2Kuruntuc 6

1Te kanŋa ɔɔn i Jwaŋa Tolanyɛ, ɔɔn toottɔn ɛkkɛti acaan dala yom pwani Jwaŋa Tolan neeni naa mugdɛ ɛkkɛ te kona baaw budan bɛɛ. 2Acaan Jwaŋa Tolan gɔki agi, “‘Ya ɛkkɛ tieŋnin te oŋŋa ‘ya yomu pɔŋna ɛkkɛtiy, ɔci ‘ya ɛkkɛ maŋŋin te oŋ yɔɔto.” ‘Ya ɛkkɛ nɔɔttin, acca Juaŋ yomɛ pɔŋnɛ! Ɔci acca gena oŋŋa Juaŋ yuoci ikin neeni! 3Ɔɔn buagɔn kandɔn ne pwadan aŋka naa menga kanŋa ɔɔn yuartɛ a damgɔn bɛɛ, acaan ɔɔn buagɔn naa menga yɔddɔnyɔ ɔɔn te yuarŋa ɛkɛ Ciɛggɔn yuardɛ bɛɛ. 4Dala ɔɔn waakɔ lɛɛldɔn bora te pɔyi waakɛnda ba kɛɛnk Juaŋ te tiit yomgɔ, ɔci te taabn, ɔci te naŋka pɛñan, ɔci te naŋka bɛya ɔɔnti ne yaayan, 5ɔci te jyepto, ɔci te cigin, ɔci te ywobjo, ɔci te kanŋa pɛñan, ɔci te yuon ween konɛ, ɔci te koño, 6ɔci te yoma giikkɛ baaw mati, ɔci te ŋeejin, ɔci te loomga tɛyan, ɔci te yoma pwadan, ɔci te Boŋ Juaŋo, ɔci te anna awarɛ, 7ɔci te jyeka awarɛ, ɔci te war tɛɛn Juaŋo. Ɔɔn balkɔn naŋka pwadan bala ba byeŋgaaran ɔci kɔɔrñi ɔɔn kɛɛyɔn ɔɔn waakɔ ɔci noŋɔn ɔɔn ṭwaŋo. 8Ma noŋi ɔɔnti ne pwadan, ɔci moki ɔɔn ñaltɔn a genga bɛɛ, ɔci ɔɔn ḍorkɔnyɔ ma, ɔci jiekɔn ma. Ɛkkɛn gɔki agi ɔɔn jomjɔn jieko, oŋ yeti ɔɔn gɔkɔn te jyeka awarɛ. 9Ɔɔn balgɔn ba ne kuokɔnti ma ɔɔn, oŋ yeti ɔɔn ŋeeckɔn mako. Ɔɔn a tuutan, oŋ yeti ɔɔn tɛɛtɔn men. 10Ɔɔn yomgɔ wiak ne tolan, oŋ yeti ɔɔn yomgɔ ñɔyɔ oŋkanda. Ɔɔn aŋŋɔn ba maka bɔwan, oŋ yeti ɔɔn ma naŋŋɔn aŋi maka cyɛgan ne coŋɔn. Ɔci ɔɔn balgɔn ba balkɔnti waak bɛɛ, oŋ yeti ɔɔn balkɔn waak waakɛnda men ɔɔn. 11Hay, ma Kuruntuc! Ɔɔn gɔŋnɔn ɛkkɛti ne pwadan doki, ɔci ɔɔn yomgɔ pɔŋnɔn ɛkkɛti. 12Ɔɔn yomgɔ uullɔn ɛkkɛti bɛɛ. Ɛkkɛ aŋka yomgɔ uullɛ ɔɔnti. 13’Ya gɔkka ɛkkɛti ba kɛɛgin ‘ya, dala ɛkkɛ yomgɔ pɔktɛ ne tolan daŋkun! 14Naa ɛkkɛ ñoodi i maka jyeti Juaŋti bɛɛ neeni te naŋki ɛkkɛn bɛɛ. Naŋka pwadan ñoodi i naŋka yaayan a ɔki? Ɔci nona bɔwan ñoodi i nona a miel a ɔki? 15Kiṭɔ ñoodi i Jwaŋa Yaayanɛ? Ɔci mena jyeti Juaŋti ñoodi i mena ciyi budan te Jyek Juaŋɔ? 16On Juaŋ ona tolan balkɔn jiek gɛɛg i jɔkin yeyin waka maltan ma budan nɛ? Ikin agin on Jwaŋa tɛɛti. Juaŋ gɔki agi, “‘Ya coocca ɛkkɛn jitin ɔci atca bootca ɛkkɛn jitin, ɔci ‘ya agdi Jwaŋ ɛkkɛn ɔci ɛkkɛn aga ma ‘ya. 17A ɔŋŋiyɛ, dala ɛkkɛ koodɛ bora te ɛkkɛnti ɔci ɛkkɛn daldɛ. Naa toptɛ gena yaayan gɛɛlti bɛɛ, ɔci ‘ya ɛkkɛ mugdin. 18’Ya agdi Wey ɛkkɛ ɔci ɛkkɛ agdɛ kɛɛgin ‘ya kɛɛgin a ‘uay ɔci kɛɛgin a moongo. Gena Jwaŋa Yaakinti Naŋki Waakɛnda gɔki a ɔŋŋi neeniy.”

will be added

X\