2Butruc 3

1Maka ana ‘yay, worga kiewan ‘ya ɛkkɛti neeniyɛ, gena worga akki ne yyɛɛwɔ. Ɔci te worgan yaakkɛn neeniyɛ, ‘ya gɔkkan ɛkkɛti ka dala ɛkkɛ poŋdɛ te jyeka guagɛ maka a bɔwan Jwaŋa Tolan te naŋka bɛya ne ŋoyɔy. 2Dala ɛkkɛ poŋdɛ te jyek bɔwan Jwaŋa Tolan jyeka te baaṭi, ɔci te jyek Ciɛggɔn ikin Mena Yuoci ikin neeni. Dala ɛkkɛ poŋdɛ te jyeka guaŋŋɛ ɛkɛ ikinti te tugi ɔɔn Cuudan ɛkɛy. 3Jwalla bala ñamu te jyeka pookɛnyɛ, gɔki agi ne oŋŋa bɛya ne ŋoyɔyɛ, maka lɛɛṭi jyek Jwaŋa Tolan bɛya. Ɔci ɛkkɛn noŋdi ba naŋka yomg ɛkkɛn buagiti ne pɛñan neeni. 4Ɔci ɛkkɛn gɔkti agi, “Ɛkkɛ gɔkɛ agi Yaccu bɛɛdɔ, oŋ ɛkɛ bala wɛnɛ?” Ɔci agi, “Yɔrg ikin ɛkkɛn tuun te baaṭi doki, ɔci naŋka parɛ gɛɛl bɛɛn mati men bɛɛ. Naŋki waakɛnda bala ba bolja oŋŋa Juaŋ okki noon warday.” 5Maka neeni jyeka naŋŋɛ Juaŋ okki ɛkɛ waak neeni ñalɛ a genga bɛɛ. Acaan te baaṭi ma yaayanyɛ, Jwaŋa Tolan gɔkcin te jwali tukɛ agi dala pɔli ɔci ṭɛɛr bala, ɔci ɛkkɛn bala doki. Šɛɛr oonɛ ɛkɛ bora te pietin, ɔci pieg bala te nonk ɛkkɛn. 6Ɔci oŋ gɛɛlti te jyek Juaŋyɛ, ṭɛra wanna jaadɛ piego, ɔci maka bala ciyi ṭɛɛrji i maal jitkɛn waakɛnda ḍakcin. 7Ɔci te jyek Juaŋ mokiyɛ, pɔli ɔci ṭɛɛryɛ, ɛkkɛn bala oŋkanda ɔɔn ne oŋŋa ɛkkɛn amdɛ maañ ɔɔn. Gena oŋŋa Juaŋ noŋdi godan maka yeyinti, oŋŋa ɛkkɛn ḍakti neeni. 8Jwali gɛɛl bala, ɔci naa ɛkkɛ ñingɔ yeya te jwalla neeni bɛɛ! Jwalla neeni gɔki agi Juaŋ poki nink bɛɛ. Oŋ jiñɛ ne cyɛɛlɔyɛ, bala ba bolja yuonga coŋin ɛkɛti ba yuong a alp ne cyɛɛlɔ (1,000) ɔɔn. Ɔci moki yuonga a alp (1,000) neeniyɛ, bala ba bolja oŋ jiñɛ ne cyɛɛlɔ ɛkɛti. 9Ma ɛkkɛ gɛɛg poŋi gɔki agi Ciɛggɔn ikin kwaci te naŋka guaŋŋɛ ɛkɛ agi noŋjɛy. Yeti ɛkɛ kwaci bɛɛ. Ɛkɛ bala poŋi te ɛkkɛ, ɔci kɛɛy ɛkkɛ, acaan ɛkɛ buagɔn naa men gɛɛl ḍakti bɛɛ. Ɛkɛ buagɔn dala ma waakɛnda waakɛn yaltan te naŋki ɛkkɛn naŋka yeyin ɔci bɛya ɛkɛti. 10Yeti ne Ciɛggɔn ikin bɛɛdiyɛ, ɛkɛ bɛya lieda ba mena ɛɛno. Ɔci te oŋŋa wannayɛ, pɔli baadi ɔci joon ɛkɛ tolla tollo. Ɔci waka bala ñaalɔ amdɛ maaño. Ɔci ṭɛɛr ɔci waka bala ṭɛɛr konɛtiyɛ, ɛkkɛn amdɛ maañ waakɛnda daŋkun. 11Acaan waka neeni ḍakti ne baaṭiyɛ, dala ɛkkɛ poŋdɛ te coodi ɛkkɛ! Dala ɛkkɛ ciedɛ ne pwadan. Dala ɛkkɛ ciedɛ te jyek Jwaŋa Tolan oŋkanda. 12Dala ɛkkɛ kɛɛddɛ oŋŋa oŋ Jwaŋa Tolan bɛɛdiy. Ɔci dala ɛkkɛ kandɛ ne pwadan aŋka dala oŋŋa neeni bɛya ne pɛñan. Oŋŋa oŋ Jwaŋa Tolan bɛɛdi neeniyɛ, pɔli kola maañ ɔci waka bala ñaalɔ waakɛnda amdɛ maaño. 13Te Jyeka guaŋŋɛ Juaŋ ikintiyɛ, ikin kɛɛyin oŋŋa pɔlla woonɛ bɛɛdi ɔci ṭɛra woonɛ bɛɛdiy. Ɔci ṭɛra woonɛ neeniyɛ, naŋka pwadin bala pookɛn oŋkanda ɔɔn. 14Maka ana ‘yay, acaan ɛkkɛ kɛɛyɛ naŋka neeniyɛ, dala ɛkkɛ woŋgɔ tiittɛ te yomg ɛkkɛ aŋka dala ɛkkɛ mɔktɛ Jwaŋa Tolan ne ɛkkɛ ciedɛ ne pwadany. Naa gena yaayan gɛɛl mɔktɛ ɛkɛ ɛkkɛti bɛɛ. Ɔci a ɔɔnyɛ, menga yaakinti gɔkti agi gena yaayan gɛɛl bala ɛkkɛti bɛɛ. 15Dala Juaŋ ŋeeddɛ ɛkkɛ ne ɛkɛ loomgɛ tɛɛki ikintiy. Acaan a ɔŋŋiyɛ, pɔya ɛkɛ yuoci ikin bala. A ɔɔnyɛ, bala ba jyeka kiinɛ mod ikin Buuluc ikintiy. Ikin anin Buuluc. Ɛkɛ bala gɔki te jyeka neeni daŋkun te worga kienɛ ɛkɛ ɛkkɛti neeniy. Ɛkɛ bala gɔki jiek te ñing tɛɛn ɛkɛ ‘wonnɛ Juaŋ neeni. 16Ɛkɛ bala gɔki te jyek oŋŋa Yaccu bɛɛdiy. Jyeka kiinɛ ɛkɛ neeniyɛ, jitkɛn gɛɛg tɛy tɛyo. Ɔci jyeka tɛyan neeniyɛ, aktanyɔ ma gɛɛg. Maka noŋi a ɔɔnyɛ, ɛkkɛn jiek ŋeecɔn ne pwadan bɛɛ. Ɛkkɛn ñingɛn tɛy tɛy bɛɛ. Ɔci ɛkkɛn ḍakti te naŋka neeni. Ɛkkɛnyɛ, jyeka kiigin jyeka pookɛn daŋkun aktanyɔ. 17Ɛkkɛ maka ana ‘yay, jiek ŋeejɛ ɛkkɛ doki. Dala ɛkkɛ woŋgɔ tiittɛ aŋka naa ɛkkɛ jyɛttɛ maka yeyin ɔntɔ bɛɛ. Dala ɛkkɛ yɔɔddɛ ne tɛyan. 18Dala ɛkkɛ aŋka ‘uottɛ ñamu te yom pwani Jwaŋa Tolan, ɔci te ŋeejin Ciɛggɔn ikin Yaccu Kiṭɔ ŋeejɛ ɛkkɛ neeni. Ɛkɛ a Mena Yuoci ikin neeni. Dala ma jieddi Yaccu acca ɔci yuonginda ɔɔn ne ṭɛɛr baadi ɔɔn! Amɛɛn.

will be added

X\