Naŋki Cuudan 11

1Ɔci Cuudan Yaccu tieŋŋin agi Keedin pookcɛn jyek Jwaŋa Tolan muŋŋɛ daŋkun. Ɔci jyeka tieŋŋi ɛkkɛn neeniyɛ, ati modgɛnti ban Yahuudiya konɛ warda. 2Ɔci ne Butruc dɔɔŋni ban Urcaliimjiyɛ, ma Icrayiil maka aŋi Ma Kiṭɔ maka gɔki te jyek ŋwoti ma agi dala Ma Kiṭɔ waakcinda ŋwoddɛ ma itkinti neeniyɛ, bala wooki ɛkɛ. 3Ɛkkɛn bala wooki ɛkɛ a ɔɔn, acaan ɛkɛ bala jyɛyi i Keedin Pookɛn, ɔci ɛkɛ bala omi iki ɛkkɛn daŋkun. Acaan ɛkkɛn a maka ŋuodi ma bɛɛ. 4Ɔci Butruc ɛkkɛn lwoŋŋɛ te jiek waakɛnda ne jiek wyetkɛnti ɔɔn agi, 5“‘Ya baal cɔk Jwaŋa Tolanti ban Yaapa, ɔci ne ‘ya baala cɔka Juaŋti a ɔɔnyɛ, ‘ya gen gɛɛl yuarcan te liɛlto. Gena yuarcan ‘ya neeniyɛ, bala ba bworŋa tolan warɛ ponnɛji, ɔci ɛkɛ bala bɛya iñɔ te pɔliji. Ɔci ɛkɛ mugɛ ma te tuggɛ ŋankɛn ɔci ḍuorɛ iñɔ nona ‘yati. 6Ɔci ‘ya baal gɔr waka neeni a jiñu bɛɛ. ‘Ya gɔrcan bworŋ konɛti waak jitkɛn waakɛnda yuarcan, gena maal ɔci leyi i kogi i ḍiirgo. 7Ɔci ‘ya tieŋŋan pwan gɔkkin ‘yati agi ‘ya jɔljɔ ŋoorcɔ waka neeni ɔci omjɔ. 8Ɔci ‘ya kɛkcan agi, ‘Hay, ‘ya dɛccan waka dɛyi ganuun Juaŋ ma neeni gɛɛg oŋgati tukuti bɛɛ.’ 9“Ɔci pwan bɛɛn ‘yati moki te ñaalɔ gɔki agi, ‘Waka naŋŋɛ Jwaŋa Tolan pwadgin dokiyɛ, naa i gɔk agi, ɛkkɛn yeyɔ bɛɛ.’ 10Ɔci naŋka neeniyɛ, naŋŋɛ Juaŋ ‘yati oŋki ne ḍoogɔ. Ɔci ne pɛñan waka neeni waakɛnda baaw duaŋŋɛ Juaŋ ñaalɔ doki. 11“Ɔci ne waka neeni dɔɔkki ñaalɔyɛ, ɔci maka ‘uay ne ḍoogɔ bɛɛn bala yɔdi bora ona ciya ‘ya neeni tukɛti. Ɔci ɛkkɛn gɔki agi ɛkkɛn cuonninti ma te ban Cɛcariiya cuonninti ma ‘yati. 12Ɔci Boŋ Juaŋ gɔkkin ‘yati agi dala ‘ya ootcɔn iki ɛkki, agi naa ‘ya kwacci paŋi jiek bɛɛ. Ɔci modga ne dɔɔyɔ wilin ne cyɛɛlɔ neeni ɛkkɛn attin iki ‘ya. Ɔci ne ɔɔn dɛnnɔn aŋanyɛ, ɔɔn kaannɔn on Kɔrniilyac. 13Ɔci Kɔrniilyac ɔɔn myennɔn agi malɛɛka gɛɛl bɛɛnɔ, ɔci yɔɔnnɔ ɛkɛ ñamɛti. Ɔci malɛɛka neeni gɔŋnɔ ɛkɛti agi dala ɛkɛ ma gɛɛg cuñjɛ ban Yaapa aŋka men gɛɛl baalɔ aŋanyɛ, dala ɛkta bɛɛdɔ. Agi ɛkta yentan Cimaan Butruc. 14Agi dala magga ooddɔ Butruc bɛɛdɔ aŋka ne ɛkta bɛɛddayɛ, ɛkta ma myetta te pɔya ma yɔɔdda Jwaŋa Tolan waakcinda i maka ciyi iki ma ɛkki oorg jitiny. 15Ne ‘ya baala mieta ɛkkɛn te jiek menyɛ, ɔci Boŋ Juaŋ bɛɛn ɛkkɛnti, bala ba bolja ɛkɛ bɛɛni ikinti te ñamu wanna ɔɔn. 16A ɔŋŋiyɛ, ‘ya baal poŋ te jwalla guaŋŋɛ Ciɛggɔn ikinti te baaṭi agi Yɔhanna baalɔ buoṭɔ ma te piegy. Agi ne cwakanti ikin daŋkun bultinti Jwaŋa Tolan te Boŋ ɛkta daŋkun. 17Ne ikin jyettin Yaccu Kiṭɔtiyɛ, Juaŋ ikin ‘wonnin Boŋ ɛkɛ. Ɔci acca kan Kɔrniilyac i ma ɛkkɛn ‘wonnɛ Juaŋ Booŋ ba bolja ikin ‘wonninti ɛkɛy, oŋ ‘ya a menɛ aŋka ɛkɛ yɔddajiy?” 18Ɔci ne ma kaniica tieŋki jyeka neeniyɛ, ɛkkɛn gɔkkin genga moki bɛɛ. Ɔci ɛkkɛn jieyi Jwaŋa Tolan gɔki agi, “Hay, naŋka neeni a naŋki Jwaŋa Tolan awarɛ! Acca Jwaŋa Tolan buagɔn keedin Pookɛn waakɛn yaltan aŋka tɛɛtin ɛkɛ bɛya ɛkkɛnti daŋkun.” 19Te yuonga Ictipanuc nokkiti ma te baaṭiyɛ, taab bɛɛn Ma Kiṭɔti ne tolan. Ɔci ma cyɛnŋin jitin te ban Urcaliim te taab neeni, ma gɛɛg ati bonka loonan ban Pɔniicyaji, ɔci Kaŋ Cayprac, ɔci ban Antyak daŋkun. Ɛkkɛn bala mieti gena ma Icrayiil pookɛn te jyek Yaccu. Ɛkkɛn Keedin Pookɛn myetkɛ bɛɛ. 20Yeti Ma Kiṭɔ maka pookɛn ɛkkɛn ati ŋoyɔ daŋkun, ɔci maka ati neeniyɛ, ma gɛɛg a ma Cayprac, ɔci ma gɛɛg a ma Cayriin. Ɔci ne ɛkkɛn dɛñki ban Antyakyɛ, ɛkkɛn Keedin Pookɛn myetkɛ jyeka wonkɛn jyeka pwadin jyek Yaccu. 21Ɔci war tɛɛn Jwaŋa Tolan bala iki ɛkkɛn. Ɔci maka coŋin gɛɛg jyeti Yaccuti ɔci ɛkkɛn waakɛn yali nɔji ɛkkɛn dalji. 22Ɔci jyek maka jyeti neeniyɛ, ati Ma Kiṭɔti ban Urcaliim. Ɔci ne ɛkkɛn tieŋki jyek maka jyeti neeniyɛ, ɔci ɛkkɛn Barnabac cuuñɛ ban Antyak. 23Ɔci ne Barnabac dɛnni ban Antyakyɛ, ɛkɛ yomɛ ñɔɔna ñɔɔn te yom pwani Juaŋ mati ban Antyak. Ɔci Barnabac bala ṭeyi ɛkkɛn oŋkanda te jyek Ciɛggɔn agi dala ɛkki woŋgɛn tiittɛ te jyek Ciɛggɔn ne pwadan. 24Barnabac bala ṭeyi ma a ɔɔn acaan ɛkɛ a mena pwadan, ɔci Boŋ Juaŋ i jyeni bala ɛkɛti. Ɔci maka coŋin gɛɛg aŋi Ma Kiṭɔ. 25Ɔci Barnabac jɔŋŋin te ban Antyak ati lieṭi Caawul ban Tarcoc. 26Ɔci ne ɛkɛ Caawul yuarŋɛyɛ, ɛkɛ Caawul eññɛ ban Antyak. Ɔci ba ywoni jiñɛ ne cyɛɛlɔ ma kaniica wyetkɛn ḍɔɔltan nona ne cyɛɛlɔ, ɔci Barnabac ɔci Caawul ɛkkɛn bala loṭi ɛkkɛn. Ɔci maka laltan ɛkkɛn neeniyɛ, kɔɔna kɔɔnno. Maka ban Antyak ɛkkɛn ma Yaccu okki yenta woonɛ agi Ma Kiṭɔ. 27Ɔci te oŋŋa wannayɛ, maka a bɔwan Jwaŋa Tolan gɛɛg bɛɛn te ban Urcaliim bɛɛn ban Antyakti. 28Ɔci mena bɔwa gɛɛl ne cyɛɛlɔ yenti Agaboc ɛkɛ jɔllin ñaalɔ, ɔci ma myennɛ ɛkɛ te jyek Boŋ Juaŋ agi koñ baalɔ bɛɛdɔ baan wardanda. Ɔci ba jyek ɛkɛ neeniyɛ, koñ bɛɛn doki. Te yuonga Klɔdyac aŋŋi ḍuaŋa tolan ma Ḍɔɔm neeniyɛ, koñ bɛɛn doki. 29Ɔci Ma Kiṭɔ neeni gɔki agi modg ɛkkɛn modga amda koñ ban Yahuudiya neeniyɛ, agi cuondinti waako. Kan mena wak ɛkɛ coŋinyɛ, wak ɛkɛ cundɛ ɔɔn, ɔci kan mena wak ɛkɛ a ḍiɛkanyɛ, wak ɛkɛ cundɛ ne ḍiɛkan daŋkun ɔɔn. 30Ɔci ɛkkɛn waka neeni ‘woñgi eyɛ Barnabac yaakkɛn i Caawul oŋo. Waka neeni eyɛ ɛkkɛn ɔci ‘woñgi cyekin kaniica ban Urcaliim.

will be added

X\