Naŋki Cuudan 22

1“Modg ɔɔn ɔci weyi ɔɔn, tieŋdɛ acca. ‘Ya buaga gɔkka ɛkkɛti te jyek ‘ya.” 2Ɔci ne ma tieŋki Buuluc baali gɔki ɛkkɛnti te tuk ɛkkɛnyɛ, ɛkkɛn cien lieda moki. Ɔci Buuluc gɔkcin ɛkkɛnti moki agi, 3“‘Ya a men ma Icrayiil. ‘Ya jietka ma ban Tarcoc ban Ciliicyaji. Ɔci ‘ya toli wɛnni bana neeniti, ɔci ‘ya lalla Gameelyal ne pwadan te jyek ganuun yɔrg ikin aŋka ‘ya waru byeri te jyek Juaŋ ba ɛkkɛ neeni. 4Te baaṭi ‘ya baal noŋ ne yaayan maka booti Pɔy Yaccuti. Ɔci ɛkkɛn ma gɛɛg nogɛ ma te naŋki ‘ya. Ɔci ‘ya baal ḍɛɛw maka ‘uay ɔci maka moongo, ɔci ɛkkɛn owwa ‘ya ɔci olja ‘ya ciginji. 5Jyeka neeni ŋeejɛ gaciic tolan ikin ma Icrayiil, ɔci ŋeecɔn maka ḍwaŋin Maka Gɔṭi Jiek daŋkun. Acaan gena ɛkkɛn ‘ya ‘wonta worgan, ɔci ‘ya worgan eed ‘ya modg ikinti ban Ḍimaacka. Ɔci ‘ya baal at ootta ban Ḍimaacka acaan buaga ka Ma Kiṭɔ ḍɛgdi aŋan, ɔci ɛkkɛn owwa ban Urcaliim aŋka ma noŋdi ne yaayan ɛkkɛnti. 6“Ɔci ‘ya baal pɔɔjɔ men, ɔci ‘ya noŋ dɛñja ban Ḍimaacka, ɔci oŋ waŋɛ yɔɔtcin yeccu doki, ɔci ne pɛñan noon dɛkkin ‘yati te ñaalɔ ne bɔwan. 7Ɔci ‘ya ḍɛmman iñɔ ṭɛɛrji, ɔci ‘ya tieŋŋan pwan gɔkkin ‘yati agi, ‘Caawul, Caawul, i noŋ ne yaayan ‘yati a ɔɔn ogo?’ 8“Ɔci ‘ya ṭwokcan ɛkɛti agi, ‘Ciɛggɔn, i a menɛ?’ “Ɔci ɛkɛ gɔkkin ‘yati agi, ‘Gena ‘ya Yaccu men ma Najarɛt mena naŋa i oŋkanda ne yaayany.’ 9Ɔci maka atin iki ‘ya neeniyɛ, ɛkkɛn noon yuarcɛ ɛkkɛn ne dɛki, yeti ɛkkɛn tieŋŋin jyeka guagdɛ men ‘yati neeni bɛɛ. 10“Ɔci ‘ya ṭwokcan ɛkɛti agi, ‘Ciɛggɔn, i buagi ‘ya noŋja gena?’ “Ɔci Ciɛggɔn ṭwokkin ‘yati agi ‘ya jɔŋjɔ ñaalɔ ɔgjɔ ootcɔ ban Ḍimaacka, ɔci agi aŋanyɛ, ‘ya myettata men gɛɛl te waka ɛkɛ buagiti naŋji ‘yay. 11Ɔci ‘ya yaakati gwali noon bɛɛ, acaan noon dɛkkin ne bɔwan, ɔci ‘ya woŋgu uli doki. Ɔci ‘ya eeka lwatka maka atin iki ‘ya a lwani ne ban Ḍimaacka ɔɔn. 12“Ɔci aŋanyɛ, mena ‘uan gɛɛl bala yenti Ananaayac. Ananaayac neeniyɛ, ɛkɛ yomɛ bala Juaŋti ne pwadan, ɔci ɛkɛ noŋi ba ganuun Muuca waakɛnda. Ɔci ma Icrayiil maka bala ciyi ban ɛkkɛnyɛ, ɛkkɛn waakɛnda gɔki agi ɛkta pwadɔ katan. 13Ɔci ɛkɛ bɛɛn ‘yati ɔci yɔɔtcin ‘ya taaŋuti ɔci gɔkkin ‘yati agi, ‘Mod ɔɔn Caawul, dala i yaaktiti gwali noon moki.’ Ɔci ne pɛñan ‘ya yaaŋnati gwali doki, ɔci ‘ya gɔrcan ɛkɛti. 14“Ɔci ɛkɛ gɔkkin ‘yati agi ‘ya kɛnnata Jwaŋ yɔrg ikin bora a kɛññin, agi Juaŋ buagda ‘ya nɔɔttata te naŋka ɛkta buagday. Agi ‘ya kɛnnata Juaŋ bora, aŋka ‘ya gɔrcɔ Yaccu Mena Pwadɔ neeni, ɔci ‘ya tieŋjɔ ɛkta gɔktɔ ‘yati 15agi ‘ya kɛnnata Juaŋ bora a ɔɔn aŋka ‘ya naŋdata ɛkta agjɔ mena nɔɔtɔ ma waakcinda te jyek ɛkta te naŋka yuarnjɛji ‘yay, ɔci te jyeka tieŋji ‘ya daŋkuny, 16ɔci agi acca ‘ya kwaccɔ ogo? Dala ‘ya jɔŋjɔ ñaalɔ dala ‘ya buldata ma, agi dala ‘ya cɔkcɔ Yaccuti te yenti ɛkta aŋka nɔji ‘ya luakta ɛkta ɔntɔy. 17“Ɔci ‘ya dɔɔkkan ban Urcaliim. Ɔci oŋ gɛɛlti ne ‘ya baala cɔka Juaŋti orɔ on Juaŋ ona tolanyɛ, 18’ya Ciɛggɔn yuarŋo, ɔci ɛkɛ gɔki ‘yati agi dala ‘ya jɔŋjɔ ne pɛñan te ban Urcaliimti wɛnni, dala ‘ya ɔgjɔ ootcɔ bana pardanti, acaan ma yookɛ waakcin te jyeka lorci ‘ya ma a jyek ɛkɛy. 19“Ɔci ‘ya gɔkcan ɛkɛti agi, ‘Ciɛggɔn, ɛkkɛn jyeka neeni ŋeecɔn ɛkkɛn waakɛnda doki ne ‘ya baala muowa maka jyeti jyek iti, ɔci ne ɛkkɛn eeda ‘ya ḍuatta ciginji ɔci ḍuatiti may. 20Ɔci ne ma balki nokki Ictipanuc mena mieti ma te jyek iyɛ, ‘ya baal yɔɔd nona nokki ma ɛkɛ gɔr bworŋin maka nokkin ɛkɛ neeni. Ɔci ‘ya baal poŋ gɔk ka naŋka naŋtan ɛkkɛn neeni pwad pwado.’ 21“Ɔci Ciɛggɔn gɔkkin ‘yati moki agi, ‘Jɔŋŋa, ɔgdi ootta, ‘ya i cundin bana loonan Keedin Pookɛnti.’ ” 22Ɔci ma bala tyeŋi jyeka guagdi Buuluc neeni, yeti ne ɛkɛ gɔŋni agi Ciɛggɔn Yaccu gɔki agi ɛkɛ ootcɛ bana loonɔ Keedin Pookcɛntiyɛ, ɛkkɛn looñi ne pɛñan, ɔci yaajjin ne tolan agi, “Dala mena gɔki a ɔŋŋi neeniyɛ, baadi. Kan ɛkɛ kwaci coodi ɔɔn pwatcin bɛɛ, yaayɛ. Dala ɛkɛ baadi!” 23Ɔci ma yomgɛn yeyɔ, ɔci ɛkkɛn bala yaadan, ɔci bworŋin ɛkkɛn yiɛpcɛ ɔntɔ, ɔci ṭɛɛr moki nwamtan gɔ pwokcin ñaalɔ ɔɔn. 24Ɔci ne ɛkkɛn balki noŋki a ɔɔnyɛ, ɔci ḍuaŋa tolan gɔkcin ackanti agi, “Dala ɛkkɛ mena neeni eedɛ orɔ ɔci ḍuadɛ.” Ne ḍuaŋa tolan gɔŋni a ɔɔnyɛ, ɛkɛ buagɔn aŋka Buuluc gɔkti ne pwadan aŋka ɛkɛ gɔrti jyeka yaatki ma te Buuluc neeni bala a ɔki. 25Ɔci ackan Buuluc ḍɛɛgɛ acaan ɛkkɛn buagɔn ḍwayi ɛkɛ. Ɔci ḍuaŋa bala yɔɔd nona ḍɛɛki ma Buuluc. Ɔci Buuluc gɔkcin ḍuaŋati agi, “Ma Ḍɔɔm ma ḍwayi ɛkkɛn boki? Kan mena godan ɛkɛ baaw men, ma yaakinti ɛkɛ ḍuatan boki?” 26Ɔci ne ḍuaŋa tieŋni jyeka neeniyɛ, ɛkɛ ati ḍuaŋa ma Ḍɔɔm ḍuaŋa tolanti, ɔci ḍuaŋa tolan myennɛ te jyek Buuluc neeni. Ɔci ḍuaŋa tooccin ḍuaŋa tolanti agi, “Hay! Hay! I gɔk ɔɔn noŋdɔn a ɔki ɛkɛti? ‘Wana neeniyɛ, ɛkɛ a men ma Ḍɔɔm!” 27Ɔci ḍuaŋa tolan bɛɛn Buulucti ɔci gɔkcin ɛkɛti agi, “‘Ya myetta i a men ma Ḍɔɔm?” Ɔci Buuluc jyettin agi, “Ɛɛ.” 28Ɔci ḍuaŋa tolan gɔkcin Buulucti agi, “Te ñamu ‘ya a men ma Ḍɔɔm bɛɛ. Yeti acca ‘ya aŋi men ma Ḍɔɔm acaan bilk ‘ya ‘woñgan ma ne coŋɔn.” Ɔci Buuluc gɔkcin ɛkɛti agi, “A ɔɔn pari bɛɛ? Yeti gɔṭṭi, ne ‘ya jietkati mayɛ, ‘ya doki a men ma Ḍɔɔm.” 29Ɔci maka noŋi ḍwayi Buulucyɛ, ɛkkɛn Buuluc daljɛ ne pɛñan. Ɔci ḍuaŋa tolan moki buayi ne pɛñan ne ɛkɛ tieŋni agi Buuluc agi men ma Ḍɔɔm. Ḍuaŋa tolan buayi acaan Buuluc ḍɛɛgɛ ma te jyek ɛkɛ. 30Ɔci ne liidɔ ḍuaŋa tolan Buuluc looŋnɛ te waka ɛkɛ ḍɛɛkkiti may. Ɔci ɛkɛ borcin gaciicin ḍwaŋin ma Icrayiil ɔci Maka Goṭi Jiek i ɛkɛy. Ɔci ḍuaŋa tolan Buuluc oonɛ iñɔ nona mati, ɔci Buuluc yɔɔnnɛ ɛkɛ ma ñomgɛnti. Ḍuaŋa tolan noŋi a ɔɔn acaan ɛkɛ buagɔn tieŋdi jyeka wookki ma Buuluc neeni ne pwadan.

will be added

X\