2Kuruntuc 7

1Maka ana ‘yay, ne jyeka ikin ḍuaññinti Juaŋ neeni balki ikintiyɛ, dala ikin waakɔ ywaŋtin te bora ne jiju. Ɔci dala ikin pwattin awarɛ te coodda ciyin ikin te bwajja ikin buayin Juaŋy. 2Dala ɛkkɛ yomgɔ pɔktɛ ɔɔnti, ɔɔn dommɔn naŋki mengati bɛɛ, ɔci ɔɔn menga yaaññɔn bɛɛ. Ɔɔn menga naŋŋɔn ñin bɛɛ. 3’Ya gɔk a ɔŋŋi aŋka jiek dɔwwa ɛkkɛ wyetkɔti bɛɛ, acaan ‘ya gɔkkan te ñamu doki, ka ɛkkɛ balgɛ ɔɔn yomgɔti ne ikin tuutin a cyɛɛlɔ ɔɔn, ɔci ne ikin tɛɛttin a cyɛɛlɔ ɔɔn. 4Ɛkkɛ ŋeejin ‘ya yomuti awarɛ. ‘Ya noŋ waru te ɛkkɛ ne tolan. ‘Ya waru wookkan te beelin ɔɔn warda. ‘Ya yomu ñɔɔna ñɔɔn ne tolan. 5Acaan ne oŋŋa ɔɔn bɛɛnɔn ban Macɛdɔɔnya ɔɔnyɛ, ɔɔn waakɔ wooŋnɔn bɛɛ, yeti naŋka yeyin bɛɛn ɔɔnti nonk waakɛnda. Ma bala wɛyyɔn iki ɔɔn, ɔci ɔɔn buayɔn yomgɔti jiju. 6Yeti Jwaŋa Tolan mena mwoni maka waakɛn dɔɔtan iñɔ yomgɛnyɛ, ɔɔn munnɔnji te bɛɛna bɛɛni Titucy. 7Yeti te bɛɛn ɛkɛ parɛ budan bɛɛ, yeti te yom pwani te ɛkkɛti. Ɛkɛ ɔɔn myennɔn te yom yoñ ɛkkɛ, ɔci kuut ɛkkɛ moki, ɔci te bwakta ɛkkɛ buagɛ ‘ya ne tolany. A ɔŋŋiyɛ, yom ñɔɔn ‘ya nɔñji ciɛñjin ñamu ne tolan. 8Kan ‘ya ɛkkɛ yaaññin yomgɔti te worgan cuoññan ‘yayɛ, ‘ya yomu wiakcin bɛɛ. Ɛɛ, ‘ya yomu wiakcin te naŋka neeni ne ḍiɛran, acaan yuarcan ‘ya worgan wanna ɛkkɛ yaakɛ yomgɔti ba wɔɔka ne ḍuulan budan. 9’Ya yomu ñɔɔcin acca men ɔɔn, yeti ‘ya yomu ñɔɔcin acaan ɛkkɛ yomgɔ wiakcin bɛɛ, yeti acaan yom joon ɛkkɛ neeni ɛkkɛ wɛɛññɛ ɔci ɛkkɛ waakɔ yallɛ. Acaan ɛkkɛ yomgɔ wiakcin ne pɛñan ba bolja Jwaŋa Tolan buagɛy, ɔci ga ɛkkɛ yaakɛ ɔɔn te genga bɛɛ. 10Yom joona ba naŋki Juaŋyɛ, ɛkɛ etti yali waakɔ, yalla ikin wɛɛtin yɔɔta ikin yɔɔtinti Juaŋ ɔci ɛkɛ etti yom joon bɛɛ. Yeti yom joona iñɔ baanji wɛnni ɛkɛ etti lieno. 11Gɔrtɛ Juaŋ noŋi gena te yom yoñ ɛkkɛ neeni. Ɛkɛ eccin war byerŋ ɛkkɛti, ɔci eccin bwakti aŋka pwani ɛkkɛ cwamdɛ, ɔci eccin loñko, ɔci bwajjo, ɔci war mwordin, ɔci ani kanŋa. Ɔci eccin jyek wani te naŋka a damgin neeni. Ɔci ɛkkɛ waakɔ lɛɛlnɛ bora aŋka ŋeettan ma ɛkkɛ ḍɔɔggɔ wɔkɔ te naŋka neeniti warda. 12Ne ‘ya kiena worga ɛkkɛtiyɛ, ‘ya kiewan te mena noŋi nɔji wanna bɛɛ, ɔci walla te mena naŋŋɛ ɛkɛ ne yaayan wanna bɛɛ. Yeti ‘ya kieñi te gwalla gɔṭɔn ɔɔn ɛkkɛ ne tolan neeni Ciɛggɔn ñamɛti. 13’Wota te naŋka neeniyɛ, ɔɔn yomgɔ tɛɛn te yom pwani ɛkkɛ, yeti ɔɔn yomgɔ ñɔɔn nɔñji te yom ñɔɔn Tituc, acaan ɛkɛ yomɛ luun ɛkkɛti waakida. 14Ne wona ɛkɛ luoṭṭi te ‘yati wɛnni men bɛɛyɛ, ɛkɛ nɔɔtkɛn ‘ya te naŋka noŋa ‘ya waru te ɛkkɛy, ɔci ɛkkɛ ‘ya poollati yomuti. ‘Ya ɛkkɛ myennin te naŋka awarɛ oŋkanda, ɔci acca naŋka noŋa ‘ya waru te Titucyɛ, aŋi naŋka awarɛ. 15Ɛkɛ ani ɛkkɛ ne tolan ne ɛkɛ poŋdi te naŋka ɛkkɛ noŋɛ ba jyek ɛkɛ ɔci te muŋŋa ɛkkɛ jyek ɛkɛ muŋŋɛ te yoma pwadan yom bwaji ɔci war ḍiediny. 16Acca ‘ya yomu ñɔɔna ñɔɔno. ‘Ya ɛkkɛ ŋeennin ne pwadan.

will be added

X\