1 ’Ya gɔkka iti Juaŋ ñamɛti ɔci Yaccu Kiṭɔ mena noŋdi godan mati waakɛnda neeni ñamɛti. Gena ɛkɛ a mena godan maka tɛɛti ɔci maka tuuny. Acaan ɛkɛ warɛ lɛɛldɛ bora mati, ɔci ɛkɛ aga Ciɛggɔn Tolan mati waakɛnda ṭɛɛr wyeñɛ warda. 2 Dala i lor ma te jyek Jwaŋa Tolan oŋkanda ɔɔn. Naa i poŋ gɔk agi pɔya loṭi ma baaw bɛɛ. Dala i gɔkca mati ne pwadan aŋka ma tieŋdi ɔci jyeddi. Kan ma bala noŋi ne yaayanyɛ, dala i ɛkkɛn ṭeya ñin ne pɛñan te yoma pwadan. Dala i lor ma te jyek Juaŋ oŋkanda ɔɔn. 3 Acaan oŋŋa bɛya waayiyɛ, ma bwagdɛ jyeka pwadin neeni moki bɛɛ. Ɛkkɛn buagdɛ gena jyeka budan. Ɔci ɛkkɛn ooddi lieṭi maka loṭi ɛkkɛn te jyeka ɛkkɛn buagiti jyeka milin ɛkkɛnti jyeka yeyin neeni. 4 Ɔci ɛkkɛn yooktan te jyek worga Jwaŋa Tolan jyeka awarɛ neeni. Ɔci ɛkkɛn tieŋdi gena jyek ṭɛɛr wyeñɛ jyeka budan neeni. 5 Yeti iyɛ, dala i waru muga oŋkanda. Kan taab balayɛ, dala i yɔɔdi ne tɛyan ɔɔn. Dala i noŋja kanŋa i kanŋa miti ma te jyeka wonkɛn jyeka pwadin neeni. Naa kanŋa gɛɛl dalja bɛɛ. 6 Yeti gɔṭṭi! ‘Yayɛ, ‘ya tuud ne cwakanti te kanŋa Juaŋo. Oŋŋa ‘ya ṭɛra neeni daldayɔyɛ, moki looncin bɛɛ. 7 ’Ya noonɔn i Jwaŋa Yaayan ne pwadan. Kanŋa ‘ya ‘wonnata Juaŋ neeni cwamjan ‘ya doki. Jyek jyeni Juaŋ daljan ‘ya oŋgati bɛɛ. 8 Ne oŋŋa bɛya ne ŋoyɔ a oŋŋa tolanyɛ, mena pwadan Mena Noŋi Godan matiyɛ, ɛkɛ ‘ya ‘wonda gena pwadan te coodi ‘ya coodda pwadan. Ɔci ɛkɛ ‘ya ‘wonda paru bɛɛ. Ɛkɛ ‘ya ‘wonda iki maka bala kɛɛy buagɔn oŋŋa ɛkɛ bɛɛdi daŋkuny. 9 Gɔṭṭi hay, Timutawuc! Dala i pocca bɛɛd ‘yati wɛnni ne pɛñan ne cwakanti. 10 Acaan ‘ya dalna Dimac. Ɛkɛ bala ani jyeka iñɔ baanji wɛnni ne tolan. Ɔci acca ɛkɛ ati ban Tacalunika. Ɔci Krɛcɛnicyɛ, ɛkɛ ati ban Galatiya, ɔci Tituc, ɛkɛ ati ban Dalmeecya. 11 Gena Luuk aŋka bala ‘yati parɛ wɛnniy. Dala i ootta Mark owwa, ɔci ɛkkɛ bɛɛdɛ yaakkɔ wɛnni nona ‘yati, acaan Markyɛ, ɛkɛ aŋka yaakinti ‘ya magda ne pwadan te kanŋa ‘ya. 12 Ticcikoc cuuñi ‘ya ban Ɛpacac. 13 Ne ɛkkɛ bɛɛdɛyɛ, dala ɛkkɛ bworŋ ‘ya bworŋ jwami oodɛ. Ɛkɛ dollanyɔ ‘ya Karpocti ban Trɔwac. Ɔci dala ɛkkɛ worgan ‘ya oodɛ daŋkun. Yeti kan ɛkkɛ worgan pookɛn dolnɛyɛ, dala ɛkkɛ worgan a geek aŋka oodɛ. 14 Alɛkcaandar mena a gɔɔñi gɔci waak te bilka tɛyan neeniyɛ, ɛkɛ noŋi ne yaayan ‘yati. “Ciɛggɔn ikinyɛ, ɛkɛ jiek duaktɛ mena neeni wyeñɛti te naŋka naŋŋɛ ɛkɛ yaayan ‘yati neeni.” 15 Ɔci i daŋkunyɛ, dala i waŋu tiicca te Alɛkcaandar acaan ɛkɛ yookɔn te jyeka loṭin ikin ma neeni ne pɛñan. 16 Ne ‘ya noŋkata ma godan te ñamuyɛ, men gɛɛl ‘ya maŋŋa yuonna taaŋuti te jyek godan ‘ya bɛɛ. ‘Ya dalka ma paru ɛkkɛn yiŋi ɔntɔ waakɛnda. Yeti ‘ya buaga Juaŋ jiek oldɛ ɛkkɛn wyetkɛnti te naŋka neeni bɛɛ. A’a. 17 Ciɛggɔn ikin aŋka bala ‘yati parɛ, ɔci ‘ya ‘wonna ɛkɛ war tɛɛno, ɔci a ɔɔnyɛ, ‘ya ma myetkan te jyeka wonkɛn jyeka pwadin neeni waakɛnda. Ɔci Keedin Pookɛnyɛ, ɛkkɛn tieŋŋin jyeka neeni waakɛnda. ‘Ya maŋŋa Juaŋ te jyek godan, bala ba mena wɛyɛ ma te jiɛl tukɛti. 18 Ɛɛ, ɔci oŋkanda ɔɔnyɛ, Juaŋ ‘ya yɔɔda te naŋka yeyin neeni waakɛnda ne ‘ya dɛnda ban cyɛgji ɛkɛti ñaalɔ ɔɔn. Dala Juaŋ jiɛtan ma oŋkanda oŋkanda ɔɔn. Amɛɛn. 19 Dala i ñiepca Pricillati te ‘ya, ɔci ñiepca Akwillati te ‘ya moki, ɔci ñiepca ma Ɔnɛciipɔracti te ‘ya moki. 20 Iraactac yeddin te ban Kuruntuc. Ɔci Trɔpimoc dollanyɔ ‘ya te ban Mayliitac, acaan ɛkɛ warɛ yaayɛ. 21 Dala i pocca bɛɛd ‘yati wɛnni ne pɛñan ne ñaal jiñɛ baawi men ɔɔn. Yubyuulac ñiepi i, ɔci Pudɛnic moki ñiepi i, ɔci Laynac moki ñiepi i, ɔci Klɔdya moki ñiepi i, ɔci modg ikin waakɛndayɛ, ɛkkɛn ñiepi i daŋkun. 22 Dala Ciɛggɔn ikin bala iti. Dala ɛkɛ yomɛ pwada a pwani iti. Bawwin.
