2Timatawuc 3

1Timutawuc, dala ŋeejja i ne pwadan acaan oŋka bɛya ookti ne ŋoyɔyɛ, jiek tɛya. 2Acaan maka coŋinyɛ, gɛɛg andi gena waak ɛkkɛn pookɛn, ɔci ɛkkɛn andi bilk daŋkun. Ɔci ɛkkɛn andi yyɛji daŋkun, ɔci moki ɛkkɛn andi jied waakɛn pookɛn, ɔci ɛkkɛn moki andi lomi jieko. Ɔci ɛkkɛn andi weyyɛn walla mɛyyɛn bɛɛ, ɔci ɛkkɛn gɔkti a pwatcin oŋgati te genga bɛɛ. Ɛkkɛn ciyi a nɔɔtk budan oŋkanda ɔɔn. 3Ɛkkɛn yomgɛn baaw mati waakɛnda. Ɛkkɛn yaakinti yɔŋi jiek i ma bɛɛ. Ɛkkɛn jomi ma waakɛn budan. Ɛkkɛn noŋi ba yomg ɛkkɛn pookɛn budan amaam ɔɔn. Ɛkkɛn a ywobko. Ɛkkɛn yookɔn te jyeka pwadin waakɛnda. 4Ɛkkɛn ma ‘wontan maka pookɛn byeŋkɛnti aŋka naŋtan ɛkkɛn ne yaayan. Ɛkkɛn poŋdi jiek ñamu oŋ ɛkkɛn oŋ noŋti bɛɛ. Ɛkkɛn noŋi amaam budan ɔɔn. Ɛkkɛn poŋi gɔki agi ɛkkɛn ḍwaŋgintɛ. Ɛkkɛn ñingɛn juadan te waka ɛkkɛn yomgɛn ñɔɔtiy, ɔci ɛkkɛn yomgɛn baaw Juaŋti. 5Ɛkkɛn noŋi ba ɛkkɛn akki Ma Kiṭɔ ɔɔn, yeti ɛkkɛn war tɛɛn Juaŋ daltan aŋka noŋdi kanŋa ɛkkɛn yomgɛnti bɛɛ. Ɔci naa i ñoodi iki ɛkkɛn bɛɛ. 6Maka neeni gɛɛgyɛ, ɛkkɛn kaatti orɔ oorg maka pookɛnti mooṭi moonga wyetkɛn baaw neeni aŋka moonga neeni aga maka booti ɛkkɛnti. Moonga neeniyɛ, ɛkkɛn bala poŋi oŋkanda te nɔjja naŋɛ ɛkkɛny, ɔci ɛkkɛn noŋi ba naŋka ɛkkɛn yomgɛn buagiti ne pɛñan oŋkanda neeni. 7Ɛkkɛn buagɔn tieŋdi jiek ne coŋɔn, yeti ɛkkɛn jyeka awarɛ yuartanji bɛɛ. 8Bala ba Janic ɔci Jambric ne ɛkkɛn yookiti te jyek Muuca te baaṭiyɛ, ɔci acca daŋkun ‘uaya neeni yookɔn waakɛn te jyeka awarɛ daŋkun. ‘Uaya neeniyɛ, yaakinti paŋi jiek ne pwadan bɛɛ. Jyenna ɛkkɛn jyetki neeniyɛ, a jyenna awarɛ bɛɛ. 9Yeti ɛkkɛn ‘uotti ñamu ne loonan bɛɛ, acaan jyek naŋki ɛkkɛn naŋka yaayan neeniyɛ, bɛya bora ne cwakanti, ɔci ɛkkɛn ŋeettan ma te naŋki ɛkkɛn. Ɔci a ɔɔnyɛ, bala ba jyek Janic ɔci Jambric. 10Gɔṭṭi hay! Timutawuc, jyeka loṭa ‘ya neeniyɛ, yuarniji i, ɔci coodda ciya ‘yayɛ, ŋeej i moki. Ɔci paŋi ‘ya ŋeej i, ɔci jyeni ‘ya mokiyɛ, ŋeej i, ɔci loomg tɛɛn ‘yayɛ, ŋeej i, ɔci anna ana ‘ya mayɛ, ŋeej i moki. Ɔci yɔɔdda yɔɔda ‘ya ne tɛyan ne ma balki noŋki ne yaayan ‘yatiyɛ, ŋeej i moki. 11Taab ‘ya tol tol ban Antyak ɔci ban Aykɔɔnyam, ɔci ban Lictara, ɔci ‘ya baal yɔɔd ne tɛyan men ɔɔn. ‘Ya maŋŋa Ciɛggɔn ikin ɔci wɛɛna bora ɛkɛ te taab neeniti waakɛnda. 12Ɛɛ, awarɛ, maka buagɔn ciyi ne pwadan te jyek Yaccu Kiṭɔyɛ, taab bɛya ɛkkɛnti te maka pookɛnti. 13Ɔci maka yeyin maka a laabanyɛ, naŋki ɛkkɛn pɛɛddi te yoñ gɔ moki pɛɛddi ɔɔn. Ɛkkɛn noŋi ma ñingɛn gɔ ɛkkɛn da naŋin ñin ma ɔɔn. 14Yeti iyɛ, dala i waŋu tiicca te jyeka i lalkiti ma jyeka jyetti iy. Ɔci ŋeej i te maka i lalki te jyeka awarɛ neeniy. 15Ɔci ŋeej i moki jyek Juaŋ jyeka kiigin neeniyɛ, ŋeej i ne wona i ḍiɛri meny. Ñing tɛɛn bɛya te jyeka kiigin neeni. Ɔci te jyek ñing tɛɛn jyeka kiigin neeni mokiyɛ, i yaaktiti jyedda Yaccu Kiṭɔti ɔci i yɔɔdi ɛkɛ. 16Jyek Juaŋ jyeka kiigin waakɛndayɛ, ɛkkɛn a jyeka ma myennɛ Juaŋ te Boŋ ɛkɛy. Ɔci te jyeka kiigin neeniyɛ, ma laltan ma te jyek Jwaŋa Tolan jitkɛn ne pwadan. Ɔci moki te jyeka kiigin neeniyɛ, naŋka naŋtan ma yaayan neeniyɛ, ŋeettan ma ne naŋka yaayan neeni baali a ɔkiy. Ɔci moki te jyek Jwaŋa Tolan jyeka kiigin neeniyɛ, ma yaakinti naŋka yeyin neeni daltan. Jyeka kiigin neeni loṭi ma te naŋka pwadin. 17Kanŋa jyeka kiigin neeniyɛ, bala a ɔɔn acaan Juaŋ buagɔn dala ma ɛkɛ ‘uotti ñamu ne pwadan aŋka dala ɛkkɛn naŋki waka pwadin neeni ŋeettan ɛkkɛn waakɛnda.

will be added

X\