2Timatawuc 2

1Kaci ‘ya Timutawuc, dala i waru tɛya gɔ moki tɛyi ɔɔn te yom pwani ikin ‘wonninti Juaŋ te Yaccu Kiṭɔ neeni i yomuti. 2Jyeka i myennin ‘ya maka pookɛn ñomgɛnti neeniyɛ, dala i ‘uaya pookɛn ‘uaya tieci jiek waakɛn oŋkanda neeniyɛ, dala i ɛkkɛn ‘woñga jyeka neeni daŋkun, aŋka ɛkkɛn lorti ma te jyeka neeni daŋkun. 3Naa i buay taab bɛɛ. Kan taab bala itiyɛ, dala i yomu tɛya ɔɔn ba mena ackan. Ikin da balkin ba ackan Yaccu Kiṭɔ ackan pwadin neeni. 4Mena ackanyɛ, ɛkɛ ñingɛ juadan te kanŋa parɛ gɛɛl bɛɛ, acaan ɛkɛ buagɔn dala naŋki ɛkɛ pwada mena ɛkɛ naŋŋi a ackan neeniti. 5Gɔṭṭi ‘wota, maka boddɔ guoñjiyɛ, ɛkkɛn boddɔ ba yomg ɛkkɛn pookɛn budan guoñji bɛɛ. Ɛkkɛn boddɔ ba naŋki jyek boddin. Ɔci maka ma bwantanyɛ, ɛkkɛn ‘wontan ma waka pwadin. Ɔci kan men gɛɛl noŋdi ba yom ɛkɛ parɛ budanyɛ, ɔci kan ɛkɛ maka pookɛn bwandɛyɛ, ɛkɛ ‘wontan ma genga bɛɛ. 6Ɔci gɔṭṭi ‘wota, mena kanŋan ne pwadan oŋkanda yieljiyɛ, waka ‘yɛgdi ñamu yieljiyɛ, aga wak ɛkɛ. Ɔci a ɔɔnyɛ, yɔmjin. 7Dala i poŋja te waka neeni. Ɔci Ciɛggɔn ikin i magdi, ɔci i tieŋja jyeka neeni ne jiek jitkɛn balki a ɔkiy. 8Dala i poŋja te Yaccu Kiṭɔ mena yɔr ɛkkɛn a Dawuud neeni, ɛkɛ jɔŋŋin ñaalɔ te lienti doki, bala ba jyeka wonkɛn jyeka pwadin loṭa ‘ya ma neeni mieti a ɔɔn te ɛkɛ. 9’Ya lor ma te jyeka wonkɛn jyeka pwadin neeni, ɔci acca ‘ya balka taab te jyeka neeni. Ɔci ‘ya olka ma jiju ciginji doki ba mena nɔɔdɔn ɔɔn. Yeti jyek Juaŋ neeniyɛ, menga yaakinti ɛkkɛn mugdɛyɔ bɛɛ. 10’Ya yɔɔd ne tɛyan taab bɛɛn ‘yati neeni jitin ɔɔn, aŋka dala maka muonɛ Juaŋ bora neeni daŋkun yɔɔrdi tɛɛtin bala Yaccuti neeni ɔci pwanna baadi bɛɛ neeni. 11Jwalla pwadan gɛɛl bala, ɔci ikin yaakinti jyettin jwalla neeniti. Jwalla neeni gɔki agi, Kan lyen Yaccu aŋi ba lyen ikinyɛ, ɔci tɛɛtin ɛkɛ aŋi ba tɛɛtin ikin daŋkun. 12Ɔci moki kan taab ɛkɛ aŋi ba taab ikinyɛ, ikin ‘wontin ɛkɛ jyek cyɛgji ne baaṭi, ɔci ikin aktin cyekin iki ɛkɛ a cyɛɛlɔ. Kan ikin kɛkin te ɛkɛyɛ, ɔci ɛkɛ da kɛkti te ikin daŋkun. 13Yeti ne ikin bɛɛyin jiek jitkɛnyɛ, ɔci ɛkɛ men tieci jiek waakɛn ɔɔn. Acaan ɛkɛ yaakinti warɛ agdɛ moki bɛɛ. 14Dala i gɔkca ma kaniicati moki aŋka ɛkkɛn ñingɛn ñiektan te jyeka neeni. Dala ɛkkɛn myetka i Jwaŋa Tolan ñamɛti, dala ɛkkɛn mwondi te tyewwin te jyeka jitkɛn baaw neeni. Acaan jyek tyewwin neeniyɛ, etti naŋka pwadan gɛɛl mati bɛɛ. Yeti ma ḍɛɛmdi iñɔ te naŋka neeni. 15Dala i waŋu tiicca te naŋki i aŋka Juaŋ yomɛ pwada te naŋki i ko. Dala i kanja ɔci lorca ma ne pwadan te jyeka awarɛ oŋkanda ɔɔn aŋka ne baaṭiyɛ, i lɔɔdja bɛɛ. 16Dala i jyeka pookɛn, jyeka coŋin neeniyɛ, dalja. Acaan maka ani jyeka coŋin neeniyɛ, ɛkkɛn ooddi ɔntɔ te jyek Jwaŋa Tolanti. 17Ɔci jyek ɛkkɛn jyeka yeyin neeniyɛ, ooddi mati waakɛnda ba naŋki waja yaayan neeni ɔɔn. Aymaneeyac yaakkɛn i Payliitocyɛ, ɛkkɛn balki jyeka neeni. 18Ɛkkɛn jiek pɔɔdɛ acaan ɛkkɛn jyeka awarɛ neeni ŋeecɔn bɛɛ. Ɛkkɛn gɔki agi oŋŋa ma jɔŋti ñaalɔ te kolk jitinyɛ, agi bɛɛnɔ doki. Ɔci Ma Kiṭɔ gɛɛg tieŋŋin jyeka guaktan ɛkkɛn neeni, ɔci ɛkkɛn jyetcin ɔntɔ doki. 19Yeti kaniica Juaŋyɛ, yɔɔd ne tɛyan oŋkanda acaan ma Juaŋyɛ, ɛkkɛn balki jyeka ne yyɛɛwɔ. Jwalla ne cyɛɛlɔ gɔki agi, “Maka a ma Juaŋ awarɛyɛ, ɛkkɛn ŋeejɛ Juaŋo.” Ɔci jwalla parɛ neeni gɔki agi, “Maka yenti Juaŋ bala ɛkkɛntiyɛ, dala ɛkkɛn nɔji daltan waakɛnda.” 20Gɔṭṭi, maka ciyi te ona tolan ona pwadanyɛ, ɛkkɛn balki waak ne coŋɔn. Ɔci waka neeniyɛ, ɛkkɛn gɛɛg naŋɛ ma te dahab, ɔci gɛɛg naŋɛ ma te bil pɔdda, ɔci gɛɛg moki naŋɛ ma te jango, ɔci gɛɛg naŋɛ ma te lommo. Ɔci ɛkkɛn waakɛnda kɛɛptin jitin te kanŋa ɛkkɛn daŋkun. Waak gɛɛg balki kanŋan pwadin, ɔci ɛkkɛn pookɛn gɛɛgyɛ, balki kanŋan yeyin. 21Ɔci ba jyek waka neeniyɛ, bala ba jyek ikin daŋkun. Kan mena warɛ uuttɛ ɔntɔ te maka gɔki jyeka budanti neeniyɛ, ɛkɛ aga ba gena pwadan weegɛnti, ɔci ɛkɛ ‘wondi ɛkɛ kanŋa pwadan. 22Dala i waŋu tiicca te waka ma ḍyɛrkɔ yomgɛn buagiti ne pɛñany. Dala i pocca noŋja naŋka pwadin, ɔci dala i jyedda ne pwadan, ɔci dala i anja Juaŋ ɔci ma baan ne pwadan, ɔci dala i yomu niin pwanna pwanno. Gɔṭṭi, ‘ya gɔkka moki, 23dala i noŋja naŋka neeni maka cɔki Juaŋti te yoma pwadan neeni, kan ma tyewɔ te jyeka pookɛn jyeka budanyɛ, naa i ñoodi iki ɛkkɛn bɛɛ. Acaan ŋeej i tyewwin neeniyɛ, etti wɛyyin. 24Acaan mena noŋi kanŋa Jwaŋa Tolanyɛ, naa ɛkɛ ani wɛyyin iki ma bɛɛ. Dala ɛkɛ yomɛ niin pwanna pwani mati waakɛnda aŋka ɛkɛ loṭi maka domi naŋkiy. Dala ɛkɛ loṭi ma ne pwadan, ɔci dala ɛkɛ loomgɛ tɛya. 25Ɔci kan ma gɛɛg yookɔn waakɛn te jyeka loṭi i ma neeniyɛ, dala maka neeni ṭeyayɔ te yoma pwadan. Ɔci a ɔɔn Juaŋ dita noŋdi naŋki ɛkɛ ɛkkɛn yomgɛnti ɔci ɛkkɛn waakɛn yaltan kaapun, ɔci naŋka awarɛ ŋeettan. Ɔci ɛkkɛn poŋdi te naŋki ɛkkɛn, ɔci ɛkkɛn jyeka awarɛ ŋeettan, ɔci waakɛn yaltan dɔɔktiti jyeka awarɛ neeniti. 26Ɔci a ɔŋŋiyɛ, ɛkkɛn wyetkɛn bɛya moki, ɔci ɛkkɛn pɔktɛ Juaŋ te Jwaŋa Yaayan bieŋɛti, ɔci ɛkkɛn noŋdi kanŋa Juaŋ moki.

will be added

X\