Naŋki Cuudan 12

1Ɔci te oŋŋa wannayɛ, ḍuaŋa tolan yenti Hiruuduc Agriipa ma kaniica gɛɛg muoŋŋɛ ɔci ɛkɛ bala noŋi ne yaayan ɛkkɛnti. 2Yaakub mod Yɔhannanyɛ, nogɛ ma te jyek ɛkɛ. 3Ɔci ne Hiruuduc Agriipa gɔrni naŋka neeni pwadi ma Icrayiiltiyɛ, ɛkɛ buagɔn Butruc mugdɛ daŋkun. Ɔci oŋŋa wannatiyɛ, Iid Ma Omki Byedga Polan bala. 4Ɔci Butruc mugɛ ma ɔci eyɛ olji ma ciginji. Ɔci ackan ne inyaakkɛn ɔci ne dɔɔyɔ wilin ne cyɛɛlɔ (16) bala yɔdi kɛɛy ɛkɛ. Hiruuduc Agriipa poŋi gɔki agi ne Iid bɛɛdda borayɛ, ɛkɛ Butruc koojji bora nona mati ɔci noŋjɛ godan. 5Ɔci ne Butruc baali ciginji a ɔɔn menyɛ, ma kaniica bala cɔki Jwaŋa Tolanti ne tolan te ɛkɛ. Ɛkkɛn woodi bɛɛ. 6Ɔci Hiruuduc Agriipa buagɔn Butruc koodɛ bora ne liidɔ, ɔci te ween jiñɛ Butruc bala ciginji byeŋkɛ a ḍɛɛggin te jiŋgin ne yyɛɛwɔ. Ɔci ɛkɛ bala niin yeccu yuukci ackan ñaalɔ. Ɔci maka gɔṭi cigin bala yɔdi bora cigin tukɛti. 7Ɔci ne pɛñan malɛɛka gɛɛl bɛɛn nona Butructi ɔci noon dyɛŋŋɛ bɔɔna bɔɔno. Ɔci ɛkɛ Butruc jyɛmmɛ omɛti ɔci gɔkcin ɛkɛti agi, “Jɔŋŋa ñaalɔ ne pɛñan!” Ɔci ne pɛñan jiŋgin buottin pookɛn budan ɔɔn te ɛkɛ byeŋkɛti. 8Ɔci malɛɛka gɔkcin ɛkɛti agi, “Buarñan i ḍyɛkca tɛyuti, ɔci wɛyi ‘yɛɛŋja daŋkun.” Ɔci Butruc noŋjin a ɔɔn. Ɔci malɛɛka gɔkcin ɛkɛti agi, “Bworŋ jwami ‘yɛɛŋja ɔci bɛɛd bootta ‘yati.” 9Ɔci ɛkɛ bootcin ɛkɛ ŋoyɛti, ɔci ati ne bora ɔɔn. Ɔci ŋeejɛ ɛkɛ naŋka naŋŋɛ malɛɛka neeni a naŋka awarɛ bɛɛ. Ɛkɛ poŋi gɔki agi gena liɛlti katan. 10Ɔci ɛkkɛn ati ɔci goṭi ackan neeni warɛti, ɔci ati ɔci goṭi ackan parɛ warɛti moki ɔɔn. Ɔci ɛkkɛn dɛñjin kaañ tuka bilti. Ɔci pɔya neeniyɛ, gena pɔya eetan gortan ma baan konɛti. Ɔci ne ɛkkɛn dɛñki kaañ tukɛtiyɛ, kaañ tukɛ warɛ pɔŋnɛ parɛ, ɔci ɛkkɛn kaaccin bora. Ɔci ɛkkɛn ati ati ati ne pɔya parɛti, ɔci malɛɛka baaw wiin ne pɛñan atti. 11Ɔci acca ŋeennɛ Butruc ne pwadan ɔci ɛkɛ gɔki agi, “Hay! Acca ŋeejjan ‘ya ne pwadan oŋo. Hay! Jwaŋa Tolan malɛɛka cuonnɛ ‘yati, ɔci ɛkɛ ‘ya wɛɛna bora te byeŋ Hiruuduc Agriipati. Ɔci ɛkɛ ‘ya pɔŋna te naŋki ma Icrayiil, naŋka ɛkkɛn buagiti ‘ya naŋtatiy.” 12Ne Butruc naŋka neeni yuarnɛ ne pwadanyɛ, ɛkɛ oŋ ati on Moryam oŋo. Moryam neeniyɛ, gena mɛy Markn. (Ɔci Mark neeniyɛ, yenti ɛkɛ yenta parɛ ma boṭi agi Yɔhanna.) Ɔci ona neenitiyɛ, maka coŋin wyetkɛn ḍɔɔlɛ bala cɔki Jwaŋa Tolanti. 13Ɔci Butruc bala ciepi kaañ tukɛ. Ɔci ṭɔla noŋi kanŋa neeni ati nona ciepi ɛkɛ ‘yeŋi tukɛti neeni. Šɔla neeniyɛ, yenti Rɔɔda. 14Ɔci ne Rɔɔda pwan Butruc ñiññiyɛ, ɛkɛ yomɛ ñɔɔna ñɔɔno, ɔci ɛkɛ ‘yeŋi tukɛ pɔŋnɛ bɛɛ, ɛkɛ yiŋi nona cɔkki mati ɔci ma myennɛ agi Butruc baalɔ yɔɔdɔ kaañ tuktanti. 15Ɛkkɛn gɔkcin ɛkɛti agi, “Hay, i a amgɔn?” Ɔci ɛkɛ bala mieti ma ɔɔn ne ma tieki ɛkɛ ɔɔn. Ɛkkɛn gɔki agi, “Gena malɛɛka gɔṭi ɛkɛ kaapun.” 16Yeti Butruc bala ciepi kaañ tukɛ men. Ɔci ne ɛkkɛn kaañ tukɛ pɔkkitiyɛ, ɛkkɛn Butruc yuarcɛ, ɔci ɛkkɛn poni ne tolan. 17Ɔci Butruc gɔkcin ɛkkɛnti te bieŋɛ agi, “Hay, liedɛ, liedɛ.” Ɔci ɛkɛ ma myennɛ agi Ciɛggɔn ɛkɛ pɔŋnɛti te ciginji a ɔki. Ɔci ɛkɛ ma myennɛ agi dala ɛkki Yaakub myettɛ te jyeka neeni daŋkun, ɔci modg ɛkkɛn Ma Kiṭɔ modga pookɛn myettɛ daŋkun. Ɔci Butruc ma dalnɛ, ɔci ɛkɛ ati nona parɛti. 18Ɔci ne noon bɔɔniyɛ, maka ackan buayi ne tolan ne Butruc baawi te ciginjiy. Ɛkkɛn bala toyi yɔtin yaadan ne pɛñan te ɛkɛ. 19Ɔci Hiruuduc Agriipa gɔkcin mati agi dala ma ooddɔ lieṭɔ Butruc. Ɔci ma bala lieṭi. Ɔci ne ma lierkɛ Butruc baawi men ɔɔnyɛ, ɔci Hiruuduc Agriipa ackan kɛɛyi cigin neeni bornɛ noŋnɛ godan taaññɛ tuggɛnti te naŋka neeni, ɔci Hiruuduc Agriipa gɔkcin mati agi ackan gɔṭi cigin neeniyɛ, dala ɛkki nogdi ma. Hiruuduc Agriipa ban Yahuudiya dalnɛ, ɔci ati bala ciyi ban Cɛcariiya ne ḍiɛran lakun. 20Ɔci Hiruuduc Agriipa looñi ma Tayirti ɔci ma Ciḍɔɔnti. Ɔci maka neeni waakɛn limɛ, ɔci ɛkkɛn bɛɛn Hiruuduc Agriipati. Ɔci ne ɛkkɛn dɛñkiyɛ, ɛkkɛn bala gɔwwɔ i Blactoc te ñamu. Blactoc neeniyɛ, ɛkɛ a mena ḍuaŋa ṭɔɔlɛ on Hiruuduc Agriipa. Ɔci ne ɛkkɛn gɔrki Blactoc yomɛ pwadi ɛkkɛntiyɛ, ɛkkɛn oŋ tooccin ɛkɛti oŋ te jyek Hiruuduc Agriipa oŋo. Ɛkkɛn buagɔn dala Hiruuduc Agriipa yomɛ pwada ɛkkɛnti acaan waka amtan ɛkkɛn bɛya te ban Hiruuducti. 21Ɔci Hiruuduc Agriipa ma myennɛ ñamu te oŋŋa ɛkɛ buagi gɔkti mati. Ɔci ne oŋŋa neeni bɛɛniyɛ, ɛkɛ bworŋin ɛkɛ bworŋin cyɛgji ‘yɛɛŋnɛ ɔci ɛkɛ cooccin kaakci ɛkɛ kaakci cyɛgjiti ɔci ɛkɛ gɔkcin jiek mati. 22Ɔci ma yaadan, ɔci ma gɔki agi, “Hɔɔy! Pwana neeniyɛ, a pwan men baan budan bɛɛ. Gena pwan juaŋ gɛɛl!” 23Ɔci ne pɛñan ɛkɛ eeŋnɛ malɛɛka Jwaŋa Tolan taab acaan ɛkɛ jieyi naŋki Juaŋ bɛɛ. Ɛkɛ poŋi gɔki agi ɛkɛ tolji parɛ. Ɔci ɛkɛ kooyɛ liwwo, ɔci ɛkɛ tuuni. 24Ɔci jyek Juaŋ toli baan konɛ warda. 25Barnabac ɔci Caawul bala ban Urcaliimji acaan ɛkkɛn eci waak mati aŋan. Ɔci ne ɛkkɛn jyeka neeni ḍaakkitiyɛ, ɛkkɛn dɔɔkkin ban Antyak, ɔci Mark owwɛ ɛkkɛn.

will be added

X\