2Butruc 2

1Ɔci maka pookɛn gɛɛg te baaṭi maka gɔki amaam agi ɛkkɛn aginti bɔwan Jwaŋa Tolanyɛ, ɛkkɛn gɛɛg bala mati daŋkun. Yeti ɛkkɛn a bɔwan Jwaŋa Tolan woodgɛn bɛɛ, ɛkkɛn a maka jomi jiek budan. Ɔci ma bɛya ɛkkɛti daŋkun, ɔci ɛkkɛn loṭi ma amaam te jyek ɛkkɛn jyeka pookɛn neeni. Jyeka lorki ɛkkɛn ma neeniyɛ, ɛkkɛn lɛɛwi jyek Jwaŋa Tolan jitkɛn. Maka neeniyɛ, ɛkkɛn yookɔn ne pɛñan te Ciɛggɔn ɛkkɛn mena ɛkkɛn wannɛ neeni. Ɔci a ɔɔnyɛ, ywobji bɛya ɛkkɛnti ne pɛñan, ɔci ɛkkɛn ḍakti. 2Maka coŋin bootti ɛkkɛnti, ɔci lɔkti ba naŋki ɛkkɛn naŋki tomi neeni. Ɔci te naŋki maka loṭi ma amaam neeniyɛ, jyeka awarɛ aga ba jyeka budan mati. 3Ɔci acaan yomg ɛkkɛn buagi waak ne tolanyɛ, ɛkkɛn ɛkkɛ naŋtɛ ñin te jyeka jomgin. Te baaṭi jyek ywobja bɛya ɛkkɛnti naŋŋɛ Juaŋ doki agi ɛkki ḍaktɔ. 4Malɛɛkanyɛ, ne ɛkkɛn noŋki nɔjiyɛ, ɛkkɛn dalnɛ Juaŋ te ywobji bɛɛ. Ɛkkɛn yiemnɛ ɛkɛ iñɔ bana maañti. Ɔci ɛkkɛn olnɛ ɛkɛ nona ulan, ɔci ɛkkɛn ciyi aŋan ne oŋŋa godan Jwaŋa Tolan bɛɛdi ɔɔn. 5Ɔci moki maka bala te baaṭi dalnɛ Juaŋ bɛɛ. Gena Nɔwa mena loṭi ma te naŋka pwadiny. Ɛkɛ iki maka pookɛn gɛɛg ne dɔɔyɔ wyetkɛn ne yyɛɛwɔyɛ, ɛkkɛn aŋka yɔɔññɛ Juaŋ te oŋŋa wanna. Tol bɔrda oonɛ Juaŋ ɔci maka yeyin ṭɛɛrji eññɛ ɛkɛ. 6Ban Caduum ɔci ban Gamɔɔra ḍakcin te ywobji Juaŋ moki. Ɛkkɛn ammɛ maaño. Juaŋ noŋi a ɔɔn aŋka dala maka ciyi budan te ɛkɛ poŋdi te naŋki ɛkkɛn. 7Mena pwadan yenti Lutyɛ, aŋka yɔɔññɛ Jwaŋa Tolan. Lut bala wiak yomɛti ne pɛñan te naŋki maka yeyin noŋi tomi neeni. 8Ne Lut baali ciyi ban maka neenitiyɛ, ɛkɛ yomɛ yaayɛ ne pɛñan te naŋka yuarŋɛ ɛkɛ mati ɔci te jyeka tieŋnɛ ɛkɛ te ɛkkɛntiy. Ɛkkɛn bala noŋi ba naŋka yomg ɛkkɛn buagitiy. 9Kan Juaŋ yaakinti naŋka tɛyan neeniyɛ, ɔci ɛkɛ yaakinti ma ɛkɛ magdɛ te taab ɛkkɛn. Ɔci moki ɛkɛ yaakinti ywobji ɛkɛ oldɛ maka yeyinti, ɔci ywobji bala ɛkkɛnti oŋkanda ne oŋŋa godan bɛɛdi ɔɔn. 10Maka ani naŋki tomi maka paŋi ɛkkɛn yiegin te naŋka neeni, ɔci maka yookɔn te jyek Juaŋyɛ, ywobji Juaŋ bɛya ɛkkɛnti ne tolan. Ɛkkɛn buayi menga bɛɛ. Ɛkkɛn noŋi ba yomg ɛkkɛn pookɛn budan. Ɛkkɛn buayi te waaŋi malɛɛkan bala ñaalɔ bɛɛ. 11Maka noŋi a ɔɔnyɛ, war tɛɛn ɛkkɛn tol tol ba war tɛɛn malɛɛkan bɛɛ. Yeti malɛɛkanyɛ, ɛkkɛn wooki jwali gɛɛl Jwaŋa Tolan ñamɛti bɛɛ. 12Maka noŋi ne yaayan neeniyɛ, ɛkkɛn baali ba kulin mwoktan ma ɔci noktan may. Maka neeni bala gɔki ne yaayan te jyeka kwoyɔn ɛkkɛn neeni, ɔci ba leyi ne ḍaktiyɛ, ɔci ɛkkɛn daŋkun ḍakti a ɔɔn. 13Taab dɔɔkti ɛkkɛnti daŋkun ba naŋka naŋi ɛkkɛn yeyin maka pookɛnti wanna. Ɛkkɛn poŋi gɔki agi kan ɛkkɛn ciyinti te coodda milan coodda noŋki ɛkkɛn naŋka yeyin a lɔɔn ma ñomgɛnti oŋkanda neeniyɛ, agi a ɔɔn pwadɔ ɛkkɛnti. Ɔci ɛkkɛn yomgɛn ñɔy ñɔy poŋi agi ɛkkɛn ɛkkɛ naŋŋɛti ñin te naŋki ɛkkɛn neeni. Ɔci nonk iidn yaakɔn ɛkkɛn ne ɛkkɛn balki omi iki ɛkkɛy. Ɛkkɛn yomgɛn ñɔy ñɔy ne ɛkkɛn poŋki te naŋki ɛkkɛn naŋka yeyin, ɔci ne ɛkkɛn ɛkkɛ naŋkɛ ñin neeniy. 14Kan ɛkkɛn jyɛyi iki moongyɛ, paŋi jyek tomi bala ɛkkɛnti doki. Ɔci oŋkanda ɔɔnyɛ, ɛkkɛn bala poŋi te jyek tommo. Ɔci ɛkkɛn maka moong maka ñingɛn tɛyan bɛɛyɛ, maaltan ɔci naŋtan ñino. Oŋkandayɛ, yomg ɛkkɛn buagɔn waka coŋin. Jwaŋa Tolan noŋdi ne yaayan ɛkkɛnti. 15Pɔya pwadan dalji ɛkkɛn. Ɛkkɛn jyetcin ɔntɔ, ɔci ɛkkɛn bala noŋi ba naŋki Balaam kaci Biyɔr. Balaamyɛ, ɛkɛ ani ami bilka bɛya te kanŋa ɛkɛ kanŋa yaayan neeniy. 16Juaŋ bala ṭeyi ɛkɛ te naŋki ɛkɛ naŋka yaayan neeni. Tɔɔrɔnyɛ, ɛkɛ a gena kookinti jieko. Yeti ɛkɛ gɔkcin Balaamti te pwan men baano. Ɔci acaan a ɔŋŋiyɛ, bɔwa neeni naŋka naŋdɛ ɛkɛ te wyeña yaayan neeniyɛ, dalnɛ ɛkɛ doki. 17Maka noŋi ne yaayan neeniyɛ, ɛkkɛn bala ba jiidg ne ɛkkɛn iiki ɔci menga motti pyeg ɛkkɛn moki bɛɛy. Ɔci moki ɛkkɛn bala ba wiew ne eedɛ peedɛ jwami ɔntɔ amaam ɔci etti ñaal gɛɛl yelk jitin bɛɛy. Noon gɛɛl ywaŋŋɛ Juaŋ doki te ɛkkɛn. Gena nona iñɔ nona mielo. 18Ɛkkɛn gɔki jyeka coŋin jyeka budan. Ɔci te naŋki ɛkkɛn naŋki tomiyɛ, maka pookɛn ḍɛɛmdi iñɔ. Gena maka kooyin bora te naŋka yeyintiy. Ɛkkɛn ḍɛɛmdi iñɔ ne pɛñan moki te naŋki maka neeni. 19Maka loṭi ma amaam neeniyɛ, ɛkkɛn gɔki mati agi ɛkkɛn yaakinti noŋi ba yomg ɛkkɛn pookɛn oŋkanda. Yeti maka neeniyɛ, ɛkkɛn a kɛɛnk naŋka yeyin. Kan men gɛɛl buannɛ gengayɛ, ɛkɛ a kɛɛngɔn gena ɛkɛ buannɛ neeni. 20Ciɛggɔn ikin Yaccu Kiṭɔyɛ, ɛkɛ a Mena Yuoci mako. Ɔci kan ma kooyin bora te nɔji ɛkkɛnti te ŋeejin ɛkkɛn Yaccu ŋeeckiti ɔci kan ɛkkɛn dɔɔdi nɔjiti moki ɔci kan ɛkkɛn bwandɛ nɔjja neeniyɛ, coodda ne ŋoyɔ neeni yaayɛ ne tolan te coodi maka jyeti Yaccuti bɛɛy. 21Kan te pɔya pwadan ŋeeckiti ɛkkɛn bɛɛyɛ, a ɔɔn aŋka pwatcin. Kan pɔya pwadan ŋeecɔn ma, ɔci kan ɛkkɛn oŋ ganuun pwadan ganuun ɛkkɛn ‘wonnɛ Juaŋ neeni daltanyɛ, a ɔɔn yaayɛ ne tolan. 22A ɔɔnyɛ, bala ba jwali ṭɔɔlɛ awarɛ jwalla gɔki agi, “Gɔɔŋyɛ, kan ɛkɛ ŋɔktiyɛ, ɛkɛ dɔɔdi waka ŋɔŋnɛ ɛkɛ neeni amdɛ moki.” Ɔci jwalla parɛ gɔki agi, “Kuciyɛ, kan ɛkɛ lwaktan mayɛ, ɛkɛ dɔɔdi cotinti moki ne pɛñan.”

will be added

X\