ween jiñɛ ne ban Antipatric ɔɔn. 32Ɔci ne liidɔ ackan ati te ciegɛnyɛ, ɛkkɛn dɔɔkkin baanji ban ɛkkɛn, ɔci ackan taab te muntanyɛ, ɛkkɛn aŋka ati Buuluc eyɛ ne ban Cɛcariiyati. 33Ɔci ne ɛkkɛn dɛñki ban Cɛcariiyatiyɛ, ɛkkɛn ḍuaŋa ṭɔɔlɛ ‘woñgi worga, ɔci moki ‘woñgi Buuluc bieŋɛti. 34Ɔci ḍuaŋa ṭɔɔlɛ pokcin worga ɔci tooccin Buulucti agi, “Ban ɛkkɛ bana tolan yenti ɔki?” Ɔci ne ɛkɛ tieŋni agi Buuluc bɛɛnɔ te Ciliicyayɛ, 35ɛkɛ gɔkcin ɛkɛti agi, “Maka tɔɔmi i ne ɛkkɛn bɛɛtiyɛ, ‘ya oŋ gɔrca jyek i ne pwadan oŋo.” Ɔci ɛkɛ gɔkcin mati agi dala Buuluc eedi ma on Hiruuduc Agriipati uuldɛ ma jiju, ɔci kɛɛdɛyɔ ackan ne pwadan aŋan ona cɔnda ɛktay.

will be added

X\