Naŋki Cuudan 18

1Ɔci ne naŋka neeni baaniyɛ, Buuluc jɔŋŋin te ban Atɛnic, ɔci ɛkɛ ati ban Kuruntuc. 2Ɔci ne ɛkɛ atti bana neenitiyɛ, ɛkɛ men ma Icrayiil gɛɛl mɔŋnɛ bana neeniti. Ɛkɛ yenti Akwilla. Ɛkɛ a men maka ban Bunti. Ɛkkɛn wonkɛn bɛɛki i ɛŋ ɛkɛ Pricilla te ban Itali, acaan Klɔdyac ḍuaŋa tolan ma Ḍɔɔm ma Icrayiil ŋualnɛ ɔntɔ te ban Ḍɔɔm. Ɔci Buuluc ati ḍieŋjin ban ɛkkɛn. 3Ɔci ɛkɛ bala ciyi iki ɛkkɛn ɔci bala kanŋan iki ɛkkɛn te byeŋkɛn, acaan kanŋa ɛkkɛn a kanŋa ne cyɛɛlɔ, gena ɛkkɛn a maka ṭwoṭi oorga a bworŋiny. 4Ɔci oŋkanda te Oŋ Cabityɛ, Buuluc kaatti orɔ ona morki ma Juaŋ ɔci ɛkɛ bala gɔwwɔ iki ma te jyek Juaŋo. Ɛkɛ bala gɔki ɛkkɛnti ne pwadan agi dala ɛkki jyeka neeni mugdɛ. Maka neeniyɛ, gena ma Icrayiil ɔci ma Giriik. 5Ɔci ne Cila ɔci Timutawuc bɛɛki te ban Macɛdɔɔnyayɛ, ɛkkɛn ati nona Buulucti, ɔci ɛkkɛn Buuluc mɔkci loṭi ma a jiñɛ bɛɛ. Ɛkɛ bala lwoki ma Icrayiil ne pwadan agi Yaccu neeniyɛ, ɛkɛ a Kiṭɔ Mena Muonɛ Juaŋ Boray. 6Ɔci ne ma yookiti te jyek ɛkɛ ɔci ne ɛkkɛn ḍorki ɛkɛ ne yaayanyɛ, ɛkɛ bworŋin ɛkɛ ṭyɛŋŋɛ ñin ɛkkɛnti, ɔci ɛkɛ gɔkcin ɛkkɛnti agi, “Kan jiek bɛya ɛkkɛ wyetkɔtiyɛ, aŋi jyek ɛkkɛ pookɔ doki. A jyek ‘ya moki bɛɛ. Acca ‘ya ootta Keedin Pookɛnti.” 7Ɔci Buuluc bakcin bora ona parɛti. Gena on mena yenti Tituc Jactac. Ɛkɛ a mena moṭi Jwaŋa Tolanti. Ɔci on Tituc bala ona morki ma Juaŋ taaŋɛti ne cwakanti. 8Ɔci mena parɛ daŋkun bala yenti Kricpac, ɔci Kricpac neeni ɛkɛ a ḍuaŋa ona morki ma Juaŋ, ɔci ɛkɛ jyeti Ciɛggɔn Yaccu Kiṭɔti. Ɔci maka cieki iki ɛkɛ daŋkun jyeti waakɛnda. Ɔci maka ban Kuruntucyɛ, ɛkkɛn tieŋŋin ɔci jyeti daŋkun. Ɛkkɛn a ḍiɛkan bɛɛ, kɔɔna kɔɔnno. Ɔci ɛkkɛn buuli ma. 9Ɔci oŋ gɛɛlti te ween jiñɛyɛ, Jwaŋa Tolan gɔkcin Buulucti te liɛlti agi, “Naa i buay bɛɛ. Dala i ma myetka oŋkanda ɔɔn. Naa i jiek dalja bɛɛ, 10acaan ikin balkin iki ‘ya a cyɛɛlɔ. Ɔci i mugdi men gɛɛl noŋdi ne yaayan iti bɛɛ. Ma ‘ya bana neenitiyɛ, ɛkkɛn kɔɔna kɔɔnno.” 11Ɔci Buuluc cien bana neeniti bala ba ywoni ne cyɛɛlɔ ɔci ponk ne dɔɔyɔ wilin ne cyɛɛlɔ, ɔci ɛkɛ bala mieti maka neeni te jyek Jwaŋa Tolan. 12Ɔci te yuonga Galiyɔ agɛ ḍuaŋa ṭɔɔlɛ maka ban Akeeyayɛ, ma Icrayiil jiek naŋɛ te tuka ne cyɛɛlɔ, ɔci ɛkkɛn Buuluc mugɛ ɔci eyɛ nona noŋki ma godan. 13Ɔci ɛkkɛn gɔkcin Galiyɔti agi, “Mena neeniyɛ, ɛkɛ bala loṭi ma agi dala ma moṭi Juaŋti ba pɔya parɛ pɔya yaayan ganuuntiy.” 14Ɔci ne Buuluc noŋi tukɛ pɔktɛ gɔktiyɛ, Galiyɔ gɔkcin ma Icrayiilti agi, “Hay ɛkkɛ ma Icrayiil, kan jyeka neeni a jyek naŋka naŋŋɛ ‘wana neeni yeyin gɛɛgyɛ, ‘ya gɔrca. 15Yeti kan jyeka neeni a jyek naŋki ɛkkɛ, ɔci jyek yeng, ɔci jyek ganuun ɛkkɛ pookɔyɛ, dala ɛkkɛ gɔrtɛ jiek pookɔ. ‘Ya buaga gɔrca jyeka neeni bɛɛ.” 16Ɔci ɛkɛ ɛkkɛn ŋualnɛ ɔntɔ te nona noŋki ma godan. 17Ɔci mena parɛ gɛɛl bala moki ɛkɛ yenti Cɔctanic, ɔci Cɔctanicyɛ, ɛkɛ a ḍuaŋa ona morki ma Juaŋy. Ɔci maka neeni waakɛnda Cɔctanic mugɛyɔ te nona godan wɛnan ɔci ɛkɛ jiebɛ. Yeti Galiyɔ gɔrcin nona jiebki ɛkkɛn mena neeni bɛɛ. 18Ɔci ne Buuluc ɛɛni coodi ban Kuruntucyɛ, ɛkɛ ñiebjin i modgɛn, acaan ɛkɛ buagɔn woon ooddi ban Cuurya. Ɔci ɛkkɛn ati i Pricilla i Akwilla aŋka taabti murkati ooddi ban Cuurya. Ɔci wona men ɛkkɛn jɔŋti bɛɛyɛ, Buuluc jyeyi ɛkɛ tuomnɛ bora ba naŋki ma Icrayiil, acaan ɛkɛ ḍɛki jwali gɛɛl Juaŋ ñamɛti ɔci jyeyi ɛkɛ bala niin budan te twomto. 19Ɔci ɛkkɛn taapcin murkati ɔci ati ban Ɛpacac. Ɔci ne ɛkkɛn balki ban Ɛpacacyɛ, Buuluc kaaccin ona morki ma Juaŋy, ɔci ɛkɛ bala gɔṭi jiek wɛnan i ma Icrayiil. 20Ɔci ma Icrayiil bala poṭi ɛkɛ warɛ, acaan ɛkkɛn buagɔn naa ɛkɛ ooddi men bɛɛ. Yeti Buuluc yookɔn. 21Ɔci ɛkɛ ñiebjin iki ɛkkɛn, ɔci gɔkcin ɛkkɛnti agi, “Kan Jwaŋa Tolan buagɔn ‘ya dɔɔkka nona neeniti mokiyɛ, ‘ya dɔɔkka dɔki.” Ɔci ɛkɛ taapcin murka tolanti, ɔci ati te ban Ɛpacac. Ɔci ɛkɛ Pricilla i Akwilla dolnɛyɔ te aŋan. 22Ɔci ne ɛkɛ dɛnni ban Cɛcariiyayɛ, ɛkɛ kooyin bora te murka tolanji, ɔci ati ban Urcaliim ɔci ñiebjin i ma kaniica aŋan. Ɔci ɛkɛ oŋ ati ban Antyak oŋo. 23Ɔci ne ɛkɛ ɛɛni coodi aŋanyɛ, ɛkɛ jɔŋŋin te aŋan, ɔci ɛkɛ ati booti ban Galatiya ɔci ban Prijya konɛti, bala ṭeyi Ma Kiṭɔ waakɛnda aŋan. 24Men ma Icrayiil gɛɛl bala yenti Apɔɔlɔc, ɔci ɛkɛ a men maka ban Alɛkcaandriya. Ɛkɛ bɛɛn ban Ɛpacac. Ɛkɛ yaakinti gɔki jiek mati ne pwadan, ɔci ɛkɛ worga Juaŋ ŋeejɛ ne pwadan. 25Ɛkɛ lalɛ ma te ñamu te pɔy Ciɛggɔn ɔci a ɔŋŋiyɛ, ɛkɛ warɛ byerŋa byerŋ te lali ma te jyek Yaccu. Ɛkɛ bala loṭi ma te jiek jitkɛn neeni ne pwadan. Yeti jyek bultiyɛ, ŋeejɛ ɛkɛ waakɛnda bɛɛ, yeti ɛkɛ jyek bulti Yɔhanna aŋka ŋeejɛ ɛkɛ parɛ. 26Ɔci ɛkɛ kaaccin orɔ ona morki ma Juaŋ, ɔci bala loṭi ma te yoma tɛyan. Ɛkɛ buayi menga bɛɛ. Yeti ne Pricilla ɔci Akwilla tieŋki jyeka loṭi ɛkɛ neeniyɛ, ɛkkɛn Apɔɔlɔc eyɛ ban ɛkkɛn, ɔci ɛkkɛn ɛkɛ lwogɛ ne pwadan te pɔy Juaŋ waanɛ waakɛnda. 27Ɔci ne ɛkɛ buaŋŋi woon ooddi galŋ kwoña parɛti ban Akeeyatiyɛ, ɛkɛ kiegi modg ɛkkɛn Ma Kiṭɔ worga aŋka eedɛ ɛkɛ eektɛ ma aŋan. Worga gɔki agi dala ɛkki Apɔɔlɔc ñiibdɛ ne pwadan. Ɔci ne ɛkɛ dɛnni aŋanyɛ, ɛkɛ Ma Kiṭɔ maŋŋɛ ne pwadan. Juaŋ yomɛ pwad pwad maka neeniti aŋka ɛkkɛn jyetki ɛkɛti wanna. 28Apɔɔlɔc ma maŋŋɛ ne pwadan te jyek Juaŋo. Ɛkɛ bala tyewɔ i ma Icrayiil ma ñomgɛnti, ɔci ɛkɛ ma lwoŋŋɛ nɔɔnnɛ te worga Juaŋ ne pwadan agi Yaccu neeniyɛ, ɛkɛ a Kiṭɔ Mena Muonɛ Juaŋ Boray. Ɛkɛ ma Icrayiil buannɛ a ɔɔn ne ɛkɛ baali lwoki ma te worga Juaŋy.

will be added

X\