Naŋki Cuudan 19

1Ɔci ne Apɔɔlɔc baali ciyi ban Kuruntuc menyɛ, Buuluc bala booti bonka pookɛnti daŋkun. Ɔci ɛkɛ ati ne dɛnni ban Ɛpacacti ɔɔn, ɔci ban Ɛpacacyɛ, Buuluc Ma Kiṭɔ gɛɛg mɔŋnɛ aŋan. 2Ɔci ɛkɛ tooccin ɛkkɛnti agi, “Ne ɛkkɛ jyettɛ Yaccuti Boŋ Jwaŋa Tolan bɛɛn ɛkkɛti boki?” Ɔci ɛkkɛn ṭwokcin ɛkɛti agi, “A’a. Ɔɔn tieŋnɔn a ɔɔn te jyek Boŋ Jwaŋa Tolan bɛɛ.” 3Ɔci ɛkɛ tooccin ɛkkɛnti moki agi, “Oŋ kan ɛkkɛ jyek Boŋ Jwaŋa Tolan kwoyɛy, oŋ ɛkkɛ buulkɛ ma a ɔki?” Ɔci ɛkkɛn ṭwokcin ɛkɛti agi, “Ɔɔn buulkɔn ma te bulti Yɔhanna.” 4Ɔci Buuluc gɔkcin ɛkkɛnti agi, “Yɔhanna baalɔ buoṭi ma a ɔɔn aŋka ŋeettan ma maka neeni waakɛn yali te nɔji ɛkkɛn doki. Ɔci ne Yɔhanna baali buoṭi mayɛ, ɛkɛ bala mieti ma agi dala ma jyeddɔ mena baalɔ bɛɛdɔ ɛkɛ ŋoyɛti. Mena guaŋŋɛ Yɔhanna neeniyɛ, gena Yaccu.” 5Ɔci ne ma tieŋki jyek Buuluc neeniyɛ, ɛkkɛn buuli ma te yenti Yaccu mena Ciɛggɔn. 6Ɔci ne Buuluc byeŋkɛ tannɛ ɛkkɛntiyɛ, Boŋ Juaŋ bɛɛn ɛkkɛnti ɔci ɛkkɛn bala gɔki te tugi maka pookɛn mieti te jyek Juaŋo. 7Ɔci maka Boŋ Juaŋ bɛɛn ɛkkɛnti neeniyɛ, dita a inyaakkɛn wyetkɛn ne yyɛɛwɔ. 8Ɔci Buuluc bala ooddi ona morki ma Juaŋ oŋkanda ba ponk ne ḍoogɔ. Ɔci ɛkɛ bala gɔki ne tɛyan ɛkkɛnti ɔci tyewɔ ɔci ‘yeṭi ɛkkɛn te jyek cyɛgji Jwaŋa Tolan. 9Ɔci ma gɛɛgyɛ, wyetkɛn tɛɛna tɛɛno. Ɛkkɛn yookɔn te jyenno, ɔci ɛkkɛn wooki Pɔy Yaccu te ma ñomgɛnti ɔɔn. Ɔci ne Buuluc gɔrni naŋka neeniyɛ, ɛkɛ maka neeni dalnɛ. Ɔci Ma Kiṭɔ maka tieŋŋin jyek ɛkɛyɛ, aŋka eññɛ, ɔci oŋkanda ɛkkɛn ooddi ḍwoṭi wyetkɛn gɔṭi jiek ona parɛ on worga. Ona neeni ma boṭi agi, “On Tiraanoc”. 10Ɔci ɛkkɛn bala gɔwwɔ a ɔɔn aŋan ban Ecya ba yuong ne yyɛɛwɔ. Ɔci te naŋka neeniyɛ, maka bala ciyi ban Ecya tieŋŋin jyek Ciɛggɔn. Ɛkkɛn tieŋŋin waakɛnda. Gena Keedin Pookɛn i ma Icrayiil. 11Ɔci Buuluc bala noŋi naŋka tɛyan naŋka ñyecki ma Jwaŋa Tolan oŋkanda. Gena Jwaŋa Tolan bala noŋi naŋka neeniy. 12Bworŋin ḍyɛrin ɔci bworŋin kanŋa bworŋin ‘yɛŋdɛ Buulucyɛ, ɛkkɛn eyɛ ma nona maka waakɛn yeyinti. Ɔci ne ma topki bworŋin neenitiyɛ, ɛkkɛn waakɛn pwadgin doki. Ɔci maka muogɛ jɔkin yeyin ne ɛkkɛn topki bworŋin neeniti daŋkunyɛ, ɛkkɛn pɔkki jɔkin yeyin daŋkun. 13Ma Icrayiil gɛɛg bala a ṭyeṭo. Ɔci ɛkkɛn bala ati ḍɔki a ḍwaŋi baan konɛti kooci jɔkin yeyin bora te mati. Ɔci ɛkkɛn poccin gɔkcin maka muogɛ jɔkin yeyinti te yenti Yaccu agi, “‘Ya gɔkka ɛkkɛti te yenti Yaccu mena loṭi Buuluc may, dala ɛkkɛ koodɛ bora te ma waakɛnti.” 14Maka noŋi kanŋa neeniyɛ, gena kɛɛgin gaciic tolan ma Icrayiil gɛɛl gaciic yenti Cibay. Kɛɛgin ɛkɛ bala ne dɔɔyɔ wyetkɛn ne yyɛɛwɔ. Ɔci kɛɛgin neeni ɛkkɛn bala noŋi kanŋa ṭyeji daŋkun a ɔɔn. 15Ɔci oŋ gɛɛltiyɛ, ne ɛkkɛn balki noŋki a ɔɔnyɛ, jwaŋa yaayan ṭwokcin ɛkkɛnti gɔkcin agi, “Yaccuyɛ, ŋeej ‘ya, ɔci Buulucyɛ, ŋeej ‘ya moki. Yeti ɛkkɛ neeni agɛ makɛ daŋkun?” 16Ɔci mena muŋŋɛ jwaŋa yaayan neeniyɛ, kuajin mati, ɔci bala jieb mako. Ɔci maka ne dɔɔyɔ wyetkɛn ne yyɛɛwɔ muoŋŋɛyɔ, ɔci ɛkkɛn buannɛ ɛkɛ ne pɛñan. Ɔci ma kuan yiŋi bora waakɛn budan bworŋin baawo. Ɔci ɛkkɛn yannɛ meno. 17Ɔci jyeka neeni ati ban Ɛpacac konɛ warda ne pɛñan. Ɔci Keedin Pookɛn ɔci ma Icrayiil ɛkkɛn tieŋŋin waakɛnda, ɔci ɛkkɛn korkɛn buañi waakɛnda te naŋka neeni. Ɔci ma bala gɔki agi yenti Ciɛggɔn Yaccu neeniyɛ, tolɔ. 18Ɔci maka jyeti dokiyɛ, ɛkkɛn bɛɛn kɔɔna kɔɔnno, ɔci bala lɛɛṭi naŋki ɛkkɛn naŋka yeyin bora. 19Ɔci maka bala noŋi kanŋa ṭyer ne wona ɛkkɛn jyetkɛ Yaccuti bɛɛyɛ, ɛkkɛn eccin worgan ɛkkɛn worgan noŋki ɛkkɛn kanŋan ṭyeṭo, ɔci ɛkkɛn worgan neeni yiɛpcɛ maccu ɔci ammɛ maaño. Ɔci ɛkkɛn bala noŋi naŋka neeni maka coŋin ñomgɛnti. Ɔci worgan yiɛpcɛ ma maccu neeniyɛ, bilkɛn a ḍiɛkan bɛɛ, bilkɛn kɔɔna kɔɔni bala ba ḍeyyan a pɔdda a alpn a ma baan ne yyɛɛwɔ mena parɛ byeŋkɛ (50,000). 20Ɔci jyek Ciɛggɔn ati ciɛñi baan konɛ warda. Ɔci jyeka pookɛn jyeka naŋtan ma baanjiyɛ, buanɛ jyek Ciɛggɔn neeni. 21Ɔci ne naŋka neeni baaniyɛ, Buuluc buagɔn ooddi boddi ban Macɛdɔɔnya, ɔci ban Akeeya ne ban Urcaliimji ɔɔn. Ɔci Buuluc gɔki agi, “Ne ‘ya bonka neeni boddajiyɛ, ‘ya ootta ban Ḍɔɔm daŋkun.” 22Ɔci Buuluc maka moki ɛkɛ oŋkanda gɛɛg cuuññɛ ñamu ne yyɛɛwɔ ban Macɛdɔɔnya. Gena Timutawuc ɔci Iraactac. Ɔci Buuluc, ɛkɛ yeddin te ban Ecya men. 23Ɔci te oŋŋa wannayɛ, ywobji bala acaan ma gɛɛg yookɔn te Pɔy Yaccu. 24Ɔci mena gɔɔñgɔn gɛɛl bala ɛkɛ yenti Dɛmiitriyac. Ɛkɛ gɔci bil pɔddan naŋdɛ bala ba on jwaŋ ɛkkɛn jwaŋa yenti Artɛmic neeni. Ɔci maka noŋi kanŋa Ḍɛmiitriyucyɛ, bilk bala ɛkkɛnti kɔɔna kɔɔn te kanŋa ɛkkɛn neeni. 25Ɔci Dɛmiitriyac borcin maka noŋi kanŋa ɛkɛti, ɔci borcin maka gɔɔñk maka pookɛnti maka noŋi kanŋa ba naŋki kanŋa ɛkkɛn neeniy. Ɔci ɛkɛ gɔkcin ɛkkɛnti agi, “Hay ‘uayo, ŋeejɛ ɛkkɛ bilka ciyin ikin ne pwadan neeniyɛ, bɛɛn te kanŋa ikin neeni. 26Ɛkkɛ tieŋnɛ jiek doki, ɔci naŋki Buuluc yuarŋɛ ɛkkɛ doki, ne ɛkɛ ma yalliyɔ te mali jɔkin ikintiy. Gena wɛnni ban Ɛpacac parɛ bɛɛ. Ban Ecya konɛ warda daŋkunyɛ, ɛkɛ ma yalliyɔ a ḍiɛkan bɛɛ. Acaan ɛkɛ gɔki agi jɔkin pɔɔdi ma te byeŋkɛn neeniyɛ, ɛkki agi jɔkin woodgɛn bɛɛ. Ɛkki agi waka budan. 27Jyeka tɛyan noŋi bɛya ikinti doki hay! Kan maka coŋin bootti Buulucti a ɔɔnyɛ, ɛkkɛn dita mwondi te kanŋa ikin, ɔci ɛkkɛn dita gɔɔdi agi kanŋa ikin yaayɔ. Ɔci dita ma moki gɔɔdi agi on Artɛmic jwaŋa tɛyan neeni yaayɔ. Ɔci dita Artɛmic mena maltan maka ban Ecya ɔci maltan maka baan warda neeniyɛ, ɛkɛ aga gena budan ne cwakanti dita!” 28Ɔci maka bala tyeŋi jyeka guagdi Dɛmiitriyac neeniyɛ, ɛkkɛn looñi ne pɛñan. Ɔci ɛkkɛn bala yaadan agi, “Artɛmic a mena tolan ban Ɛpacac! Artɛmic a mena tolan ban Ɛpacac!” 29Ɔci maka ban Ɛpacacyɛ, ɛkkɛn jiek ḍuobgɛ. Ɔci ɛkkɛn waakɛnda bala yooŋdi nona ḍworki ma wyetkɛn. Ɔci ma gɛɛg mɔkci pɔɔjɔ ɔci muogɛyɔ, ɔci ɛkkɛn eyɛ nona ḍworki ma wyetkɛn. Gena Gayac ɔci Ɛrictaarkoc. Ɛkkɛn a maka ban Macɛdɔɔnya. Ɛkkɛn a maka ati i Buuluc. 30Ɔci Buuluc buagɔn ooddi nona ḍworki ma wyetkɛn neeni, acaan ɛkɛ buagɔn gɔkti jwali gɛɛl polla tolan neeniti. Yeti maka a Ma Kiṭɔyɛ, ɛkkɛn dɛyi ɛkɛ. 31Ɔci ḍuaŋan ma Ḍɔɔm gɛɛg ban Ecya neeniyɛ, ɛkkɛn ma gɛɛg yomgɛn pwanna pwani Buulucti. Ɔci ɛkkɛn men gɛɛl cuuñɛ nona Buulucti, ɔci gɔki ɛkɛti agi naa ɛkta ooddɔ kaattɔ bora nona ḍworci ma wyetkɛn neeni bɛɛ. 32Ɔci maka bala nona ḍworki ma wyetkɛn neeniyɛ, ɛkkɛn bala yaadan a yook budan ɔɔn, woodi bɛɛ. Ɛkkɛn yaadan magga da te yookɛn, ɔci magga da te yookɛn. Yeti yooka yaatki ɛkkɛn a ɔɔn wannayɛ, ŋeecɔn ɛkkɛn waakɛnda bɛɛ. Çeecɔn magga ne ḍiɛkan. 33Ɔci ma Icrayiil mena ‘uan gɛɛl yenti Alɛkcaandar mwowwɛ ɛkkɛn bora, ɔci ɛkɛ yɔɔtci ɛkkɛn ma ñomgɛnti, ɔci ma gɛɛg poŋi gɔki agi gena jyeka bɛɛnji ma neeni. Ɔci Alɛkcaandar bieŋɛ laŋnɛ mati aŋka ma ciya lieda acaan ɛkɛ noŋi gɔkti maka neeniti. 34Ɔci ne ɛkkɛn Alɛkcaandar ñiikiti agi gena men ma Icrayiil neeniyɛ, ɛkkɛn yaadan ne pɛñan waakɛnda te lɛmma ne cyɛɛlɔ agi, “Artɛmic a mena tolan ban Ɛpacac! Artɛmic a mena tolan ban Ɛpacac!” Ɔci ɛkkɛn bala yaadan a ɔɔn ba oŋ woŋgɛ ne yyɛɛwɔ, woodi bɛɛ. 35Ɔci mena kiewi jyek akuuma gɛɛl gɔkcin polla tolan neeniti agi, “Dala ɛkkɛ ciedɛ lieda!” Ɔci ɛkkɛn cien lieda. Ɔci ɛkɛ gɔkcin ɛkkɛnti agi, “‘Uay ma Ɛpacac, hay! Çeecɔn ma waakɛnda maka ban Ɛpacac neeniyɛ, gena ikin a maka gɔṭi on Artɛmic jwaŋa tɛyan neeni. Ikin a maka gɔṭi poma maltan ma poma ḍɛmmin ikinti te pɔliji. 36Ɔci acaan men gɛɛl yaakinti noŋdi genga jwaŋ ikinti bɛɛyɛ, dala ɛkkɛ ciedɛ lieda. Naa ɛkkɛ noŋɛ amaam budan ɔɔn bɛɛ. 37Ɛkkɛ ‘uaya neeni oonɛ wɛnni budan. Ɛkkɛn noŋi gena yaayan gɛɛl jwaŋ ikinti bɛɛ. Ɔci ɛkkɛn ḍori jwaŋ ikin bɛɛ. 38Dɛmiitriyac, ɛkɛ iki maka noŋki iki ɛkɛ kanŋayɛ, kan ɛkkɛn balki jiek iki mengayɛ, dala ɛkkɛn ooddi jiek eetan ma akuumati. Cyekin godan bala, ɔci ɛkkɛn gɔrti jyeka neeni. 39Ɔci kan jyeka pookɛn gɛɛg bala ɛkkɛtiyɛ, jyeka neeni ywaŋtan ma oŋŋa cyekin wyetkɛn ḍɔɔltiti gɔrti jieky. 40Acaan kan ikin noŋtin amaam te yomg ikin pookɔ a ɔɔnyɛ, akuuma jiek dɔɔdɛ ikin wyetkɔti acaan ɛkɛ poŋdi gɔɔdi agi ikin wyetkɔ ḍɔɔlcin amaam, kaapun. Ɔci kan akuuma tootti ikinti te jyeka ikin wyetkɔ ḍɔɔllin neeniyɛ, ikin yaakinti gɔktin genga ɛkɛti boki?” 41Ɔci ne ɛkɛ gɔkki jyeka neeni mati ne jiek baakiyɛ, ɛkɛ gɔkcin mati agi dala ma kaattɔ bora, ɔci ma cyɛnŋin jitin.

will be added

X\