Naŋki Cuudan 21

1Ɔci ne ɔɔn ñiemnɔn i maka neeni ɔci ne ɔɔn ɛkkɛn dolnɔnyɔyɛ, ɔɔn attɔn te murka tolan a tyɛlga ɔɔn ne dɛnnɔn kaŋ wyeñɛ yenti Koc ɔɔn. Ɔci ne liidɔ ɔɔn attɔn ne kaŋ wyeñɛ yenti Rɔɔdic, ɔci te kaŋa neenitiyɛ, ɔɔn attɔn ne ban Patara. 2Ne ɔɔn balgɔn ban Patarayɛ, ɔɔn yɔṭṭɔn murka tolan gɛɛl bala buagɔn woon ooddi ban Pɔniicya. Ɔci ɔɔn taamnɔn ɛkɛti ɔci ɔɔn attɔn. 3Ɔci ne ɔɔn attɔnyɛ, ɔɔn attɔn goṭṭɔn Kaŋ Cayprac, kɛŋnɔn te byeŋa aamo. Ɔci ɔɔn attɔn ne ban Cuurya ɔɔn. Ɔci murka tolan yɔɔni ban Tayir, acaan murka tolan weegɛn buagɔn waka eedɛ murka tolan neeni ootan ma bora bana neeniti. 4Ɔci ne murka tolan yɔɔnniyɛ, ɔɔn kaannɔn iñɔ, ɔci ɔɔn attɔn bana wanna konɛti, ɔci ɔɔn yɔɔrnɔn iki Ma Kiṭɔ gɛɛg. Ɔci ɔɔn cienɔn i ɛkkɛn aŋan nink ne dɔɔyɔ wyetkɛn ne yyɛɛwɔ. Boŋ Jwaŋa Tolan bala gɔki maka neeni yomgɛnti, ɔci ɛkkɛn gɔkcin Buulucti agi naa ɛkta ooddɔ ban Urcaliim bɛɛ. 5Yeti ne oŋka neeni bɛɛki borayɛ, ɔɔn bana neeni dalnɔn, ɔci ɔɔn attɔn. Ɔci maka neeni waakɛnda i moong ɛkkɛn i kɛɛgin ɛkkɛnyɛ, ɛkkɛn attin iki ɔɔn ne baan ŋoyɛti, ɔci ɔɔn ḍwonnɔn iñɔ aŋan galŋ ḍwaŋɛti, ɔci ɔɔn cɔŋnɔn Juaŋti. 6Ɔci ɔɔn ñiemnɔn i ɛkkɛn aŋan, ɔci ɔɔn taamnɔn murka tolanti, ɔci ɛkkɛn ati dɔɔki baanji. 7Ɔɔn jɔŋnɔn te ban Tayir, ɔci ɔɔn attɔn ne ban Tɔlameeyac ɔɔn. Ɔci ne ɔɔn dɛnnɔn ban Tɔlameeyac dokiyɛ, murka tolan yɔɔni moki. Ɔci ɔɔn kaannɔn iñɔ moki te murka tolanji. Ɔci ɔɔn ñiemnɔn i modg ɔɔn Ma Kiṭɔ. Ɔci ɔɔn balgɔn ciyɔn i ɛkkɛn oŋ jiñɛ ne cyɛɛlɔ. 8Ɔci ne liidɔ ɔɔn jɔŋnɔn te bana neeniti, ɔci ɔɔn attɔn ne ban Cɛcariiya ɔɔn. Ɔci ban Cɛcariiyayɛ, ɔɔn attɔn ban Pilibucn. Ɛkɛ a mena mieti ma te jyek Yaccu. Pilibuc neeniyɛ, ɛkɛ a mena akki ma ne dɔɔyɔ wyetkɛn ne yyɛɛwɔ te maka muowi ma bora te kanŋa kaniica ban Urcaliim. Ɔci ɔɔn balgɔn ciyɔn on ɛkɛ. 9Ɛkɛ balki kɛɛgin a ṭɔlg ne ŋaanɔ. Ɛkkɛn a bɔwan Jwaŋa Tolan. 10Ne ɔɔn balgɔn te ban Pilibucn nink ṭɔlgɛn gɛɛg ne coŋɔn menyɛ, mena a bɔwa gɛɛl bɛɛni. Ɛkɛ yenti Agaboc. Ɛkɛ bɛɛn te ban Yahuudiya. 11Ɛkɛ bɛɛn ḍieŋŋin ɔɔnti. Ɔci bworŋa ‘yɛŋdɛ Buuluc tɛyɛti luullɛ Agaboc bieŋɛti. Ɔci byeŋki ɛkɛ ɔci ciegi ɛkɛ ḍɛɛŋŋɛ te bworŋa neeni. Ɔci ɛkɛ gɔki agi, “Boŋ Juaŋ gɔki agi, ‘Bworŋa neeniyɛ, weegɛn ḍɛktan ma Icrayiil ban Urcaliim a ɔɔn. Ɔci ma Icrayiil neeni ɛkɛ ‘wontan Keedin Pookɛn byeŋkɛnti.’ ” 12Ne ɔɔn tieŋnɔn jyeka neeniyɛ, ɔɔn i maka neeni waakɛndayɛ, ɔɔn balgɔn dɛyɔn Buuluc ka naa ɛkɛ ooddi ban Urcaliimji bɛɛ. 13Ɔci Buuluc ṭwokkin gɔkkin ɔɔnti agi, “Ɛkkɛ wiagɛ a ɔɔn ogo? Acca ‘ya yomu yaañi doki te joon ɛkkɛ. Hay, kan ‘ya ḍɛkta maka ban Urcaliimyɛ, baatɔ. Ɔci kan ‘ya nokta ma aŋan te jyek Ciɛggɔn Yaccuyɛ, yaayɛ ‘yati bɛɛ.” 14Ne Buuluc tieŋni jyek ɔɔn bɛɛyɛ, ɔɔn balgɔn dɛyɔn ɛkɛ moki bɛɛ. Ɔci ɔɔn gɔŋnɔn ɛkɛti agi, “Dala naŋka ṭagdɛ Jwaŋa Tolan bɛya iti.” 15Ɔci ne naŋka neeni baaniyɛ, ɔɔn waakɔ ywaŋŋɔn jɔŋnɔn buaŋŋɔn woon ban Urcaliim. 16Ɔci Ma Kiṭɔ gɛɛg te ban Cɛcariiyayɛ, ɛkkɛn attɔn iki ɔɔn. Ɔci ɔɔn wɛɛkɔn ɛkkɛn ban Necann. Necan neeniyɛ, ɛkɛ a men ma Cayprac. Ɛkɛ jyeti Yaccuti te ñamu doki. Ɔci ɔɔn niinnɔn on ɛkɛ. 17Ɔci ne ɔɔn dɛnnɔn ban Urcaliimjiyɛ, ɔɔn ñiipkɔn modg ɔɔn Ma Kiṭɔ ne pwadan. 18Ɔci ne liidɔ ɔɔn attɔn i Buuluc ḍieŋnɔn Yaakubti. Ɔci cyekin kaniica ɛkkɛn bɛɛn waakɛnda daŋkun ban Yaakubn. 19Ɔci Buuluc ma ñiimmɛ waakɛnda ñamu oŋ ɛkɛ oŋ ma myennɛ te naŋka naŋŋɛ Juaŋ Keedin Pookɛnti te kanŋa ɛkɛ oŋo. 20Ɔci ne ɛkkɛn tieŋki jyeka neeniyɛ, ɛkkɛn bala jieyi Juaŋ agi Jwaŋa Tolan pwanni agi pwanno. Ɔci ɛkkɛn gɔkcin Buulucti agi, “Mod ɔɔn, ŋeej i ma Icrayiil jyeti Yaccuti a ḍiɛkan bɛɛ, a alpn coŋgin a coŋgin. Ɛkkɛn waakɛnda waakɛn byerɔ te ganuun kiinɛ Muuca. 21Ɔci maka neeni tieŋŋin jiek agi i baalji lorci ma Icrayiil maka balgi ciyi bonk Keedin Pookɛnti agi dala ɛkki ganuun Muuca daldɛ ɔci agi naa ɛkki kɛɛgin ɛkki ŋwoddɛ bɛɛ, ɔci agi naa ɛkki noŋdɔ ba naŋka naŋdi ma Icrayiil oŋkanda wanna bɛɛ. 22“Acca ma tieŋdi doki agi i bɛɛnji Urcaliimji wɛnni oŋ i noŋŋa a ɔki acca? 23Acca dala i noŋja ba jyeka i myettiti ɔɔn neeni. Maka ‘uay gɛɛg bala ikinti wɛnni ne ŋaanɔ, ‘uaya jiek naŋi iki Juaŋ te naŋka ɛkkɛn buagɛ naŋtan neeni. 24Dala i ooddi iki ɛkkɛn ɔci waru ywaŋa Juaŋti iki ɛkkɛn ba naŋki yɔrg ma Icrayiil. Dala ecca genga aŋka ‘yɛra i te ɛkkɛn daŋkun aŋka ɛkkɛn jyeyyɛn twomtan ɔci ŋeettan ma ɛkkɛn ma waakɛnda jyeka tieŋŋi ɛkkɛn te ñamu te i neeniyɛ, ɛkkɛn a jyeka awarɛ bɛɛ. Ɔci ŋeettan ɛkkɛn i noŋ ba ganuun Muuca oŋkanda. 25Yeti Keedin Pookɛn maka jyeti Yaccuti neeniyɛ, ɛkkɛn balki worga te ikinti doki. Gena jyeka ñaaŋŋinyɔ ikin te ñamu agi naa ɛkki omdɔ waka ‘yɛrdi ma jɔkin yeyin bɛɛy. Ɔci agi naa ɛkki menga dɛtti yimg bɛɛ. Ɔci agi naa ɛkki omdɔ waka tuudɔ nogdi wyeng neeni bɛɛ. Ɔci agi naa ɛkki noŋdɔ tomi bɛɛ.” 26Ne Buuluc tieŋnɛ jyeka neeniyɛ, ɛkɛ yomɛ mwoki jyeka neeniti. A ɔŋŋiyɛ, ne liidɔ ɛkɛ ati ɔci warɛ ywaŋŋɛ Juaŋti ba naŋki yɔrg ɛkkɛn ma Icrayiil. Ɛkkɛn waakɛn ywaŋɛ a cyɛɛlɔ Juaŋti i maka ne ŋaanɔ neeni. Hayya! Ɛkɛ oŋ kaaccin on Juaŋ ona tolan ɔci gɔkcin gaciicin ma Icrayiilti agi, “Ɔɔn i maka ne ŋaanɔ neeni balgɔn jɔɔnnɔn noŋɔn kanŋa ywaŋi waakɔ Juaŋti neeni doki. Ne nink kanŋa neeni baatiyɛ, ‘ya oŋ bɛɛd ecca waak gɛɛg bieŋuti aŋka ‘yɛrdɛ ɛkkɛ te ɔɔn waakida.” 27Ɔci ne ninka a dɔɔyɔ wyetkɛn ne yyɛɛwɔ ninka yɔŋki ma waakɛn ba naŋki ma Icrayiil neeni noŋki bɛɛti borayɛ, ma Icrayiil maka bɛɛn te ban Ecyayɛ, ɛkkɛn Buuluc mɔkci orɔ on Juaŋ ona tolan. Ɔci ɛkkɛn maka bala on Juaŋ ona tolan warɛti aŋan myetkɛ ɔci ciŋɛji, ɔci ma Buuluc mugɛ. 28Ɔci ɛkkɛn bala yaadan a yook agi, “‘Uay ma Icrayiil, hay! Bɛɛdɛ, ‘wana neeniyɛ, gena mena loṭi ma waakɛnda baan warda amaamy. Gena mena wooki ikin, ɔci ɛkɛ wooki ganuun Muuca daŋkun, ɔci wooki on Juaŋ ona tolan neeni daŋkun. Ɔci ɛkɛ noŋi naŋka parɛ moki naŋka yaayan, ɛkɛ Keedin Pookɛn oonɛ orɔ on Juaŋ ona tolanti, ɔci ona pwadan neeniyɛ, yaaññɛ ɛkɛ te naŋka neeni.” 29Ɛkkɛn gɔki a ɔɔn acaan oŋ gɛɛlti ɛkkɛn Buuluc yuarɛ yaakkɛn iki Trɔpimoc bala ati booti bana neeniti. Trɔpimoc neeniyɛ, ɛkɛ a men maka ban Ɛpacac. Ɔci ɛkɛ a men Keedin Pookɛn. Ɔci ma bala poŋi gɔki agi Trɔpimoc neeni enda Buuluc orɔ on Juaŋ ona tolan neeni. 30Ɔci jiek ati baan konɛ warda, ɔci ma waakɛn ḍiedan, ɔci ɛkkɛn yiŋi ne pɛñan nona Buulucti, ɔci ɛkɛ mugɛ ɔci wuayɛ ɛkkɛn bora te on Juaŋ on tolan. Ɔci ɛkkɛn on tukɛ ‘uorkɛ ne pɛñan. 31Ɔci ne ɛkkɛn pocki noŋki Buuluc noktitiyɛ, jiek peen ati ḍuaŋa ackan ma Ḍɔɔmti ḍuaŋa tolan agi maka ban Urcaliim kondan wardandayɛ, agi ma balgɔ noŋɔ ywobjo. 32Ɔci ḍuaŋa tolan ackan ḍɔɔllɛyɔ ne pɛñan i ḍuaŋan ɛkkɛn. Ɔci ɛkkɛn ati ne pɛñan nona polla tolanti. Ɔci maka coŋin neeni ne ɛkkɛn gɔrki ḍuaŋa tolan baali bɛɛdi i ackan ɛkɛyɛ, ɛkkɛn Buuluc dalji te jyebto. 33Ɔci ḍuaŋa tolan ati Buulucti ɔci Buuluc mugɛ ackan, ɔci ḍuaŋa tolan gɔkcin ackanti agi, “Dala ɛkɛ ḍɛgdɛ te jiŋgin ne yyɛɛwɔ.” Ɔci ḍuaŋa tolan tooccin mati agi, “Mena neeni a menɛ yeti? Ɔci ɛkɛ noŋi gena?” 34Yeti ma yaadan, magga da te jwali ɛkkɛn, ɔci magga da te jwali ɛkkɛn. Jiek kɛɛptin jitin. Ɔci ne ḍuaŋa tolan jiek jitkɛn yuarnɛ ne pwadan bɛɛyɛ, ɛkɛ gɔkcin ackanti agi, “Dala ɛkɛ eetin baanji nona ikinti.” 35Ɔci Buuluc lwadɛ eyɛ ackan, ɔci polla tolan bootcin ɛkkɛnti, ɔci acaan maka neeni buagɔn noki Buuluc menyɛ, ackan Buuluc kɛrɛ ñaalɔ nona kaaciti eyɛ ɔɔn ne nona cieki ackan waakɛnda ɔɔn. 36Maka bootcin ɛkkɛnti neeniyɛ, a ḍiɛkan bɛɛ, kɔɔna kɔɔnno. Ɔci polla tolan neeni bala yaadan agi, “Dala ɛkɛ noktin dala baadi!” 37Ɔci ne ackan noŋki kaatti orɔyɛ, Buuluc gɔkcin ḍuaŋa tolanti agi, “‘Ya tuku a jwallo.” Ɔci ḍuaŋa tolan tooccin ɛkɛti agi, “I urkiti tuk Giriik daŋkun? 38Pari i a men ma Macor mena maka coŋin ḍɔɔllɛyɔ a alpn ne ŋaanɔ (4,000) ɔci eññɛ ɛkɛ wɔɔŋji aŋka noŋi ṭwaŋ akuumati neeni bɛɛ?” 39Ɔci Buuluc kɛkcin ɛkɛti agi, “A’a, ‘ya a men ma Icrayiil. ‘Ya bɛɛn te ban Tarcoc ban Ciliicyaji. Ban ɔɔn neeniyɛ, ñyɛrcin bɛɛ. Tol tolo. ‘Ya gɔkka iti ‘ya buaga gɔkca jiek mati.” 40Ɔci ḍuaŋa tolan gɔkcin agi, “Pwatcin gɔkca.” Ɔci Buuluc bala yɔɔd ñaalɔ kaaci wyeñɛti. Ɔci ɛkɛ bieŋɛ laŋnɛ mati, acaan ɛkɛ buagɔn dala ma ciya lieda. Ɔci ne ma cieki liedayɛ, ɛkɛ gɔkcin mati te tuk Ma Icrayiil agi,

will be added

X\