Naŋki Cuudan 10

1Mena ‘uan gɛɛl bala ban Cɛcariiya yenti Kɔrniilyac. Ɛkɛ a ḍuaŋa ackan. Ɔci ackan neeniyɛ, ɛkkɛn a miyya ne cyɛɛlɔ (100). Ɔci ackan neeniyɛ, ma boṭi agi ackan ma Itali. 2Ɔci Kɔrniilyac neeniyɛ, ɛkɛ yomɛ bala Jwaŋa Tolanti oŋkanda. Ɛkɛ ɔci ma ɛkkɛnyɛ, ɛkkɛn moki ma te waak oŋkanda. Ɔci ɛkkɛn cɔki Juaŋti oŋkanda. 3Ɔci oŋ gɛɛlti ne oŋ waŋɛ warɛ yiɛnnɛyɛ, Kɔrniilyac malɛɛka gɛɛl yuarŋɛ ɛkɛ te liɛlti ne pwadan bɛɛn te Jwaŋa Tolanti bɛɛn nona ɛkɛti. Ɔci malɛɛka neeni gɔkcin ɛkɛti agi, “Kɔrniilyac!” 4Ɔci ɛkɛ bala gɔṭi a jiñɛ bɛɛ, ɛkɛ buayi ne tolan, ɔci ɛkɛ tooccin malɛɛkati agi, “Ciɛggɔn, a gena ɔɔn?” Ɔci malɛɛka ṭwokcin ɛkɛti agi, “Jwaŋa Tolan tieŋŋin cɔŋi i. Ɔci ɛkɛ tieŋŋin naŋki i naŋka naŋa mati pwadin oŋkanday, ɔci ɛkɛ bala poŋi i. 5Ɔci acca dala i maka ‘uay cuña ban Yaapa. Mena ‘uan gɛɛl bala aŋan. Dala ɛkɛ bɛya. Ɛkɛ yenti Cimaan, ɔci yenti ɛkɛ yenta parɛ moki a Butruc. 6Ɛkɛ a wɛli bala ciyi on Cimaan mena noŋi kanŋa geeky. Ɔci on ɛkɛ bala Galŋa Tolan ḍwaŋɛti.” 7Ɔci ne malɛɛka gɔɔki i Kɔrniilyacyɛ, ɛkɛ atti. Ɔci ne ɛkɛ atti dokiyɛ, Kɔrniilyac maka kanŋan on ɛkɛ gɛɛg bornɛ ne yyɛɛwɔ. Ɔci ɛkɛ mena ackan gɛɛl bornɛ ne cyɛɛlɔ daŋkun. Ɔci ackan neeniyɛ, ɛkɛ yomɛ bala Juaŋti daŋkun. Ɔci ɛkɛ bala moki Kɔrniilyac oŋkanda te kanŋa te yoma pwadan. 8Ɔci ne Kɔrniilyac ɛkkɛn myennɛ te jyeka neeni waakɛndayɛ, ɛkɛ ɛkkɛn cuuññɛ ban Yaapa. 9Ɔci maka neeni jɔŋŋin te ban Cɛcariiya ɔci ɛkkɛn ati ɔci niini yomɔ. Ɔci te liidɔ ɛkkɛn jɔŋŋin ɔci luoṭi moki. Ɔci ne ɛkkɛn noŋki dɛnti ban Yaapayɛ, te wɔɔka wanna Butruc kaaccin ñaalɔ on wyeñɛti nona badi ma cieki may. Ɛkɛ ati aŋan aŋka cɔki Jwaŋa Tolanti. Oŋ waŋɛ yɔɔtcin yeccu doki. 10Ɔci ne ɛkɛ baali ñaalɔyɛ, ɛkɛ ammɛ koñ ne tolan. Ɛkɛ buagɔn omdi gena amtin. Ɔci ne ma balki nɔrki am menyɛ, 11liɛlgin bɛɛn Butruc ñingɛti ɔci ɛkɛ gɔrcin pɔli tukɛ pɔŋnɛ, ɔci gen gɛɛl yuarnɛ bala ba bworŋa tolan warɛ ponnɛji bɛɛn te ñaalɔ, ɔci ɛkɛ mugɛ ma te tuggɛ ŋankɛn ɔci bɛɛn iñɔ ṭɛɛrji. 12Ɔci waak bala jiju bworŋ konɛti. Gena waka ati te ciegɛn waakɛnda ba maal ɔci leyi ɔci waka ba kogi moki, ɔci ḍiirgo. Gena ɛkkɛn bala bworŋ konɛti. 13Ɔci pwan bɛɛn ɛkɛti gɔkcin agi, “Butruc, jɔŋŋa ñaalɔ ŋoorca waka neeni ɔci omja!” 14Ɔci Butruc kɛkcin agi, “Hay, ‘ya omi waka bala a ɔɔn gɛɛl oŋgati bɛɛ! Acaan ganuun Jwaŋa Tolan dɛyi ma te ami waka neeni.” 15Ɔci pwan bɛɛn ɛkɛti moki gɔki agi, “Waka naŋŋɛ Jwaŋa Tolan pwadgin dokiyɛ, naa i gɔk agi ɛkkɛn yeyɔ bɛɛ.” 16Naŋka neeni naŋŋɛ Jwaŋa Tolan oŋki aŋi ne ḍoogɔ. Ɔci ne pɛñan waka neeni baaw dɔɔki ñaalɔ doki. 17Ɔci Butruc bala poŋi te liɛlta neeni, yeti ɛkɛ liɛlti jiñɛ yuarnɛ bɛɛ. Ɔci ne ɛkɛ baali poŋi te jyek liɛlta neeni menyɛ, maka cuonnɛ Kɔrniilyac dɛññin bora, ɔci ɛkkɛn tooccin mati yomu te pɔya eetan ma ban Cimaann. Ɔci ɛkkɛn bɛɛn ɔci oṭṭinti kaañ tukɛti ne cwakanti. 18Ɔci borcin mati, ɔci ɛkkɛn tooccin te Butruc mena bala ciyi a wɛli ban Cimaann neeni. 19Ɔci ne Butruc baali poŋi te liɛlti menyɛ, Boŋ Juaŋ gɔkcin ɛkɛti agi, “Maka ‘uay gɛɛg bala bɛɛn ne yyɛɛwɔ lieṭi i wɛnni. 20Jɔlla ñaalɔ, dala i kaacca iñɔ nona ɛkkɛnti. Dala i ooddi i ɛkkɛn ban ɛkkɛn. Naa i kwaci paŋi jiek bɛɛ, acaan ɛkkɛn cuoññan ‘ya wɛnni iti.” 21Ɔci Butruc kaaccin iñɔ ɛkkɛnti ɔci gɔkcin ɛkkɛnti agi, “Gena ‘ya a mena lildɛ ɛkkɛ neeni. Ɛkkɛ bɛɛnɛ a ɔɔn ogo?” 22Ɔci ɛkkɛn gɔkcin ɛkɛti agi, “Ɔɔn bɛɛnɔn cuonnɔn Kɔrniilyac te ban ɔɔn. Ɛkɛ a ḍuaŋa ackan a miyya ne cyɛɛlɔ (100). Naŋki ɛkɛ pwanna pwani oŋkanda. Ɔci ɛkɛ yomɛ bala Jwaŋa Tolanti, ɛkɛ a mena guaktan ma Icrayiil waakɛnda agi mena pwadan. Malɛɛka gɛɛl bɛɛn te Jwaŋa Tolanti gɔkcin Kɔrniilyacti agi dala ɛkta ma gɛɛg cuonda iti aŋka i bɛɛdji aŋka ɛkta tieŋdɔ jyeka guagji i neeni. Gena jyeka bɛɛnɔn ɔɔn neeni.” 23Ɔci Butruc gɔkcin ɛkkɛnti agi dala ɛkki koodɔ orɔ. Ɔci ɛkkɛn kaaccin orɔ aŋi wɛlg ɛkɛ. Ɔci ne liidɔ Butruc jɔllin, ɔci ɛkɛ ati i ɛkkɛn. Ɔci modg ɛkkɛn Ma Kiṭɔ gɛɛg te ban Yaapa ati iki ɛkkɛn. Ɔci ɛkkɛn niini yomɔ. 24Ɔci te liidɔyɛ, ɛkkɛn luoṭi moki, ɔci ɛkkɛn dɛñjin ban Cɛcariiya. Ɔci ne Kɔrniilyac baali kɛɛy Butrucyɛ, ɛkɛ ma ɛkkɛn ḍɔɔllɛyɔ, ɔci mung ɛkkɛn daŋkun ḍɔɔllɛyɔ nona ne cyɛɛlɔ on ɛkɛ. 25Ɔci ne Butruc kaanni kaañjiyɛ, Kɔrniilyac kookkinti ɛkɛti kaañ tukɛti, ɔci ḍwoñjin iñɔ Butruc ñamɛti, ɔci morcin ɛkɛti. 26Ɔci Butruc ɛkɛ luolnɛ ñaalɔ ɔci gɔkcin ɛkɛti agi, “Jɔŋŋa ñaalɔ, acaan ‘ya a men baan budan ba i ɔɔn.” 27Ɛkkɛn bala ati gɔwwɔ yaakkɛn ɔɔn ne dɛñki on Kɔrniilyacti ɔɔn, ɔci maka coŋin mɔkci orɔ aŋan. 28Ɔci Butruc gɔkcin ɛkkɛnti agi, “Naŋki ma Icrayiil ŋeejɛ ɛkkɛ doki, acaan ɛkkɛn gɔwwɔ i maka pookɛn bɛɛ, ɔci jyɛyi i maka pookɛn bɛɛ. Yeti ‘ya lalla Juaŋ ɔci ɛkɛ gɔki agi naa ‘ya gɔkci agi men gɛɛl yaayɔ bɛɛ. 29Ɔci acaan ‘ya lalla Juaŋ a ɔɔnyɛ, aŋka ‘ya bɛɛna neeni. Ne ma cuonnɛ ɛkkɛ ‘yatiyɛ, ‘ya kwaccan paŋi jiek bɛɛ. ‘Ya bɛɛn nona ɛkkɛti doki, oŋ ba jwalla boorɛ ɛkkɛ ‘ya neeni bɛɛ.” 30Ɔci Kɔrniilyac gɔkcin Butructi agi, “Ninka ati ne ŋaanɔ waayi ne oŋ waŋɛ warɛ yiɛnnɛ ba acca neeniti ɔɔnyɛ, ‘ya baal cɔk Jwaŋa Tolanti orɔ on ‘ya, ɔci ne ‘ya wyeñu oona ñaalɔyɛ, mena ‘uan gɛɛl mɔkcan ‘ya bala yɔɔd ‘ya ñamuti. Bworŋ ɛkɛ bɔɔna bɔɔn ɔci galla gallo. 31Ɔci ɛkɛ gɔkcin ‘yati agi, ‘Kɔrniilyac, Jwaŋa Tolan tieŋŋin cɔŋi i. Ɔci naŋki i naŋka pwadin matiyɛ, tieŋni ɛkɛ moki, ɔci ɛkɛ bala poŋi i. 32Ɔci acca dala i maka ‘uay cuña ban Yaapa. Mena ‘uan bala aŋan. Dala ɛkɛ bɛya. Ɛkɛ yenti Cimaan, ɔci yenti ɛkɛ yenta parɛ moki a Butruc. Ɛkɛ a wɛllo. Ɛkɛ bala ciyi on mena noŋi kanŋa geeko. Ɔci yenti mena noŋi geek neeniyɛ, ɛkɛ yenti Cimaan daŋkun. Ɔci on ɛkɛ bala galŋ ḍwaŋɛti.’ 33Ɔci ‘ya ma cuoññan iti ba jyeka gɔɔni malɛɛka ‘yati. I yomu pwad pwad mati aŋka i bɛɛni ban ɔɔn neeni. Ɔci acca Juaŋ balgin iki ɔɔn wɛnni, ɔɔn buagɔn tieŋdɔn jyeka i myenniti Juaŋ aŋka gɔwwa i ɔɔntiy.” 34Ɔci Butruc gɔkcin mati agi, “Awarɛ, acca ŋeej ‘ya ne pwadan Jwaŋa Tolan yookɔn te Keedin Pookɛn gɛɛg bɛɛ. Ɛkɛ ani ma waakɛnda. 35Ma wɛɛn warda kan ɛkkɛn morti Juaŋti ɔci noŋdi naŋka pwadinyɛ, Juaŋ ɛkkɛn magdɛ daŋkun. 36Jyeka cuonnɛ Jwaŋa Tolan ma Icrayiilti neeni ŋeejɛ ɛkkɛ. Ɛkɛ bala loṭi ma te jyeka wonkɛn jyeka pwadin jyek coodi pwani neeni te Yaccu Kiṭɔ agi Yaccu neeni ɛkɛ a Ciɛggɔn wɛɛn warda. 37Jyek Yaccu ati ban Yahuudiya warda. Ɔci jyeka neeni ŋeejɛ ɛkkɛ daŋkun. Te ñamu jyeka neeni jɔɔtcin ban Jaliil ne Yɔhanna ḍookki te lali ma te jyek bultiy. 38Yaccu men ma Najarɛtyɛ, ɛkɛ ‘wonnɛ Juaŋ Boŋ ɛkɛ, ɔci moki ɛkɛ ‘wonnɛ Juaŋ war tɛɛn hayya ɛkɛ oŋ atti noŋi naŋka pwadin mati oŋo. Ɔci maka muogɛ jɔkin yeyin daŋkun pɔŋnɛ ɛkɛ. Ɛkɛ yaakinti naŋka wanna acaan Jwaŋa Tolan bala iki ɛkɛ. 39Gena ɔɔn a maka yɔṭi naŋka naŋŋɛ Yaccu mati bonk ma Icrayiil jitin, ɔci ban Urcaliim daŋkuny. Yeti Yaccu ŋaapci ma ñaalɔ kakanti, ɔci ɛkɛ nogɛ mako. 40Yeti ne ninna akki ne ḍoogɔ bɛɛni borayɛ, ɛkɛ jɔɔŋnɛ Jwaŋa Tolan ñaalɔ tɛɛti moki. Ɔci Juaŋ ma lɛɛrnɛ Yaccu. 41Yeti Juaŋ Yaccu lɛɛlnɛ bora mati waakɛnda bɛɛ. Gena maka kɛnnɛ ɛkɛ bora aŋka lɛɛrnɛ Yaccuy. Ɛkɛ maka neeni kɛnnɛ bora acaan ɛkɛ buagɔn ɛkkɛn ma nɔɔttan. Gena ɔɔn a maka omi waak iki ɛkɛ a cyɛɛlɔ, ɔci mottɔn i ɛkɛ ne ɛkɛ jɔŋni ñaalɔ te koolji tɛɛti mokiy. 42Juaŋ ɔɔn myennɔn agi dala ɔɔn ma myetcɔn agi Yaccu neeniyɛ, ɛkɛ a mena guaŋŋɛ Juaŋ agi ɛkta noŋdɔ godan maka tɛɛti, ɔci maka tuunti daŋkuny. 43Mena neeni a mena guaktan bɔwan Jwaŋa Tolan te baaṭi waakɛnda agi kan mena jyeddi ɛktatiyɛ, Jwaŋa Tolan ɛkta bɔɔkta doki, acaan yenti ɛkɛ baalɔ ɛktati doki.” 44Ɔci ne Butruc baali gɔki jyeka neeni menyɛ, Boŋ Jwaŋa Tolan bɛɛn maka bala tyeŋi jyeka neeniti, ɔci cooccin ɛkkɛn yomgɛnti. 45Ɔci ne ma Icrayiil maka aŋi Ma Kiṭɔ maka ati i Butruc neeni gɔrki Boŋ Juaŋ bɛɛni Keedin Pookɛnti daŋkunyɛ, ɛkkɛn bala poŋi agi, “Aa, cca cca cca! Juaŋ Keedin Pookɛn ‘wonnɛ Boŋ ɛkɛ daŋkun? Ay ay ay ɛkkɛ!” 46Maka bɛɛn i Butruc neeni ɛkkɛn poni acaan maka neeni bala gɔki te tugga kuokɔn ma, ɛkkɛn gɔki agi Jwaŋa Tolan ɛkta tolɔ katan. Ɔci Butruc gɔkcin ma Icrayiilti agi, 47“Men gɛɛl yookɔn boki ne maka neeni bultiti ma te piegyɛ? Acaan Boŋ Juaŋ bɛɛn ɛkkɛnti doki bala ba bolja ɛkɛ bɛɛni ikinti te ñamuy.” 48Ɔci Butruc ma myennɛ agi dala maka neeni buldi ma te yenti Yaccu Kiṭɔ. Ɔci Keedin Pookɛn neeni gɔkcin Butructi agi, “Dala ikin pari cietin iki ɔɔn ne ḍyɛṭ ṭɔɔlɛ.”

will be added

X\