1 Ɔci Buuluc i Cila ati booti ban Ampiipolic konɛti, ɔci ban Apolɔɔnya konɛti, ɔci ɛkkɛn dɛñjin ban Tacalunika. Ɔci bana neenitiyɛ, ona morki ma Juaŋ bala. 2 Ɔci te Oŋ Cabityɛ, Buuluc ati kaaccin orɔ ona morki ma Juaŋ ba naŋki ɛkɛ oŋkanda ɔɔn. Ɛkɛ kaaccin ona morki ma Juaŋ Oŋ Cabit jitkɛ ne ḍoogɔ. Ɔci ɛkɛ bala gɔṭi jiek i maka bana neeniti. Ɛkkɛn bala gɔwwɔ te jyek Juaŋ jyeka kiigin. 3 Ɛkɛ ma lwoŋŋɛ te jyeka kiigin ne pwadan aŋka ŋeettan ɛkkɛn jiek bala worgaji doki agi ne Kiṭɔ bɛɛddayɛ, ɛkta wardan eeddɔ, ɔci ɛkta moki jɔldɔ ñaalɔ te koolji tɛɛti moki. Ɔci Buuluc gɔki agi, “Yaccu mena ɛkkɛ nɔɔttin ‘ya te ɛkɛ neeniyɛ, ɛkɛ a Kiṭɔ mena cuonnɛ Juaŋ awarɛy.” 4 Ɔci maka neeni gɛɛgyɛ, jyeti jyeka neeni. Ɔci ɛkkɛn bala booti Buuluc ɔci Cila. Ɔci ma Giriik gɛɛg maka yomgɛn bala Jwaŋa Tolantiyɛ, ɛkkɛn jyeti Juaŋti daŋkun. Ɔci moong gɛɛg moonga a wyetk moonga wɛɛyi makɛnyɛ, ɛkkɛn jyeti a ḍiɛkan bɛɛ. 5 Ɔci ma Icrayiil korkɛn modɔ Buuluc ɔci Cilati. Ɔci ɛkkɛn maka yeyin maka booti dukkan jitin budan kanŋan bɛɛ neeni ḍɔɔlɛyɔ, ɔci ɛkkɛn ciŋiji. Ɔci maka baanji waakɛnda daŋkun bɛɛn nona maka neeniti. Ɔci maka yeyin ciŋiji ɛkkɛn waakɛnda daŋkun, ɔci ma bana neeniti ḍuobbin lyɛl a lyɛli waakɛnda. Ɔci ɛkkɛn ati ɔci yɔɔtcin on men gɛɛl bala yenti Jɛcan tukɛti, acaan ɛkkɛn buagɔn Buuluc ɔci Cila muktan aŋka eetan nona ma godanti. 6 Ɔci ne ɛkkɛn Buuluc ɔci Cila yuarkiti bɛɛyɛ, ɛkkɛn Jɛcan aŋka mugɛ, ɔci wuayɛ eyɛ i Ma Kiṭɔ gɛɛg nona ḍuaŋanti. Ɔci ne ɛkkɛn balki atki wɔɔcki ma a ɔɔnyɛ, ɛkkɛn yaadan ɔci gɔki agi, “Maka noŋi amaam baan wardayɛ, ɛkkɛn bɛɛn ban ikinti, 7 ɔci ɛkkɛn eññɛ Jɛcan on ɛkɛ doki. Ɛkkɛn waakɛnda neeniyɛ, noŋi ba jyek ḍuaŋa tolan ikin ma Ḍɔɔm bɛɛ, acaan ɛkkɛn gɔki agi ḍuaŋa tolan pardan gɛɛl baalɔ, agi gena Yaccu.” 8 Ɔci te jyek ɛkkɛn neeniyɛ, maka coŋin neeni looñi, ɔci ne ḍuaŋan tieŋkiyɛ, ɛkkɛn looñi daŋkun. 9 Ɔci ḍuaŋan eci bilk te Jɛcanti ɔci te Ma Kiṭɔti, ɔci ɛkkɛn oŋ pɔkkiti ma oŋo. 10 Buuluc ɔci Cila kwaccin ban Tacalunika bɛɛ. Ɔci te ween jiñɛ ɛkkɛn cuuñɛ modgɛn ne pɛñan bana parɛti bana yenti Bɛriiya. Ɔci ne ɛkkɛn dɛñki ban Bɛriiyayɛ, ɛkkɛn kaaccin ona morki ma Juaŋy. 11 Ɔci ma Icrayiil maka bana neenitiyɛ, yomg ɛkkɛn bala ba ma Icrayiil maka ban Tacalunika bɛɛ. Ma Icrayiil ban Bɛriiya yookɔn te jyeka neeni bɛɛ. Ma Icrayiil ban Bɛriiya buagɔn jyeka neeni ne pɛñan, ɔci ɛkkɛn bala poki gɔṭi lieṭi worga Juaŋ jitkɛ oŋkanda, acaan ɛkkɛn buagɔn gɔrti kan jyeka guagdɛ Buuluc neeni a jyeka awarɛ kaapun. 12 Ɔci ma Icrayiil maka bana neeniti jyeti a ḍiɛkan bɛɛ. Ɔci ma Giriik, maka ḍwaŋin maka moong ɔci maka ‘uayi ɛkkɛn jyeti a ḍiɛkan bɛɛ, kɔɔna kɔɔnno. 13 Yeti ne ma Icrayiil maka ban Tacalunika tieŋki agi ma Bɛriiya myenda Buuluc te jyek Juaŋyɛ, ɛkkɛn bɛɛn ban Bɛriiya ɔci maka bana neeniti ciŋɛji aŋka dala ɛkkɛn yomgɛn yiegdi Buulucti. 14 Ɔci ne pɛñan Ma Kiṭɔ Buuluc cuuñɛ galŋ ḍwaŋɛti. Yeti Cila ɔci Timutawucyɛ, ɛkkɛn yeddin te ban Bɛriiya. 15 Ɔci maka ati i Buulucyɛ, ɛkkɛn Buuluc eyɛ ne nona loonan ban Atɛnic. Ɔci maka eci Buuluc neeniyɛ, ne ɛkkɛn Buuluc dɛñkiti ban Atɛnicyɛ, Buuluc ɛɛnjin ɛkkɛnti agi, “Ne ɛkkɛ ooddiyɛ, dala Cila ɔci Timutawuc myettɛ dala ɛkkɛn bɛya nona ‘yati ne pɛñan.” Ɔci ɛkkɛn atti. 16 Ɔci ne Buuluc baali kɛɛy Cila i Timutawuc ban Atɛnicyɛ, ɛkɛ yomɛ wiak a jiñɛ bɛɛ. Ɛkɛ yomɛ wiak te naŋki maka ciyi ban Atɛnic, acaan ɛkkɛn waakɛnda baan wardayɛ, bala moṭi jɔkin yeyinti waka pɔɔtan ma a pɔɔto. 17 Ɔci ne Buuluc baali kɛɛy Cila ɔci Timutawucyɛ, ɛkɛ bala ooddi oŋkanda kaatti ona morki ma Juaŋy. Ɛkɛ bala gɔṭi jiek i ma Icrayiil neeni ɔci maka Keedin Pookɛn maka jyeti jyek Jwaŋa Tolan oŋkanda, ɔci ɛkɛ bala gɔki jyek Juaŋ mati bora nona wɔɔgan daŋkun, gena maka mɔŋdɛ ɛkɛ nonka wannatiy. 18 Ɔci maka loṭi ma gɛɛg bala bartan ma agi ma Ɛpikyuurac, ɔci gɛɛg bartan agi ma Ictɔɔykin ɛkkɛn bɛɛn ɔci bala tyewɔ i Buuluc. Ɔci maka neeni gɛɛg gɔki Buuluc agi, “Mena ani jiek neeni, jyek ɛkɛ a jyek waaka yeti?” Ɔci maka pookɛn gɛɛg gɔki agi, “Hay, ɛkɛ bala ba nɔɔti ma te jyek jɔkin pookɛn jɔkin kwoyɔn ikin gɛɛg no!” Ɛkkɛn gɔki a ɔɔn acaan Buuluc bala mieti ma te jyeka wonkɛn jyeka pwadin. Gena jyek Yaccu, ɔci jyek oŋŋa Yaccu jɔŋni te koolji tɛɛti mokiy. 19 Ɔci Buuluc eyɛ ma nona Maka Gɔṭi Jiek nona bartan ma a Ɛriyɔɔpagoc. Ɔci ɛkkɛn gɔkcin ɛkɛti agi, “Ɔɔn buagɔn i ɔɔn nɔɔttɔn jyek i jyeka wonkɛn neeni. 20 Acaan jyeka guaga i neeniyɛ, da pookɛn. Dala i ɔɔn lwogdɔn te jyeka neeni.” 21 Ɛkkɛn gɔki a ɔɔn acaan maka ban Atɛnic ɔci maka bɛɛn te bonka pookɛnti bɛɛn bowwin ban Atɛnicyɛ, ɛkkɛn waakɛnda i maka neeniyɛ, kan ɛkkɛn tieŋdi gena woonɛ gɛɛlyɛ, ɛkkɛn buagɔn doki tieŋdi jyeka wonkɛn neeni ne pɛñan. Ɔci ɛkkɛn buagɔn jyey a jiɛn oŋkanda te jyeka wonkɛn woodi bɛɛ. 22 Ɔci Buuluc jɔllin ñaalɔ, ɔci yɔɔtcin Maka Gɔṭi Jiek ñomgɛnti nona bartan ma agi Ɛriyɔɔpagoc neeni, ɔci gɔkcin ɛkkɛnti agi, “‘Uay maka ban Atɛnic, ɛkkɛ agi maka moṭi jɔkinti hay! 23 Ne ‘ya baala ata bootayɛ, gena moṭɛ ɛkkɛ gɛɛl yuarŋ ‘ya, ɔci jyeka kiiwɛ ma ɛkɛ warɛtiyɛ, gɔki agi, ‘Gena neeniyɛ, a gena moṭin ikin Jwaŋa kwoyin ikiny.’ Jwaŋa maldɛ ɛkkɛ Jwaŋa Kwoyɛ ɛkkɛ neeniyɛ, gena ɛkɛ jiekɛ nɔɔttin ‘ya ɛkkɛ neeni. 24 “Jwaŋa cɔti noon warda, ɔci Jwaŋa cɔti waka bala noon warda neeniyɛ, ɛkɛ a Ciɛggɔn Tolan ñaalɔ pɔliji ɔci iñɔ ṭɛɛrji moki. Ɔci acaan a ɔŋŋiyɛ, ɛkɛ ciyi te oorga cɔttan ma te byeŋkɛn ba jɔkin ɛkkɛ neeni bɛɛ. 25 Ɔci menga yaakinti ɛkɛ magdɛ te genga ba ma ne mokki maka bɔwan ɔɔn bɛɛ. Gena ɛkɛ aŋka ma ‘wondɛ tɛɛtin ɔci booŋ ɔci waak waakɛnday. 26 Gena yɔra ne cyɛɛlɔ naŋŋɛ Juaŋ aŋka kɛɛn warda bɛɛni neeni. Juaŋ noŋi a ɔɔn acaan ɛkɛ buagɔn ṭɛɛr konɛ warda kuma te ma baano. Ɔci ɛkkɛn waakɛndayɛ, magga da te oŋŋa ɛkkɛn jietkiti may, ɔci magga da te oŋŋa ɛkkɛn jietkiti ma bala ba jyeka guaŋŋɛ Juaŋy. Ɔci ɛkɛ kɛɛn kɛɛmmɛ jitin magga da te noonɛn, ɔci magga da te noonɛn. 27 Jwaŋa Tolan ma naŋŋɛ a ɔɔn acaan ɛkɛ poŋi gɔki agi, ‘A ɔŋŋiyɛ, ma lierti ‘ya, ɔci ‘ya yuarta ɛkkɛn kaapun.’ Yeti Jwaŋa Tolan loon lon te ikinti bɛɛ. 28 Bala ba men gɛɛl gɔki agi, ‘Acaan ɛkɛ bala ikintiyɛ, ikin tɛɛtin te ɛkɛ ɔci ikin atin te ɛkɛ, ɔci acaan a ɔŋŋiyɛ, aŋka ikin balkin ciyin acca neeniy.’ Ɔci a ɔɔnyɛ, bala ba jyeka kiiwɛ ma ɛkkɛ agi, ‘Ikin ma baanyɛ, ikin akcin kɛɛgin Jwaŋa Tolan.’ ” 29 Ɔci Buuluc gɔki agi, “Kan ikin akin kɛɛgin Jwaŋa Tolan a ɔɔnyɛ, naa ikin poŋin gɔkin agi Juaŋ a dahab, walla a pɔdda, walla a poom bɛɛ. Ɔci moki naa ikin poŋin gɔkin agi Juaŋ bala ba gena pɔɔtan ma a pɔɔt te paŋi ɛkkɛn budan bɛɛ. 30 Te ñamu ne ma balki cieki noŋki amaam te kwoñña ɛkkɛn Juaŋ kuokitiyɛ, Juaŋ jiek olnɛ ɛkkɛn wyetkɛnti bɛɛ. Yeti accayɛ, ɛkɛ gɔki agi dala ma baan waakcinda waakcin yaldɛ te nɔjjo. 31 Acaan Jwaŋa Tolan oŋa ɛkɛ wɛɛn warda noŋdɛ godan a tyɛlga te yenti mena muonɛ ɛkɛ bora neeniyɛ, naŋŋɛ ɛkɛ doki. Juaŋ naŋka neeni lɛɛlnɛ bora mati waakɛnda te luollin ɛkɛ Yaccu Kiṭɔ Mena Muonɛ ɛkɛ bora neeni luolnɛ ñaalɔ te lientiy.” 32 Ɔci ne ɛkkɛn tieŋki jyek jɔŋŋin ñaalɔ te kooljiyɛ, ma gɛɛg wooki ɛkɛ, ɔci maka pookɛn gɛɛg gɔki Buulucti agi, “Ɔɔn buagɔn tieŋdɔn jyeka neeni moki.” 33 Ɔci Buuluc kooyin bora te nona mati neeni, ɔci atti. 34 Yeti maka ‘uay gɛɛg bootcin ɛkɛti, ɔci ɛkkɛn jyetti. Men gɛɛl ne cyɛɛlɔ yenti Dayoniicyac. Dayoniicyac neeniyɛ, ɛkɛ a ḍuaŋa nona bartan ma a Ɛriyɔɔpagoc. Ɔci mena ɛɛŋ gɛɛl jyeti daŋkun. Ɛkɛ yenti Damaric. Ɔci maka pookɛn gɛɛg jyeti daŋkun.
