2Tacalunika 1

1Gena ‘ya Buuluc ɔci Cila ɔci Timutawuc, ñiepɔn ɛkkɛ ma kaniica ban Tacalunika neeni. Ɛkkɛ agɛ ma Wey ikin Jwaŋa Tolan ɔci ma Ciɛggɔn ikin Yaccu Kiṭɔ. 2Dala Ciɛggɔn ikin Yaccu Kiṭɔ ɔci Wey ikin Jwaŋa Tolan yomgɛn pwada a pwani ɛkkɛti, ɔci dala ɛkkɛn ɛkkɛ ‘wontɛ coodi pwani ɛkkɛn ɛkkɛ yomgɔti. 3Hay! Modg ɔɔn, Jwaŋa Tolan buagɔn dala ɔɔn gɔktɔn a pwatcin ɛkɛti te ɛkkɛ oŋkanda. Ɔci a ɔɔnyɛ, yɔmjin. Te jyenna ɛkkɛ jyettɛ Juaŋti neeniyɛ, ɛkkɛ yomgɔ tɛya gɔ moki tɛyin ɔɔn. Ɔci moki anna ɛkkɛ oonnɛ yɔtin neeniyɛ, tola gɔ moki toli ɔɔn. 4Ɔɔn balgɔn jieyɔn ɛkkɛ te yoma ñɔyan ma kaniican Juaŋti acaan ɛkkɛ balgɛ yɔdgɛ ne tɛyan ne ma balki noŋki ne yaayan ɛkkɛtiy. Ɔci moki ne taabn pookɛn balki ɛkkɛtiyɛ, ɛkkɛ balgɛ yɔdgɛ ne tɛyan. 5Ne ɛkkɛ yomgɔ pwatki ne taab baali ɛkkɛti men ɔɔnyɛ, ŋeecɔn ma naŋki Juaŋ pwad pwad ne ɛkɛ ɛkkɛ muonɛ bora naŋŋɛ ɛkɛ a ma cyɛgji ɛkɛy. 6Naŋki Jwaŋa Tolan pwad pwad awarɛ. Ne oŋ gɛɛltiyɛ, ɛkɛ jiek kɔɔktɛ maka noŋi ne yaayan ɛkkɛti neeni wyetkɛnti. 7Ne oŋŋa Ciɛggɔn Yaccu bɛɛdiyɛ, taab ɛkkɛ baadi ɔci taab ɔɔn moki baadi. Oŋŋa Yaccu warɛ lɛɛldɛ borayɛ, ɛkɛ bɛya te pɔliji iki malɛɛkan ḍwaŋin ɔci maaño. 8Ɔci te oŋŋa wannayɛ, maka yookɔn waakɛn te jyek Jwaŋa Tolanyɛ, ywobji bɛya ɛkkɛnti te yookɔn ɛkkɛn yookiti waakɛn te tieŋŋin jyeka wonkɛn jyeka pwadin jyek Ciɛggɔn ikin Yaccu Kiṭɔ neeni. 9Ywobji Jwaŋa Tolan neeni bala ɛkkɛnti yuonginda, baadi bɛɛ. Ɔci pɔya ortiti ɛkkɛn Juaŋti bala moki bɛɛ. Ɔci ɛkkɛn naŋki Jwaŋa Tolan naŋka tɛyan naŋka ñyecki ma ɛkɛ neeni yuartan ɛkkɛn moki bɛɛ. Ɛkkɛn ḍakcin doki. 10Ɔci oŋŋa tolan oŋŋa wannayɛ, pwanna pwani ma Juaŋti waakɛnda. Ɔci maka jyeti Juaŋtiyɛ, ne oŋŋa Yaccu bɛɛdiyɛ, ɛkkɛn jieddi ɛkɛ. Ɔci ɛkɛ daŋkunyɛ, jieddi ɛkkɛ te jyenna ɛkkɛ jyettɛ jyeka ɛkkɛ myetkɛ ɔɔn neenitiy. 11Ɔci a ɔŋŋiyɛ, ɔɔn balgɔn cɔkɔn Jwaŋa Tolanti te ɛkkɛ oŋkanda. Ɛkkɛ muonɛ Juaŋ bora ɔci ɔɔn balgɔn cɔkɔn Juaŋti ka dala Juaŋ gɔkti agi ɛkkɛ pwadjɛ. Ɔɔn cɔkɔn Juaŋti ka dala ɛkkɛ magdɛ ɛkɛ te war tɛɛn ɛkɛ te naŋka ɛkkɛ buagɛ naŋdɛ a naŋka pwadan neeni. Acaan ɛkkɛ jyettɛ Juaŋtiyɛ, ɛkkɛ balgɛ kanŋɛ kanŋa pwadan neeni, ɔci ɔɔn cɔkɔn Juaŋti ka dala ɛkkɛ magdɛ ɛkɛ aŋka ɛkkɛ kanŋa neeni cwamdɛ te war tɛɛn ɛkɛ. 12Ɔci naŋka neeniyɛ, ɔɔn cɔkɔn Juaŋti ka dala yenti Ciɛggɔn ikin Yaccu Kiṭɔ tola mati te naŋki ɛkkɛ, ɔci moki ka dala ɛkkɛ pwaddɛ te naŋki ɛkɛ. Naŋka neeni bɛya te ɛkɛti te yom pwani ɛkɛ ikinti, ɔci moki te yom pwani Ciɛggɔn ikin Yaccu Kiṭɔ.

will be added

X\