1 Tiyɔɔpiloc, worga parɛti ‘ya kiewan iti te jyeka loṭi Yaccu ma, ɔci te naŋka naŋŋɛ ɛkɛ waakɛnda te oŋŋa ɛkɛ jɔɔnni, 2 ɔci ne oŋŋa ɛkɛ atti ñaalɔ ɔɔn. Yeti ne Yaccu atti ñaalɔ men bɛɛyɛ, ɛkɛ maka muonɛ ɛkɛ bora naŋŋɛ a Cuudan ɛkɛ te baaṭi neeni myennɛ te Boŋ Jwaŋa Tolan te naŋka naŋtan ɛkkɛny. 3 Ne Yaccu tuuni ɔci ne ɛkɛ jɔlni ñaalɔ dokiyɛ, ɛkɛ warɛ lɛɛlnɛ bora Cuudanti oŋki kɔɔna kɔɔni pɔyi jitkɛn ne coŋɔn aŋka ŋeettan ma ɛkɛ bala tɛɛti awarɛ moki. Ɔci ɛkɛ cien iñɔ ṭɛɛrji wɛnni nink a ma baan ne yyɛɛwɔ (40), ɔci ne ɛkɛ warɛ lɛɛrni ma a ɔɔnyɛ, ɔci ɛkɛ ɛkkɛn myennɛ te jyek cyɛgji Jwaŋa Tolan. 4 Ɔci oŋ gɛɛlti ne ɛkkɛn balki cieki i ɛkɛyɛ, ɛkkɛn myennɛ ɛkɛ agi, “Naa ɛkkɛ kaattɛ bora te ban Urcaliimji wɛnni bɛɛ. Dala ɛkkɛ kɛɛddɛ Boŋ Jwaŋa Tolan mena guaŋŋɛ Juaŋ agi bɛɛdɔy. Ne ɛkɛ bɛɛdiyɛ, ɛkɛ bala ba jwalla guaŋi ‘ya ɛkkɛti te ñamu agi, 5 bala ba Yɔhanna ne baali buoṭi ma te pieg te baaṭiyɛ, ɔci ne cwakanti daŋkun ɛkkɛ buldɛ Boŋ Juaŋo.” 6 Ɔci oŋ gɛɛlti ne Cuudan wyetkɛn ḍɔɔlkiti Yaccutiyɛ, ɛkkɛn tooccin ɛkɛti agi, “Ciɛggɔn, i noŋ cyɛgji ma Icrayiil dɔwwa ɛkkɛnti te oŋŋɔ?” 7 Ɔci Yaccu gɔkcin ɛkkɛnti agi, “Jyek oŋki naŋka bɛya ne ŋoyɔyɛ, a jyek ɛkkɛ bɛɛ, gena jyek Wey ɔɔn. Gena Jwaŋa Tolan parɛ aŋka jyek ninka neeni ŋeejɛy. 8 Ɔci ne Boŋ Jwaŋa Tolan bɛɛdi ɛkkɛtiyɛ, ɛkkɛ yaaktɛti eedɛ war tɛɛn te ɛkɛti oŋo. Ɔci ɛkkɛ agdɛ maka mieti ma te jyek ‘ya ban Urcaliim, ɔci ban Yahuudiya warda, ɔci ban Camɛɛrya warda, ɔci bonk jitkɛn waakɛnda baan warda.” 9 Ɔci ne ɛkɛ gɔŋni a ɔɔnyɛ, ɛkɛ eññɛ Jwaŋa Tolan ñaalɔ, ɔci pɔli bɛɛn kookkinti ɛkɛti ɔci ɛkɛ kuommɛ ñino. Ɔci ɛkɛ yuarcɛ ma moki bɛɛ. 10 Ɔci ne ɛkɛ baali atiyɛ, ma bala yɔdi ñoṭi ɛkɛ. Ɔci ne ɛkkɛn balki yɔtki ñorki menyɛ, ne pɛñan maka ‘uay gɛɛg bɛɛn ne yyɛɛwɔ yɔɔtcin ɛkkɛn toŋkɛnti bworŋin ɛkkɛn bɔɔna bɔɔno. 11 Ɔci ɛkkɛn gɔkcin ɛkkɛnti agi, “‘Uay ma Jaliil, ɛkkɛ yɔdgɛ ñoṭɛ ñaalɔ pɔliji a ɔɔn ogo? Yaccu mena luoṭi te ɛkkɛti acca neeniyɛ, ɛkɛ dɔɔkti moki ba wona yuarŋɛ ɛkkɛ ne ɛkɛ atti ñaalɔ pɔliji neeni ɔɔn.” 12 Ne Yaccu eññɛ Juaŋ pɔliji te Pom Jɛtuun wyeñɛti dokiyɛ, Cuudan ɛkɛ kooyin iñɔ te Pom Jɛtuun wyeñɛti, ɔci ɛkkɛn ati dɔɔki ban Urcaliimji. Ban Urcaliim looncin bɛɛ, cual cwalo. 13 Ɔci ne ɛkkɛn dɛñki baanjiyɛ, ɛkkɛn ati kaaccin on kona ñaalɔ ona cieki ɛkkɛny. Gena Butruc ɔci Yɔhanna, ɔci Yaakub ɔci Andarawuc, ɔci Pilibuc ɔci Tɔmac, ɔci Bartɔɔlamawuc ɔci Matta, ɔci Yaakub kaci Alpyac ɔci Cimaan men Maka yomgɛn myɛlin, ɔci Yahuuja kaci Yaakub. 14 Maka neeni bala cɔki a cɔŋi oŋkanda. Ɔci maka moong bala cɔki i ɛkkɛn. Moryam mɛy Yaccun bala nona cɔkki ma daŋkun, ɔci modg Yaccun bala daŋkun. 15 Oŋ gɛɛlti ma wyetkɛn ḍɔɔlɛ ne coŋɔn, bala ba miyya ɔci men baan ne cyɛɛlɔ (120). Ɔci te oŋŋa wannayɛ, Butruc jɔŋŋin ñaalɔ ma ñomgɛnti ɔci gɔkcin agi, 16 “Modg ɔɔn, jyeka bɛɛn Yahuuja Ickɛɛryutiti acca neeni bɛɛn a ɔɔn acaan ɛkkɛn guagɛ ma te baaṭi doki agi bɛɛdɔ ba jyeka guaŋŋɛ Boŋ Jwaŋa Tolan te tuk Daawud te baaṭi, ne ɛkɛ gɔki te jyek Yahuuja Ickɛɛryuti mena wɛɛñi maka ooddi mwoki Yaccuy. 17 Yahuuja Ickɛɛryuti ɛkɛ muonɛ Yaccu bora a men ikin te ñamu, ɔci ɛkɛ bala noŋin kanŋa iki ikin a cyɛɛlɔ.” 18 (Yahuuja Ickɛɛryuti neeni ɛkɛ noon wiɛllɛ te bilka ɛkɛ ‘woñkiti ma te labji ɛkɛ, ɔci ɛkɛ ḍɛmmin iñɔ nona wannati wyeñɛ ṭiɛŋnɛ iñɔ, ɔci ɛkɛ warɛ nuottin jitin, ɔci ‘yeeng ɛkɛ bɛɛn bora waakɛnda. 19 Ɔci jyek lyen Yahuuja neeni ati ban Urcaliim konɛti warda. Ɔci nona neeni ɛkkɛn boṭi agi Akɛɛldama. Akɛɛldama te tuk Mabaan ma boṭi agi, “Non Yimgo.”) 20 “Acaan jyeka kiigin worga Ɔɔlg Daawudji gɔki agi, ‘Dala non ɛkɛ nina budan ɔɔn. Naa magga cootti aŋan bɛɛ.’ Ɔci moki agi, ‘Dala kanŋa ɛkɛ mugdɛ mena parɛ.’ 21 “Ɔci acca dala ikin mena parɛ gɛɛl muotin bora te maka balkin iki ikin te ñamu ne Yaccu balkin iki ikin meny. 22 Mena neeniyɛ, dala aga mena balkin iki ikin te ñamu te oŋŋa Yaccu buulli Yɔhanna ne oŋŋa ɛkɛ luoṭṭi ñaalɔ ɔɔn. Ɛkɛ muotin bora aŋka ikin ma nɔɔttin iki ɛkɛ agi Yaccu jɔŋŋin ñaalɔ te koolji tɛɛti moki.” 23 Ɔci ɛkkɛn maka ‘uay kɛññɛ bora ne yyɛɛwɔ aŋka ɛkkɛn muodi men gɛɛl ne cyɛɛlɔ te maka neeniti, mena ne cyɛɛlɔ yenti Yuocip. Yeng ɛkɛ yenga pookɛnyɛ, ma boṭi agi Barcaaboc ɔci Jactac. Ɔci ‘wana parɛ yenti Mataayac. 24 Ɔci ma cɔkcin Juaŋti ɔci gɔkcin agi, “I ciɛggɔn, yomg ma baan waakɛnda ŋeej i. Ɔɔn myettɔn mena i buagi cuoñña kandin iki ɔɔn a cyɛɛlɔ te maka ne yyɛɛwɔ neeniti. 25 Dala ɛkɛ kanŋa Yahuuja Ickɛɛryuti kanŋa cuuda mugdɛ, acaan Yahuuja Ickɛɛryuti kanŋa ɛkɛ dalnɛ, ɔci ɛkɛ jyetcin ɔntɔ ati nona ɛkɛ buagɛtiy.” 26 Ɔci ɛkkɛn oomjin kɔla aŋka kɔla ɛkkɛn myettɛ mena muktan ɛkkɛn oltan non Yahuuja Ickɛɛryutitiy, ɔci ɛkkɛn myennɛ Jwaŋa Tolan te kɔla, agi dala ɛkki Mataayac oldɛ non Yahuuja Ickɛɛryuti. Ɔci Mataayac warɛ ñaaŋnɛti Cuudan Yaccuti, ɔci ɛkɛ aŋi mena akki Ma Inyaakkɛn Wyetkɛn Ne Yyɛɛwɔy. Ɔci ɛkkɛn aŋi Cuudan Yaccu waakɛnda.
