Naŋki Cuudan 13

1Ɔci ma kaniica maka bala ban Antyakyɛ, ɛkkɛn ma gɛɛg a bɔwan Jwaŋa Tolan ɔci maka pookɛn a maka loṭi ma te jyek Juaŋo. Gena Barnabac, ɔci Cimaan, (mena bartan ma agi Mena Ulan), ɔci Luciiyoc (men ma Cayriin), ɔci Manaayɛn (mug Hiruuduc Antipacn), ɔci Caawul. 2Ɔci ne ma kaniica balki morki Juaŋti ɔci balki gworki koñ a ɔɔnyɛ, Boŋ Jwaŋa Tolan gɔkcin ɛkkɛnti agi, “Dala ɛkkɛ Barnabac ɛkkɛn i Caawul muodɛ bora aŋka ɛkkɛn noŋdi kanŋa boora ‘ya ɛkkɛn neeni.” 3Ɔci ne gworŋ koñ ɔci cɔŋi baaniyɛ, ɛkkɛn oŋ byeŋkɛn tañji Barnabac wyeñɛti ɔci Caawul wyeñɛti oŋo. Hayya, ɛkkɛn oŋ cuuññɛ kaniica oŋo. 4Ɔci ne Barnabac ɔci Caawul cuuññɛ Boŋ Jwaŋa Tolan a ɔɔnyɛ, ɛkkɛn ati ne ban Cɛluucya ɔɔn. Bana neeni bala galŋ ḍwaŋɛti. Ɔci ɛkkɛn jɔŋŋin te ban Cɛluucya, ati te murka tolan ne Kaŋ Cayprac wyeñɛti ɔɔn. 5Ɔci ne ɛkkɛn dɛñki ban Calamic Kaŋ Cayprac wyeñɛtiyɛ, ɛkkɛn bala loṭi ma te jyek Juaŋ oorga morki ma Juaŋti. Ɔci Yɔhanna Mark bala i ɛkkɛn aŋka ɛkɛ moki ɛkkɛn te kanŋa. 6Ɔci ɛkkɛn ati booti Kaŋ Cayprac wyeñɛti ɔɔn ne dɛñki ban Pepɔc ɔɔn, ɔci ɛkkɛn men ma Icrayiil mena ṭyeni gɛɛl mɔkci bana neeniti. Ɔci mena neeniyɛ, ɛkɛ noŋi ma ñingɛn agi ɛkɛ agji bɔwa. ‘Wana neeniyɛ, yenti Barjiicoc. 7Ɛkɛ a mug ḍuaŋa ṭɔɔlɛ Kaŋ Cayprac. Gena Corjyec Pɔloc. Corjyec Pɔloc neeniyɛ, ɛkɛ ñingɛ tɛy tɛy ne pɛñan. Ɔci ɛkɛ men gɛɛl cuuññɛ Barnabac ɔci Caawulti. Ɛkɛ gɔki agi dala ɛkki bɛɛdɔ, acaan ɛkɛ buagiti tieŋjɛ jyek Jwaŋa Tolan. 8Yeti Barjiicoc mena ṭyeni mena bartan ma te yenta parɛ agi Ɛlimac te tuk ma Giriik neeni yookɔn te jyek Barnabac ɔci Caawul, acaan ɛkɛ buagɔn naa ḍuaŋa ṭɔɔlɛ jyeddi Jyek Juaŋ bɛɛ. 9Ɔci Caawul neeniyɛ, yenti ɛkɛ yenta parɛ ma boṭi agi Buuluc. Ɛkɛ yomɛ kuumi te Boŋ Jwaŋa Tolan. Ɔci acaan ɛkɛ yomɛ kuumi te Boŋ Juaŋ a ɔɔnyɛ, ɛkɛ gɔrcin mena ṭyeni ñingɛti 10ɔci gɔkcin ɛkɛti agi, “I a kaci Jwaŋa Yaayan awarɛ, hay! I konu kuumi te jyek labji naŋki ma ñingɛn waakɛnda, ɔci i buagi gena naŋka yaayan waakɛnda. Pɔɔk Jwaŋa Tolan, pɔɔka a tyɛlgan neeni dalja i te naŋka a ḍwakkan neeni ne tua yeti? 11Acca neeniti ywobji Jwaŋa Tolan bɛya iti, ɔci i ñingu ula, ɔci acca i yaaktiti gwali noon moki bɛɛ.” Ɔci ne ɛkɛ gɔŋni a ɔɔnyɛ, ɔci mena neeni ñingɛ uli doki. Ɔci ɛkɛ bala ati lieṭi mwoṭi mena ɛkɛ eedi lwaddɛ te bieŋɛ. 12Ɔci ne ḍuaŋa ṭɔɔlɛ neeni gɔrni naŋka naŋŋɛ Juaŋ mena ṭyeniti neeniyɛ, ɛkɛ konɛ buañi te jyeka loṭi Buuluc ma te Yaccu neeni, ɔci ɛkɛ jyeti Juaŋti te oŋŋa wannati doki. 13Buuluc ɔci maka atki i ɛkɛyɛ, ɛkkɛn jɔŋŋin te murka tolan te ban Pepɔc, ɔci ati ati ati ne dɛñki ban Porga ban Pampiilyaji. Ɔci bana neenitiyɛ, Yɔhanna Mark ma dolnɛyɔ, ɔci ɛkɛ dɔɔkkin ban Urcaliimji. 14Ɔci Buuluc i maka atki i ɛkɛyɛ, ɛkkɛn jɔŋŋin te ban Porga, ɔci ati ne dɛñki ban Antyak ban Picidyaji. Ɔci te Oŋ Cabityɛ, ɛkkɛn ati kaaccin orɔ ona morki ma Juaŋ, ɔci ɛkkɛn cooccin iñɔ. 15Ɔci ne ma jyek ganuun Juaŋ jyeka kiinɛ Muuca ɔci jyeka kiiwɛ maka a bɔwan Jwaŋa Tolan pakkiti ne ḍaakkitiyɛ, ḍuaŋan ona morki ma Juaŋ neeni men gɛɛl cuuñɛ Buuluc ɔci Barnabacti ɔci gɔkcin ɛkkɛnti agi, “Modg ɔɔn, kan ɛkkɛ balkɛ jiek gɛɛg yomgɔti aŋka ɛkkɛ ma magdɛyɛ, dala ɛkkɛ jɔldɛ ñaalɔ ma myettɛ.” 16Ɔci Buuluc jɔllin ñaalɔ ɔci bieŋɛ laŋnɛ mati aŋka ma ciya lieda, ɔci gɔkcin ɛkkɛnti agi, “Ma Icrayiil ɔci Keedin Pookɛn maka moṭi Juaŋtiy, dala ɛkkɛ tieŋdɛ! 17Jwaŋ ma Icrayiil neeniyɛ, ɛkɛ yɔrg ikin kɛnnɛ bora. Ɔci ne ɛkkɛn balki cieki ban Macor ba maka wɛlgyɛ, ɛkkɛn naŋŋɛ Juaŋ aŋi maka ḍwaŋin. Ɔci oŋ gɛɛltiyɛ, ɛkkɛn koonɛ Juaŋ bora te ban Macor te war tɛɛn ɛkɛ, 18ɔci ne ɛkkɛn balki wɔɔŋjiyɛ, Juaŋ bala wɛɛyi ɛkkɛn yuong a ma baan ne yyɛɛwɔ (40). 19Maka keedin pookɛn gɛɛg bala ciyi ban Kɛnan. Ɔci ne Juaŋ keedin neeni ŋualnɛ ɔntɔ ne dɔɔyɔ wyetkɛn ne yyɛɛwɔyɛ, ɛkɛ ma Icrayiil ‘wonnɛ bonk ɛkkɛn. Ɔci ɛkkɛn bala ciyi bana neeniti yuong kɔɔna kɔɔni ba miyyan ne ŋaanɔ ɔci ma baan ne yyɛɛwɔ mena parɛ byeŋkɛ (450). 20“Ɔci ne yuonga neeni bɛɛki borayɛ, Juaŋ ma ‘wonnɛ maka a cyekin aŋka wɛɛyi ɛkkɛn ne Camwil mena a bɔwa Jwaŋa Tolan neeni bɛɛni ɔɔn 21Ɔci ne Camwil baali menyɛ, maka neeni gɔki ɛkɛti agi dala ɛkkɛn ‘wondinti ɛkta ḍuaŋa tolan. Ɔci Juaŋ ɛkkɛn ‘wonnɛ Caawul kaci Kiic. Ɛkɛ bɛɛn te kɛɛn Benjaminti. Ɔci Caawul neeniyɛ, ɛkɛ aŋi ḍuaŋa tolan ɔɔn ne yuong akki ma baan ne yyɛɛwɔ (40) ɔɔn. 22Ɔci Juaŋ mwonnin te cyɛgji Caawul, ɔci ɛkɛ Daawud olnɛ aŋi ḍuaŋa tolan ma Icrayiil. Mena neeniyɛ, gena ɛkɛ a mena guaŋŋɛ Juaŋ agi ɛkɛ gɔrcɛ Daawud kaci Jɛci, agi ɛkta yomdan pwanni agi pwanno. Ɔci agi Daawudyɛ, ɛkta noŋdɔ ba naŋka yom Juaŋ buagda waakcinda. 23Ɔci Daawud neeniyɛ, Mena Yuoci Ma bɛɛn oonɛ Juaŋ te kɛɛn ɛkɛti ba jwalla guaŋŋɛ Jwaŋa Tolan te ñamu, agi ɛkɛ ma Icrayiil ‘woñji Mena Yuoci ɛkkiy. Acca ɛkɛ bɛɛn doki. Gena Yaccu. 24Ne Yaccu baawi menyɛ, Yɔhanna bala loṭi ma te jyek bulti agi dala ma Icrayiil waakcinda maka wiagɔ te nɔji ɛkkiyɛ, dala ɛkki buldi ma. 25Ɔci ne Yɔhanna noŋi kanŋa ɛkɛ baadi dokiy, ɛkɛ gɔkcin mati agi, ‘Ɛkkɛ poŋɛ gɔkɛ agi ‘ya agji menɛ? ‘Ya a Kiṭɔ Mena Muonɛ Juaŋ Bora bɛɛ. Kiṭɔyɛ, ɛkɛ bala bɛya ‘ya ŋoyuti. Ɔci ‘ya baal ba wɛyi ɛkɛ looda ‘ya bora bɛɛ.’ 26“Modg ɔɔn, maka bɛɛn te kɛɛn Abrahimti ɔci Keedin Pookɛn waakɛnda maka moṭi Jwaŋa Tolantiy, jyek Mena Yuoci ikin bɛɛn ikinti doki. 27Maka ban Urcaliim i ḍuaŋan ɛkkɛnyɛ, ɛkkɛn Yaccu ñiyɛ bɛɛ. Ɔci jyek bɔwan Jwaŋa Tolan jyeka paktan ma oŋkanda te Oŋ Cabityɛ, jiek jitkɛn neeni ŋeecɔn ɛkkɛn ne pwadan moki bɛɛ. Ɔci a ɔŋŋiyɛ, jyeka kiiwɛ bɔwan Jwaŋa Tolan te naŋka naŋtan ma Yaccuti neeniyɛ, dɛññin bora doki te jyeka oljɛ ɛkkɛn Yaccu wyeñɛti, ɔci ɛkkɛn Yaccu nokkitiy. 28Nɔjja Yaccu nokkiti ma neeniyɛ, gɔ bala bɛɛ. Yeti ɛkkɛn tooccin Bilaatucti agi, ‘Ɔɔn buagɔn i Yaccu noga.’ 29Ɔci ma noŋjin ba jyeka kiiwɛ ma worganji waakɛnda te lyen Yaccu, ɔci ne naŋka neeni ḍaakkiti mayɛ, ɛkkɛn war Yaccu gwoddɛ iñɔ te ñaalɔ jana kakanti, ɔci olji koolji. 30Yeti Jwaŋa Tolan ɛkɛ luolnɛ ñaalɔ te koolji tɛɛti moki. 31Ɔci te ninka coŋin neeniyɛ, Yaccu warɛ lɛɛlnɛ bora mati. Gena maka bɛɛki i ɛkɛ te ban Jaliil atki ban Urcaliim. Ɔci acca maka neeni bala mieti ma Icrayiil oŋkanda te jyek Yaccu. 32A ɔŋŋi jyeka nɔɔtki ma a jyeka wonkɛn jyeka pwadin neeniyɛ, ɛkkɛn bala a ɔŋŋi agi Juaŋ Yaccu jɔɔlnɛ ñaalɔ te koolji tɛɛti moki. Gena jwalla nɔɔnnɛ Juaŋ yɔrg ikin te baaṭi neeni, ɔci acca naŋka neeni naŋŋi ɛkɛ aŋa ikin kɛɛgin yɔrg ikinti doki. A ɔɔnyɛ, bala ba jyek ɔɔlla kiigin worga Ɔɔlg Daawudji ɔɔlla akki ne yyɛɛwɔ agi, ‘I a Kaci ‘ya, i jiennin ‘ya te oŋŋo.’ 34Çeejɔn ɔɔn ne pwadan Yaccu jɔɔlnɛ Juaŋ ñaalɔ te koolji tɛɛti moki, ɛkɛ warɛ jani bɛɛ, acaan Juaŋ gɔki ma Icrayiilti te baaṭi agi, ‘‘Ya i ‘wondin naŋka pwadin awarɛ, i daldin budan bɛɛ, ɔci ‘ya bieŋu toñña iti ba jyeka guaŋi ‘ya Daawudtiy.’ 35Ɔci te jyek Ɔɔlla parɛ mokiyɛ, Daawud gɔki Juaŋti agi, ‘Men i mena yomɛ bɔwan neeniyɛ, i ɛkɛ dalja warɛ jada bɛɛ.’ 36Daawud neeniyɛ, ɛkɛ bala noŋi ba naŋka buagiti Jwaŋa Tolan ne wɔɔka ɛkɛ wɔɔka cieni ɛkɛ ṭɛɛrji neeni baani ɔɔn. Ɔci Daawud tuuni, ɔci ɛkɛ jokci ma nona jokki ma yɔrg ɛkkɛn, ɔci ɛkɛ warɛ caami ɔci warɛ janni. 37Yeti mena jɔɔlnɛ Jwaŋa Tolan ñaalɔ tɛɛti mokiyɛ, ɛkɛ aŋka warɛ jani bɛɛ. 38Hay! Modg ɔɔn, dala te naŋka neeni ŋeeddɛ ɛkkɛ, gena bɛɛna Yaccu Kiṭɔ bɛɛni aŋka Jwaŋa Tolan ikin bɔɔŋninti te nɔji ikin neeni. Ɔɔn bɛɛnɔn gɔŋnɔn jyeka neeni ɛkkɛti. 39Kan ba jyek Muuca pookɛn ɔɔnyɛ, jyek nɔji baadi bɛɛ. Ɔci kan maka jyeddi Yaccutiyɛ, nɔji ɛkkɛn baadi doki, ɔci ywobji dɔɔkti ɛkkɛn wyetkɛnti moki bɛɛ. 40A ɔŋŋiyɛ, dala ɛkkɛ woŋgɔ tiittɛ te jyeka neeni, aŋka naa jyeka guaktan maka a bɔwan Jwaŋa Tolan neeni bɛya ɛkkɛti bɛɛ. 41Juaŋ gɔki te tugi bɔwan Jwaŋa Tolan agi, ‘Hay, ɛkkɛ maka tieki jiek nɛ, ‘ya noŋja naŋki ‘ya naŋka tɛyan ɛkkɛ ñomgɔti, ɔci ne ɛkkɛ gɔrtɛyɛ, ɛkkɛ yomgɔ buaya, yeti ɛkkɛ jyeddɛ bɛɛ. Ɔci kan ɛkkɛ nɔɔttɛ ma te ñamu ne naŋka neeni baaki menyɛ, ɛkkɛ yooktɛ te jyeka neeni men ɔɔn. Ɔci acaan a ɔŋŋiyɛ, ɛkkɛ ḍaktɛ.’” 42Ɔci ne Buuluc ɔci Barnabac balki atki ootti kaatti bora te ona morki ma Juaŋtiyɛ, ma bala gɔki Buulucti ɔci Barnabacti agi, “Ne Oŋ Cabit ookti ne ŋoyɔ mokiyɛ, dala ɛkkɛ ɔɔn myettɔntɔ te jyeka neeni waakɛnda moki.” 43Ɔci ne maka bɛɛn ona morki ma Juaŋti cyɛnki jitin atki baanji dokiyɛ, ma gɛɛg waakɛn ñaagɛ i Buuluc i Barnabac a ḍiɛkan bɛɛ. Gena ma Icrayiil ɔci Keedin Pookɛn gɛɛg daŋkun. Keedin Pookɛn neeniyɛ, ɛkkɛn noŋi te naŋki ma ɛkkɛn moki bɛɛ. Ɛkkɛn noŋi ba naŋki maka moṭi Jwaŋa Tolanti. Ɛkkɛn ani jyek Jwaŋa Tolan. Ɔci Buuluc ɛkkɛn i Barnabacyɛ, ɛkkɛn bala mieti maka neeni te jyek Juaŋ agi, “Dala ɛkkɛ woŋgɔ tiittɛ te jyek Juaŋo, acaan gena Jwaŋa Tolan moki ma te yom pwani ɛkɛy.” 44Ɔci ne Oŋ Cabit parɛ bɛɛni mokiyɛ, ɔci ma wɔɔwwin wyetkɛn ḍɔɔlɛ ne coŋɔn bana neeniti. Ɛkkɛn buagɔn tieŋdi jyek Jwaŋa Tolan. 45Yeti ne ma Icrayiil gɔrki ne polla tolan bɛɛni a ɔɔnyɛ, ɛkkɛn korkɛn modɔ, acaan ɛkkɛn buagɔn naa ma tieŋdi jyek Buuluc bɛɛ. Ɔci ɛkkɛn jyeka guagdɛ Buuluc neeniyɛ, kyɛkciti, ɔci ɛkkɛn bala wooki ɔci ḍori ɛkɛ. 46Ɔci ne ma Icrayiil balki noŋki ne yaayan a ɔɔnyɛ, Buuluc ɔci Barnabacyɛ, ɛkkɛn buayi bɛɛ. Ɛkkɛn bala mieti ɛkkɛn te yoma tɛyan. Ɛkkɛn gɔki agi, “Ɛkkɛ myetkɛ ɔɔn te jyek Jwaŋa Tolan te ñamu acaan ɛkkɛ agɛ ma Icrayiil. Yeti ɛkkɛ yookɛ waakɔ te jyeka neeni a ɔɔnyɛ, tɛɛtin baadi bɛɛ neeni bala ɛkkɛti bɛɛ. Acca ɛkkɛ daltɛ ɔɔn. Ɔɔn ooddɔn Keedin Pookɛnti. 47Ɔɔn myennɔn Jwaŋa Tolan a ɔɔn acaan ɛkɛ gɔki te baaṭi te Kiṭɔ agi, ‘I naŋdin ‘ya agdi mena dɛki Keedin Pookɛn daŋkun, aŋka i yɔɔt eya mati baan warda.’” 48Ɔci Keedin Pookɛn neeniyɛ, ne ɛkkɛn balki tyeŋki jyeka neeniyɛ, ɛkkɛn yomgɛn ñɔɔna ñɔɔno, ɔci ɛkkɛn bala gɔki jieyi agi jyek Jwaŋa Tolan pwannɔ agi pwanno. Ɔci maka kɛnnɛ Juaŋ bora aŋka balti tɛɛtin baadi bɛɛyɛ, ɛkkɛn jyeti ɛkɛti te oŋŋa wannati. 49Ɔci jyek Jwaŋa Tolan ati baan konɛti warda. 50Yeti maka moong gɛɛg bala, ɔci ɛkkɛn bala ñamu te moonga pookɛn neeni, ɔci ɛkkɛn yomgɛn bala Juaŋti, ɔci moonga neeni ciŋiji ma Icrayiil. Ɔci maka ḍuaŋan neeniyɛ, ɛkkɛn ciŋiji ma Icrayiil daŋkun. Ɔci ɛkkɛn bala noŋi ywobji Buuluc ɔci Barnabacti, ɔci ɛkkɛn Buuluc ɔci Barnabac ŋualji bora te bana neeniti. 51Yeti Buuluc ɔci Barnabac ciegɛn ṭyɛŋɛ te ṭɛr bana neeniti, acaan ɛkkɛn gɔki agi ɛkkɛn mwonninti te bana neeni. Ɔci ɛkkɛn ati ban Aykɔɔnyam. 52Ɔci Ma Kiṭɔ ban Antyak yomgɛn ñɔɔna ñɔɔno, ɔci ɛkkɛn yomgɛn kuumi te Boŋ Jwaŋa Tolan.

will be added

X\