Naŋki Cuudan 20

1Ɔci ne naŋka neeni baaniyɛ, Buuluc men gɛɛl cuuññɛ Ma Kiṭɔti, ɔci ɛkɛ gɔkcin ɛkkɛnti agi, “Dala ɛkkɛ ooddɛ nona Buulucti.” Ɔci ɛkkɛn bɛɛni. Ɔci Buuluc bala ṭeyi ɛkkɛn. Ɔci ne Buuluc ɛkkɛn ṭeenɛ ne ṭeen baaniyɛ, ɛkkɛn ñiebjin i Buuluc, ɔci Buuluc ati ban Macɛdɔɔnya. 2Ɔci ɛkɛ ati booti ban Macɛdɔɔnya konɛti, ɔci ɛkɛ bala ṭeyi ma aŋan te jiek jitkɛn ne coŋɔn. Ɔci ɛkɛ ati ne ban Griic ɔɔn. 3Ɔci ɛkɛ bala ciyi ban Griic ba ponk ne ḍoogɔ. Ɔci ne ɛkɛ noŋi taapti murka tolanti ooddi ban Cuuryayɛ, ɛkɛ jiek aaŋŋɛyɔ dɔki, ɔci ɛkɛ dɔki dɔɔkkin ban Macɛdɔɔnya acaan ma Icrayiil jiek ḍaagɛ doki. Ɛkkɛn buagɔn Buuluc baptan muktan pɔɔjɔ nona ooddɛ ɛkɛ ban Cuurya waayi. 4Maka ati i Buulucyɛ, gena Cɔpatɛr kaci Piroc men maka ban Bɛriiya, ɔci Ɛrictaarkoc ɔci Cekoondoc, ɛkkɛn a maka ban Tacalunika, ɔci Gayac men maka ban Dɛrbi, ɔci Ticcikoc ɔci Trɔpimoc, ɛkkɛn a maka ban Ecya. Ɔci Timutawuc bala i ɛkkɛn. 5Maka neeni ati ñamu, ati ban Trɔwac, ɔci ɛkkɛn bala kɛɛy ɔɔn aŋan. 6Ɔci ne Iid Ma Omki Byedga Polan neeni baaniyɛ, ɔɔn taamnɔn murka tolanti te ban Pilibbi. Ɔci ne nink ne dɔɔyɔ bɛɛki borayɛ, ɔɔn yɔɔrnɔn i ɛkkɛn ban Trɔwac. Ɔci ɔɔn balgɔn aŋan nink ne dɔɔyɔ wyetkɛn ne yyɛɛwɔ. 7Ɔci te Oŋ Juaŋyɛ, ɔɔn wyetkɔ ḍɔɔllɔn balgɔn omɔn Am Ciɛggɔn, ɔci Buuluc jɔŋŋin ñaalɔ ɔci bala loṭi ma acaan ɛkɛ buagɔn woon ne liidɔ. Ɔci jyeka loṭi ɛkɛ ma neeniyɛ, becɔ. Ɛkɛ loṭi ma ɔɔn ne ween jiñɛ tuodan ɔɔn. 8Ɔci ona ɔɔn wyetkɔ ḍɔɔllɔn neeniyɛ, dyɛkan bala coŋɔ. Ona neeniyɛ, gena on jiña ñaalɔ. 9Ɔci kaalgɔn ṭɔɔlɛ gɛɛl bala yenti Yutikoc, ɛkɛ bala ciyi on waŋɛti. Ɔci Yutikoc amɛ ninko. Ɛkɛ bala nɛɛdan, ɔci Buuluc bala loṭi ma men, ɛkɛ kwaccin te lali mako. Ɔci acaan jiek becɔyɛ, kaalgɔn ṭɔɔlɛ wiccin, ɔci ɛkɛ bieŋɛ wyɛŋi ɔci ḍɛmmin te on waŋɛti ḍɛmmin iñɔ ṭɛɛrji te on waŋa ñaalɔ loonan. Ɔci ne ma kooki iñɔ nona ɛkɛtiyɛ, ɛkɛ luollɛ ma ñaalɔ a tuuta doki. 10Yeti Buuluc kooyin iñɔ nona ɛkɛti daŋkun, ɔci ɛkɛ niinjin kaalgɔnti, ɔci kaalgɔn muŋŋɛyɔ. Ɔci Buuluc gɔkcin mati agi, “Naa yomgɔ yeyɔ bɛɛ. Ɛkɛ bala men hay!” 11Ɔci Buuluc ati dɔɔki ñaalɔ iki maka neeni moki. Ɔci ɛkɛ bala omi iki ɛkkɛn Am Ciɛggɔn. Ɔci ɛkɛ bala gɔwwi jyɛyi iki ɛkkɛn moki ne tini wyeñɛ yoŋni ɔɔn. Ɔci ɛkɛ atti. 12Ɔci kaalgɔn ṭɔɔlɛ eyɛ ma baanji tɛɛti moki, ɔci ɛkkɛn yomgɛn pwanna pwanno. 13Ɔɔn taamnɔn murka tolanti doki pookɔ. Buuluc taamnɔn iki ɔɔn bɛɛ, acaan ɛkɛ jiek naŋŋɛ doki agi ɔɔn taapcɔn murka tolanti ootcɔn ban Acoc pookɔ, ɔci agi ɛkɛ bɛɛdjɛ te ciegɛ. 14Ɔci ne ɔɔn yɔɔrnɔn i ɛkɛ ban Acocyɛ, ɛkɛ taamnɔn ɔɔn murka tolanti ɔci ɔɔn attɔn ne ban Mitiliinɛ ɔɔn. 15Ɔci ne liidɔ ɔɔn jɔŋnɔn te bana neeniti ɔci ɔɔn dɛnnɔn ban Kiyoc ŋoyɛti. Ɔci ne liidɔ moki ɔɔn attɔn ne ban Cemoc ɔɔn. Ɔci ne liidɔ moki ɔɔn dɛnnɔn ban Mayliitac. 16Ɔɔn attɔn ban Ɛpacac bɛɛ, acaan Buuluc gɔki te ñamu agi naa ma ɛɛrdɔ ban Ecya bɛɛ, agi ɛkɛ buagiti ootci iidti ban Urcaliim. Iid neeni gena Iid Ninka A Ma Baan Ne Yyɛɛwɔ Mena Parɛ Byeŋkɛ (50). 17Ɔci ne ɔɔn balgɔn ban Mayliitac menyɛ, Buuluc men gɛɛl cuuññɛ ban Ɛpacac, ɔci mena neeni gɔkcin maka a cyekin kaniicati agi Buuluc gɔki agi ɛkkɛ bɛɛdjɛ ɛkɛti. 18Ɔci ne maka neeni dɛñki nona Buuluctiyɛ, Buuluc gɔkcin ɛkkɛnti agi, “‘Ya ŋeejati ɛkkɛ te coodda ‘ya ciyin iki ɛkkɛ oŋkanda wɛnni ban Ecyay. 19’Ya baal noŋ kanŋa Jwaŋa Tolan oŋkanda. ‘Ya baal noŋ ba ‘ya a mena tolan bɛɛ. Ɔci ‘ya baal wiak te ma oŋki a ḍiɛkan bɛɛ, ɔci taab owwɛ ma ‘yati ñyɛran bɛɛ, acaan ma Icrayiil jiek naŋtan oŋkanda te lɛmma ne cyɛɛlɔ buagɔn noŋdi ne yaayan ‘yati. 20Ɛkkɛ myennin te jyeka pwadin waakɛnda. ‘Ya jwali gɛɛl daljan bɛɛ. ‘Ya baal lor ɛkkɛ oorga ḍworki ma wyetkɛn, ɔci ‘ya baal lor ɛkkɛ oorg ɛkkɛti daŋkun. 21’Ya baal lwok ma Icrayiil ɔci Keedin Pookɛn oŋkanda. ‘Ya baal gɔk ɛkkɛnti agi, ‘Dala ɛkkɛn nɔji ɛkkɛn daltan, ɔci waakɛn yaltan Jwaŋa Tolanti.’ 22Ɔci acca ‘ya baal pɔɔjɔ ootta ban Urcaliim. Gena Boŋ Juaŋ gɔki ‘yati ne pɛñan aŋka ‘ya oodda ban Urcaliim neeni. Ɔci naŋka bɛya ‘yati aŋanyɛ, ŋeej ‘ya ne pwadan men bɛɛ. 23Jwali gɛɛl aŋka ŋeej ‘ya, acaan Boŋ Juaŋ bala gɔki ‘yati agi ne baaṭi ‘ya oldata ma jiju ciginji. Ɔci taab bɛɛdɔ ‘yati ne tolan. Ne ‘ya baala te bonka neenitiyɛ, ‘ya myenna ɛkɛ te jyeka neeni. 24Yeti kan ne ‘ya tuudayɛ, baatɔ. Ciɛggɔn ikin Yaccu Kiṭɔyɛ, ɛkɛ ‘ya ‘wonna kanŋa doki. Gena kanŋa loṭa ‘ya ma oŋkanda te jyek Jwaŋa Tolan jyeka wonkɛn jyeka pwadin neeni. ‘Ya baal miet ma te jyek yom Jwaŋa Tolan ka ɛkɛ yomɛ pwad pwad ma baanti. Kan kanŋa neeni ḍaaŋi ‘ya doki oŋ ‘ya oŋ tuuda neeniyɛ, yaay bɛɛ. Pwad pwado. 25“Gɔṭṭɛ, ɛkkɛ agɛ maka lali ‘ya te jyek cyɛgji Jwaŋa Tolan ne ‘ya baala boota bonk ɛkkɛ jitin. Ɔci acca ŋeej ‘ya, ‘ya yuardata ɛkkɛ oŋgati moki bɛɛ. 26Ɛkkɛ myennin ‘ya te naŋka ṭagdɛ Juaŋ waakɛnda doki. ‘Ya jwali gɛɛl daljan bɛɛ. Oŋŋa neeni ‘ya ɛkkɛ myettin awarɛ kan menga ɛkkɛti dɔɔki ŋoyɔyɛ, gena jyek ‘ya moki bɛɛ. 28Dala ɛkkɛ woŋgɔ tiittɛ te naŋki ɛkkɛ, ɔci moki dala ɛkkɛ woŋgɔ tiittɛ Ma Kiṭɔti waakɛnda, acaan ɛkkɛn bala ba pooldin kulin, ɔci ɛkkɛ balgɛ ba ḍɛɛnin ɛkkɛn. Ɛkkɛn wiɛllɛ Ciɛggɔn te yimg ɛkɛ, ɔci ɛkkɛ naŋŋɛ Boŋ Juaŋ aŋŋɛ maka gɔṭi ɛkkɛn ɔci wɛɛyi ɛkkɛn. 29Dala ɛkkɛ woŋgɔ tiittɛ acaan ŋeej ‘ya ne ‘ya ooddayɛ, ɛyi bɛya ɛkkɛti, ɔci ɛkkɛn noŋdi ne yaayan pooldin kulinti. 30Ɔci maka balgi iki ɛkkɛ oŋkanda wɛnni a ma kaniica neeniyɛ, ɛkkɛn ma gɛɛg gɔkti jyeka pookɛn maka wɛɛdɛ ɛkkɛ neeniti, acaan ɛkkɛn buagɔn maka a Ma Kiṭɔ yaltanyɔ ɔci bootti ɛkkɛnti amaam budan ɔɔn. 31Dala ɛkkɛ woŋgɔ tiittɛ! Naa ɛkkɛ ñingɔ yeya te naŋki ‘ya naŋka ‘ya baala ṭeya ɛkkɛ te yuonga ne ḍoogɔ neeni bɛɛ. ‘Ya baal ṭey ɛkkɛ te oŋji ɔci te weenji moki. Ne ‘ya baala ṭeya ɛkkɛyɛ, ‘ya ṭey ɛkkɛ menan da ne cyɛɛlɔ, ɔci menan da ne cyɛɛlɔ. ‘Ya baal wiak te ɛkkɛ. 32“Acca ɛkkɛ ḍuattin ‘ya byeŋ Jwaŋa Tolanti. Dala ɛkkɛ ciedɛ te jyek Juaŋ jyeka ikin ‘wonninti ɛkɛ te yoma pwadan neeniy. Jyeka neeni ɛkkɛ yɔɔttɛ iñɔ ne tɛyan, ɔci ɛkkɛ ‘wondɛ Jwaŋa Tolan waka ‘wondɛ ɛkɛ ma ɛkɛ waakɛnda. 33Ne ‘ya baala ciyin iki ɛkkɛyɛ, ‘ya buaŋŋa bil pɔdda walla dahab menga bɛɛ, walla bworŋin menga bɛɛ. 34Çeejɛ ɛkkɛ wak ‘ya, ɔci wak maka atin iki ‘yayɛ, ɛkkɛn bɛɛn te kanŋa byeŋ ‘ya. 35Te kanŋa ‘ya neeniyɛ, ɛkkɛ lɛɛrnin ‘ya te naŋka pwadan. Kan ikin maka bɔwan maktin te bilk kanŋa ikinyɛ, a ɔɔn pwatcin. Dala ɛkkɛ poŋdɛ jyeka guaŋŋɛ Yaccu Ciɛggɔn ikin agi, ‘Mena ‘wontan ma waakyɛ, ɛkɛ yomɛ ñɔɔna ñɔɔn ne ḍiɛran ṭɔɔlɛ. Yeti mena ma ‘wondɛ waakyɛ, ɛkɛ aŋka yomɛ ñɔɔna ñɔɔn ne tolan.’ ” 36Ɔci ne Buuluc gɔkki jyeka neeni ne ḍookkiyɛ, ɛkɛ ḍwoñjin iñɔ i maka neeni waakɛnda, ɔci ɛkkɛn cɔkcin Juaŋti. 37Ɔci ma bala wiak ne tolan waakɛnda. Ɔci ɛkkɛn ɛkɛ mugɛ ḍɔɔggɛn kaakcɛti, ɔci ñiebjin iki ɛkɛ. 38Ɛkkɛn yomgɛn yeyɔ te jyeka guaŋŋɛ Buuluc, agi ɛkɛ yuarditi ma moki oŋgati bɛɛy. Ɔci ɛkkɛn ati murka tolanti iki ɛkɛ a cyɛɛlɔ.

will be added

X\