1 Modg ɔɔn, dala ɛkkɛ cɔktɛ Jwaŋa Tolanti te ɔɔn aŋka dala jyek Ciɛggɔn ikin ooddi mati ne pɛñan te war tɛɛn ɔci ma jyeddi ɛkɛti bala ba jiek ne bɛɛki ban ɛkkɛ wanna ɔɔn. Ɔci dala ma jieddi Juaŋ te jyeka neeni. 2 Dala ɛkkɛ cɔktɛ Juaŋti aŋka naa maka yeyin maka wyetkɛn baaw neeni noŋdi ne yaayan ɔɔnti bɛɛ. Ɛkkɛn waakɛnda jyeti Juaŋti men bɛɛ. 3 Yeti Ciɛggɔn ikinyɛ, ɛkɛ a mena tieci jyek ɛkɛ waakɛn. Ɔci ɛkɛyɛ, ɛkkɛ ‘wondɛ war tɛɛno. Ɔci ɛkɛ ɛkkɛ yɔɔdɛ te Jwaŋa Yaayan. 4 Ɔɔn poŋɔn aŋa Juaŋti parɛ gɔkɔn ka Jwaŋa Tolan bala moki ɛkkɛ. Ɔci moki ɔɔn balgɔn poŋɔn ka ɛkkɛ balgɛ noŋɛ ba jyeka ɛkkɛ lalkɛ ɔɔn, ɔci ɛkkɛ balgɛ noŋɛ ba jyeka neeni oŋkanda ɔɔn. 5 Dala ɛkkɛ wɛɛdɛ Jwaŋa Tolan aŋka ɛkkɛ ‘uottɛ ñamu te jyek ɛkɛ aŋka anna ɛkɛ ani ma neeniyɛ, ŋeeddɛ ɛkkɛ ne pwadan aŋka ɛkkɛ yomgɔ tɛya ba yom Kiṭɔ ɔɔn. 6 Gɔṭṭɛ, hay! Modg ɔɔn, ‘ya buaga ɛkkɛ myettin te jwali ṭɔɔlɛ gɛɛl ne cyɛɛlɔ moki te yenti Ciɛggɔn ikin Yaccu Kiṭɔ aŋka naŋdɛ ɛkkɛ. Tieŋdɛ, ‘ya gɔkka ɛkkɛti, maka waakɛn pɛñin te naŋki waak, ɔci maka yookɔn te jyeka loṭɔn ɔɔn ɛkkɛnyɛ, naa ɛkkɛ ñoodi iki ɛkkɛn te coodi bɛɛ. 7 Çeejɛ ɛkkɛ kan ɛkkɛ lɔktɛ ba naŋki ɔɔnyɛ, a ɔɔn pwatcin. Ne ɔɔn balgɔn iki ɛkkɛ ban ɛkkɛyɛ, ɔɔn waakɔ pɛñɔ te naŋki waak bɛɛ. 8 Ɔɔn balgɔn omɔn wak ɛkkɛ budan bɛɛ, yeti ɔɔn balgɔn wɛɛṭɔn oomdin ɔɔn a wyɛlto. Ɔɔn balgɔn kanŋɔn ne tolan te oŋ jiñɛ ɔci te ween jiñɛ aŋka naa coodi ɔɔn ban ɛkkɛ cyɛga ɛkkɛti te jyek waka amtin bɛɛ. 9 Kan ɔɔn gɔktɔn ɛkkɛti ka ɔɔn ‘wondɔntɔ ɛkkɛ oomdinyɛ, a ɔɔn yaayɛ bɛɛ. Yeti ɔɔn kanŋɔn te byeŋkɔ a ɔɔn acaan ɔɔn buagɔn dala ɛkkɛ lɔktɛ ba naŋki ɔɔn neeni. 10 Ne ɔɔn balgɔn iki ɛkkɛ ban ɛkkɛyɛ, ɔɔn gɔŋnɔn ɛkkɛti agi, “Kan men gɛɛl noŋi kanŋa bɛɛyɛ, naa ɛkɛ daŋkun omdi waak bɛɛ.” 11 Ɛɛ, ɔɔn nɔɔtkɔn ma agi ma ɛkkɛ gɛɛg balgi tieci kanŋan ɛkki waakcin bɛɛ. Yeti ɛkkɛn bala cooŋi ñingɛn te gena luarŋ ma waakɛn. 12 Maka noŋi naŋka neeniyɛ, ɔɔn ṭeyɔn ɛkkɛn te yenti Ciɛggɔn ikin Yaccu Kiṭɔ ka dala ɛkkɛn tieci kanŋan ɛkkɛn waakɛn ne pwadan aŋka oomdin ɔci waka pookɛn bala ɛkkɛn byeŋkɛnti daŋkun te kanŋa ɛkkɛn. 13 Ɔci gɔṭṭɛ, hay! Modg ɔɔn, naa ɛkkɛ taabdɛ ɔci mwondɛ te naŋka pwadin bɛɛ. 14 Kan men gɛɛl ɛkkɛti yookɔn te jyeka kiewan ‘ya ɛkkɛti neeniyɛ, dala ɛkkɛ woŋgɔ tiittɛ te ɛkɛ. Naa ɛkkɛ jyeyɛ iki ɛkɛ oŋkanda bɛɛ. A ɔɔnyɛ, ɛkɛ poŋdi te naŋki ɛkɛ naŋka yaayan neeni. 15 Yeti gɔṭṭɛ, naa ɛkkɛ yooktɛ te ɛkɛ bɛɛ. Dala ɛkkɛ ɛkɛ ṭeedɛ ba ṭeena ma ṭeeki modg ɛkkɛn waakɛnda ɔɔn. 16 Dala Ciɛggɔn ikin mena ma ‘wondɛ coodi pwani neeniyɛ, dala ɛkɛ ɛkkɛ ‘wondɛ coodi pwani ɛkɛ oŋkanda te jiek waakɛnda. Dala Ciɛggɔn ikin bala ɛkkɛti waakida. 17 Gena ‘ya Buuluc kiewan jwali ṭɔɔlɛ ne ŋoyɔ neeni te byeŋ ‘ya paru neeni. ‘Ya ñiep ɛkkɛ. Ɔci te jyek ñiebbin neeniyɛ, ɛkkɛn kiewan ‘ya te byeŋ ‘ya aŋka ŋeeddɛ ɛkkɛ worga neeni bɛɛn te ‘yati paru. Naŋki ‘ya bala a ɔɔn oŋkanda worganti. 18 Dala Ciɛggɔn ikin Yaccu Kiṭɔ yomɛ pwada a pwani ɛkkɛti waakida.
