2Kuruntuc 4

1A ɔŋŋi ne kanŋa neeni baali ɔɔnti te yom pwani Jwaŋa Tolanyɛ, ɔɔn yaakɔnti poddɔn bɛɛ. 2Ɔɔn kɛŋnɔn te lɔna niin lieda neeni bɛɛ, ɔci ɔɔn menga dieddɔn ñin bɛɛ, ɔci ɔɔn jomɔn jwali Juaŋ a jomi bɛɛ. Yeti ɔɔn buagɔn ciyɔn ne pwadan aŋka ŋeettan ma waakɛnda ɔɔn ciyɔn ba coodda naŋki Juaŋ naŋka awarɛ lɛɛldɛ bora ɔɔnti Juaŋ ñamɛtiy. 3Yeti kan jwalla oonɔn ɔɔn neeni konɛ ḍiilcinyɛ, ɛkɛ konɛ ḍiilcin aŋa maka ati ooddi ḍakti neeniti pookɛn. 4Jwaŋa Yaayan iñɔ ṭɛɛrji wɛnni maka jyeti Juaŋti bɛɛ neeni uullɛ ñingɛnti aŋka naa ɛkkɛn nona dɛki te jyeka wonkɛn jyeka pwadin te pwani Kiṭɔ neeni yuartan bɛɛ. Kiṭɔ ɛkɛ bala ba bolji Jwaŋa Tolan. 5Acaan ne ɔɔn loṭɔnyɛ, ɔɔn loṭɔn te gena Ciɛggɔn Yaccu, ga ɔɔn loṭɔn ma te waak ɔɔn woodgɔ bɛɛ, yeti ɔɔn loṭɔn ka ɛkɛ a Ciɛggɔn, ɔci waak ɔɔn bala ba maka kanŋan ɛkkɛti te Yaccu Kiṭɔ. 6Acaan gena Jwaŋa Tolan waanɛ gɔki agi, “Dala nona dɛki dɛkti te miel jitin.” Gena ɛkɛ a Jwaŋa mañ ɛkɛ bala dɛki ɔɔn yomgɔti aŋka ɔɔn pwani Jwaŋa Tolan yuartɔn Yaccu Kiṭɔ ñingɛtiy. 7Yeti ɔɔn balkɔn waka ḍuaññɔn ɔɔn a wak booŋ te kullan a lop neeni. Ɛkkɛn nɔɔti a naŋka naŋŋɔn ɔɔn pwadan neeni, naŋŋɔn te waak ɔɔn pookɔ bɛɛ. Yeti naŋka neeni bɛɛn te Juaŋti. 8Ɔɔn yomgɔ wiak te naŋki waakɛnda, yeti genga bɛɛn ɔɔn ḍɔɔggɔti bɛɛ. Ɔɔn waakɔ yiŋnɔn ñaalɔ, gena naŋdɔn ɔɔn gɛɛl yuartɔn bɛɛ, yeti ɔɔn ponnɔn bɛɛ. 9Ɔɔn naŋkɔn ma ne yaayan, yeti ɔɔn dalkɔn ma ɔntɔ bɛɛ. Ɔɔn yiɛpkɔn ma iñɔ, yeti ɔɔn nuonnɔn jitin bɛɛ. 10Ma buagɔn noki ɔɔn budan bala ba lyena ɛkkɛn Yaccu nokkitiy. A ɔŋŋiyɛ, tɛɛtin Yaccu daŋkun warɛ lɛɛldɛ bora waak ɔɔnti. 11Acaan ɔɔn maka a tɛɛtan neeniyɛ, waakɔ ‘wondɔn lien oŋkanda te Yaccu Kiṭɔ aŋka tɛɛtin ɛkɛ warɛ lɛɛldɛ bora ɔɔn waakɔti daŋkun. 12A ɔŋŋiyɛ, lien bala ɔɔnti, yeti tɛɛtin aŋka bala ɛkkɛti. 13Bala ba kiiwɛ ma agi, “‘Ya jyetto, a ɔŋŋiyɛ, ‘ya gɔkcan.” Ɔɔn daŋkun jyettɔn te boŋ jyenna neeni, a ɔŋŋiyɛ, ɔɔn daŋkun gɔkɔn. 14Çeejɔn ɔɔn Jwaŋa Tolan Mena Yaccu jɔɔŋnɛ ñaalɔ te lienti neeni, ɔɔn daŋkun luoldɔn ɛkɛ ñaalɔ iki Yaccu a cyɛɛlɔ, ɔci ɔɔn oodɔn iki ɛkkɛ a cyɛɛlɔ ɛkɛ ñamɛti. 15Naŋka neeni waakɛnda bala te ɛkkɛ aŋka yom pwani Jwaŋa Tolan bala maka coŋinti, ɔci maka coŋin gɔkti a pwatcin, ɔci jieddi Juaŋo. 16A ɔŋŋiyɛ, ɔɔn poddɔn bɛɛ. Kan war ɔɔn wara bora neeni noŋi baadi dokiyɛ, ɛka jiju neeni aga ɛka woonɛ oŋkanda oŋkanda. 17Acaan naŋka bala ikinti puaran ɔci baadi lakun neeniyɛ, ɛkɛ pwani ɔɔn ‘uottiti ne tolan. Naŋka bɛɛn ɔɔnti pɛñan neeni bwandɛ pwanna baadi bɛɛ neeni. 18Ɔɔn gɔṭɔn waka yuartin te waakɛn neeni bɛɛ, yeti ɔɔn gɔṭɔn waka yuartin te waakɛn bɛɛ neeniy. Acaan waka yuartɔn te waakɛn neeniyɛ, ɛkkɛn a waka baadi lakun, yeti waka yuartin te waakɛn bɛɛ neeniyɛ, ɛkkɛn a waka bala yuonginday.

will be added

X\