3Yɔhanna 1

1Mug ɔɔn Gayac, gena ‘ya ciɛggɔn kaniica kiewan worga iti neeni. I a mena ana ‘ya te jyeka bala ikinti a jyeka awarɛ neeniy. 2Hay i Gayac mena ana ‘yay, ‘ya baal cɔk te i aŋka Juaŋ i magdi te waak waakɛnda. I yomu pwad pwad Juaŋti, ɔci ‘ya baal cɔk te i aŋka i cied waru ne pwadan daŋkun. 3’Ya yomu ñɔɔna ñɔɔn acaan modg ikin gɛɛg bɛɛn, ɔci ‘ya nɔɔtka ɛkkɛn agi i baalji ciejji ne pwadan te jyeka awarɛ neeni oŋkanda. 4Ne ‘ya tieŋda agi kɛɛgin ‘ya balgɔ ciyɔ ne pwadan te jyek Juaŋ oŋkandayɛ, ‘ya yomu ñɔɔna ñɔɔn ne tolan. 5Gayac mena ana ‘yay, i baal mok modg ikin maka wɛlg kwoy i te ñamu neeni. Kan i baal mok ma a ɔɔnyɛ, a ɔɔn pwad pwado. 6Maka maŋŋi i neeni ɛkkɛn jɔllin ñaalɔ ma kaniica ñomgɛnti, ɔci ɛkkɛn ma nɔɔtkɛ te anna ani i ɛkkɛny. Ne maka neeni jɔŋti ootti bana parɛtiyɛ, dala i ɛkkɛn maga ba yoma Juaŋ buagiti. 7Maka ati loṭi ma neeniyɛ, ati te yenti Kiṭɔ. Ɔci ɛkkɛn luoṭi waagga te non maka ciyi budan te jyek Juaŋ neeni bɛɛ. 8Kan maka ‘uay ati noŋi kanŋa Juaŋ a ɔɔn ba naŋka neeniyɛ, dala ikin Ma Kiṭɔ ɛkkɛn gwaltin ne pwadan. Ne ikin noŋtin a ɔɔn ɛkkɛntiyɛ, ikin ñoowin iki ɛkkɛn a cyɛɛlɔ te jyeka awarɛ neeni. 9’Ya kiewan jiek ṭɔlgɛn ne ḍiakan ma kaniicati, yeti Dayɔɔtrapac mena buagɔn jyek ɛkɛ jɔɔtti ñamu oŋkandayɛ, ɛkɛ yookɔn te tieŋŋin jyek ‘ya. 10Ɔci ne ‘ya bɛɛdayɛ, ɛkkɛ myettin te naŋki ɛkɛ, acaan ɛkɛ bala wooki ‘ya te kona baaw budan, ɔci gɔki ne yaayan mati te jyek ‘ya. Ɔci gena jyeka neeni pookɛn bɛɛ, jiek gɛɛg bala daŋkun. Acaan ne Ma Kiṭɔ bɛɛti ban ɛkkɛyɛ, ɛkɛ yookɔn te ɛkkɛn. Ɔci kan ma gɛɛg buagɔn noŋdi ne pwadan Ma Kiṭɔ maka bɛya kaniica ɛkkɛti neeniyɛ, Dayɔɔtrapac ɛkkɛn ŋualdɛ bora te kaniicaji doki. 11Mena ana ‘yay, kan ma noŋi ne yaayanyɛ, naa i lɔkca naŋka naŋtan ɛkkɛn bɛɛ. Kan naŋki ɛkkɛn pwadɔyɛ, dala i lɔkca acaan maka noŋi ne pwadanyɛ, ɛkkɛn a Ma Juaŋo. Yeti mena noŋi ne yaayan oŋkandayɛ, ɛkɛ Jwaŋa Tolan yuarŋɛ oŋgati bɛɛ. 12Dɛmiitriyac yuarcɛ ma ɛkɛ bala noŋi ba jyeka awarɛ, ɔci ma waakɛnda gɔki agi naŋki ɛkta pwadɔ. Ɔci ‘ya daŋkun gɔk ka naŋki ɛkɛ pwad pwado. Ɔci ŋeej i jyeka guagdi ‘yayɛ, a jyeka awarɛ. 13Jiek bala ‘yati kɔɔna kɔɔnno, yeti ‘ya buaga kiewa jyeka neeni waakɛnda ne coŋɔn iti bɛɛ. 14’Ya buaga bɛɛd ban ɛkkɛ ne cwakanti ɔci ikin jiɛtin ne pwadan iki i dɔki. 15Mung ikin wɛnni ñiepi i. Ɔci dala i ñiepca mung ikinti aŋan te ‘ya daŋkun, ɛkkɛn ñiipca iñɔ waakɛnda, menga da te yenti ɛkɛ, ɔci menga da te yenti ɛkɛ te ‘ya daŋkun. Bawwin.

will be added

X\