Naŋki Cuudan 2

1Ɔci ne Iid Nink A Ma Baan Ne Yyɛɛwɔ Mena Parɛ Byeŋkɛ (50) bɛɛniyɛ, Ma Kiṭɔ waakɛnda bala nona ne cyɛɛlɔ. 2Ɔci joon bɛɛn te ñaalɔ pɔliji bala ba joon jwamma tolan ɔɔn. Ɔci ona cieki ɛkkɛn neeni jiñɛ kuumi te joona neeni. 3Ɔci ma gɔrcin ɔci gen gɛɛl bɛɛn ba maañ ɔɔn, ɔci ɛkɛ warɛ kɛɛmmɛ jitin ɔci cooccin ma wyetkɛnti waakɛnda. 4Ɔci ɛkkɛn kuomnɛ Jwaŋa Tolan yomgɛnti te Boŋ ɛkɛ. Ɔci ɛkkɛn yaakinti gɔki te tugi maka pookɛn ba bolja ɛkkɛn ‘wonnɛ Boŋ Juaŋ war tɛɛny. 5Ɔci ma Icrayiil maka moṭi Juaŋti maka bɛɛn te bonka pookɛnti waakɛndayɛ, ɛkkɛn bala ciyi ban Urcaliim. 6Ɔci ne polla tolan neeni tieŋki ma gɔkki te tugga pookɛn a ɔɔnyɛ, ɛkkɛn bɛɛn waakɛnda Ma Kiṭɔti, ɔci ɛkkɛn korkɛn buañi noon acaan ɛkkɛn waakɛnda tieŋŋin magga da te tuk ɛkkɛn ɔci magga da te tuk ɛkkɛn. 7Ɔci ɛkkɛn korkɛn buañi ɔci bala poŋi gɔki agi, “Maka neeni ɛkkɛn bɛɛn te ban Jaliil waakɛnda boki? 8Oŋ ɛkkɛn loṭi ikin te tugi ikin a ɔki? Tugi ikin ŋeecɔn ɛkkɛn te aŋɛ? Acaan ikin wɛnniyɛ, ikin ma gɛɛg da pookɛn! 9Ikin ma gɛɛg bɛɛn te ban Partya, ɔci ma gɛɛg bɛɛn te ban Midya, ɔci ma gɛɛg bɛɛn te ban Ilam, ɔci ma gɛɛg bɛɛn te Bana Kaŋ Wyeñɛti, ɔci ma gɛɛg bɛɛn te ban Yahuudiya, ɔci ma gɛɛg bɛɛn te ban Kapadociiya, ɔci ma gɛɛg bɛɛn te ban Bunti, ɔci ma gɛɛg bɛɛn te ban Ecya, 10ɔci ma gɛɛg bɛɛn te ban Prijya, ɔci ma gɛɛg bɛɛn te ban Pampiilya, ɔci ma gɛɛg bɛɛn te ban Macor, ɔci ma gɛɛg bɛɛn te ban Libya te ban Cayriin taaŋɛti, ɔci ma gɛɛg bɛɛn te ban Ḍɔɔm, ɔci ɛkkɛn ma gɛɛg a ma Icrayiil ɔci ma gɛɛg ɛkkɛn a Keedin Pookɛn maka moṭi Jwaŋ ma Icrayiilti. 11Ɔci ma gɛɛg bɛɛn te Kaŋ Kriit, ɔci ma gɛɛg bɛɛn te ban buñko. Jyeka guaktan ma ikinti neeniyɛ, ikin tyeŋin ɛkkɛn gɔki te tugi ikin, magga da te tuk ɛkkɛn, ɔci magga da te tuk ɛkkɛn. Ɛkkɛn mieti ikin te naŋki Jwaŋa Tolan naŋka tɛyan!” 12Ɔci maka coŋin maka tieŋŋin jyeka guaktan ma neeniyɛ, ɛkkɛn waakɛnda korkɛn buañi ɔci ɛkkɛn tieki ɔci ɛkkɛn bala gɔwwɔ yɔtin pookɛn agi, “Naŋka neeni bala a ɔki ɔɔn yeti?” 13Ɔci maka pookɛn bala juoli gɔki agi, “Hay, ɛkkɛn nokkin mooy kaapun!” 14Ɔci Butruc yɔɔtcin ma ñomgɛnti ɔci Cuudan pookɛn Maka Inyaakkɛn Wilin Ne Cyɛɛlɔ neeniyɛ, ɛkkɛn yɔɔtcin Butruc toŋkɛti. Ɔci Butruc gɔkcin polla tolanti ne pɛñan te pwana tolan agi, “Hay, ‘uay ma Icrayiil ɔci maka ciyi ban Urcaliimji waakɛnda, dala ɛkkɛ tieŋdɛ. Ɛkkɛ myettin te jyeka neeni ne pwadan. Dala ɛkkɛ tieŋdɛ jyek ‘ya neeni. 15Maka neeni nokkin mooy ba jyeka guagdɛ ɛkkɛ neeni bɛɛ, acaan noon a liidɔ men. 16Naŋka neeni a naŋka guaŋŋɛ Jɔwɛl mena a bɔwa Jwaŋa Tolany. Ɛkɛ gɔki agi, 17‘Jwaŋa Tolan gɔki agi, ne oŋŋa ookti bɛya ne ŋoyɔyɛ, ‘ya Boŋ ‘ya pwowwa mati waakɛnda. Ɔci kɛɛgin ɛkkɛ kɛɛgin a ‘uay ɔci kɛɛgin a moongyɛ, ɛkkɛn ma myettan te naŋka bɛya ne ŋoyɔ neeni. Ɔci ‘uay ɛkkɛ ‘uaya ḍyɛrin gɔrti waka lɛɛlla ‘ya bora ɛkkɛntiy. Ɔci ‘uay ɛkkɛ ‘uaya donkyɛ, ɛkkɛn lokti loggin. 18Ɛɛ, ɔci kɛɛnk ‘ya kɛɛnka a ‘uay ɔci kɛɛnka a moongyɛ, boŋ ‘ya pwowwa ‘ya ɛkkɛnti oŋka wannati, ɔci ɛkkɛn ma myettan te jyeka bɛya ne ŋoyɔy. 19Ɔci ‘ya ma lɛɛrka naŋka tɛyan ɔci naŋka ñyecki ma naŋki tɛɛn ‘ya te pɔliji ɔci iñɔ ṭɛɛrji wɛnni moki. Ma gɔrti yimgo, ɔci meeko, ɔci jien maaño, 20ɔci oŋ waŋɛ dɛkti bɛɛ, ɔci paan tida ba yimgo. Oŋŋa ‘ya bɛɛdayɛ, oŋŋa neeni tolla toli ɔci pwanna pwanno. Ɔci ne oŋŋa neeni baawi menyɛ, ma gɔrti naŋka tɛyan naŋka ñyecki ma neeni ñamu. 21Ɔci maka cɔkti ‘yati te yenti ‘yayɛ, ɛkkɛn yɔɔd ‘ya waakɛnda.’ 22“Ma Icrayiil, tieŋdɛ! Yaccu men ma Najarɛt neeniyɛ, ne ɛkɛ baali noŋi kanŋa ɛkɛyɛ, Jwaŋa Tolan bala noŋi naŋka tɛyan ɔci naŋka ñyecki ma aŋka ŋeettan ma Yaccu a mena awarɛ. Naŋka naŋŋɛ Juaŋ neeniyɛ, gena naŋka ñyecki ma Yaccuy. Juaŋ bala noŋi naŋka neeni ɛkkɛ ñomgɔti. Jyek Yaccu neeni ŋeejɛ ɛkkɛ doki. 23Yeti Juaŋ jwali ḍyɛŋŋɛ te baaṭi doki agi Yaccu neeni ‘wontɛ ma ɛkkɛ byeŋkɔti. Ɔci naŋka naŋdɛ ɛkkɛ Yaccutiyɛ, ŋeennɛ Juaŋ doki. A ɔŋŋiyɛ, ɛkkɛ maka bɛɛyi jyek Juaŋ olnɛ Yaccu nogɛ ŋaabɛ ñaalɔ kakanti. Ɔci a ɔɔn bala ba gena ɛkkɛ woodgɔ noŋnɛ ɛkɛ wanna. 24Yeti ɛkɛ pɔŋnɛ Jwaŋa Tolan te lyena ɛkɛ tuuni neeni, acaan lien yaakinti Yaccu tiektɛ oŋkanda ɔɔn bɛɛ. 25Daawud bala gɔki te naŋka bɛya Yaccuti ne ɛkɛ gɔki agi, ‘Ciɛggɔn ‘ya yuarcan ciyi ‘ya ñamuti oŋkanda, ɛkɛ ciyi taaŋŋa byeŋa byerɔn, ɔci acaan a ɔŋŋiyɛ, aŋka ‘ya yɔɔda ne tɛyan neeni. 26Ɔci ‘ya yomu ñɔɔna ñɔɔno, ɔci ‘ya lɛmmu gɔki jyeka ñɔyan. Ɔci war ‘ya bala kɛɛy oŋŋa Juaŋ noŋdi naŋki ɛkɛ ‘ya warutiy. 27Acaan i ‘ya dalda i non lienji budan bɛɛ, acaan ‘ya a men i Mena Pwadan, ɔci acaan a ɔŋŋiyɛ, ‘ya dalda i waru jada koolji budan bɛɛ. 28I ‘ya nɔɔnna pɔya ‘ya tɛɛta moki ne baaṭiy, i balkin iki ‘ya, ‘ya yomu ñɔɔna ñɔɔn ne tolan.’ 29“Modg ɔɔn, jyek wey ikin Daawud ḍuaŋa tolan neeni ‘ya waru mɛɛdan ne ‘ya gɔka te ɛkkɛn bɛɛ. Ɛkɛ tuun awarɛ, ɔci ɛkɛ jokci ma koolji, ɔci kol ɛkɛ bala wɛnni men acca ban ikin. 30Daawudyɛ, ɛkɛ a bɔwa Jwaŋa Tolan, ɔci ɛkɛ nɔɔnnɛ Juaŋ te ñamu agi ‘mena bɛɛdɔ te kɛɛgin Daawudtiyɛ, agi ɛkta agdɔ ḍuaŋa tolan, ɔci coottɔ kaakci Daawudti.’ 31Ɔci acaan jyeka neeni ŋeejɛ Daawudyɛ, ɛkɛ gɔkcin mati te jɔŋŋin jɔŋdi Kiṭɔ te koolji tɛɛti moki agi, ‘Ɛkɛ dalnɛ Juaŋ non lienji budan bɛɛ, ɔci ɛkɛ warɛ jani bɛɛ.’ 32Yaccu mena bala ikinti wɛnni neeniyɛ, gena ɛkɛ guagdɛ Daawud neeni. Ɛkɛ luolnɛ Juaŋ ñaalɔ te koolji, ɔci ɛkɛ tɛɛti moki. Ɔci ɛkɛ yuarŋɔn ɔɔn te woŋgɔ waakida. 33Ɔci Yaccu neeni naŋŋɛ Juaŋ aŋi mena tolan, ɔci ɛkɛ cooccin Juaŋ taaŋɛti taaŋŋa byerɔn. Ɔci ɛkɛ ‘wonnɛ Weegɛn Boŋ ɛkɛ ba jwalla guaŋŋɛ Juaŋ ɛkɛti te baaṭiy. Ɔci Yaccu ɔɔn ‘wonnɔn Boŋ ɛkɛ ne ŋoyɔ. Naŋka yuarŋɛ ɛkkɛ ɔɔnti acca neeniyɛ, ɔci jyeka tieŋnɛ ɛkkɛ neeniyɛ, bɛɛn te Boŋ Jwaŋa Tolanti Boŋa ɔɔn ‘wonnɔnti Yaccu acca neeni. 34Daawud waanɛ ati ñaalɔ pɔliji bɛɛ, yeti ɛkɛ gɔki te baaṭi agi, ‘Ciɛggɔn gɔkcin Ciɛggɔn ‘yati agi dala i coocca ‘ya taaŋuti taaŋŋa byerɔn, 35ne maka yookɔn te i bwanda ‘ya ɔci ḍuatta ‘ya iñɔ i cieguti ɔɔn.’ 36“Ɔci acaan a ɔŋŋiyɛ, dala ŋeeddɛ ɛkkɛ ma Icrayiil waakɛnda, Yaccu mena ŋaamnɛ ɛkkɛ ñaalɔ neeniyɛ, naŋŋɛ Jwaŋa Tolan aŋi Ciɛggɔn, ɔci naŋŋɛ a Mena Muonɛ Juaŋ Bora moki neeni.” 37Ɔci ne poli ma polla tolan neeni tieŋki jyeka neeniyɛ, ɛkkɛn bala yomgɛn wiak. Ɔci ɛkkɛn tooccin Butructi i maka atki iki ɛkɛ a Cuudan Yaccuti agi, “Modg ɔɔn, ɔɔn noŋdɔn a ɔki?” 38Ɔci Butruc gɔkcin ɛkkɛnti agi, “Dala ɛkkɛ waakɔ yaldɛ te nɔji ɛkkɛ, ɔci ne ɛkkɛ waakɔ yaldɛ dokiyɛ, dala ɛkkɛ bultɛ ma te yenti Yaccu Kiṭɔ aŋka ŋeettan ma ɛkkɛ bɔɔŋnɛ Juaŋ doki. Kan ɛkkɛ noŋdɛ a ɔɔnyɛ, ɛkkɛ ‘wondɛ Juaŋ Boŋ ɛkɛ. 39Acaan jyeka guaŋŋɛ Juaŋ te ñamu agi ɛkɛ ma ‘woñji Boŋ ɛkɛyɛ, jyeka neeni bala te ɛkkɛ, ɔci te kɛɛgin ɛkkɛ daŋkun. Ɔci moki te maka loonan daŋkun maka bortɛ Juaŋ ɛkɛti waakɛnday.” 40Ɔci Butruc bala loṭi ma men te jyeka coŋin. Ɛkɛ bala ṭeyi ɛkkɛn agi, “Dala ɛkkɛ mwondɛ te naŋka yeyin naŋka naŋtan maka coŋin oŋkanda neeni aŋka ɛkkɛ uddɛ te ywobja bɛya ɛkkɛn wyetkɛnti neeni.” 41Ɔci maka jyeti jyeka guaŋŋɛ Butruc a jyek Juaŋ neeniyɛ, ɛkkɛn buuli ma. Ɔci te oŋŋa wannayɛ, maka coŋin ñoowin i Ma Kiṭɔ aŋi ba maka ne cyɛɛlɔ. Maka jyeti neeniyɛ, ɛkkɛn a alpn ne ḍoogɔ (3,000). 42Ɔci ɛkkɛn bɛya oŋkanda aŋka tieŋdi jyeka lorki Cuudan Yaccuy, ɔci ɛkkɛn bala ñoowɔ te jwali tɛɛtin, ɔci moki bala ñoowɔ te Am Ciɛggɔn, ɔci te cɔŋi Juaŋ daŋkun. 43Ɔci ma waakɛnda korkɛn buañi, acaan Cuudan Yaccu bala noŋi naŋka tɛyan naŋka ñyecki ma Jwaŋa Tolan a ḍiɛkan bɛɛ. 44Ɔci maka jyeti Juaŋti neeniyɛ, ɛkkɛn bala ḍwoṭi wyetkɛn oŋkanda waakɛnda. Ɔci ɛkkɛn menga gɔki agi waka neeni a wak mena ne cyɛɛlɔ parɛ bɛɛ, a wak ɛkkɛn waakɛnda. 45Ɔci wak ɛkkɛn wiɛljiyɔ ɔci bilk ‘woñgi maka bilkɛn baawy. 46Ɔci ɛkkɛn bala wyetkɛn ḍɔɔltan oŋkanda on Juaŋ ona tolan neeni. Ɔci ɛkkɛn omi ñoowɔ nona ne cyɛɛlɔ baanji oorg ɛkkɛn jitin. Ɔci ɛkkɛn yomgɛn ñɔɔna ñɔɔno. 47Ɔci ɛkkɛn bala jieyi Juaŋ oŋkanda, ɔci maka pookɛn yomgɛn pwadɔ ɛkkɛnti. Ɔci oŋkanda Juaŋ bala maka pookɛn oodɛ jyeddi ɛkɛti gɔ Ma Kiṭɔ moki coŋkin ɔɔn.

will be added

X\