2Timatawuc 1

1Gena ‘ya Buuluc cuuda Yaccu Kiṭɔ. Jwaŋa Tolan ‘ya muona bora aŋka ‘ya ma myetka te naŋki ɛkɛ. Ɔci naŋki ɛkɛ neeniyɛ, gena tɛɛtin Juaŋ ma ḍuaññɛ te jwali agi ɛkki ‘woñji ɛkɛ te Yaccu Kiṭɔy. 2Kaci ‘ya Timutawuc, dala Jwaŋa Tolan Wey ikin, ɔci Ciɛggɔn ikin Yaccu Kiṭɔ yomgɛn pwada a pwani iti, ɔci dala yom pɔkkin Juaŋ bala iti. 3’Ya gɔk a pwatcin Jwaŋa Tolanti oŋkanda te i, hay, Timutawuc. ‘Ya kanŋ ɛkɛti te yoma pwadan. Ɛkɛ a Jwaŋ yɔrg ɔɔn ɔci a Jwaŋ ‘ya. ‘Ya cɔk ɛkɛti oŋkanda, te oŋ jiñɛ ɔci te ween jiñɛ ka da ɛkɛ i ordiyɔ. 4’Ya ñingu boŋi ne pɛñan te i. Ne ‘ya poŋa te joon i te oŋŋa ikin kɛɛmninji iki iyɛ, ‘ya buaga dala ikin yɔɔrtin iki ‘ya, aŋka ‘ya yomu ñɔɔdɛ. 5Ɛɛ, ‘ya baal poŋ te jyenna i jyetti Juaŋti ne pwadan neeni. Šyer ɛkkɛ Lɔwic jyeti ne pwadan daŋkun yaakkɛn i mɛy ɛkkɛ Yunic. Ɔci acca ‘ya gɔk ka i jyetti ba ɛkkɛn ɔɔn daŋkun. 6Ɔci acaan a ɔŋŋiyɛ, ‘ya i myettin ‘wota, dala i waru tɛya ‘wota te naŋki i naŋka i ‘wonniti Juaŋ te oŋŋa ‘ya byeŋku tanna itiy. 7Acaan Boŋ Juaŋ Boŋa ikin ‘wonninti Juaŋ neeniyɛ, ɛkɛ etti jyek bwaji bɛɛ. Ɛkɛ etti gena war tɛɛn iki anna ikin anin Juaŋ iki ma baany. Ɔci moki te Boŋ Juaŋ neeniyɛ, ikin yaakinti maŋi waakɔ ne pwadan. 8A ɔŋŋiyɛ, naa i noŋ ba i lɔɔdi te jyek Ciɛggɔn ikin bɛɛ. ‘Ya baal jiju ciginji acca te jyek ɛkɛ, ɔci naa i poŋ gɔk naŋka neeni a lɔɔn bɛɛ. Ɔci kan taab bɛya iti te jyeka loṭi i ma a jyeka wonkɛn jyeka pwadin neeniyɛ, naa i yooki bɛɛ. Dala war tɛɛn Jwaŋa Tolan bala iti. 9Jwaŋa Tolan neeniyɛ, gena ɛkɛ ikin yɔɔññin neeni, ɔci gena ɛkɛ ikin muonin bora aŋka ikin aktin ma ɛkɛ maka pwadin neeni. Ikin muonin ɛkɛ bora te naŋka naŋŋin ikin pwadin gɛɛl bɛɛ. Yeti ikin muonin ɛkɛ bora ba naŋka ɛkɛ buagiti ikin ne ṭɛɛr men baawiy. Ɛkɛ ikin ‘wonnin yom pwani ɛkɛ te naŋki Yaccu Kiṭɔ. 10Ɔci acca jyek yom pwani Juaŋ neeni bɛɛn bora doki. Jyeka neeni bɛɛn bora oŋŋa Yaccu Kiṭɔ bɛɛni iñɔ baanji wɛnniy. Ɛkɛ a Mena Yuoci ikin. War tɛɛn lien lɛɛŋŋɛ ɛkɛ jitin, ɔci ɛkɛ ikin ‘wonnin tɛɛtin te jyenna ikin jyettin jyek ɛkɛy. Ɔci tɛɛtin neeniyɛ, baadi ywongati bɛɛ. 11Te jyeka wonkɛn jyeka pwadin neeniyɛ, ‘ya naŋŋa Yaccu aŋi cuuda ɛkɛ miet ma te jyek ɛkɛ, ɔci lor ma te jyek ɛkɛ. 12Ɔci te jyeka neeniyɛ, aŋka taab bɛɛni ‘yati neeni. Yeti ‘ya lɔɔd te jyeka neeni bɛɛ, acaan mena jyetta ‘ya neeniyɛ, ŋeej ‘ya ne pwadan. Ɔci ŋeej ‘ya kanŋa ‘ya ‘wonnata ɛkɛ neeniyɛ, bala ɛkɛ bieŋɛti, ɔci ɛkɛ gɔṭi kanŋa neeni oŋkanda ne oŋŋa ɛkɛ bɛɛdi ɔɔn. 13Jyeka i laldin ‘ya a jyeka awarɛ neeniyɛ, dala i waŋu tiicca te ɛkkɛn. Dala yom i an ma ne pwadan, ɔci dala i yomu ḍuacca Juaŋti ne pwadan oŋkanda. Naŋka neeni bɛya te Yaccu Kiṭɔti waakɛnda. 14Dala i waŋu tiicca ne pwadan te kanŋa i ‘wonniti Juaŋ pwadan neeni te Boŋ Juaŋ mena ciyi ikin yomgɔti neeni. 15Çeej i doki ne ‘ya dalkata maka ciyi ban Ecya waakɛnday. ‘Ya dalka Pijiiloc ɛkkɛn yaakkɛn iki Ɛrmɔɔjɛnic. 16Yeti Ɔnɛciipɔracyɛ, ɛkɛ ‘ya dalna bɛɛ. Dala Jwaŋa Tolan yomɛ pɔktɛ on tukɛ ɛkɛti, acaan ‘ya maŋŋa ɛkɛ oŋki ne coŋɔn te yoma pwadan. Ne ‘ya byeŋku akki ḍɛɛggin te jiŋginyɛ, ɛkɛ buayi warɛ a lɔɔn bɛɛ. Yeti ɛkɛ bɛɛn ḍieŋŋin ‘yati ɔci ‘ya maŋŋa yomuti. 17Ɛɛ, awarɛ, ne ɛkɛ bɛɛni ban Ḍɔɔmyɛ, ɛkɛ bala lieṭi ‘ya a lilti ne tolan ne ‘ya yuarŋata ɛkɛ ɔɔn. 18Ne oŋŋa Yaccu bɛɛdiyɛ, dala Yaccu yomɛ pɔktɛ ɛkɛti. Ɛkɛ ŋeej i ne pwadan, ne ɛkɛ ‘ya maŋŋata te naŋka coŋin ban ɛkkɛ ban Ɛpacacjiy.

will be added

X\