2Kuruntuc 9

1Te waka cuuññɛ ɛkkɛ wanna ‘ya balka gen gɛɛl aŋka ‘ya ɛkkɛ kiegdin worga te ɛkkɛn bɛɛ. 2Acaan bwakta ɛkkɛ buagɛ moki mayɛ, ŋeej ‘ya, ɔci ‘ya noŋ waru te ɛkkɛ ma Macɛdɔɔnyati, ɔci ‘ya gɔkcan agi ɛkkɛ ma Akeeyayɛ, waakɔ ywaŋŋɛ te ywonna ati waayi doki, ɔci bwakta ɛkkɛ buagɛ neeniyɛ, magga ṭyɛllɛyɔ te ɛkkɛnti. 3Acca ‘ya modg ɔɔn cuoñña aŋka naa jiɛta jieyin ɔɔn waakɔ te ɛkkɛ neeni koodi bora aga jyeka budan bɛɛ. Oŋ yeti bala ba guaŋi ‘ya doki, dala waak ɛkkɛ nina a ywaŋgɔn te jyek moowin. 4’Ya buay kan ma Macɛdɔɔnya gɛɛg bɛɛdin i ‘ya, ɔci ɛkkɛ woottɛ ɛkkɛn waakɔ a ywaŋgɔn bɛɛyɛ, ɔɔn nogdɔn lɔɔno, ɔci gɔktɔn te lɔn ɛkkɛ moki bɛɛ, acaan yomg ɔɔn ḍuannɔnti ɛkkɛti doki. 5A ɔŋŋiyɛ, modg ɔɔn gɛɛg cuoññan ‘ya ñamu ɛkkɛti aŋka gɔrti waka limmɛ ɛkkɛ ne baali ḍaaŋŋɛ te limi ba jwalla ḍuaññɛ ɛkkɛy, acaan ‘ya buaga ‘woññin ɛkkɛ neeni aga ‘woññin awarɛ, naa aga ‘woññin mwaji bɛɛ. 6Dala ŋeeddɛ ɛkkɛ, mena duodi pok ne ḍiɛkanyɛ, ɛkɛ yɔɔrdi ne ḍiɛkan daŋkun, ɔci mena duodi ne coŋɔnyɛ, ɛkɛ yɔɔrdi ne coŋɔn daŋkun. 7Dala men da ‘woñi ba yom ɛkɛ. Naa ɛkɛ ‘woñi te yoma baaw bɛɛ, acaan Jwaŋa Tolan yomɛ ñɔɔcin te mena ‘woñi te yoma pwadany. 8Ɔci Jwaŋa Tolan yaakinti ɛkkɛ ‘uottɛti pwani ɛkɛ aŋka ɛkkɛ baltɛ waka ɛkkɛ yɔɔmti oŋkanda ɔci ɛkkɛ ‘uottɛti waak ne coŋɔn nɔñji waakɛnda te naŋka pwadan. 9Bala ba jyeka kiigin worga Juaŋji gɔki agi, “Mena pwadanyɛ, ɛkɛ maka bɔwan ‘wonnɛ waako, ɔci naŋki pwani ɛkɛ bala yuonginda ɔɔn.” 10Ɔci Jwaŋa Tolan mena ‘woñi kookin dɔktan ma, ɔci ‘woñi ma te oomdin, aŋka amtan ɛkkɛn neeniyɛ, ɛkɛ ɛkkɛ daŋkun ‘wondɛ kookin ɛkkɛ buagɛ waakɛnda, ɔci ɛkɛ ɛkkɛn yuoldɛ ñaalɔ ɔci ‘wondɛ ḍɔŋo, ɔci jieda ne pwadan te wak ɛkkɛ waka ‘wonnɛ ɛkkɛ ne coŋɔn neeni. 11Ɔci ɛkɛ ɛkkɛ naŋdɛ agdɛ maka cyɛgan te waak waakɛnda, ɔci maka coŋin gɔkti Juaŋti a pwatcin te waka ‘wonnɛ ɛkkɛ ɛkkɛn, ɔci luulɛ ɛkkɛn te ɔɔnti neeni. 12Acaan naŋki moowin neeniyɛ, maka pwadgin Juaŋ ñamɛti yɔɔmtan pookɛn bɛɛ, yeti ciɛndi ñamu te jwali pwani Juaŋti, gɔ moki ciɛñji ɔɔn. 13Acaan ɛkkɛ waakɔ lɛɛlnɛ bora te kanŋa neeniyɛ, ma waakɛnda gɔkti a pwatcin Juaŋti te jyeni ɛkkɛ, ɔci te naŋka ɛkkɛ noŋɛ ba jyeka wonkɛn jyeka pwadiny, ɔci moki te waka ‘wonnɛ ɛkkɛ ɛkkɛn, ɔci ma waakɛnda mokiy. 14Ne ɛkkɛn balki cɔkki te ɛkkɛyɛ, ɛkkɛn ani ɛkkɛ ne tolan te yom pwani ɛkkɛ ‘wonnɛ Jwaŋa Tolan neeniy. 15Pwatcin ne tolan Juaŋti te ‘woññin ɛkɛ ‘woññin tolan ne yaajan neeni.

will be added

X\