2Yɔhanna 1

1Ɛɛŋo, i a mena muonɛ Juaŋ boray. Gena ‘ya ciɛggɔn kaniica kiey worga iti ɔci kɛɛgin iti daŋkun neeni. Ɛkkɛ a maka ana ‘ya acaan te jyeka bala ikinti a jyeka awarɛ neeniy. ‘Ya an ɛkkɛ paru bɛɛ, maka jyeka awarɛ neeni ŋeecɔnyɛ, ɛkkɛn da ani ɛkkɛ. 2Jyeka awarɛ neeniyɛ, ciyi ikin yomgɔti, ɔci bala ikinti yuonginda ɔɔn. 3Jwaŋa Tolan, ɔci Kaci ɛkɛ Yaccu Kiṭɔyɛ, ɛkkɛn ikin ‘wontin yom pwanno, ɔci ɛkkɛn yomgɛn pɔktan ikinti, ɔci ikin ‘wontin coodi pwanno. Ɛkkɛn ikin ‘wontin waka neeni awarɛ te anna Jwaŋa Tolan ani ikiny. 4’Ya yomu ñɔɔna ñɔɔn ne kɛɛgin i gɛɛg yuarŋa ‘ya balki cieki ne pwadan te jyeka awarɛ ba jyeka ikin myenninti Wey ikin Jwaŋa Tolan agi naŋcin ikiny. 5Hay, ɛɛŋo, ‘ya gɔk iti te jyeka wonkɛn gɛɛg bɛɛ. ‘Ya gɔkka iti te jyeka bala ikinti te ñamu dokiy. Gena jyeka agi ikin ooncin yɔtin pookɔ oŋkanday. 6Kan mena ani Juaŋ awarɛyɛ, ɛkɛ jyek Juaŋ tiidiyɔ oŋkanda. Jyek Juaŋ gɔki agi dala ikin ooncin yɔtin pookɔ. Gena jyeka tieŋnɛ ɛkkɛ te baaṭi neeni, ɔci dala ɛkkɛ noŋdɛ ba jyeka neeni oŋkanda ɔɔn. 7Maka noŋi ma ñingɛn te jyek Juaŋyɛ, ɛkkɛn bala bonk jitin kɔɔna kɔɔnno. Ɛkkɛn gɔki agi Yaccu Kiṭɔ aŋŋi men baan bɛɛ. Kan men gɔki a ɔɔnyɛ, ɛkɛ a mena noŋi ma ñingɛn, ɔci ɛkɛ moki a mena yookɔn te Yaccu Kiṭɔ. 8Dala ɛkkɛ woŋgɔ tiittɛ ne pwadan te waak ɛkkɛ aŋka jyeka laldɔn ɔɔn ɛkkɛti neeni aga jyeka budan bɛɛ. Dala ɛkkɛ woŋgɔ tiittɛ aŋka ne baaṭi Jwaŋa Tolan ɛkkɛ ‘wondɛ waka pwadin te kanŋa ɛkkɛ. 9Kan men gɛɛl loṭi ma te waka loṭi Kiṭɔ ma neeni pookɛn bɛɛyɛ, ɔci kan ɛkɛ jyeka neeni uottɛtiyɛ, Jwaŋa Tolan bala ɛkɛti bɛɛ. Yeti mena loṭi te gena jyeka loṭi Kiṭɔ ma pookɛnyɛ, Wey ikin Jwaŋa Tolan bala ɛkɛti, ɔci Kaci Jwaŋa Tolan da bala ɛkɛti moki. 10Ɔci a ɔŋŋiyɛ, kan mena loṭi ma bɛya on iyɛ, ɔci kan jyek ɛkɛ bala ba jyeka loṭi Yaccu ikin bɛɛyɛ, naa i ɛkɛ kaacca on i bɛɛ, ɔci naa i ɛkɛ ñiiba bɛɛ. 11Kanŋa mena neeniyɛ, yaayɛ. Kan i ɛkɛ ñiibayɛ, bala ba naŋki ɛkkɛ a naŋka ne cyɛɛlɔ yaakkɔ. 12Jiek bala ‘yati kɔɔna kɔɔnno, yeti ‘ya buaga kiewa jyeka neeni waakɛnda bɛɛ. ‘Ya aŋka buaga bɛɛd ban ɛkkɛ, ɔci ikin yɔɔrtin iki i ban ɛkkɛ. Ɔci a ɔŋŋiyɛ, ikin jiɛtin, ɔci jiɛn mila millo. 13Kɛɛgin kow ɛkkɛ mena muonɛ Juaŋ bora neeniyɛ, ñiepi i daŋkun. Bawwin.

will be added

X\