2Kuruntuc 8

1Acca modg ɔɔn, ɔɔn buagɔn dala yom pwani Jwaŋa Tolan yom pwani ‘wonnɛ ɛkɛ ma kaniican ban Macɛdɔɔnya pwadan neeniyɛ, ŋeeddɛ ɛkkɛ. 2Ɛkkɛn bala pɔɔt jitin, oŋ yeti ɛkkɛn yomgɛn ñɔɔni. Ɛkkɛn yomgɛn ñɔɔcin ne tolan ɔci bala ‘woñi waak te yoma pwadan ne ɛkkɛn akki maka bɔwan ɔɔn. 3Gena ŋeej ‘yayɛ, ɛkkɛn yaaŋnɛti ḍɔccin ba waka bala ɛkkɛnti. Ɛkkɛn yaaŋnɛti naŋka neeni ɔci ‘uotkiti te yomg ɛkkɛn. 4Ɔci ɛkkɛn tooccin ɔɔnti oŋkɛn ne coŋɔn te maŋŋa mokɔn Ma Kiṭɔ ban Yahuudiyay. 5Ɔci ɛkkɛn noŋi ne tolan nɔñji naŋka paŋdɔn ɔɔn ‘yeeyɛyɔ, oŋ yeti ɛkkɛn waakɛn ‘woñgi Ciɛggɔn ñamu lakun, ɔci ɛkkɛn waakɛn ‘woñkɔn ɔɔn moki te yom pwani Juaŋo. 6A ɔŋŋi ɔɔn toonnɔn Titucti ka dala ɛkɛ kanŋa neeni cwamdɛ bala ba ne ɛkɛ jɔɔnni te kanŋa yom pwani neeni. 7Ɛkkɛ agɛ maka cyɛgan te waak waakɛnda. Gena jyeni, ɔci jiek, ɔci ŋeejin, ɔci war byerŋ, ɔci anna anɛ ɛkkɛ ɔɔny. Ɔci a ɔŋŋi ɔɔn buagɔn dala ɛkkɛ bwagdɛ kanŋa yom pwani Juaŋ neeni ne tolan. 8’Ya ‘yer ɛkkɛ bɛɛ, yeti ‘ya buaga ani ɛkkɛ poorcati i war byerŋ maka pookɛn aŋka gɔrca ne ani ɛkkɛ agi warɛ boki no. 9Acaan naŋki yom pwani Ciɛggɔn ikin Yaccu Kiṭɔ ŋeejɛ ɛkkɛ, ɛkɛ a mena cyɛgan, yeti ɛkɛ warɛ naŋŋɛ bɔɔn te ɛkkɛ aŋka ɛkkɛ agdɛ maka cyɛgan te bɔɔn ɛkɛ neeni. 10Paŋi ‘yayɛ, bala a ɔŋŋi, dala kanŋa jɔɔnni ɛkkɛ ywoniti neeni cwamdɛ. Gena ɛkkɛ a maka jɔɔtcin te kanŋa neeniy. Dala ɛkkɛ noŋdɛ kanŋa neeni te yom ñɔɔn ɛkkɛ buagɛ noŋɛ kanŋa neeni ba bolja ɛkkɛ jɔɔnnɛ wanna ɔɔn. 11Accayɛ, dala ɛkkɛ kanŋa cwamdɛ aŋka bwakta yomg ɛkkɛ buagi noŋi kanŋa neeni ḍɔtti ne pwadan ne ɛkkɛ kanŋa naŋdiy. Dala ɛkkɛ menga da ‘woñi ba gena bala ɛkɛtiy. 12Kan ɛkkɛ buagɛ ‘woññɛyɛ, Juaŋ waka ‘woññɛ ɛkkɛ neeniyɛ, mugdɛ te waka ‘woññɛ ɛkkɛ neeniti, ga te waka baaw ɛkkɛti neeniti bɛɛ. 13’Ya buaga maka pookɛn woodi ɔci ɛkkɛ aŋka taabdɛ bɛɛ, yeti ne ɛkkɛ balkɛ waak ne coŋɔn te waka neeniyɛ, dala te ɛkkɛ maka baaki waak neeni maŋŋɛ. 14Ne ɛkkɛ baakɛti waak, ɔci ɛkkɛn balkiti waak ne coŋɔnyɛ, ɛkkɛn ɛkkɛ maktɛ. Te naŋka neeniyɛ, ɛkkɛ poṭṭɛ a poṭṭin. 15Bala ba jyeka a kiigin worga Jwaŋa Tolanji ne gɔkki agi, “Mena lyemi ne coŋɔnyɛ, ɛkɛ balki ne coŋɔn nɔñji bɛɛ. Ɔci mena lyemi ne ḍiɛkanyɛ, ɛkɛ balki ne ḍiɛkan nɔñji moki bɛɛ.” 16’Ya gɔk a pwatcin Juaŋti acaan ɛkɛ Tituc ‘wonnɛ bwakti bala ba ne ɔɔn buagɔnti mokɔn ɛkkɛy. 17Acaan ɛkɛ jyeti jyeka ɔɔn toonnɔn ɛkkɛti pookɛn bɛɛ, yeti ɛkɛ buagɔn moki ɛkkɛ te yom ɛkɛ parɛ, ɔci ɛkɛ yomɛ ḍyɛŋŋɛ aŋka bɛya ɛkkɛti aŋan. 18Ɔci ɔɔn menga cuonnɔn i ɛkɛ. Mena neeni kaniican kanŋi ɛkɛyɛ, yomgɛn ñɔɔna a ñɔɔn ɛkɛti te lali ɛkɛ te jyeka wonkɛn. 19Awarɛ, ‘wana neeni mwowwɛ kaniican bora aŋka atɔn i ɔɔn noŋɔn kanŋa ani neeni, ɔci naŋka neeni a pwani Ciɛggɔn, ɔci nɔɔti te bwakta ɔɔn buagɔnti mokɔn ɛkkɛy. 20Ɔci ɔɔn balgɔn tiecɔn woŋgɔ aŋka naa jwalla yaayan gɛɛl bɛya te kanŋa ‘woññin ne coŋɔn kanŋa bala ɔɔn byeŋkɔti neeni bɛɛ. 21Acaan gena ɔɔn buagɔn naŋdɔnyɛ, ɔɔn buagɔn noŋdɔn naŋka pwadin Juaŋ ñamɛti parɛ bɛɛ, yeti ma baan ñomgɛnti daŋkun. 22Mod ɔɔn cuonnɔn ɔɔn i ɛkkɛn. Ɔɔn ɛkɛ pɔɔññɔn oŋki ne coŋɔn, ɔci yuarŋɔn ɔɔn ɛkɛ yomɛ buagɔn moki ma. 23Ɔci Titucyɛ, ɛkɛ a mena ñoowin i ‘ya te kanŋa te ɛkkɛ ɔci maka a modg ikin neeniyɛ, ɛkkɛn a maka cuntan kaniican, ɔci noŋi ba jyek Kiṭɔ. 24A ɔŋŋiyɛ, dala ani ɛkkɛ lɛɛldɛ bora ‘uaya neeniti a ɛkkɛ anɛ ɛkkɛn, ɔci dala kaniican gɔrti ani ɛkkɛ, ɔci ɛkkɛn nɔɔttɛ ɔɔn jieyɔn waakɔ te ɛkkɛ awarɛ.

will be added

X\