Naŋki Cuudan 16

1Ɔci Buuluc ati ban Dɛrbi ɔci ban Lictara daŋkun. Ban Lictarayɛ, men Ma Kiṭɔ gɛɛl bala yenti Timutawuc. Mɛy ɛkkɛn a men Kiṭɔ, ɛkɛ a men ma Icrayiil daŋkun. Ɔci wey ɛkkɛnyɛ, a men ma Giriik. 2Modga ban Lictara ɔci ban Aykɔɔnyam, ɛkkɛn gɔki agi Timutawuc pwadɔ. 3Buuluc buagɔn Timutawuc neeni eedɛ ɛkɛ nona ɛkɛ ooddɛ loṭi ma bonka pookɛn gɛɛgtiy. Yeti ma Icrayiil maka ciyi bonka neenitiyɛ, ɛkkɛn Timutawuc ŋeeckɔn ne Timutawuc ŋutkiti ma iñɛti ba naŋki ma Icrayiil bɛɛy, acaan Timutawuc neeni wey ɛkkɛn a men ma Giriik. A ɔŋŋiyɛ, Buuluc Timutawuc ŋunnɛ iñɛti ñamu parun, aŋka ne ɛkkɛn ootti lorki mayɛ, naa ma Icrayiil yomgɛn yiegdi loondi bɛɛ. 4Ɔci ne ɛkkɛn atki bootki bonk korkɛntiyɛ, ɛkkɛn ma kaniica nɔɔtkɛ agi dala jyeka naŋŋɛ ma ban Urcaliim neeniyɛ, dala ɛkki tiidiyɔ mako. Gena jyeka naŋɛ Cuudan Yaccu ɔci cyekin kaniica ban Urcaliimy. 5Ɔci oŋkandayɛ, ma kaniica bala ciɛñ a ciɛñi gɔ moki coŋkin ɔɔn, acaan ɛkkɛn jyeti Yaccuti ne pwadan. Ɔci moki jyeni ɛkkɛn tɛɛna tɛɛno. 6Buuluc ɔci Cila, ɛkkɛn kɛŋnɛ Boŋ Jwaŋa Tolan agi naa ɛkki ooddɔ loṭɔ ma ban Ecya bɛɛ. Ɔci acaan a ɔŋŋiyɛ, ɛkkɛn ati booti ban Prijya ɔci ban Galatiya korkɛnti. 7Ɔci ɛkkɛn ati ne dɛñki ban Micya. Ɔci ɛkkɛn buagɔn ooddi ban Bitinnya, yeti ɛkkɛn kɛŋnɛ Boŋ Yaccu yomgɛnti. 8Ɔci acaan a ɔŋŋiyɛ, ɛkkɛn booti ban Micya konɛti ne ɛkkɛn dɛñki ban Trɔwac kɔmḍɔ ɔɔn. 9Ɔci ne ɛkkɛn balki te ban Trɔwacti menyɛ, oŋ gɛɛlti te ween jiñɛyɛ, Buuluc liɛlti yuarnɛ agi mena ‘uan gɛɛl ban Macɛdɔɔnya bala yɔɔd boor ɛkkɛn a borti agi, “Bɛɛd totta bora wɛnni ban Macɛdɔɔnya, ɔɔn magdɔn!” 10Ɔci ne liɛlti bɛɛni Buulucti a ɔɔnyɛ, ɔɔn jɔŋnɔn ne pɛñan waakɔ ywaŋŋɔn aŋka ooddɔn ban Macɛdɔɔnya, acaan ɔɔn gɔrnɔn Juaŋ boor ɔɔn buagɔn ɔɔn ooddɔn loṭɔn ma te jyeka wonkɛn jyeka pwadin neeni aŋan. 11Ɔci ɔɔn taamnɔn baabin tool konɛ baabin tolanti te ban Trɔwac, ɔci ɔɔn attɔn ne dɛnnɔn ban Camotrec. Ɔci ɔɔn niinnɔn ban Camotrec, ɔci ne liidɔ ɔɔn jɔlnɔn te baabin tool konɛ moki attɔn ne ban Ñapolic ɔɔn. 12Ɔci ɔɔn jɔŋnɔn te ban Ñapolicti moki, ɔci attɔn ne ban Pilibbi ban Macɛdɔɔnyaji. Ban Pilibbi neeniyɛ, ɛkɛ a ban ma Ḍɔɔm. Pilibbi neeniyɛ, ɛkɛ tol tol te bonka pookɛn waakɛnda. Ɔci ɔɔn coonnɔn aŋan ne ḍiɛran ṭɔɔlɛ. 13Ɔci te Oŋ Cabit ɔɔn attɔn, ɔci ɔɔn kaannɔn bora te kañ baan tukɛ, ɔci ɔɔn attɔn tool ḍwaŋɛti, acaan ɔɔn balgɔn poŋɔn gɔkɔn agi nona cɔkki ma Juaŋ bala aŋan kaapun. Ɔci ɔɔn moong mɔŋnɔn iñɔ wyetkɛn ḍɔɔlɛ doki aŋan. Ɔci ɔɔn coonnɔn iñɔ ɔci gɔŋnɔn i ɛkkɛn. 14Ɔci mena ɛɛŋ gɛɛl bala nona cɔkki ma neeni, ɛkɛ yenti Lidya. Ɛkɛ bɛɛn te ban Tayataayra. Kanŋa ɛkɛyɛ, a wyɛlti bworŋin a buol bworŋin eci bilka coŋɔny. Ɛkɛ bala moṭi Jwaŋa Tolanti te baaṭi doki, ɔci ɛkɛ bala tyeŋi jyeka guagdɛ Buulucy. Ɔci Ciɛggɔn ɛkɛ pɔŋnɛ ñingɛti, ɔci jyeka guaŋŋɛ Buuluc neeniyɛ, muŋŋɛ ɛkɛ yomɛti. 15Ɔci ne ɛkɛ buullɔn ɔɔn i ma ɛkkɛnyɛ, ɛkɛ gɔkkin ɔɔnti agi, “Kan ŋeejɛ ɛkkɛ ‘ya a men Yaccu awarɛyɛ, dala ɛkkɛ bɛɛdɛ coottɛ on ‘ya.” Ɔci ɛkɛ gɔ moki gɔkki ɔɔnti ɔɔn ne ɔɔn attɔn i ɛkɛ ban ɛkkɛn ɔɔn. 16Oŋ gɛɛlti ne ɔɔn balgɔn ooddɔn nona cɔkki mayɛ, mena kɛɛngɔn a ṭɔɔl gɛɛl mɔŋnɔn ɔɔn yomɔ. Šɔla neeniyɛ, ɛkɛ muŋŋɛ jwaŋa yaayan, ɔci ɛkɛ bala mieti ma te waka bɛya ne baaṭiy, ɔci bilka gɔki ɛkɛ jiek neeniyɛ, bɛya kɛɛngɔn neeni weegɛnti oŋkanda a ḍiɛkan bɛɛ, kɔɔna kɔɔnno. 17Ɔci ṭɔla neeni bala booti Buuluc ŋwayɛ, ɔci ɔɔn daŋkun. Ɛkɛ yaadan gɔki agi, “‘Uaya neeniyɛ, ɛkkɛn a kɛɛnk Jwaŋa Tolan ñaalɔy, ɔci ɛkkɛn bala mieti ɛkkɛ te jiek aŋka ɛkkɛ yɔɔdɛ Juaŋo.” 18Ɔci ṭɔɔl bala noŋi a ɔɔn oŋkanda, ɔci ne nink gɛɛg bɛɛki borayɛ, Buuluc konɛ poli te naŋki ɛkɛ neeni. Ɔci Buuluc warɛ yallɛ, ɔci gɔkcin boŋa yaayan jwaŋa bala ṭɔɔl warɛti neeni agi, “‘Ya gɔkka iti te yenti Yaccu Kiṭɔ, dala i kooya bora men dalja!” Ɔci boŋa yaayan kooyin bora ne pɛñan te ṭɔɔlti. 19Ɔci ne maka gɔṭi ṭɔla neeni gɔrki bilk bɛɛti ɛkkɛnti moki bɛɛyɛ, ɛkkɛn Buuluc ɔci Cila muogɛ, ɔci ɛkkɛn wuayɛ eyɛ nona dukkanji nona ḍuaŋan godan ḍuaŋan ma Ḍɔɔmti. 20Ɔci ma gɔkcin ḍuaŋanti agi, “‘Uaya neeniyɛ, ɛkkɛn a ma Icrayiil, ɔci ɛkkɛn bala noŋi ne yaayan ban ikinti. 21Ɛkkɛn loṭi ma te jyek naŋka pookɛn. Ɔci jyeka neeniyɛ, yeyɔ ɔɔnti acaan ɔɔn agɔn ma Ḍɔɔm. Ma Ḍɔɔm yaakinti noŋdi ba jyeka guaktan ɛkkɛn neeni bɛɛ.” 22Ɔci polla tolan neeniyɛ, ɛkkɛn da gɔki ne yaayan Buulucti ɔci Cilati daŋkun. Ɛkkɛn gɔki jyeka neeni a ɔɔn ḍuaŋanti. Ɔci te jyek ḍuaŋanyɛ, Buuluc ɔci Cila bworŋin ɛkkɛn guoddɛ ma bora, ɔci ɛkkɛn ḍwayɛ mako. 23Ɔci ne ɛkkɛn ḍuakiti ma ne pɛñanyɛ, ɛkkɛn yiɛpcɛ ma jiju ciginji, ɔci ma gɔkcin mena gɔṭi ciginti agi, “Dala i waŋu tiicca te ɛkkɛn ne pwadan.” 24Ɔci acaan ma gɔki ɛkɛti ne pɛñan ɔɔnyɛ, mena gɔṭi cigin neeni ɛkɛ Buuluc ɔci Cila eññɛ on kona jiju, ɔci ɛkkɛn tɛrkɛn wwannɛ jaanti, ɔci jana parɛ ḍuannɛ ñaalɔ ɛkkɛn tɛrkɛnti aŋka ɛkkɛn yaakinti jɔŋdi ñaalɔ bɛɛ. 25Ɔci ne ween jiñɛ tuodan Buuluc ɔci Cila bala cɔki Juaŋti, ɔci bala ‘ual ɔɔlg Jwaŋa Tolanti. Ɔci ne ɛkkɛn balki cɔkki ɔci ‘ualkiyɛ, maka pookɛn maka ciginji bala tyeŋi. 26Ɔci ne pɛñan ṭɛɛr ḍiejjin doki. Ɔci cigin warɛ ḍiedan, ɔci cigin tuggɛn waakɛnda waakɛn pɔɔggɛ, ɔci jiŋgin ḍɛɛki ma maka jijuyɛ, ɛkkɛn waakɛnda waakɛn lookkɛ te mati waakɛnda. 27Ɔci mena gɔṭi cigin ne ɛkɛ ṭieniyɛ, ɛkɛ cigin tuggɛn mɔŋnɛ yɔdi a lyɛpin, ɔci ɛkɛ byeŋgaaran oonɛ bora te kuorjɛji, ɔci ɛkɛ noŋi warɛ nogdɛ, acaan ɛkɛ poŋi gɔki agi maka balgɔ ciginji baagɔ attɔ ɔntɔ doki. 28Ɔci ne ɛkɛ yuarnɛ Buuluc noŋi nokki warɛyɛ, Buuluc yaajjin ne pɛñan agi, “Hay! Naa i waru naŋa amaam bɛɛ! Ɔɔn balgɔn wɛnni waakida men!” 29Ɔci mena gɔṭi cigin borcin mati, agi ɛkɛ eektiti ma maña dɛkci ma noono. Ɔci ɛkɛ yiŋi ɔci kuajin orɔ Buuluc i Cilati, ɔci ɛkɛ warɛ ḍiedan, ɔci ɛkɛ ḍwoñjin iñɔ ɛkkɛn ñomgɛnti. 30Ɔci ɛkkɛn lɔnnɛ ɛkɛ bora te ciginji, ɔci ne ɛkɛ Buuluc i Cila lɔnnɛ borayɛ, ɛkɛ tooccin ɛkkɛnti agi, “‘Ya noŋja a ɔki aŋka ‘ya yɔɔdati Jwaŋa Tolany?” 31Ɔci ɛkkɛn gɔkcin ɛkɛti agi, “Dala i jyedda Ciɛggɔn ikin Yaccu Kiṭɔti, ɔci i yɔɔdi ɛkɛ i ma i.” 32Ɔci ɛkkɛn ‘wana neeni myetkɛ jyek Juaŋo, ɔci ɛkkɛn ma mena neeni daŋkun myetkɛ ɛkkɛn moki. 33Ɔci te ween jiñɛ neeni, mena neeni Buuluc ɔci Cila luaŋŋɛ kɔɔgga ɛkkɛn ḍuakiti may. Ɔci mena gɔṭi cigin neeniyɛ, ɛkɛ i ma ɛkkɛnyɛ, ɛkkɛn buuli ma te weenji ɔɔn. 34Ɔci ɛkɛ Buuluc ɔci Cila eññɛ on ɛkɛ, ɔci ɛkkɛn ‘wonnɛ oomdin. Ɔci ɛkɛ yomɛ ñɔɔna ñɔɔno, ɔci maka ciyi on ɛkɛ ɛkkɛn yomgɛn ñɔɔna ñɔɔn daŋkun, acaan ɛkkɛn jyeti Jwaŋa Tolanti. 35Yeti ne noon bɔɔniyɛ, ḍuaŋan maka bɔlin gɛɛg cuuñɛ mena gɔṭi ciginti, ɔci ɛkkɛn ɛkɛ myetkɛ agi ḍuaŋan ma Ḍɔɔm gɔki agi, “Dala i maka ne yyɛɛwɔ neeni pɔkci ɔgdɔ ooddɔ.” 36Ɔci mena gɔṭi cigin neeniyɛ, Buuluc myennɛ agi, “Ḍuaŋan ma Ḍɔɔm gɔki agi dala ‘ya ɛkkɛ pɔkci katan. Acaan a ɔŋŋiyɛ, dala ɛkkɛ kaattɛ bora, ɔci ɔgdɛ ooddɛ, acaan jiek bawwin doki.” 37Yeti Buuluc kɛkcin gɔkcin bɔlinti agi, “Ɔɔn ḍuakɔn ɛkkɛn maka coŋin ñomgɛnti budan, ɛkkɛn ɔɔn noŋkɔn godan bɛɛ. Ɔɔn agɔn ma Ḍɔɔm daŋkun, yeti ɛkkɛn ɔɔn olkɔn jiju ciginji budan ɔɔn. Oŋ ɛkkɛn ɔɔn pɔktɔn lieda a ɔɔn? A’a, dala ḍuaŋan ma Ḍɔɔm neeni bɛya ɔɔn kootɔn bora ɛkkɛn woodgɛn.” 38Ɔci ḍuaŋan bɔlin ati, ɔci ḍuaŋan ma Ḍɔɔm myetkɛ jyek Buuluc. Ɔci ne ḍuaŋan neeni tieŋki jyek Buuluc agi ɛkkɛn aginti ma Ḍɔɔmyɛ, ɛkkɛn buayi. 39Ɔci ɛkkɛn bɛɛn Buuluc ɔci Cilati, ɔci bala gɔki ɛkkɛnti agi baatɔ te naŋka naŋi ɛkkɛn Buulucntiy, ɔci ɛkkɛn kooyi ḍuaŋan ma Ḍɔɔm bora te ciginji, ɔci ɛkkɛn gɔki agi dala ɛkki ɔgdɔ ooddɔ kaattɔ bora te bana neeniti. 40Ɔci ne Buuluc i Cila pɔkkiti ma te ciginjiyɛ, ɛkkɛn ati on Lidya. Ɔci ne ɛkkɛn modg ɛkkɛn Ma Kiṭɔ yuarkitiyɛ, ɛkkɛn bala ṭeyi ɛkkɛn. Oŋ ɛkkɛn oŋ atki bana parɛ oŋo.

will be added

X\