2Kuruntuc 5

1Acaan ŋeejɔn ɔɔn ne daran ciyɔn ɔɔn iñɔ ṭɛɛrji wɛnni neeni baadiyɛ, ɔɔn balkɔn ona parɛ ñaalɔ pɔliji. Ona neeni cɔnnɛ menga te bieŋɛ bɛɛ, yeti ɛkɛ naŋŋɛ Jwaŋa Tolan, ɔci ɛkɛ baadi bɛɛ. 2Ɔɔn ne ciyɔn te ona iñɔ neeniyɛ, ɔɔn joŋdɔn buagɔn ɛka ñaalɔ pɔliji neeni. 3Ne ɔɔn kwomɔn ona neeni waakɔtiyɛ, ɔɔn coottɔn waakɔ budan moki bɛɛ. 4Acaan ne ɔɔn men balgɔn te daran neenitiyɛ, ɔɔn balgɔn joŋdɔn, ɔci ñokɔn jitkɔ acaan ɔɔn buagɔn coottɔn waakɔ budan bɛɛ, yeti ɔɔn buagɔn ɛɛŋdɔn ɛka ñaalɔ pɔliji neeni. A ɔŋŋiyɛ, wara a tuuta neeni laddɛ tɛɛtin. 5Gena Juaŋ waanɛ ɔɔn ḍuaññɔn te gena neeniy. Ɛkɛ a mena ɔɔn ‘wonnɔn Boŋ Juaŋ bala ba juati waka ḍuaññɛ ɛkɛ ɔɔntiy. 6A ɔŋŋiyɛ, ŋeejɔn ɔɔn ɔci ɔɔn yomgɔ tɛɛcin oŋkanda. Ne ɔɔn balgɔn ciyɔn te war ɔɔn war ma baan menyɛ, ɔɔn balgɔn ɔntɔ ne loonan te Ciɛggɔnti. 7Ɔɔn ciyɔn te jyenno, ga ɔɔn ciyɔn te ñali budan bɛɛ. 8Ɔɔn yomgɔ tɛɛcin ɔci buagɔn ban ɔɔn daldɔn ɔci baldɔn ɔntɔ te waak ɔɔnti, yeti baldɔn iki Ciɛggɔn baanji. 9A ɔŋŋi kan ɔɔn balgɔn baanji walla balgɔn ɔntɔyɛ, ɔɔn poŋɔn te yom pwani ɛkɛ. 10Acaan ikin waakida waakɔ lɛɛltin bora non kaakci godan Yaccu ñamɛti, ɔci ikin waakida menga da yɔɔrdi gena yuardɛ ɛkɛ ba naŋka naŋŋɛ ɛkɛ wona ɛkɛ baali ciyɛ te war ma baan meny, kan a pwani walla yoñ kaapun no. 11Acaan bwajja ɔɔn buayɔn Ciɛggɔn ŋeejɔn ɔɔn ne pwadanyɛ, ɔɔn yaakɔnti ma myettɔn ne pwadan. Juaŋ ɔɔn ŋeejɔn ne pwadan, ɔci ‘ya poŋ ɛkkɛ ‘ya ŋeejati yomgɔti daŋkun. 12Ɔɔn jieyɔn waakɔ ɛkkɛti moki bɛɛ, yeti ɔɔn noŋŋɔn a ɔɔn aŋka ɛkkɛ noŋdɛ waakɔ te ɔɔn aŋka ɛkkɛ yaaktɛti ṭwokti maka noŋi waakɛn te ma ñingɛn budan neeniti. Ɛkkɛn noŋi te yomgɛn bɛɛ. 13Kan ɔɔn wilnɔnyɛ, ɔɔn wilnɔn te Jwaŋa Tolan. Kan ɔɔn aŋŋɔn wiilin bɛɛyɛ, ɔɔn aŋŋɔn wiilin bɛɛ te ɛkkɛ. 14Acaan ani Kiṭɔ ɔɔn kɛɛyɔnyɔyɛ, naŋka neeni pagdɔn ɔɔn a kan mena ne cyɛɛlɔ tuun te maka coŋin waakɛndayɛ, a ɔŋŋi bala ba ma tuun waakɛnda daŋkun. 15Ɔci ɛkɛ tuun te ma waakɛnda, a ɔŋŋi aŋka maka ciyi tɛɛtiyɛ, ɛkkɛn ciyi tɛɛti te waak ɛkkɛn pookɛn moki bɛɛ, yeti ɛkkɛn ciyi te mena tuun te ɛkkɛn ɔci jɔŋŋin ñaalɔ neeni. 16A ɔŋŋi acca ɔci ne ñamu ɔɔnyɛ, ɔɔn menga ŋeejɔn ba paŋi ma baan bɛɛ. Kan ɔɔn Yaccu ŋeennɔn doki ba paŋi ma baanyɛ, ɛkɛ ŋeejɔn ɔɔn acca ba paŋi ma baan moki bɛɛ. 17A ɔŋŋiyɛ, kan menga bala Kiṭɔtiyɛ, ɛkɛ aŋi gena cɔnnɛ Juaŋ woonɛ. Bolja a daan ati bora doki, ɛka woonɛ aŋka bɛɛni. 18Naŋka neeni waakɛnda bɛɛn te Juaŋti mena noŋŋin iki ikin ŋɛy te Yaccu Kiṭɔy. Ɛkɛ ɔɔn ‘wonnɔn kanŋa ŋeewin. 19Juaŋ noŋi ŋɛy iki maka ṭɛɛrji wɛnni waakɛnda te Yaccu Kiṭɔ, ɛkɛ poŋi te nɔji ɛkkɛn moki bɛɛ, ɔci ɛkɛ jwali ŋeewin ḍuannɛ ɔɔnti. 20A ɔŋŋi ɔɔn agɔn cuudan Yaccu. Ɔɔn gɔktɔn ɛkkɛti bala ba gena Kiṭɔ waanɛ gɔkti ɛkkɛti wanna ɔɔn. Ɔɔn gɔktɔn ɛkkɛti te yenti Yaccu ka dala ɛkkɛ ŋeedɛ i Juaŋo. 21Yaccu mena baaki nɔji neeni naŋŋɛ Juaŋ aŋi nɔji te ikin. Oŋ te ñoowin ikin ñoowin iki ɛkɛ neeniyɛ, ikin ñootin iki ɛkɛ te pwani Juaŋo.

will be added

X\