Naŋki Cuudan 14

1Ɔci ban Aykɔɔnyam daŋkun aŋanyɛ, ma bala noŋi ne yaayan Buuluc ɔci Barnabacti ba naŋka naŋɛ ma ɛkkɛnti ban Antyaky. Ɔci Buuluc i Barnabac kaaccin orɔ ona morki ma Juaŋ, ɔci ɛkkɛn bala mieti ma te jyek Yaccu. Ɔci ma jyeti Yaccuti ne coŋɔn, gena ma Icrayiil ɔci Keedin Pookɛn. 2Ɔci ma Icrayiil gɛɛg, maka yookɔn te jyek Yaccu neeniyɛ, ɛkkɛn bala cyeŋi Keedin Pookɛn jitkɛn agi dala ɛkki yooktɛ te Buuluc ɔci Barnabac. 3Yeti ɛkkɛn buañi jyek ma bɛɛ. Ɛkkɛn bala ciyi te wɛnan nink kɔɔna kɔɔnno, bala mieti ma te jyek Ciɛggɔn jyek yoma pwadan. Ɛkkɛn buayi ma bɛɛ. Ɔci Juaŋ ma lɛɛrnɛ te jyek yom pwani ɛkɛ agi jyeka neeni a jyeka awarɛ te naŋka ɛkɛ Buuluc ɔci Barnabac ‘wonnɛ noŋkɛ naŋka tɛyan naŋka ñyecki ma ɛkɛy. 4Ɔci maka bana neenitiyɛ, ɛkkɛn kɛɛptin jitin te jieko. Ma gɛɛg gɔki agi jyek ma Icrayiil aŋka pwadgɔ, ɔci maka pookɛn gɛɛg gɔki agi jyek Cuudan Yaccu aŋka pwadgɔ. 5Ɔci ma Icrayiil ɔci Keedin Pookɛn, ɛkkɛn i ḍuaŋan ɛkkɛnyɛ, ɛkkɛn jiek ñaagɛyɔ, ɔci ɛkkɛn buagɔn noŋdi ne yaayan ɔci Buuluc i Barnabac yeptan te gwoyyo. 6Ɔci Buuluc i Barnabac ne ɛkkɛn tieŋki jyeka guaktan ma agi ma buagɔn yebi ɛkkɛnyɛ, ɛkkɛn ati yiŋi ban Lictara ɔci ban Dɛrbi bonk Likɔɔnyaji, ɔci ɛkkɛn ati bonka pookɛn daŋkun. 7Ɔci ɛkkɛn bala mieti ma te jyeka wonkɛn jyeka pwadin neeni. 8Ɔci ban Lictara aŋanyɛ, mena ‘uan gɛɛl bala ciyi pɔy taaŋɛti oŋkanda. Ɛkɛ yaakinti woon bɛɛ. Ɛkɛ a puon wona ɛkɛ jienni mɛɛgɛny. 9Ɛkɛ bala ciyi tyeŋi jyeka guagdɛ Buulucy. Ɔci ne Buuluc gɔrni ‘wana neeni ñingɛtiyɛ, ŋeejɛ ɛkɛ ‘wana neeni yomɛ bala Juaŋti doki. Ɔci jyenna bala ‘wana neeniti neeniyɛ, ɛkɛ ywaŋdɛ. 10Ɔci Buuluc borcin ɛkɛti te pwana tolan agi, “Hay, jɔlla ñaalɔ ciegu yɔɔtca iñɔ.” Ɔci mena neeni kuawwin ñaalɔ, ɔci poccin woon doki. 11Ɔci maka coŋin ne ɛkkɛn gɔrki naŋka naŋŋɛ Buuluc mena neeniti a ɔɔnyɛ, ɛkkɛn yaadan, ɔci ɛkkɛn gɔki te tuk Likɔɔnya agi jɔkin bɛɛnɔ koonɔ iñɔ aŋŋɔ ba ma baano! 12Ɔci ɛkkɛn Barnabac yaakkɛn i Buuluc ooggɛ yeng jɔkin ban ɛkkɛn wɛnan gɛɛg ne yyɛɛwɔ. Barnabacyɛ, bartan agi Juuc. Ɔci Buuluc bartan agi Ɛrmac. Buuluc bartan ma a ɔɔn acaan ɛkɛ bala gɔki jiek a ñaccu. 13Ona morki ma jwaŋ ɛkkɛn jwaŋa yenti Juucyɛ, bala yɔɔd pɔy tukɛti, ɔci mena noŋi kanŋa ona neenitiyɛ, ɛkɛ bɛɛn i maka coŋin nona kañ baan tukɛti. Ɛkɛ eccin yotk ɔci pɛɛppin, ɔci ɛkɛ noŋi Buuluc ɔci Barnabac ‘yɛrdɛyɔ te yotko. 14Ɔci cuudan Yaccu Barnabac i Buuluc neeniyɛ, ne ɛkkɛn tieŋki jyeka neeniyɛ, bworŋin ɛkkɛn bworŋin ‘yɛŋtan waakɛnti jieyɛ jitin aŋka ŋeettan ma naŋka ɛkkɛn buagɛ ‘yɛrtan ɛkkɛnti wanna yaayɛ, ɔci ɛkkɛn yiŋi maka coŋin jitin, ɔci ɛkkɛn yaajjin gɔkcin mati agi, 15“Hay, ‘uayo, te gena yeti ɛkkɛ noŋɛ a ɔŋŋi nɛ? Ɔɔn agɔn ma baan budan balgɔn ba ɛkkɛ ɔɔn! Ɔɔn bɛɛnɔn aŋka ɛkkɛ myettɛ ma jyeka wonkɛn jyeka pwadin neeni aŋka ɛkkɛ waka budan neeni daldɛ te naŋkɛn, ɔci ɛkkɛ waakɔ yaldɛ Jwaŋa Tolanti. Gena ɛkɛ aŋka a Jwaŋa tɛɛtiy. Ɛkɛ a mena oki pɔli ɔci waka bala ñaalɔ pɔliji, ɔci ɛkɛ oki ṭɛɛr ɔci waka bala iñɔ ṭɛɛr konɛti, ɔci ɛkɛ oki tolk ɔci waka bala jiju tolk korkɛnti. 16Te ñamuyɛ, maka kɛɛna pookɛn, ɛkkɛn dalnɛ Juaŋ noŋi ba naŋki ɛkkɛn pookɛn. Maka kɛɛna pookɛn neeniyɛ, gena ɛkkɛ. 17Yeti ɛkkɛ dalnɛ Juaŋ budan bɛɛ. Juaŋ bala noŋi ne pwadan ɛkkɛti daŋkun aŋka ɛkɛ ŋeeddɛ ɛkkɛ. Ɛkkɛ ‘wonnɛ ɛkɛ ñaal te ñaalɔ pɔliji, ɔci te ñaal neeniyɛ, waka amdɛ ɛkkɛ ywollin te ɛkɛ. Ɛkkɛ ‘wonnɛ ɛkɛ oomdin ɔci yoma ñɔyan daŋkun.” 18Ɔci Buuluc ɛkkɛn i Barnabac kɛkcin mati agi ɛkkɛn buaginti ‘yɛrŋ bɛɛ. Yeti maka neeni bala ‘yeṭi ɛkkɛnti men ɔɔn, agi dala ɛkkɛn waak ‘yɛrdinti ɛkkiti ɔɔn. Ɔci Buuluc ɔci Barnabac ɛkkɛn gɔkcin maka neeniti ne pɛñan, ɔci maka neeni waak dalji te ‘yɛrŋ doki. 19Ɔci ne nink gɛɛg bɛɛki borayɛ, ma Icrayiil gɛɛg bɛɛn te ban Antyak, ɔci gɛɛg bɛɛn te ban Aykɔɔnyam, ɔci ɛkkɛn ati ban Lictara ɔci ɛkkɛn ma Lictara ciŋiji. Ɔci ɛkkɛn Buuluc yepci te gwoyyo, ɔci ɛkɛ wuayɛ ɛkkɛn ɔntɔ baan ŋoyɛti, ɔci ɛkkɛn poŋi gɔki agi ɛkta tuunɔ doki. 20Yeti ne Ma Kiṭɔ balki yɔtki ɛkɛ bwotkitiwiyɛ, ɛkɛ jɔŋŋin ñaalɔ, ɔci ɛkɛ bɛɛn dɔɔkkin baanji bana tolan neeniti dɔki. Ɔci ne liidɔ ɛkkɛn ati yaakkɛn i Barnabac ban Dɛrbi. 21Ɔci ɛkkɛn bala mieti maka ban Dɛrbi te jyeka wonkɛn jyeka pwadin. Ɔci ne maka coŋin bana neeniti ɛkkɛn akki ma Yaccu dokiyɛ, Buuluc i Barnabac ati dɔɔki ban Lictara, ɔci ban Aykɔɔnyam, ɔci ban Antyak ban Picidyaji. 22Ɔci ɛkkɛn bala ṭeyi Ma Kiṭɔ bonka neeniti aŋan aŋka ma yomgɛn tɛɛtɛ. Ɔci ɛkkɛn gɔki agi, “Naa ɛkkɛ jyek Yaccu daldɛ bɛɛ. Taab bɛya ikinti waakida ne tolan, ɔci a ɔɔnyɛ, ikin aktin ma cyɛgji Jwaŋa Tolan.” 23Ɔci Ma Kiṭɔ maka ciyi bonka neenitiyɛ, ɛkkɛn magɛ Buuluc ɔci Barnabac te jyek cyɛgji kaniica. Ɛkkɛn ma gɛɛg muowi bora naŋɛ a cyekin. Ɔci cyekin neeniyɛ, ɛkkɛn magga da te non ɛkkɛn, ɔci magga da te non ɛkkɛn. Ne ɛkkɛn makkiti ma te jyek cyɛgji kaniica a ɔɔnyɛ, ɛkkɛn bala gwoṭi koño, ɔci bala cɔki Juaŋti te ñamu. Ɔci ma kaniica neeniyɛ, ‘woñgi ɛkkɛn Jwaŋa Tolan mena jyetki ɛkkɛn neeni bieŋɛti. 24Ɔci Buuluc i Barnabac ati booti ban Picidya ne dɛñki ban Pampiilya ɔɔn. 25Ɔci ne ɛkkɛn maka ciyi ban Porga myetkɛti jyek Juaŋyɛ, ɛkkɛn ati ne dɛñki ban Ataliiya ɔɔn. 26Ɔci ɛkkɛn jɔŋŋin te ban Ataliiya, ɔci ɛkkɛn bala ooddi ban Antyak ban Cuuryaji te murka tolan. Antyak neeniyɛ, gena bana jɔŋki ɛkkɛn te ñamu te oŋŋa ɛkkɛn ‘woñkiti Ma Kiṭɔ bieŋɛtiy. Ɛkkɛn ‘woñgi Ma Kiṭɔ bieŋɛti a ɔɔn, aŋka ɛkkɛn magdɛ Juaŋ te kanŋa ɛkkɛn kanŋa bawwin cwamjɛ ɛkkɛn doki neeni. 27Ɔci ne ɛkkɛn dɛñki ban Antyak ban Cuuryajiyɛ, ɛkkɛn ma kaniica boorgɛti, ɔci ɛkkɛn ma myetkɛ te naŋka naŋŋɛ Juaŋ mati te tugi ɛkkɛn, ɔci Keedin Pookɛn pɔŋnɛ yomgɛnti te jyek jyeniy. 28Ɔci ɛkkɛn cien aŋan nink ne coŋɔn i Ma Kiṭɔ.

will be added

X\