2Butruc 1

1Gena ‘ya Cimaan Butruc kiewan worga ɛkkɛti neeni. ‘Ya a kɛɛngɔn Yaccu Kiṭɔ, ɔci ‘ya a Cuuda ɛkɛ moki. Ɛkkɛ maka kiegan ‘ya worga nɛ, ɛkkɛ a maka balki jyek jyenna pwadan ba ɔɔny. Ikin balkin jyek jyenna neeni te naŋki Jwaŋ ikin ɔci Yaccu Kiṭɔ Mena Yuoci ikin neeni. Ɛkɛ pwad pwado. 2Ciɛggɔn ikin Yaccuyɛ, dala ɛkɛ ɛkkɛ magdɛ ne tolan yomgɔti. Ɔci dala yom pwani ɛkɛ bala ɛkkɛti ne tolan. Dala naŋka neeni bala ɛkkɛti te ŋeejin ɛkkɛ jyek Juaŋ ŋeejɛ ne pwadan i jyek Yaccu Kiṭɔ Ciɛggɔn ikin daŋkuny. 3Te war tɛɛn Juaŋ ikintiyɛ, ikin yaakinti cietin ne pwadan, ɔci noŋtin ba naŋki ɛkɛ. War tɛɛn ɛkɛ bala ikinti acaan ɛkɛ ŋeecin ikin doki. Ɛkɛ ikin bornin acaan ɛkɛ buagɔn dala ikin pwattin ba ɛkɛ ɔɔn. Ɔci ɛkɛ buagɔn dala war tɛɛn ɛkɛ bala ikinti ne tolan. 4Ikin myennin ɛkɛ te naŋka naŋdɛ ɛkɛ ikintiy. Jyek naŋki ɛkɛ neeniyɛ, pwanna pwani ne tolan hay! Ɔci te jyek ɛkɛ neeniyɛ, ikin yaakinti kootin bora te naŋka yeyinti, naŋka bala iñɔ ṭɛɛrji wɛnniy. Nɔji tol tol iñɔ ṭɛɛrji acaan ma bala noŋi ba naŋka yomg ɛkkɛn buagiti ne pɛñan neeni. Ikin yaakinti kootin bora te naŋka neeniti, acaan ikin ‘wonnin Juaŋ yom ɛkɛ waanɛ ikin yomgɔti. 5Ɛkkɛ jyettɛ Jwaŋa Tolanti doki, ɔci dala ɛkkɛ lieṭɛ naŋka pookɛn naŋka pwadin ne pɛñan daŋkun. Naŋka pookɛn neeniyɛ, gena coodda pwadan ɔci ŋeejjin jiek ŋeettiti ma, 6ɔci muŋŋa ma mwokki waakɛn, ɔci yɔɔdda ma yɔɔtti ne tɛyan, 7ɔci yom pwanna ma yomgɛn pwatki Juaŋti, ɔci yom pwanna ma yomgɛn pwatki maka pookɛnti, ɔci anna ma anki maka pookɛny. 8Naŋka guaŋi ‘ya neeniyɛ, kan ɛkkɛn bala ɛkkɛti ne tolan waakɛnda, ɔci ŋeejin ɛkkɛ Ciɛggɔn ikin Yaccu Kiṭɔ ŋeennɛ neeniyɛ, bala ɛkkɛti budan bɛɛ. Ɛkkɛ aarŋɛ kanŋa Jwaŋa Tolan bɛɛ. Ɔci naŋka pwadan baaw ɛkkɛti bɛɛ. 9Maka naŋka neeni baaw ɛkkɛntiyɛ, ɛkkɛn bala ba maka ñingɛn ulan. Ɛkkɛn yaakinti jiek jitkɛn yuartan ne pwadan bɛɛ. Ɔci ɛkkɛn poŋi te oŋŋa nɔji ɛkkɛn eññɛ Juaŋ ɔntɔ neeni bɛɛ. 10Modg ɔɔn, acaan naŋka neeni bala matiyɛ, dala ɛkkɛ aŋka poŋdɛ te naŋki Juaŋ ne pwadan, acaan dala naŋki Juaŋ ŋeeddɛ ɛkkɛ ne pwadan ne ɛkɛ ɛkkɛ bornɛ ɔci muonɛ boray. Ɔci kan a ɔɔnyɛ, ɛkkɛ ḍɛɛmdɛ iñɔ oŋgati moki bɛɛ. 11Ɔci a ɔŋŋiyɛ, ne oŋŋa ɛkkɛ kaattɛ cyɛgji Ciɛggɔn ikin Yaccu Kiṭɔti bɛɛdiyɛ, ɛkkɛ kaattɛ Juaŋ ne pwadan ban ɛkɛ. Ɔci cyɛgji ɛkɛ neeniyɛ, bala yuonginda ɔɔn. 12Jyeka neeni jitkɛn ŋeejɛ ɛkkɛ ne pwadan, ɔci ɛkkɛ balgɛ yɔdgɛ ne tɛyan te jyeka neeni. Yeti a oŋkiyɛ, ‘ya baal gɔk ɛkkɛti aŋka dala ɛkkɛ poŋdɛ jyeka neeni. 13’Ya poŋ gɔk ka ne ‘ya baala ciya men te wara neeni ɔci kan ‘ya gɔkka ɛkkɛti aŋka naa ɛkkɛ yiedɛ te jyeka neeni bɛɛyɛ, a ɔɔn pwatcin. 14’Ya poŋ a ɔɔn acaan ‘ya myenna Ciɛggɔn ikin Yaccu Kiṭɔ agi oŋŋa ‘ya tuudjɔ cɔɔlnɔ doki. 15Ɛkkɛ myennin ‘ya ne pwadan te jyeka neeni aŋka ne ‘ya baada wɛnniyɛ, ɛkkɛ yaaktɛti poŋdɛ jyeka neeni oŋkanda. 16Ɛkkɛ myennin ‘ya te jyek war tɛɛn Ciɛggɔn ikin Yaccu Kiṭɔ ɔci te jyek bɛɛna ɛkɛ bɛɛdi dɔɔkti iñɔ ṭɛɛrji wɛnniy. Jyeka ɛkkɛ myennin ‘ya neeniyɛ, ɛkkɛn a jyeka budan jyeka naŋŋɔn ɔɔn te ñing tɛɛn ɔɔn bɛɛ. Pwani Yaccu yuarnɔn ɔɔn te woŋgɔ ne ɛkɛ warɛ lɛɛlnɛ bora ba mena tolany. 17Ɔɔn balgɔn i ɛkɛ a cyɛɛlɔ poom wyeñɛti te oŋŋa ɛkɛ naŋŋɛ Wey ɛkkɛn Jwaŋa Tolan ne pwadany. Te oŋŋa wannayɛ, pwan gɔkkin ɛkɛti te ñaalɔ Mena Tolanti agi, “I a Kaci ‘ya Kacca ana ‘yay. ‘Ya yomu pwanna pwani iti.” 18Ɔɔn tieŋnɔn pwana neeni ne ɛkɛ gɔŋni te ñaalɔ pɔliji ne ɔɔn balgɔn poom wyeñɛti iki ɛkɛ a cyɛɛlɔy. 19Çeejɔn ɔɔn jyek bɔwan Jwaŋa Tolan a jyeka awarɛ. Ɔci te naŋka yuarnɔn ɔɔn poom wyeñɛti neeniyɛ, jyek ɛkkɛn ŋeejɔn ɔɔn ne pwadan ‘wota ne ɛkkɛn akki jyeka awarɛy. Dala ɛkkɛ woŋgɔ tiittɛ te jyek bɔwan Jwaŋa Tolan neeni, acaan jyek ɛkkɛn bala ba dyɛka ne nona ulan dyɛgdɛy. Dala ɛkkɛ woŋgɔ tiittɛ te jyeka neeni oŋkanda ne noon bɔɔdi ɔɔn, ɔci moki ne jiek jitkɛn yuartɛji ɛkkɛ ne pwadan ɔɔn. 20Dala ŋeeddɛ ɛkkɛ ne pwadan jyek bɔwan jyeka guagɛ ɛkkɛn te naŋka bɛya ne ŋoyɔ neeniyɛ, jiek jitkɛn neeni ŋeejɛ menga te ñing tɛɛn ɛkɛ parɛ bɛɛ. 21Jyeka guagɛ bɔwan Jwaŋa Tolan te naŋka bɛya ne ŋoyɔ neeniyɛ, guagɛ ɛkkɛn te paŋi ɛkkɛn pookɛn bɛɛ. Ɛkkɛn gɔki ba jyeka guaŋŋɛ Boŋ Jwaŋa Tolan ɛkkɛnti neeni.

will be added

X\