Naŋki Cuudan 15

1Ɔci ma gɛɛg bɛɛn te ban Yahuudiya ati ban Antyak, ɔci ɛkkɛn bala loṭi modg ɛkkɛn ma kaniica. Ɛkkɛn gɔki mati agi, “Kan ɛkkɛ ŋwottɛ ma ba ganuun Muuca bɛɛyɛ, ɛkkɛ yɔɔdɛ Juaŋ bɛɛ.” 2Ɔci Buuluc ɛkkɛn i Barnabac ne ɛkkɛn tieŋki jyeka guaktan ma neeniyɛ, ɛkkɛn bala tyewɔ i maka neeni te jyeka neeni. Ɔci ne ma balki gɔɔki tieki ne pɛñan a ɔɔnyɛ, ɔci ma gɔkcin agi dala Buuluc ɔci Barnabac ɛkki i ma kaniica maka pookcɛn gɛɛg te ɛkkitiyɛ, dala ɛkki ooddɔ ban Urcaliim aŋka gɔrtɔ jyeka neeni aŋan i Cuudan Yaccu ɔci cyekin kaniica. 3Ɔci ba jyeka guagɛ ɛkkɛn neeniyɛ, ma kaniica maka neeni cuuñɛ ati ban Urcaliim. Ɛkkɛn ati booti ban Pɔniicya konɛti, ɔci ban Camɛɛrya konɛti, ɔci ɛkkɛn maka bonka neeniti myetkɛ agi Keedin Pookɛn jyeti Yaccuti doki. Ɔci modgɛn ne tieŋki jyeka neeniyɛ, ɛkkɛn yomgɛn ñɔɔna ñɔɔn ne tolan. 4Ɔci ne ɛkkɛn dɛñki Urcaliimyɛ, ɛkkɛn ñiebjin i ma kaniica, ɔci ñiebjin moki i Cuudan Yaccu, ɔci ñiebjin moki i cyekin kaniica. Ɔci ɛkkɛn maka neeni myetkɛ te naŋka naŋŋɛ Juaŋ Keedin Pookɛnti te tugi ɛkkɛny. 5Ma Kiṭɔyɛ, ma gɛɛg a ma Pɛriciin, ɔci ɛkkɛn jɔŋŋin ñaalɔ gɔki agi, “Dala maka a Keedin Pookɛn maka jyeti wannayɛ, dala ɛkkɛn ŋwottan mako. Ɔci dala ma gɛɛg ooddi ɛkkɛn myettan te ganuun kiinɛ Muuca waakɛnda neeni aŋka dala ɛkkɛn tiitanyɔ.” 6Ɔci Cuudan Yaccu wyetkɛn ḍɔɔlɛ i cyekin kaniica aŋka gɔrti jyeka neeni. 7Ɔci ne ɛkkɛn balki gɔrki jyeka neeni ne jiek tɛɛki a tɛɛnyɛ, Butruc jɔŋŋin ñaalɔ ɔci gɔkcin ɛkkɛnti agi, “Modg ɔɔn, ŋeejɛ ɛkkɛ doki ‘ya kɛnna Juaŋ bora te ɛkkɛti te baaṭi, aŋka Keedin Pookɛn tieŋdi jyeka wonkɛn jyeka pwadin te tuk ‘yati aŋka ɛkkɛn jyeddi jyeka neeniti. 8Jwaŋa Tolanyɛ, ɛkɛ a mena ma yomgɛn ŋeejɛ. Ɔci acca ɛkɛ doki Keedin Pookɛn ‘wonnɛ Boŋ ɛkɛ bala ba ikin ne ‘wonninti ɛkɛ te ñamu ɔɔn. Ɛkɛ Keedin Pookɛn neeni ‘wonnɛ Boŋ ɛkɛ aŋka ŋeettan ma ɛkkɛn a ma ɛkɛ daŋkun. 9Juaŋ ma kɛɛmmɛ jitin bɛɛ. Ne Keedin Pookɛn neeni jyetki Juaŋtiyɛ, ɛkkɛn luaŋŋɛ Juaŋ yomgɛnti ba ikin ɔɔn. 10Yɔrg ikinyɛ, ganuun Muuca tiiyɛyɔ waakɛnda bɛɛ. Ɛkkɛn kookinti. Ɔci ikin moki, ganuun neeni tiiññinyɔ bɛɛ. Oŋ acca ɛkkɛ buagɛ Keedin Pookɛn neeni ganuun tiitanyɔ ogo? A ɔɔnyɛ, bala ba ɛkkɛ poccɛ naŋki Jwaŋa Tolan. Ɔci ɛkkɛ taab oonɛ maka jyeti jyek Juaŋti neeni ḍɔɔggɛnti doki. 11Ikin jyettin ɔci yɔɔññin Jwaŋa Tolan te yom pwani Ciɛggɔn ikin Yaccu ba ɛkkɛn daŋkun ɔɔn.” 12Ɔci ne maka wyetkɛn ḍɔɔlɛ neeni tieŋki jyek Butruc neeniyɛ, ɛkkɛn cien lieda waakɛnda. Menga bala gɔki genga bɛɛ. Ɔci ɛkkɛn myetkɛ Barnabac yaakkɛn i Buuluc te jyek naŋka naŋŋɛ Juaŋ Keedin Pookɛnti. Jyeka myetki ɛkkɛn ma neeniyɛ, gena jyek naŋka naŋŋɛ Juaŋ mati ne ɛkkɛn balki lorki may, acaan Juaŋ bala noŋi naŋka tɛyan naŋka ñyecki ma ɛkɛy. 13Ɔci ne ɛkkɛn jyeka neeni ḍaakkitiyɛ, Yaakub jɔŋŋin ñaalɔ ɔci gɔkcin mati agi, “Modg ɔɔn, tieŋdɛ jyek ‘ya. 14Ikin myennin Butruc doki te naŋki Juaŋ te oŋŋa ɛkɛ jɔɔnni Keedin Pookɛn gɛɛg kɛnnɛ bora akki ma ɛkɛy. 15Jyek Butruc neeniyɛ, bala ba jyeka guaŋŋɛ Jwaŋa Tolan te tuk maka a bɔwan Jwaŋa Tolan agi, 16‘‘Ya dɔɔkka moki ɔci ‘ya cɔtca on Daawud ona ḍɛmmin iñɔ ɔci yaañi neeni ywaŋdiyɔ 17aŋka maka a Keedin Pookɛn lierti ‘ya waakɛnda, gena maka naŋi ‘ya aŋi ma ‘yay. 18Mena gɔki jyeka neeniyɛ, gena Ciɛggɔn. Ɛkɛ bala mieti ma te jyek naŋka neeni te baaṭi doki.’ 19“Paŋi ‘ya neeni, kan Keedin Pookɛn waakɛn yaltan Jwaŋa Tolantiyɛ, naa ikin gɔktin jyeka tɛyan a jyek ŋwoti ma itkɛn neeni ɛkkɛnti bɛɛ. 20Dala ikin kiettin worga ɛkkɛnti. Dala ikin gɔktin ɛkkɛnti, naa ɛkkɛn omdi waka ‘yɛrtan ma jɔkin yeyinti neeni bɛɛ. Naa ɛkkɛn noŋdi tomi bɛɛ. Ɔci naa ɛkkɛn omdi waka tuwa noktan wyeng neeni bɛɛ. Ɔci naa ɛkkɛn dɛtti yimg bɛɛ. 21Ikin kiettin ɛkkɛnti a ɔɔn, acaan ganuun Muuca ati baan konɛti warda te baaṭi doki, ɔci oŋkanda te Oŋ Cabit ma bala poki ganuun Muuca oorga morki ma Juaŋy.” 22Cuudan Yaccu ɔci cyekin kaniicayɛ, ɛkkɛn i ma kaniica waakɛndayɛ, ɛkkɛn jiek ñaagɛyɔ agi dala ɛkkɛn ma gɛɛg kɛndinti bora te ɛkkɛnti aŋka ɛkki ooddɔ iki Buuluc i Barnabac ban Antyak. Ɔci ɛkkɛn ma kɛññɛ bora ne yyɛɛwɔ. Gena Yahuuja mena bartan ma a Barcaaboc, ɛkkɛn i mena parɛ yenti Cila. Ɛkkɛn a maka bala wɛɛyi ma kaniicaji. 23Ɔci ɛkkɛn cuuñɛ mako, ɔci ɛkkɛn ati i Buuluc i Barnabac, ɔci worga eyɛ ɛkkɛn. Jyeka kiiwɛ ma worgaji neeniyɛ, gɔki agi, Modg ɔɔn Keedin Pookɛn ban Antyak ɔci ban Cuurya ɔci ban Ciliicya, ɔɔn ñiepɔn ɛkkɛ te worga neeni. Ɔɔn agɔn cuudan Yaccu ɔci cyekin kaniica ɔci modg ɛkkɛ. 24Ɔɔn tieŋnɔn jiek agi maka bɛɛnɔ te ban ɔɔn agi ɛkki jiek cɔŋŋiyɔ, ɔci agi acca ɛkkɛ jiek jitkɛn yuarcɛ moki ne pwadan bɛɛ. Maka jiek cɔgiyɔ neeniyɛ, ɛkkɛn cuonnɔn ɔɔn bɛɛ. 25Ɔci acaan a ɔŋŋiyɛ, ɔɔn jiek ñaaŋŋɔnyɔ waakida te tuka ne cyɛɛlɔ, aŋka ɔɔn ma gɛɛg muonɔn bora ne yyɛɛwɔ, gena Barcaaboc ɔci Cila, ɔci ɛkkɛn cuondɔn ɔɔn ɛkkɛti. Ɛkkɛn bɛya iki modg ikin modga anin ikin. Gena Buuluc i Barnabac. 26Ɔci Buuluc i Barnabac neeniyɛ, ɛkkɛn a maka ati loṭi ma te jyek Ciɛggɔn ikin Yaccu Kiṭɔ, ɔci ɛkkɛn poŋi te jyek lyen ɛkkɛn bɛɛ. 27Barcaaboc ɔci Cilayɛ, ɛkkɛn cuondɔn ɔɔn ɛkkɛti, aŋka ɛkkɛn ɛkkɛ myettɛ jyeka kienɔn ɔɔn ɛkkɛti te worga neeni te tugi ɛkkɛn. 28Ɔɔn jiek ñaaŋŋɔnyɔ i Boŋ Jwaŋa Tolan a ɔɔn gɔktɔn jyeka tɛyan ɛkkɛti bɛɛ. Yeti ɔɔn gɔktɔn ɛkkɛti te jiek gɛɛg ne ḍiɛkan. 29Naa ɛkkɛ omdɛ waka ‘yɛrtan ma jɔkin yeyinti bɛɛ. Ɔci naa ɛkkɛ menga dɛtti yimg bɛɛ. Ɔci naa ɛkkɛ omdɛ waka tuwa noktan wyeng neeni bɛɛ. Ɔci naa ɛkkɛ noŋdɛ tomi bɛɛ. Kan ɛkkɛ noŋdɛ naŋka neeni bɛɛyɛ, ɛkkɛ ciedɛ ne pwadan. Jwaŋa Tolan baldi i ɛkkɛ. 30Ɔci maka cuuñɛ ma neeniyɛ, ɛkkɛn ati ɔci dɛñjin ban Antyak. Ɔci ne ɛkkɛn dɛñkiyɛ, ɛkkɛn ma kaniica waakɛnda boorgɛti nona ne cyɛɛlɔ, ɔci ɛkkɛn ma ‘woñgi worga. 31Ɔci ne ɛkkɛn gɔrki worga neeniyɛ, ɛkkɛn yomgɛn ñɔɔna ñɔɔn acaan ɛkkɛn magɛ ma te jyeka neeni. 32Yahuuja (mena bartan ma a Barcaaboc) ɔci Cila, ɛkkɛn a bɔwan Jwaŋa Tolan. Ɔci ɛkkɛn bala loṭi ma ne tolan ṭeyi mako. 33Ɔci ne ɛkkɛn ɛɛni coodi aŋan ne ḍiɛran ṭɔɔlɛyɛ, ɛkkɛn cuoññɛ ma bɛɛn dɔɔkkin nona maka ɛkkɛn cuoñki te ñamuy. Ɔci ma ɛɛnjin Barcaaboc ɔci Cilati agi, “Ɛkkɛ ne ooddiyɛ, dala ɛkkɛ ma ñiibdɛ ɔci coodda pwadan bala ɛkkɛnti.” [ 34Yeti Cila buagɔn cootti aŋan.] 35Yeti Buuluc yaakkɛn i Barnabacyɛ, ɛkkɛn yeddin te ban Antyak. Ɛkkɛn i maka pookɛn maka coŋin, ɛkkɛn bala loṭi ma te jyek Ciɛggɔn jyeka wonkɛn jyeka pwadin. 36Ɔci ne nink gɛɛg bɛɛki borayɛ, Buuluc gɔkcin Barnabacti agi, “Dala ikin dɔɔtin dɔki oottin bonka ikin loṭṭin ma te jyek Ciɛggɔn te ñamu aŋka ikin ḍieŋtin modg ikinti ne ɛkkɛn balki cieki a ɔkiy.” 37Ɔci Barnabac buagɔn ɛkkɛn ooddi iki Mark. 38Yeti Buuluc yookɔn. Ɛkɛ gɔki agi, “Mena neeni attin iki ikin te ñamu, ɔci ɛkɛ ikin dolninyɔ te ban Pampiilya, ɔci ɛkɛ dɔɔkkin baanji. Ikin dolninyɔ kanŋa cwamnin pookɔ. Ɔci acca ɛkɛ eetin aŋɛ moki?” 39Ɔci ɛkkɛn jiek pɛɛddɛ, ɔci kɛɛptin jitin. Ɔci Barnabac ati yaakkɛn i Mark, ɔci ɛkkɛn taapcin te murka tolan, ɔci ati Kaŋ Cayprac. 40Yeti Buuluc Cila muonɛ bora ɛkɛ. Ɔci ne ma cɔkki Juaŋti ɔci ɛkkɛn ‘woñkiti Ma Kiṭɔ bieŋɛtiyɛ, 41ɛkkɛn ati booti ban Cuurya konɛti, ɔci ban Ciliicya konɛti, ɔci ɛkkɛn bala ṭeyi ma kaniican aŋan.

will be added

X\